Zomi Youth Association (ZYA) hong pianzia

Zomi Youth Association (ZYA) hong pianzia – ZYA History

January 17, 2005 in Sia Mangpu (Pastor Peter Khual Lam Mang, Dr. Chin Do Kham naupa) in Kawlpi khua sunga om khangno pawlkhat amau inn (Canaan Land) ah hong kaikhawm in kilawmtatna hunnuam khat zanga ankuang umkhopna kinei hi.

Holimna

An nekkhit ciangin “Mailam Khangnote khantoh nading Holimna,” cih thulupi nei-in ei le ei mel kipulakna le ngaihsut dan genna a paikhawm mimal kimin kinei ciat hi. Tua sungah thusunna pawlkhat genleng;

Sia Peter Khual Lam Mang

Khuasung vengsung khantoh nading bang septuak i sa hiam? I ngahsutna ciat sungkhawm dih ni. Zukham, ankham, guta, sakvak a lamdung a awngawng khongnote bangci leng lamman tunkik thei ding i hiam. Veng sungah lungmuanna leh khantohna a omtheih nading koici bangin ma pangkhawm thei ding i hiam. Fellowship khat beek i nei thei diam. Cih thu sunna hong nei hi.

Pa Ngul Do Tuang

Tu-a Sia Mangpu hong gen thupisa in zong thukim ing. Khatvei naupangte damlo, zan menglua in tualeh ka manglah hilo, ka taklah hilo, hong kihopih hi. No Zomite ommawklua hi uh teh, kipawlna khat nei unla, kipawlkhawm in nasem un, hong kici hi. Kei zong tua dan cih mawk in ka kumpi uh zong gilolua hiven, hong phal ding hiam, ci-in ka dawngkik hi. Tua ciangin tua hong hopih pen in bangmah lauhuailo ding hi, na kipawlna min ding uh, “Lumuhzi Atein,” ci le-uhcin kumpi-in zong hong sang thei mahmah dinga, tua tawh na tampi nasem thei ding uh hi, cih a mangmuhna thu saupitak hong gen hi.

Sia Kham Sian Pau

Zomite pen biakna sungah i omzaw a, Biakna makaite hong makaih dandan pen i mipi paidan khat zong hipah mai hi. Biakna sungah kithutuahna a omlai siah Zomite kithutuak hipah lel hi. Hunkhat ciangin Biakna pawlpi (Denomination) tuamtuam (eg. EBC, AG, Seven Day, RC, etc…) in i kikhen hi. Ahi zongin Zomi atamzaw Tuiphum (Baptist) sungah ki-om in Tuiphum pawlpi cih bangbang Zomite kalsuanzia hipian lai hi. Tu-in ahihleh Tuiphum pawlpi phelthum bang (ZBCM, TBC, ZBC) in kisemnen in Zomite i kithehzak hi. Biakna vai hilel i cih hangin minam kipumkhatna nakpi takin hong kisia hi. Beh i ultung sak-a khua kipawlna thupi sakin ei khua lote neumuh in i thusim kei hi. Beh le phung le khua tawh i kikhen banah biakna vai-in i nu i pate nakpi takin na kisiatlawh uh hi.

A kitawng, a kisel, a kitalkawk i nu i pate amau khangin sabuai khatah vai hong hawm ding uh baih nawnlo kha thei ding hi. Himah leh ei khangnote tuabang bauinate in hong laplo lel-a, kipawlmawhna liang dingin khatlekhat i kikhasiat lawhna a om kei hi. Ei khangnote in Zomi makai i nu i pate kikhasiat-lawhnate uh mangngilh bawlin kipawlkhawm a Zomite kipumkhat nading le khantoh nading mapang in i sepkhawp ding hunta hi. Tuni-in nang le kei bangmah sem loin om leng, banghangin Zomite in Zomi khempeuh ahuam kipawlna neilo hiam, ci’n eima a piangte i mawhsiat mah bangin khangsawnte in zong ei hong mawhsak ding hi, ci’n thu hong sun hi.

Pa Cin Ngaih Suan

Midang Sanggam Mizo, Falam, Khalkha, Kawl, Muslem, etc. te in zong minam kipawlna nei ciat uh a, ei mite in tutan i neihnailoh pen zekailua hang. Lawmte gensateng kicing sa ing. Ahi zongin i kipawlna min in za ahuam theithei ding thupisa ing.

Adangteng

Adangtengin zong mel kipulakna leh thu tomno genna kineikimtek a, Zomi khempeuh a hauithei ding kipawlna khat neih dingin hoih kisa ciat ahih manin kipawlna khat neih dingin thu kikupna kipan hi.

Kipawlna min ding

Vekpi in khangno kipawlna neih ding hoih kisa ahih manin amin ding a naui-a bangin hoih sak ciat kipullak hi.

1) Chin Youth Organization, Zomi Khangno Kipawlna, Chin Hlumuhzi Atein
2) Zomi Khristian Youth Fellowship, Zomi Tapidaw Khangno Kipawlna, Zomi Damah Lunge Atien
3) Zomi Youth Organization, Zomi Khangno Kipawlna, Zomi Lunge Lumuhzi Atien

Tua hunin galkap kumpi khauh mahmah laitak le kithuneihsak mahmah laitak ahih manin kumpi zaktheih ding kipawlna ahih ding zong kithupikup mahmah hi. Kipawlna min ding hong kisung hih a tunga teng nakpitak kikupna kinei hi. “Chin va kicih dingin zong Zopau Zolai zangin Zomite sungah nasem masa ding i hih manin i mipi in hong sang zolo kha ding hi. Minam kipawlna a bawlnuam i hih manin Zomi i cih ding mah dikpen ding hi. En Zomi i cih ciangin Chin bup mah ahuam hi. Nikhat ni ciang tu-a, Zomi a pom thei nailote in zong a pomtheih hun hong tung ding hi.

I kipawlna pen i hihna Zomi tawh kipawl in i nasepna ah minam biakna deidan loin na hoih sepna tawh Zomi tawisang ding hi hang. A kikhenthang/tamkham Zomite gawmkik in kipumkhatna tawh a khangto saknuam i hih manin Zomi’ min lo tawh kipawl ding hi theilo hi. Bektham loin minam kipawl nading ahih manin Khristian a hilo Zomite zong hong kipawl theih nadingin Khristian heldah ni. Zomi 95% bang Khristian i hih manin makai a tamzaw zong Khristian pan hong hi den ding a, Pasian deihna bangin kimakaih in kikalsuan lel ding hi,” cihna tawh ZOMI YOUTH ORGANIZATION, ZYO (Zomi Khangno Kipawlna) cih dingin vekpi kithukim hi.

Makai le Nasep dingte

Kipawlna min dingin ZOMI YOUTH ORGANIZATION (ZYO) a kithukim khit ciangin makai ding zong kitelpah hi. January 30, 2005 (Sunday) ni-in Zomi Conference khat sam in Zomi sungah nu le pa, muanlesuan a om thei teng kaikhawm ding hanga, “Zomi Khangnote Khantoh nang Ngaihsut ngetna,” cih thulu tawh thusunna nei ding hi hang. Tua ni a i sap, hong paikhawm nu le pa, muanlesuante in hong cih bangbang uh mang ding hi hang. ZYO kullo a cih uhlezong mang ding hanga, panmun bawlpha ding hong cih uhle zong mang ding hi hang. Tua ni ciangin tua mun pana kivaihawm bangbang mang ding hi hang, cih thupukna kinei hi. ZYO Secretary masa Pa Cin Ngaih Suan in Meeting thuciaptehna ah;

“Pa Khual Lam Mang (Canaan Land) in a it teng leh a ngaih teng tawh ankuang umkhawm in mimal khat ciat muhna thute, kumkhawm le ngaikhawm in mi khatciat in introduce nate nei-in, tua panin hong pai khat ciat in minam itna veina ciat tawh Khangno Kipawlna nei leng, ci-in gelna le thukimna kinei-in, tua pan kikumto lai-in kipsakna kinei a amin dingin ZYO ci ni ci-in kilungkim ciat hi. Kipsak nangin Pa Khan Za Nang in thungetna nei hi.

Zomi Conference sapna

Gelna om mah bangin January 31, 2005 ni-in Pa Vungh Lian Thang inn ah Conference kisam in Zomi makai muanlesuan mi 50 kim hong kah thei hi.

Zomi Conference pan thupukna

Hibang a thusungte hitaleh hong paikhawm a kuamahpeuh in ZYA neih ding thupi sa-in thukim ciat uh ahih manin a nuai-a bang khensatna kibawl hi.

Kipawlna min : Zopau in – Zomi Khangno Kipawlna
Mangpau in : Zomi Youth Association
Kawlpau in : Zomi hlunge Hlumuhzi Atin
Ngimna : Hlumuhzi Utichiat 4 zat

Thu bullet : Kalsuan zia ding leh thubullet ding EC in hong gel ding, i gensa, “hih kipawlna pen dongta kipawlna bek hi ding, kumpi Hausa upa tawh khut kilen in nasem ding, party politic tawh kimemat lo ding,” cih a kipan ahoih thei pen dingin hong gel ding.

Panmun: Panmun pen ahi bangin kipsuak ding, cih thu pukna le Zomite adingin Zomi Khangno Kipawlna kipsakna kinei hi.