Zomi te leh UN ~ Lamhkim Samte

Zomi te leh UN ~ Lamhkim Samte

Abeisa hun in Zomi te leh Kawlgam minam tuamtuam te UN in refugees in hong ciamteh uh aa , ahizong 2019 kum beiciang Zomi te UN tawh kisai nawnlo ding, refugee omnawn loding cih pen UN zumpi Geneva pan tang ko khin hi. A hangin a nuai nam 3 te hang a hihi.

1. Hun ki kheel

A bei sa hun leh 2010-2015 Democracy system ki tel hun in galkap lam te in mun hong gah man in , Zomi te refugee din mun hong puak in , gam 3 na ki tung thei hi. A hi zong 2015 ki teel kik ciang in, Democracy min pua a hi NLD leh ZCD in Chin State bup ah zawh na leh kumpi sep theih na za hong neih ciang in refugee cih pen ngaih sut bek in zong piang thei nawn lo aa, Mipi deih teel Democracy Party te’n hong ngah bek tham lo, ZCD pan in Pu Pau Lun in Social Department ah mun hong ngah tak ciang in, khem theih hi nawn lo in, Democracy tawh ki kal suan ta cih leitung bup ii muh theih a hih man in Zomi te leh UN a bei na nam 1 a hihi.

2. UN U Lian te Chin State ah va pai ngiat

Geneva pek pan in UN U Lian te Chin State ah vapai ngiat in, va en uh aa, gam sung daih na om ta cih mu a hih man in kheem theih hi nawn lo a hih man in, Zomi te leh UN a bei na nam 2 na a hihi.

3 . CNF te Suaih kaih na

Chin State (Zogam) ah galkap te hong tha hat toh na leh hong buluh toh na tawh ki zui in mipi haksat na te hang in UN te in refugee in hong koih thei na hang pen CNF te hong pian man in, case tuamtuam tawh UN ki lut thei hi. A hi zong CNF te pen Kumpi tawh ki lem na hong bawl in, General Secretary Salai Lian Hmung na ngawn Myanmar Peace Centre ah makai pi in hong om ta a hih man in, Chin State ah gal le sa om nawn lo hi ci in, thu ngaih sun thei khat na gawn in, ngaih sut theih hi ta a hih man in, Zomi te leh UN ki zop na pen hong bei na a hang zong hih thu a hihi.

Tua a hih man in gam 3 na tung khin te a hi zong, gam 2 na om te a hi zong , CNF leh Gal kap Kumpi te tung lung damh ding hi zaw aa, UN hong bei na pen Democracy Min pua NLD leh ZCD in Kumpi hong sep ciang in UN a bei hi zaw hi cih ii muh theih ding ki samh hi.

A tawp na ah Koi mun koi mun ah ki pawl khawm in lung pho na ii neih hang, a tung aa thu 3 teng pen siang tak in ki tel a hih man in, bang mah hong petlet nawn lo ding hi. A hi zong Zomi te pen Pasian gel na sung ah a kal suan te ii hih man in, Pasian in ei aa ding a hoih zaw hong gel sak ding hi cih kei muh na hi. Lamhkim Samte (BA History, Myanmar, Cert lV Community Services, Australia)