Zomi Tangthu tomcing (Zomi concise history) ~ Pau Do Lian

Zomi Tangthu tomcing (Zomi concise history) ~ Pau Do Lian

Tulai Zo/Zomi cihte tawhkisai alunglut huailaitak ahihlam kuamah dotkul lo in ihthei zota a, Zomi mawbang maw cih ihtel samhang alunghiang lai khawng omleh kilawm kasa hi. Ih uta utkeizong in eihih nakikhel theikei mahtaleh hihbang in ihpulakciang in eitheihbek hilo midangtezong hongtheihpihding uhi. Ih hihna ahihsam hang hongkiciap tehlohciang hamphatna leh lemlohna dingte tampitak kisumthei hi. Gentehna in tulaitak Hakha te minampuan a, azat uhpen ataktak in hihpuan namngiatpen hongkipat khiatna Zotungte kiangpan hi ahizongin Zotungte sangin khua namu masazaw uh ahihman in kami nampuan uh ciñ azatkhit ciang, amau a hongsuak lel hi. Zotungte innkuan khat Akron, Ohio a kahawh lai in teltak in honggen uhi. Hihpen thukhat ci ni- ihgen nop pipen Zomi vai hizaw hi.

Tulaitak ihphutkhakthu Zomi issue pen athupi mahmah khat hi a tangthu (history) zong ahihi. Abeisa in Kawlkumpi minamneu tecih leh minam vatmai nopna tawh gentheihna atuamtuam omahih man in ihihna takpizong mihongtheihpihlo nahi mawk ahihman in mailam hun ah ihtu ihta te minamtawh buailo a ihkoih zawhna ding eitulai siamsinte tungah kinga hi.

Zo/Jo/Shuo/Zhou tangthu

Ihdeih leh deihloh tawhkisai lo in gamvaite ah tangthu in thuhong khendinghi. Atung a laimal gawmpen anagelh masaten amau awkaih (phonetic usage) tawh nagelh uh ahih man in kilamdan na ompeuhmah lo hi. Eimi sung mahmah ahzong Cin=Chin, Ciang=Kyiang, Khup=Cope, omlai, tuabang in kigelh thei lel hi.

Zou/Zo minam tepen Tibeto-Mongoloid pan hongkipankhia- Zomi,Mizo, Kuki etc te tawh phungkhatsuan hi. Hih Zo innkuante Chin Hill Myanmar leh Manipur India teng ah khuasakhia uhi. Gam keekte gelhna leh ciaptehna te-ah Yo/Jou cihbang inzong kimu thei kawikawi hi. Fan-Cho in Tang dynasty China ah diplomat aseplai AD 862 in Chindwin valley(zang) thu agelhna ah tua(Chindwin) a om ukpi tepen Zo, Shou or Zhou mite hi ci in naciamteh hi.

Tuaban ah adik pen leh a madawk pen telak ah Rev. Fr. Vincentious Sangermano (Catholic Missionary) in AD-1835 in Latin laitawh Zos/Zous in gelhngei a, hihpen amasa pen leh adekpen ding in ki muangmawh hi. Hih Latin laibu William Tandy in Rome khuapan mah in Latin pan Manglai tawh na letkik hi.

Kawlgam sunga teng minam te ahgelh na ah hihbang in ci hi. Burma gamsung ateng minam tepen phungkhat guikhatpan piang hilo, minamkhat pan zonghilo- kigawmtuah mite hi uhi. Amaute puansilh, kampau, ngeina tezong kilam dang mahmah hi. Burmese minamte Ava(Innwa) pan Pie (Pyi) or Prom sungteng ah busa uha, Minam thahat nihna tepen Pegu (Peguan) te-in Ava atengte kampautawh zong kibanglo uhi. Negraglia tuikulhpan Siam ukpisung (empirer)ciangdong nateng uhi. Athum nate pen Aracan uksungna sunga ommi te hi uhi. Amau tepen Arakan or Aracan in kithei hi. Akampau, a khuasakzia te uh Ava leh Pegu mite tawh kibang vetlo uhi.

Negraglia gal ah mualkhat omin tua in Aracan leh Burmese te gamkhen na hipah a tuamual tungteng ah a omte Chien (Chin acihna hiding hi) kici a akam pau uh tumdang bekthamlo apuansilh ziate leh numei ten amaivua tattoo abawl mahlamdang kasa pen hi ci hi. ´Southern Chin lamte acih na hingel hi tudongphial mah tualam a om numeiten´amaivuah tattoo kimu thei lai hi.

Tua Chien Mual akicih na nisuah nalam ah Jo (Zo) kici minam omhi ci hi. China Tang dynasty a kigelh naleh Rev. Fr Sangermano tegelh laipek in Zo tawh hoihtak in Laibusung ah ki-at khin mawk ahih man in leh American Missionaries te Zogam mualtung hongtun mapek vua agelhna te uh ih-et ciang reference muanhuai mahmah ihnei a ei utman zong hilo utloh man akilai theiding zong hilo hi cih hong hawmsawn nuam ing.jeffreypaudolian

Thukhupna

Tulai siamsin khangnote hanciam ni-tulai tak eileh eisung nangawn ah ihtel phatloh napen adang hilo hi thunih hanghi- 1) Ih hihna pulaktheih hun ahihman in eimi sungah akhanglo kawmkawm zong a om man hi 2) Nidanglai/ Zomi history pen laibu tawh ki publish tawm mahmah ahihman in mi hongdot ciang ihlah ding amuzolo zong ki-om lai hi, tu hunciang kamtawh (oral record) tawhlah hithei taktak nawnlo hi. Lunglut kahih man in kongkup pihpongmawk hi, kicinglo ding ahihman in tangthu (historical fact) tawh ihlah zawhziahziah nading hongbehlap lai-un.

Pau Do Lian
Boston