Zomi sungah apahtaak huai mite ~ Thawn Tuang

Zomi sungah apahtaak huai mite ~ Thawn Tuang

A pilna uh hi masa lo in Gam le minam adingin a sepna uh ih muh ciangin Pahtaak Huai sa mahmah ka hih manin tawmkhat kaikhawm in kong gelhsuk hi.

1. Pu Thawng Za Khup (Saizang khua)

Hausa kum 28 sung semin Zomi sungah a sawtsempen hikha ding hi.(1928-1951, 1956-1961). Hausa asepin kum 23 phapan hi. Pinglong Agreement ah Letmatthuh (singnatory) khat mahin ki hel hi.

2. Pu Col Dal Za Kam (Saizang khua)

Zosuan sung pan Colonel a ngah masa penpa hi. Kum 33 a phak 1948 kumin Colonel ngah hi.

3. Pu Col. Khen Za Moong (Muizawl khua)

Zosuan sung pan Millatary Attache a sem masa pen hi. Kum 34 a phak in 1940 in Colonel za tawh Millatary Attache sem hi. State Councellor za dong ngahto hi. Zomi sungah Nam Puannak, Puanten, Niikdial khephiau leh Thansuah Dailkhai (Chin National Dress, Flag and Emblem) a bawl khia pa hi.

4. Pu Major Genenal Tuang Za Khai (Khuasak khua)

Zosuan sungpan galkap mang a za lianpen Major General 1984 kumin ngah hi.

5. Pu Lt.Col Pau Khan Thang (Muizawl khua)

Zosuan sungpan Galkap vanleng hawl masa pen pa hi. Kawlgam Galdona lian major operations ahi Naganaing, Bayinnaung, Yangyiaung, Aungmargah le adang vangleng tawh galsim in ki hel hi. Vanleng tawh 5 vei a kiat hangin Topa in a mah keemden hi.

6. Pu Dr. Vum Kho Hau (Thuklai khua)

Zosuan sungapn Ambassador (Tongciin pa Gam pa laipa) a sem masa pen hi. Kum 35 a phak in Ambassador semta hi. Kum 55 a phak in Charles University, Prague, Czenchoslovakia panin Ph.D ngah hi.

7. Menzi Pu Thawng Cin Thang (Saizang khua)

Kum 32 a phak in Secretary za ngah in kum 44 a phak in Menzi ngah hi. Ama hunsungin Zothau, licence tampi pia khia pen hi. Zogamah thau kikhawm kikding a kicihlai ama huutna hangin ki kaikhawm nawnlo hi.

8. Pu Dr. Hau Za Cin Pau (Anlang khua)

Zosuan sungpan Matric(1930) in ong/zo masa pen leh Siavuan masa pen hipah hi. Tapa 2 leh tanu 7 nei-in a vekpi mah un degree (graduate) ngah ciat uh hi.

9. Pu Dr. Chin Do Kham (Saipimual khua)

Zosuan sungpan D.Min; D.D; Ph.D ci-in Doctorate thuapthum a ngah masa penpa hi. Leitungbup Zomi Inn Kuan ( LZI) ah makaipi sem hi.

10. Pu. Rev Khup Za Go (Murlen khua)

Tedim Laisiangtho hong pian khiatna, Tedim pau leh laikhantohna Thu, Zomi Nam tawh kisai Thu, Chriatianity in Chiland, A Critical Historical Study of Bible Transiations Aong te Zo People In North East India, Leivui Pan In cih bang laibu tampi tak hong bawlkhia hi. Indonesia, Germany, Uk leh USA gam tuamtuam ah Laibusaal ah Zomite’tangthu kanin Zomi a vei mahmah mikhat leh a lamsang mikhat ahihi. Zo Chornicles a bawl zo nailo deuh in Topa kiang hong ciahsan hi.

11. Pu Rev.Dr. Kam Khaw Thang B.Th, FDCS (Tuithang khua)

Khristian Piakna Laite (Translator) sawt sempen hi. Lai Siangtho bup a lui le a thak 1982 kumin hong tei khiatsak hi.

12. Pu Dr. Dal Lian Haokip, Ph.D (Tonzang khua)

Zomi sungah Englist – Zomi Dictionary tuhun laitak in a kicing pendingin a ki lam-en Laibu hoih mahmah khat hong bawlkhia pa hi. 1983-1986 sung, Ph.D. sina a om sungin Mrs. Ellen G. White ii gelh The Patriarchs and Prophets kici laimal 800 vaal a pha khat Zokam in teikhia hi. 1992 kumin Tedim Chin- English Dictionary (244) kici laibu khat bawla, kum nih nungin Zomite’Taangthute(248) a kici laibu dang khat bawl leuleu hi. Amahpen Lamka a Founder Principal, Blue Star Academy, Churachandpur, Manipur, INDIA neihpa hi.

13. Pu H.Kam Pum (Phunon khua)

Galkap sungpan a pensen zawhteh Pasian thu laitei te leh sangkah tuah in a khan kum 65 a phak 1999 kumin Master of Christian Studies ( M.C.S) ngah hi. Kum 70 a phak ciangin M.A ( Theology) lawk sawm cihthu kiza hi.

14. Pu Awn Lam (Hanship), Pu Song Theu (Kaptel), Pu Thang Tuan (Mualpi), Lt.Col. Lian Cin Zam (Mualbem), Pu

Neng Za Cin (Lamka) leh Pu S.T.Hau Go (Ngennung) te pen Zosuan sung pan khuak manlang, thugeel le ngaihsut siam, thuciin le ciapteh siam hi a, a Kawl, a Zo in amau sanciat uhah zaktak uh hi.

Hih a tunga tenglo gelhding tampi om lai hi. Zomi sungah Gamthu le la ah nasep pahtak huai mi tampi om lai hi. A min le khua cihte manlo, a zaminte manlo aomleh nong theihsak kikna dingin kong thum phapha hi.
Etkhak laibu; Zolus Journal No. 17, 2003, Zolus Journal No. 3, 1998, Leivui Pan In 2005, The New English-Zomi Dictionary 2006. A kaikhawm, Thawn Tuang