Zomi or Chin ~ Thang Khua Kai

Zomi or Chin ~ Thang Khua Kai

Mihing in I pian nak leh minam min khat ciat I nei pah aa, tua I khan’pih minam in nakpi in I khuamuhna leh I pilna ding tampi ong tawn sawn or hong khak tan thei hi. Minam khempeuh in amau minam hihna kisak theih pih ciat aa, hoihsa diak se uh hi. Ei Zomi te zong mi’n bangbang in hongmu zongin, tua I Zomi hihna sungah ki lungkim mahmah aa, zong I omom na ah I kizuan kipawlna a tuamtuam nei in kimu kiho leng nakpi in nuam kisa hi.

Tua minam I cihcih ii a zung bulpi pen keima muhna ah ‘kampau’ in hong len pen aa, hong pumkhat sak zo pen sa ing. Pa U nau or Nu U nau tiltel nangawn, amau kawlpau bek pau thei in ei lah Zo pau bek pau thei leng, kizop theih a om loh banah tua Zopau tawh kipawl khopna mun nangawn ah nuamsa zolo bek tham lo in, I minam itna lungtang taktak tam neih zolo zawdeuh pah se uh hi.

Mangpau a siam khat in Mang te sungah kihel ding nuamsa pah se uh aa, a pau a theih hetloh French (Piantit) khat sang tua mangpau a siam Zomi khat pen mangkang pa mah tawh hong kipawl thei zaw hamtang se ding hi. Pau in I minam thupitna honglak sa pen ing. Pau tangzai a nei te hampha kasa mahmah aa, mi tampi ii zat pau a nei te pen minam pi hong suak to uh hi. Minam pi I cih ciangin, 1948 Kawlgam in suahtakna I ngah hun laitak in Kawl te leh Kayin te pen a mipum uh leh a pau zanguh kitam khiah luat lo zah in kikim phial uh hi. Ai zongin tu hunah Kawlte pen Kawlgam minam bup ii 70% valah hongkah to mawk hi. Bang hang hiam cih leh minam neuneu Asho, Yaw, Pyu, cih bang leh ei a dang teng mahmah zong a mau pianpih pau mangngilh or nusia in kawlpau bek zang ta mawk ahih manun, kawlmi suak mang to mawk uh hi. Tua minam neuneu teng hangin Kawlpau tangzai hanhan mawk aa, nakpi in a pau zang mi khang to semsem ahih manin a mau pen minam picing te hongsuak to mawk uh hi.

Khat gen lai ni. Tuma kum 100 hun lai in, Mizo state ah minam tampi teng uh aa, a diakdiak in tua te sung panin Lushei khua leh paihte khua pen ki kim phial dingin kigen mawk hi. Tua bek tham lo in Mara te tam mahmah uh aa, Thadou Kuki te zong tam mahmah uh hi. A vekin a thahat zaw kuamah omlo zah dongin minam kikim nam 4 bang om sung panin “Lushei” te pen pawl huai siamin, a pau uh a tangzai nang ham ciam uh aa, politics lam hongsiam manin

tu hun laitak in Mizo State ah Lushei pau pen a vekun theikim leh zang kim thei uh aa, a dang teng tungah nampi te hongsuak uh hi.

England te’n a gamkeek hun lai un, a gamkeekna mite mawk sim mawh ngawp lo uh aa, England pau mun khempeuh ah a kizelh zawh na dingin a tu’ntu’nna mah vuah sang phuat sakin, a pau uh, a philosophy, a culture uh minam khempeuh tung’ hilh in pantah uh ahih manin gamneu kiukiau England pau pen leitung pau suak mawk hi. Tua hunin Japan te’n zong gamkeek aa, amau a pau a culture uh mihilh in pantah cih gen loh sim mawh gawp lai uh ahih manin a mau gamkeekna in Japan khangthak te a ding bangmah phattuamna tu’npih lo aa, ai zongin English khangthak te a dingin a mau pen leitungah minam pa pen hongsuak mawk uh hi. Mangpau leh a mau pilna na theih kei leh nang pen mi bang lo zah dongin ki om hi banghang hiam cih leh a mau tua ding ngimna nei khol uh hi. Tua mangpau tangzaina dingin a tha a gal uh leh a neihsa uh tampi piakhia ngam mawk uh hi.

Zomi te tu laitak Tedim, Falam, Khalkha en suk leng I population I et ciang Tedim gam ah population tam pen thamtham aa, Kawlpi leh Tamu dung sukah zong Tedim gam leh Tonzang gam pan a lal suk kitam pen ahih manin Tedim – Tonzang mite pen a dang Khalkha, Falam te sang ki tamzaw thamtham cih pen mit muh ahi hi. Cope Topa Tedim ah Zolai hilh ding hong kipat in Falam pau I cih “Laizo” pau a zang pen Falam Township sung nangawn ah kizang kim thei lo hi. Banghang hiam cih leh Ngawn te’n tua laizo pau thei lo aa, Zanggiat te’n zong pau thei lo, Khualsim te’n zong pau thei lo ahih manin Cope topa’n tua kam pen zat nang toi sa lua hi.

Hakha township en leng a mau zong Senthang, Zotung, Zophei, Lautu, Maram cih mah pau ki nak lamdang mahmah uh aa, zattang dingin toisa napi’n Falam pau sang tawm tangzai sa zaw hi. Tedim gam hongtu’n ciangin I pau I aw luanzia hong muh ciang Tedim gambup leh Tonzang gambup in tua Tedim pau kamphen kullo in I kiho theih lam hongmuh ciang aw hi pau kanin a tangzai zaw om ke’n teh ci in hun khat ni ciang Chin buppi ii common languages pi suak hamtang ding cih lametna tawh tha lawp takin lai hong bawl sak in laisiangtho bu zong hong bawl sak pah hi. Laipian Pau Cin Hau lai tawh lungdamna Luke zong zo man aa, ai zong a laimal tam lua lawmlawm ahih manin zat suak theih dingin mu lo aa, tua I zat Latin alphabet Zolai dingin hong bawl sak suak hi.

Ahi zongin I nau Falam, Khalkha te in kipum khat thei uh aa, Falam gambup pau dingin ‘Laizo’ pau kipsakin lai lam kipawlna ah a vekun kihel kim uh hi. Khalkha te zong Thantlang leh Matupi te a lai kipawlna vuah kigawmin ki pumkhat uh hi. Ei pau kibang teng penpen TEdim leh Tonzang gam teng ee, ZCLS I neih sunsun ah Zo, Sihzang, Thadou te hong ki hel loh banah innteek tang zo lo zah dong dingin I ki huaina om lo aa, ei ki khenkhen hi hang. Nidang in Ngawn te bang Ciimnuai pan aa, piang ahih manun eimi sungah kihel nuam hi mah leh no ngawn te cii’n I sim mawh zanzan aa, eimi te pen minam lungsim nei thei mahmah tei napi hangin

thukhualna leh I pau tangzai na dingin ki makaihna lam tawm lua ahih manin I pau khang lo in kiam lo in tua dinmun ah ki om lai hi.

Falam, Lushei te’n a numei te un mi namdang tawh a kiten uh leh a tate a pasal pau zong thei sak uh aa, a mau pau zong siam sak mahmah zo veve uh hi. Numei te’n I pau keek zo mahmah uh aa, tua manin Zomi numei te’n I pau I keek nang leh I tangzai sak nang nakpi in thupi ding hi. Ei pen Pa dinmun thukhualna tawh a la ding te leh I nau I Chin pih te huai ding I hi aa, ai zongin tu ciangah ei leh ei nangawn a kisai liapliap te Ihi hi. Tua manin I kilem kei aa, I pau I khual kei leh hun khat ni ciang nidangin Mizo state ah Tedim mite tam mahmah ngei cih dan bek Ihih khak ding ka pautau mahmah hi.

I pau leh I tang thu tawmcik et dingin kong ngelh hi. Tu’n aa I pau Tedim pau pen Tedim leh Tonzang gam mite bek ii pau ding aa, Pasian hongpiak hilo aa, Chin buppi kizopna a nop na ding aa, hongpiak Chin Common languages hi cih pen I tel ding nakpi in tha kongpia nuam hi. 1899 in Carson te Zogam hong tung a, 1953 kumin ZBC piang hi. 1948 kum a piang HBA, FBA, leh TBA kigawm ZBC kici ahi hi. Hih bangin Association thum a pian ma in Zogam bup a om Baptist Pawlpi khempeuh “All Chin-Hills Baptist Association” kici hi. 1919-1938 ciang Cope topa vaihawm “Tedim Kam Thu kizakna lai” zong “Chin Hills News” kici hi. Hi thu te en kik leng, ’Lai’ I neih zawh 100 pawi I bawl keei hang, I lai hongbawl sak Cope sangmang pa’ sepsa te nangawn I zom zo kei hi ci leng ki khial lo ding hi. Cope sangmang pa in “Tedim kam thu kizak sakna lai pen “Chin Hills News” ci in tangzai takin I pau hongzat saksa tu ni in khangthak te in I nampi pau ki pum khatin a tangzai nang I hanciam ding ahi hi.

I Ukpi te hun lai in, ukpi te’n amau awkaih zat tang dingin na geel leh ‘Teizang’ awkaih zat ding hi aa, ahi zongin tu laitak aa, Tedim pau I cih pen a nei tuam vilvel a om ahih loh hang pau zattaang dingin Sihzang, Teizang, Paite (India Manipur) dongah, Khuano, Saizang, Thadou, Ngawn, Zote, Vaiphei pan kipan, Tedim gam leh Tonzang gam bup ii, I pau teng kigawm in a nei tuam omlo in leh kamphen kullo in Pasian in letsong bang aa, hongpiak hi aa, Ukpi te’ thu khual thu muh na tawh Tedim, Tonzang leh I kim I paam ah tangzai aa, zat kim theih dingin tua I Tedim pau hong tel leh hong pungsuak sak uh ahi hi. A thu muhna uh leh a thukhualna uh tungah zahtakna lianpi zong kapia hi.

Tua leh tu’n I thulu taktak ah lut leng Zomi or Chin. Kei a dingin Zomi deih zaw ing aa, ai zong I minam buppi a dingin I gam kumpi hong ciaptehsak leh leitung bup ii theih Chin State pan Chin people pen ka muh ciang Chin cih pen a diakdiak ei Tedim mite a dingin zat huai zaw in ka mu hi. Cope topa in Chin Hill News cih pen Tedim lai tawh hong hawm sak mah bangin Chin Dictionary pen eipau dictionary ahih ding, Chin Cultures pen ei Culture ahih ding, Chin pau pen nidang aa, Cope topa hun aa a kizang Tedim pau ahih ding lunggulh mahmah ing.

Gentehna in khat hong at leng: Kumpi ‘Philip’ ukna nuai aa, om te ‘Philip’ gam pan Philippines cih hongpiang khia aa, a minam min taktak uh hi het lo in zong a mau a dingin deih huai het lo hi. Ai zongin a kipumkhat nang uh zang lel uh aa, tua man minam tam diak ‘Tagalog’ pau nei te’n a mau pau, cultures pen ‘Philippines’ pau a suak nang hanciam uh aa, gambup zat tang kam dingin kizang to aa, nidang in tua ‘Tagalog’ pau zang te sang a tam zaw thamtham ‘Ilokano’ te’n ‘Philippines’ pau ci nuam ngiat lo in ‘Ilokano’ pau bek hongcih manin nam neuneu ‘Ilokano’ ahi lo te’n zuihpih thei lo uh aa, ‘Tagalog’ pen Philippines pau hongsuak mawk ahih manin, mi nam neuneu tengin a mau pau in zangin tu’n Philippines ah pau a tangzai pen hongsuak hi.

‘Zomi’ pau I cih sang ‘Chin’ pau cih mah zat ding tangzai kasa zaw aa, tua ‘Chin’ pen Mindat, Hakha, Falam, Matupi pan eimi a kici khempeuh in a san’ theih sa uh ahih manin leh leitung leh I kumpi te mahmah ii, ciaptehna ahih manin ka deih mahmah ‘Zomi’ sang I nampi tan nang ‘Chin’ mi cih pen a diakdiak ei minam pi te a dingin tel huai zaw kasa hi. ‘Chin’ leh ‘Zomi’ cih zong tang thu tam kha in teh ai zong tua te sangin khangthak te’n mite ii hongsan pih theih min leh gamuk kumpi te ciaptehna, leitung bup ii hong theihna ‘Chin’ zang zaw in tua sungah I pau, I cultures zangin pau nampi suak sak leng cih pen ngaihsut huai kasa hi.

I kumpi in tuni dong Chin lai ki-at na khat peuhah ei ‘Tedim’ lai mah zang zaw lai sam aa, banghang I pau en zai sak lo ding I hiam? I pau a tangzai leh nang minam pi nahi ding aa, kuama zat loh pau nei te minam pi hi zolo hi. Pau tangzai nang I kihon’ kul aa, tua I kihon’na leh I zat min tungtawn in mi khempeuh in hong lut zawh ding minam min zong I telsiam kul kasa hi.

Namneu hang cih ding hilo hi. India ah kamphen kullo I pau kibat pih tawm lo aa, Kawlpi sai thupi, Tamu sai thupi te ah Tedim pau thei lo in van kikhawng zolo ahih manin, tua bang sai thupi te ah eimi khat ta nasem dingin kila hi. Zumpih ding hilo aa, a zai nang it kepin, mite zong thei sakin, hi leng tuzawh kum 10 hunah I pau zang pen tua zah nih tua zah thum hongpha ding aa, minam lianin a khang cing te I suak toto ding hi. Tua manin I pau pen ‘Chin’ buppi ii san’ theih ‘Chin’ pau ci zo leng aa, a diakdiak in Falam, Khalkha, Tedim te a dingin a Center pen ahi, Tahan, Kawlpi dungsuk ah eipau mahmah ‘Chin’ sungah ‘influence’ zo leng, khamtung gamah hong kilawh toto ding hi lel aa, I hanciam ding thupi kasa hi.

Nidangin ‘Mizo’ te’n a minam tangzai nang leh a pau tangzai semsem nang ci’n, bawllung suih, kibuan, melhoih kidemna cih bangin a bawl uh ciang, tua sungah a ut khempeuh kihel sakin, eimi khat peuh in a khatna I ngah phial leh zong letsong lungkim tak mah in hongpia uh hi. Ai zong a thusim un, tua kimawlna ah a mau ii makaihna ahih manin ‘Mizo’ pau lian bek mah zangin mi khempeuh tua ‘Mizo’ sung a kita dingin bawl uh hi. Eimi te’n Zangkual bawllung kisuih ki bawl in no pau siam ung honglut sak un a ci ngaungau te nangawn, ‘Zomi’ hi kei uh teh cih tawh ki letkhan lo hi. Mite’n laisiang tho sang phuan aa, ama pau tua sung pan uplift uh hi.

Minam dang akah nuam te zong sang uh aa, ai zong a pau uh a theih nang internship cih bang amau mite kiangah pai sak zel uh aa, siam sak sawm in tua tawh a gam uh keek uh hi.

Mindat te ‘Lingnai’ a cih khat tawh Manila ah ka kimu uh aa, ei pau tawh hong paupih sansan ahih manin, kadot leh Tedim laisiang tho sang pan a man hing hong ci hi. Tan 10 boarder nei te’n Zogam khanglam te zong samin i boarder ah kahsak ni. I pau hilh pah leng tua pen mangte’ ii mi makaih dan ahi hi. Ka cih nopna ah I hih theihna nam tuamtuam tawh I pau khan’ ni. ZCLS aa tu te’n zong eimi te a ding bekin kingaih sun lo in vision lianpi tawh ‘Chin’ bup ai tangin nasem bangin kituat huai kasa hi. ‘Zomi’ concert, Zomus leh khuado te I bawl hun ciang zong ngaihsut huai kasa hi. Kumpi te’n I khuado pawi bang pen ‘Chin’ te’ ii I neih pawi lian penin hong ciapteh sak ahih manin tua bang I bawl ciang zong I ‘Chin’ pih te zot huai sap huai hi. Hi ka gen thu te pen thu ol tak tawh hongpiang ding omlo aa, ai zongin I kipiak khiatna tantan in hongpiang toto ding thu te vive ahih manin I lungsim puakzia limlim khat tangzai sak masak ding leh kipuah masak ding deihna tawh extreme pianin kong at ahi hi.

Khatvei Tonzang gam Khumnuai khua, Thadou pau kizatna ah Pasian thu gen in kapai kha ngei aa, eipau pen ei zahin siam uh hi. A deacon khat in Sia aw Zolai nidang Tonzang gam bupin sin ding hong kipuak in ai zong tu’n lei ding nangawn kamu kei uh ci in Zolai sin ding laibu koi pan kangah tam ci’n hong dong ngei hi. Eimi mi hau mi lian te leh gamdang ah tungin minek mi dawn a ne zo te aw I Zopau tua bang aa, a sin nuam te a ding lei kullo zah in I hawm zawh nang ma hong pang un.

Khatvei leuleu Humalin khuapi kapai aa, sia Paul tu laitak Humalin aa, Kuki Baptist Association aa Pastor hi in tua pa in no KVBA te’n KVBC (Convention) hong la leucin ko eimi a cian lai Association neuneu te ee, bang ci in ka om uh tam! Hong ci ngeungau hi. AG, Tuiphum, RC, Seventhday leh pawl tuamtuam khempeuh in bang khat peuh I sem aa, Association, Section, Convention I la zong I kim I paam aa, nam neuneu te huai ding pen minam picin vai kasa hi.

Khatvei Khampat veng 3 na-ah Thadou tuiphum pawlpi khatah kapai leh Pastor meigong te huhna, Singapore a om eimi te tung pan a ngah thu piteek khat in hong gen aa, nakpi in thupi kasa hi. Tua bang kalsuanna in minam keek kasa aa, tua bangin thu I khual nak leh I minam sungah mite’n khalum kisa ding uh aa, I minam pung semsem ding hi.

Minam itna hangin I thu a kituak loh ciang, a mi kitawng lo in a thu kinial or kikum leng a mi kimuhdah na piang lo zaw ding aa, a mi muh dah manin a thu hoih pipi I nialna zong minam itna leh a tangzai lungsim hi ngei lo ding hi. Na pil luat loh hang, minam a ding na sep tantan, tang thu nei na hi aa, minam itna bulpi in minam dang te nangawn ei sungah kitat sak zawh nangin huai siamna ahi hi. Ai zong tua I huai na ah I pau pen amau pau bangin ngaihsut sak zawh na ahi hi.

Nidangin minam dang te’ pau theih ding ki hanciam mahmah aa, tu’n mite’n ei pau a pau theih ding ki hanciam mahmah hi. Aizongin honguk Kawlte leh Kawlpau, leitung bup in International pau Mangpau cih te pen theih hamtang ding thupi sa ing. Mi nam dang khat pau na theih pen nang na meet aa, mi nam neu khat in na pau a siamna pen na minam hamphatna ahi hi. Pau pen a pau nei te tung bek pan tangzai hanhan ding hamsa aa, apau mi’ theih nang a hamciam in minam thukhualna leh ki thutuahna pan nakpi in pau tangzai baih hi.

Laibu leh lakhui ka bawl aa, ka khuaveng uh Tayagong, Nanchuang, Pinkhongyi te ei Ciimnuai mi Ngawn te hi uh aa, amau hong it pih in tha hongpiak sak uh hi. Na pau a siam khatin nang zong hong it ding uh aa, na lakhui, na laibu, pan kipan lei dingin tha hongpia nuam ding uh hi.

Na pau a zang tam leh nang pen minam pi na hi aa, minam pi lungsim zong na nei to pah ding hi. Tua in thukhualna hongguan ding aa, tua nampi lungsim in mi picing hongsuak sak ding hi. Tua nampi lungsim in namneu lungsim khat sang makaihsiam zawkna hongguan ding aa, thu zong hong mu sak zaw ding aa, zong hong lamto ding hi. Kawlgam ah bangbang i ci zongin kawlpau zang a tam pen mah bangin kawlmi te mah minam dang neuneu te sang hauzaw, pilzaw in om veve uh hi. Kawlla a siam te kawlgam bupah lasiam te hi uh aa, Kawl lai at a siam te, Kawlgam bupah lai at siam te hi pah uh hi.

Mang te’ pau in leitung huap ahih manin video khui hoih khat a bawl tuah nak uh leh khantawn in hauh lawh zo uh aa, laibu hoih khat a bawl nak uh leh khantawn hau zo mawk uh hi. Mangla a siam te leitung bup huap pah uh hi. Manggam aa mi minthang te leitung bupah minthang uh hi. Tua khempeuh pen a pau tangzai hang ahi hi. A philosophy uh minam dang te a sang picing zaw veve uh aa, na khempeuh ah a nampi hih na in lam to in tawi sang uh hi. Na pau pen na nampi hih nang a thupi pen leh kal masa pen ahi hi. Thang Khua Kai (Kaino)