Zomi Online Dictionary tangthu

Zomi Online Dictionary tangthu

Leitung muntuamtuam pan nisim in Zomi tampitak in azatdet leh anoptuampih mahmah ahi English – Zomi Online Dictionary www.zodictionary.com pen Germany, Hamburg khuapi aom Thomas Khaipi (Tual Khan Khai) in hong bawlkhiat ahihi. 2003 kum Germany ah Technical College akahlaitak Project nokhat abawlpen hong puahtosuak in, Zomi te tampitak noptuampih dingin hong khuasuaksak ahihi.

Hih English – Zomi Online Dictionary bawlkhiatnop nadingin bangin ong tawsawnhiam cih kadot takciang un hih anuai abang in ama Motivation hong genkhia thei hi.

Motivation:

• ZOMI te leh ZOLAI sinnuam te a ding olno tak in sintheih nading
• ZOMI te in paunam tampi ihneih mahbangin khatlehkhat ihpau ihlai te nuamtak in ih sintheih nading

Hih English – Zomi Online Dictionary hong piankhiattheih nadingin Technical lamsang ah akisam khempeuh Thomas Khaipi in honggelkhiat hi a, asung a akihel laimal Data khempeuh pen ngahtheih nading in ZOCIA pan Michael Pau in hong vaihawm khia hi. Asuang ah akizang Data pen ZCLS te bawlkhiat “English to Tedim Chin Tongdot Dictionary” akizang ahihi.

English – Zomi Online Dictionary pen 2007 September khasung in ki Online khin a, ahi zongin atuam in Website kician kinei nailo ahih manin Thomas Khaipi mahin ama Personal Blog kiukhat ah hong koihphot hi. 2008 kumciang in ZCLS te kiangah Data zattheih nadingin Official takin ngetna ki neithei hi. ZCLS paninzong “English to Tedim Chin Tongdot Dictionary” sungah akizang Data khempeuh zattheih nading lungkimtak in phalna hongpia uh ahih manin ki lungdam mahmah hi.

April 09, 2008 kum in ih English – Zomi Online Dictionary adingin Domain www.zodictionary.com atuam in Thomas Khaipi mahin hong leibeh a, tuatung ah Data teng kituah leuleu in, hongzatnuam semsem hi.

2008 kumsung mahin Google Chat Bot Dictionary Service tawh hong bawlbehto leuleu a, www.zodictionary.com website ah paitektek kullo in Gmail leh Gtalk sungpan in hih Zomi Online Dictionary aki zangthei dingin hong bawlbehto leuleu hi. Gmail leh Gtalk sungpan in hih Email ID [email protected] guangin English laimal ihtheihnopte Chat leng mitawh akiho bangkek in alangkhat pan Google Chat Bot in akhiatna honglak ziauziau ahih manin lemtang mahmah hi.

Google Chat Bot Dictionary Service ah zattheih nading Software pen Pythong tawh akigelh Software Project khat hi a, akisam vekpi khempeuh Thomas Khaipi mahin honggelhkhiat ahihi. Hih Zomi Online Dictionary bekthamloh Kawlgammi tampitak in alimzat mahmah English – Myanmar Online Dictionary bawlna ahzong Thomas Khaipi naki hel hi. Myanmar Language Technology Group (www.mmlt.org)

Zolai, Kawllai te banah 2009 kumin English – Hakha Online Dictionary zong hong bawlbehto leuleu a, sanggam Hakha lamte’n noptuampih mahmah uhhi. English – Hakha Online Dictionary sungah akizang laimal Data khempeuh pen Dr. David Van Bik ii bawl Dictionary laibu sungpan akizang hi a, tuabang in zattheih nading phalna taktawh atapa Dr. Kenneth VanBik (Department of Linguistics and Language Development, San Jose State University, USA) in apiak ahihi. English – Hakha Online Dictionary zong Gmail leh Gtalk sungpan in hih Email ID [email protected] tawh ki zangthei hi.

Hih Dictionary te pen ei Zomi te noptuam pihbek hilo a, gamdang mite’n gambel in gamthumna atungkhinsa te laihilhna ahzong nazangthei uh ahih manin phattuamna tampi omkhin hi. USA, Canada, New Zealand gamte pan English Teacher pawlkhatte’n Zomi Refugee hongtungte English kahilhna un nazangthei mahmah ung cih Email tawh lungdam kohna laikhakzong honpikhat ki ngahkhin hi.

Hihbangdan in ih Zomi pihte phattuam pihding akibawlkhiat ciangin pawlkhatte’n sumbei paibeiding ki theihpih khalo theihi. Ataktak in abawlkhia te pilna siamna te thaman bangmah akisim vetlo, adang beiloh aphamawh Website Domain leh Hosting tampimah kumsim in beiden hi. Website Domain pen kumkhat in Euro 15 bang hi a, Virtual Private Server Hosting leina tawh kumkhat in Euro 200 kim beitheiden hi.

2008 kumpek panin tuni ciangdong kum 5 val sitset sumbei paibei khempeuh pen hih Zomi Online Dictionary abawlkhiapa Thomas Khaipi in apiakhiaden leh asuplawhden himawk hi. Tua sumbei lakah ama thaman, nitha, noptuam cihte pekkhatzong ki helnailo hi. Sumtawh aki cialding hileh Programmer te naikhat Euro sum tampi akipia hi a, Thomas Khaipi in hih Zomi Online Dictionary ading in kum 5 val ahun abeiteng khempeuh anai in tuatleng tawmnawn hetloding hi.

2012 September khasung in www.zodictionary.com Design athak leh System athak bawlnading in Malaysia gamsung leh USA gamsung aom Zomi pawlkhat in US$200 tawh na panpihthei uh cihciangbek hipan a, adang ama noptuampihding panpihna bangmah aneizo ki omnailo hi.

Thomas Khaipi pen ICT (Information and Communications Technology) thute tawh Zomi te thantoh nading bekthamlo, ih Zogam ngiat mahmahzong a khantoh nading alunggulhden khat hi a, mailam ah Zomi te leh Zogam ading in nahoih nalian tampi hongsepzawh semsem nadingin ih hihtheihna bangbang ah panpih ciatni cih Zomi Daily pan kongzawn uhhi. ZD Sawltak #zomidaily

Update:

Mobile Phone Google Android OS ah Zolai Dictionary Offline in ki zangtheita

Internet tungtawn in English to Zolai Online Dictionary zattheihna ihneih sunsun ahi www.zodictionary.com Service pen tu in Mobile Phone Google Android OS tungah Offline in ki zang theita hi.

Abeisa hunsung ah hih website www.zodictionary.com leh Google Chat Bot Dictionary Service te ah nuamtak in ihzatzatsa hi a, tuate ciangbek tawh ki khawlbawllo in tu’n Mobile Phone Google Android OS te ah zattheihding in App/Software khatin hong ki bawlbehto ta hi. Azangnuam peuhmah in Google Play panni hih link https://play.google.com/store/apps/details?id=com.kp.zodic ah amawkna in ki Install theita hi.

www.zodictionary.com Android App pen Google Andorid OS 3.0 tungsiah akizang Mobile Phone te ah lempen hi. Ahi zongin Google Android OS Old Version ahi 2.2 leh 2.3 te ahzong zattheihding in hongki puahto laiding hi. ZD Sawltak #zomidaily