Additional menu

ZOMI DAILY

Online News & Magazine

Zomi Ngalliam Zuapa Pu Cin Sian Thang tangthu

Zomi Ngalliam Zuapa Pu Cin Sian Thang tangthu

posted on at Lomkholna: , ,

Tweet
Share

Zomi Ngalliam Zuapa Pu Cin Sian Thang tangthu

  • A min : Sitni Pu Chin Sian Thang (kum 90)
  • A sih ni : 31 July 2021 Saturday pm 5:34
  • A natna : Awmna
  • A sihna : Ama inn, Kalaymyo
  • Beh min : Neihkhup
  • Kivui ni ding : 1 August 2021 Sunday am 11:00
  • Pawlpi : Leipi Baptist Church

Pu Chin Sian Thang pen April 6, 1938 in Zogam Zampi khua ah suak a, pa min Sum Hang hi a, a nu min Niang Khan Cing (Gualnam) ahihi. A mah pen Neihkhup beh hi a, a min phuak pen Thual Cin-Cin Sian Thang ahihi. Ama matpongtin (မှတ်ပုံတင်) ah 1938 hi ci-in kiciam teh hi mah taleh, amah suah kum taktak pen 1932 hi.

Amau unau 6 pha uh a, pasal 3 leh numei 3 a hi uhhi.

  1. Pu Chin Sian Thang + Don Khen Niang (Kawngte)leh Sian Nuam Bawi (Guite)
  2. Pu Pau Za Langh
  3. Pu Hau Khan Eng + Cing Za Lun (Ngaihte)
  4. Pi Diah Za Awi + Nok Do Pau (Gualnam)
  5. Tel Khan Cing + Tuah Cin Kap (Songput)
  6. Niang Ngaih Cing
    A tate 8 ; pasal 5 leh numei 3 ahihi.
  7. Cing Sawm Lian pasal Si Si Am Aung
  8. Hang Khen Mung
  9. Kam Lam Khup zi Cing Lam Za Vung
  10. Langh Thawn Pau zi Cing Lian Vung
  11. Eng Biak Thang
  12. Cing Do Mang pasal Pau Khat Thang
  13. Gen Kap Thang
  14. Cing Khaw Man Lun pasal Thang Khan Gin

Pu Chin Sian Thang pu Son Sum te unau Vangteh khua panin Heilei khua ah pem uh hi. Heilei khua ah a ten lai un pu Thual Cin in Mangkang (British Army)galkap khat that a, a lu ai hi. Heilei khua panin Chawhte ah tawmvei teng uh a, Zampi khua ah pem uh hi. Zampi khua pen Pu Cin Sian Thang unau pianna leh khankhiatna ahihi.

Zampi khua a tun uh ciangin khanglui biakna siampi Tulpi pen a pu Thual Cin, a pa Sum Hang in sem a, amah’n zong sem in Dalkhai, Tuimang, Vaivet leh khuakim ah kum nih sung sem hi. Christian Biakna ah 1953 kumin Zampi khua ah kituiphum a, Christian suak hi.

A sangkahna te pen Zampi Primary School, Tedim High School, Mandalay Taingchit Private School panin 1958 kumin tan-10 zo hi. 1962 kumin Policital Science, Modern History leh International Relations te zo in B.A degree ngah hi. 1967 kum in B.A (law) zo a, 1968 kum in LL.B zo hi. Tua ahihmanin Rangoon University panin a degree ngah te pen B.A, B.A (Law), LL.B ahihi. 1969 kumin U Chan Tun Maung tung pan Advocate (Sitni) hih theihna Chamber sin hi.

1971 kumin Dr. Maung Maung tung panin Advocateship Licence ngah a, tua kum panin sitni sep kipan pah hi. 1986 kumin Kalay Township Lawyers Association President ngah hi. 1989 dong sitni sem a, sitni a sep sungin thu nei (case) 700 val sem hi. Thu lian mahmah 4, high court dong tung pih a, High Court ah zong zo ahihmanin a minthang mahmah hi.

Rangoon University ah a kah sungin Chin-Hill Student’s Union Present, Rangoon University Chin Student’s Association President te sem hi. Rangoon University Chin Student’s Association President a sep sungin Taunggyi Federal meeting kah a, State Unity Organization (SUO) kiphuan a, CEC member ahihi. State Federal kamkupna te ah kihel kawikawi a, 1962 kum March 1 nitak BBC Kawlgam pan Radio tawh thugenkhiatna ah zong kihel hi. Tua banah Zomi Tangko Editor zong semkawm hi.

1948-1962 ciang Democracy tawh nuam takin a ki uk kimlai March 2, 1962 in Dictator Newin makai in Military Rule tawh galkapte in thatang thu in Kawlgam la uh a, Burma Socialist Program Party cih tawh 1962-2011 sung Kawlgam ukcip hi. July 7, 1962 in sangnaupang te zat innpi ahi, Union Hall pen mine tawh kisusia a, tua sung a om Zomi Sangnaupang laibu te leh man (photo) te a tunna lam kithei zo nawnlo hi. Kawlgam in Independence a ngah khit ciang kum 14 (1948-1962) sung bek Democracy tawh ki uk a, Socialist tawh kum 50 sung (1962-2011) ki uk hi.

1988 kumin Pu Chin Sian Thang makai in Zomi National Congress Party registration kibawl hi. August 4, 1989 in ZNC (Zomi National Congrees) Coference ah ZNC President dingin Pu Chin Sian Thang kitel a, Politician makaipi suak hi. 1990 kumin Myanmar election ah seat 492 om a, Pu Chin Sian Thang in MP candidate in ZNC ah kuanglui a, MP cing hi. NLD in 492 pan 392 MP ngah in 72.6% zo mah leh galkap te in kumpi za pia nuamlo ahihmanin NLD in kumpi sem theilo a, pu Chin Sian Thang in MP a hihna tawh bangmah sem theilo a, kiman zawsop hi.

1993 kum in kumpi in ZNC party mawkphiat sak sawm ahihmanin kumpi in party mawkphiat theilo hi, ci in Committee Representing People’s Parliament cih kiphuan a, vaihawm te lakah kihel hi.

2008 kumin galkap kumpi in Achikhan Upadi bulpi teng a bawl zo a, 2010 kumin gambup kitel bawl a, CRPP member party te in nuaksan (boycott) a, Pu Cin Sian Thang in zong MP kuanglui lo hi. Myanmar President U Thein Sein in CRPP member te in party hing kik (renew) thei ding a cih ciangin Pu Cin Sian Thang makai in ZNC a hih kik uh leh ZNC sang nawn uh a, ZCD (Zomi Congress for Democracy) ngah uhhi. November 8, 2015 in Myanmar elction om a, Pu Chin Sian Thang in ZCD party ah MP candidate a, MP cing a, 2015-2020 sung Pyithu Hluttaw ah MP hi a, ZCD President zong ahihi.

Pu Chin Sian Thang pen Kawlgam sung a om Zomi te sung pan LL.B a zo masa pen ahih mah bangin Zogam leh Zomi a dingin nakpi takin nasem a, kumpi te bawlsiatna tampi thuak a, Pahtawina zong pawlkhat ngah ahihi. Gam leh minam a dingin a sep sungin a khangno thahatna teng bei ta a, a kumcing kisa ta ahihmanin 2020 kum gambup kitelna ah kuanglui nawnlo hi.

Pu Chin Sian Thang thuak haksatna te

  1. October 30, 1972 pan March 3, 1974 dong Yee Kyi Aing, Mingaladon ah thongkia.
  2. March 4-8, 1074 sung Insein ah thongkia.
  3. March 8-August 8, 1974 sung Mandalay ah thongkia.
    4.March 12-19, 1992 in Kalay myo pan zingsang nai 4:00 kisam khia in Yangon ah kipuak a, thu kisit in kikhah kik.
  4. May 10-31, 1993 sung a inn pan paikhiat theilo (house arrest) dingin kikhumcip a, zingsang nai 8:00 leh nitak nai 5:00 in om mah ing cih na Kalay myo 17 MIS ah ki report.
  5. October 10-24, 1996 sung Kalay myo MIS ah kikhum cip.
  6. September 6, 1998 pan kha 7 sung 220 Bn Yemon ah thongkia, tua pan kha 4 sung 91/2 mile-stone ah thongkia, March 14, 1999 in a kal na in ki-at dingin kikhah khia.
  7. September 3, 1999 in MI-14 Quater, Botataung, Yangon ah.
  8. November 3, 1999-June 14, 2001 sung thongkia.
  9. September 28- October 30, 2007 sung Saffron Revolution, Insein ah thongkia.
  10. November 20-26, 2007 sung Aung Thapyae HQ ah.
  11. May 10, 2008 i motor in nawkkha in a nakguh 5 leh a liangguh khat kitan in RGH ah zato lum a, Pasian hehpihna tawh May 29, 2008 in zato pan tuak hi.

Pu Chin Sian Thang in pahtawina a ngah pawlkhat te

  1. Zomi National Reconciliation Hero Award : 2009 kumin Norway a om Kawlgam mite in pia uhhi.
  2. Zomi Ntional Freedom Award : 2012 kumin Zomi Community USA in pia hi.
  3. Father of Zomi Award : ZAM (Zomi Association of Malaysia) in pia hi.
  4. Ngalliam Zuapa : 2013 kumin ZBCM in pahtawina laipi pia uhhi.
  5. Zomi te’ Pa : February 20, 2014 in Tuithang khua ah Zomi Nam Ni in kipia hi.
  6. Zomi Ngalliam Award : March 6, 2021 Saturday in ZYA General Headquaters Office ah Zomi Award leh motor khat k kipia in kipawlna tuamtuam panin lungdampihna laipi 70 kipia hi.
  7. Doctor of Law (LL.D) March 27, 2021 in Zomi Theological Seminary ah Doctor ki pia hi.

Meltheihte kiangah a hawh nunungna

March 13, 2021 in Kalaymyo a inn uh pan Zampi, New Darkhai lam pai dingin dingkhia uh a, Zampi ah giak uh hi. March 14, 2021 Sunday pm 2:00 in New Darkhai tung uh hi.

15/3/2021 Monday in Sitni Pu Chin Sian Thang(Kalay myo), Pu Cin Kulh Thang (New Darkhai), Pu Lang Khan Do (Old Darkhai), Pu Kam Lam Khup (Yangon), Pi Zen Luan Cing(Kalay myo), Pi Thang Sian Ning(Yangon) te leh u nau sanggam a om thei teng tawh Pu Cin Kulh Thang Innpi New Darkhai ah kituah khawm uh a, Pu Kam Lam Khup in Sial khat go in pu Cin Kulh Thang in vok khat go a, ZYA ten tanu sem in khua zangbup tawh ankuang umkhopna nei uhhi.

“Tang bang dam a mel kimuh lai ci ni e ngaih” cih dan khat in Pu Cin Kulh Thang(kum 94) te nupa leh Pu Chin Sian Thang te kum 90 val khin uh a, kum 80 val, kum 70 val khit ciang unau sanggam hizah kimu khawm thei in lungdam maitai takin tukhawm, khawlkhawm in, ankuang um khawm thei cih ka muh teh thupha sa mahmah ing.

New Darkhai ah a om sungin a sanggampa Cin Khan Nang tapa

(i)Thang Kap Piang (kum 38) in March 16, 2021 Tuesday am 7:00 in hong nusia hi. Pa Langh Khan Do zi
(ii)nu Nok Khan Cing (kum 66) June 14, 2021 in,
(iii) Pa Cin Kulh Thang (kum 94) ni in, June 19, 2021 Saturday am 1:30 ni in,
(iv)Pa Langh Khan Do (kum 72) in July 3, 2021 in hong nusia hi.
(v) Sitni Pu Chin Sian Thang in July 31, 2021 Saturday pm 5:35 in hong nusia hi. Tua hun sung bekbek in Pu Thual Cin suan sung pan mi 5 takin hong nusia hi.

More: USA ah Pu Cin Sian Thang in Zomi vai thugenna

Sitni Pu Chin Sian Thang kum vai : Ka pa Thawng Zam sangin kha khat in nauzaw hi. Ka pa Thawng Zam pen 5/5/1932 kumin suak hi. Tua ahih manin Sitni Pu Chin Sian Thang pen kum 90 (1932-2021) pha ta hi. Pa Kam Lam Khup te innkuan, Nu Sawm Lian te innkuan, Nu Cin Khaw Man Lun te innkuan a kipan a dah a kap te khempeuh Pasian’Khasiangtho in hong hehnem ta hen. NK. Nang

Tweet
Share

Reader Interactions

Comment piaknop aomleh...