Zomi Nam Ni thugenna ~ Hau Za Cin

68th Zomi Nam Ni a Zinmang Thugen ~ Hau Za Cin

Tuni a Zomi Nam Ni a 68 veina zanga hong pai khempeuh na vekpi un na taklam khut uh kong len masa hi. Tuni a hong pai theilo – nasep man hiam, damloh man hiam, manlahna dang neih man hiam, vai tuamtuam hang ahi zongin – pianpih laizom Zomi khempeuh aw, na omna mun ciat uh ah Zomite hong bawl Pasian in Zomi Nam Ni thupha a kicingin hong tungsak ciatta hen.

Zomi Nam Ni, Malaysia khuapi Kuala Lumpur ah note tawh zangkhawm dinga nong sap uh ka lungdam. Kei bek hilo ka zi, Vung Deih Cing, in zong hong zui thei ahih manin ama tungah zong ka lungdam hi.

• Hello Zomi! Zomi dam maw!!
• Zomi hih mah nuam ngaungau ei.
• Zomi hih mah angtang hang ei.
• Zomi hih mah ahi ding mah na hi ei.

Hong bawl Pasian in hih ciang hong tunpih a, mailam kalsang tampi hong zawhpih dinga, a tawp dong hong lamsang ding hi.

I. BANG HANGIN ZOMI NAM NI ZANG

Mangkang gamkekte in Zogam hong luh zawh uh ciangin Zomi leh Zogam hong ukna dingin thukhun khat na bawl uh a, tua pen Chin Hills Regulation Act, 1896 kici hi. Tua sungah:

• Thuneihna lente in a ut leh mi khatpeuh Zogam hoihzawkna ding upna tawh Zogam pan hawlkhia thei;
• Thuneihna lente thu a nialte a kul bangin khumcip, liausak hi ding;
• Thuneihna lente nuaia hausate thu nangawn nial theih hilo hi;
• Thuneihna lente thu leh vaihawmna peuhmah kuamah in koimah ah thupuak theilo ding hi.

CHIN HILLS REGULATION ACT, 1896, Part IV (22, 23, 37 & 40)

22. When the Superintendent is satisfied that the presence of any person (not being a public servant or a Zomi) is injurious to the peace or good administration of the Chin Hills, he may, for reasons to be recorded in writing, order such person to leave the Chin Hills within a given time.

23. Whoever contravenes the provisions of section 19, or disobeys an order under section 20 or a requisition under section 21, or an order under section 22, may, on conviction by a Magistrate, be punished with imprisonment for a term which may extend to six months, and shall also be liable to fine which may extend to one thousand rupees.

37. No appeal shall lie against any order passed by a headman or by any officer acting under his Regulation.

40. Except as provided in this Regulation, a decision passed, act done or other made under this Regulation shall not be called in question in any Civil or Criminal Court. (Source: Extract from “Chin Chronicles” by Rev Khup Za Go, 1988)

cih bangin thukhun a bawl uh ciangin mipi in giksa in pualah mahmah uh hi. Mikang kumpi in Japan kumpi lel in amau gam ah hong ciahsan ding uh ciangin Zomite tenna India leh Kawlgam, Bangladesh gamte gamtuam hong suak in kumpi thak tuam ciat sungah Zomite a om hi. Zomi a tamzaw omna Kawlgam in zong gam thak, kumpi thak hong nei ding hita ahih manin Zomite in lametna lianpi tawh galet in mitmul sau liang, ciltui kai liangin a khuadak hangin a metpih bangmah om tuanlo a, siahtung siahphei, saliang, tangseu, tuktha, khaltha kiam tuanlo in thuneihna lente in zom paisuak lai phot uh hi.

Kawlgam suahtakna ding a kigel laitak in Zomite zong ‘Bel Pawl’ kumpi ah kihel in semkhawm in gamkek kumpi ciah leh Zomite vangik tampi nuamtuam dinga, nidanga amau leh amau a kivaihawm lai mah bangun nuamsa kik ding hi cih upna tawh Panglong Khoppi February 7-12, 1947 sungah va kihel in Panglong Thukimna February 12, 1947 ni-a bawlna ah zong thukimna min Pu Thawng Za Khup in va gelh hi. Tua thukimna ah ‘Kawl in pek khat a ngah ciang Zomi in zong pek khat ngah ding, liangko kikim ding,’ cih ahi hi.

THE PANGLONG AGREEMENT, Signed on February 12, 1947.

A conference have been held at Panglong, attended by Members of the Executive Council of the Governor of Burma, all Saophas and representatives of the Shan States, the Kachin Hills and the Chin Hills:

The Members of the Conference, believing that freedom will be more speedily achieved by the Shans, the Kachins and the Chins by their immediate co-operation with the interim

Burmese Government:

The Members of the Convention have accordingly, and without dissentients, agreed as follows:

1. A representative of the Hill Peoples, selected as the Governor on the recommendation of representatives of the Supreme Council of the United Hill Peoples (SCOUHP), shall be appointed as Counsellor to the Governor to deal with the Frontier Areas.

2. The said Counsellor shall also be appointed a Member of the Governor’s Executive Council, without portfolio, and the subject of Frontier Areas brought within the purview of the Executive Council by Constitutional Convention as in the case of Defence and External Affairs. The Counsellor for Frontier Areas shall be given executive authority by similar means.

3. The said Counsellor shall be assisted by two Deputy Counsellor representing races of which he is not a member. While the two Deputy Counsellors should deal in the first instance with the affairs of their respective areas and the Counsellor with all the remaining parts of the Frontier Areas, they should by Constitutional Convention act on the principle of joint responsibility.

4. While the Counsellor, in his capacity of Member of the Executive Council, will be the only representative of the Frontier Areas on the Council, the Deputy Counsellors shall be entitled to attend meetings of the Council when subjects pertaining to the Frontier Areas are discussed.

5. Though the Governor’s Executive Council will be augmented as agreed above, it will only operate in respect of the Frontier Areas in any manner which would deprive any portion of these areas of the autonomy which it now enjoys in internal administration. Full autonomy in internal administration for the Frontier Areas is accepted in principle.

6. Though the question of demarcating and establishing a separate Kachin State within a Unified Burma is one which must be relegated for decision by the Constituent Assembly, it is agreed that such a state is desirable. As a first step towards this end, the Counsellor shall be consulted in administration of such areas in the Myitkyina and the Bhamo Districts as are Part II Scheduled Areas under the Government of Burma act of 1935.

7. Citizens of the Frontier Ares shall enjoy rights and privileges which are regarded as fundamental in democratic countries.

8. The arrangements accepted in this Agreement are without prejudice to the financial autonomy now vested in the Federated Shan States.

9. The arrangements adopted in this Agreement are without prejudice to the financial assistance which the Kachin Hills and the Chin Hills are entitled to receive from the revenues of Burma, and the Executive Council will examine with the Frontier Areas Counsellor and the Deputy Counsellors the feasibility of adopting for the Kachin Hills and the Chin Hills financial arrangements similar to those between Burma and the Federated Shan States. (Source: Extract from “Chin Chronicles” by Rev Khup Za Go, 1988)

Ahi zongin suahtakna ngah khit, kumpi thak neih khit ciang zong Zomite vangikpi, Mangkang gamkekte hong nusiat pen bei nai tuanlo ahih manin ‘hih pen kibeisak henla, thuneihna lente kikhawlsak in a kikhawlsak man kumpi pan dinpihna sum kipia leh’ cih thu a vaihawm ding committee kumpi in seh hi.

Kumpi seh thuvaihawmte kimuhkhopna kikum ding, mailam bangci kalsuan ding cih kikum dingin Falam khua ah mipi 5000 kikhoppi February 19-22, 1948 sung om a, tua hun ah Pu Thang Za Kai, Tuithang in, February 20, 1948 ni in “Zogam ah siahtung siahphei kibeisak ta hen. Zomite nidang bangin ei leh ei vaikihawm kikta hen,” a cih ciangin mipi in “Hita hen” ciin thukim uh a, mipi a tamzaw thukimna tawh kikipsak hi. (Mi 17 bek in thukimpih pahlo uh hi). Zogam ah tua ni a kipan in siahtung siahphei bei in Zomi te amau leh amau vai kihawm in amau khua ciat ah suakta taka nuntakna hong kipan kik hi.

Tua ni, February 20, 1948 pen ZOMI NAM NI ci-in kiciamteh a, Kawlgam kumpi in October 9, 1950 niin kipsak in Ni Thupi khat in hong ciamteh sak hi. Tuni in kum 68 cingta hi. Zomite tangthu ah a ciaptehhuai leh a lungdam huai ni hi a; lungdamtak, angtangtak a zat ding ahi hi. Minampi hihna kician neihna hi a, minam kician hihna kipna hi a, midangte kiangah Zomi a kikipsakna ahi hi.

Zomi khempeuh kihuai in uangtak in zat ziahziah ding hi a, ahi zongin midangte tungah kigualzawhsakna leh kitungnunsakna lahna a zat ding hilo hi. Banghang hiam cih leh tuani in Zomi khempeuh kipumkhat in lawng khat in ginga, a deihna uh kibang in a lungtup uh a tun ni ahi hi. Gamkek mangkangte hong ukcip kicimtak in ei leh ei vai kihawm i ngeinasehsa ah i ciahkik ni ahi hi.

Zomite minam a hong bawlpa in Zomi te tangthu zong hei a, Zomi nam zong hong lam (build up) toto in, a sangzaw ah zong hong laamtoto hi (raise up). Pasian aw, lungdam ung. Lungdam ung. (Lungdamna khut kibeng ziahziah a, khitui luang zong tampi om hi).

II. TUA AHIH LEH ZOMI I CIH KUATE HIAM

Vaphual tawh a kiciamteh Zomite kua hipeuhmah hiam? Itna leh cihtakna tawh a nungta ngiat Zophualva tawh kiciamteh Zomite pen itna leh cihtakna a nei minam hi a; a numei a pasal in mi citak nam ihi hi. Muanhuai in muantak a, kuhkal in kipuah sitset uh hi. A hoih thupisa a, a sia pai in, a siangtho in gamta uh hi. Numei pasal kal ah muanhuai in nisim nuntakna ah citak in hanciam in a mawhpuak zo den hi.

Zomite pen Sengam pan pai hi hang a ci om a, zong dik pen mai ding hi. Hih thu bel Zomi laisiamte leh mipil, laitheite leh thukante sep zom zel lai dingin tuat ni. ‘Khul’ a piang ciin khanglui laphuakte in na gen uh a, ‘Khul’ cih pen suangbuk cihna hi. Sau gen lehang singhawm, suanghawm genna hi. Kei upmawhna ah Sengam pan leitaw lam zuana a taisuksuk lai un nisa guahzu, gal leh sa lak pan a kibukna uh, a kiselna uh ‘Khul’ hiding a, pumpi bitna dinga kibukpakna (temporary shelter) hi ding hi.

Tua sanga thukzaw pen, thakhat thu a minam khat kizui diamdiam cih pen sisan kizopna leh pa khat suan, nu khat sungpan piang hikei leh ahi theilo thu ahi hi. Tua manin ‘Tun sung khat piang’, ‘sul khat suak’ genna hizaw ding hi. Unau khat, minam khat, mun khat a tengkhawm ngei pen khuahun zui a mundangah kisuan, taikhawm, paikhawm, singhawm suanghawm kawm ah kibu suk kawikawi hi ding hi. Sengam ah haksatna nusia a nuntak nuamzaw delh a paikhia minam Zomite hi ding hi hang. Tua pen kei bek hilo mipil laisiam tampi upna hi.

Taiwan ka omlai in Sengam a Museum gol pen GuGong pana Chiang Kai Shek in Tembawpi tawh Forbidden City pan a puaksuk vanlui kikoihte en in ka hawh hi. Zhou Dynasty van kikoihte ka en kawikawi a, Zomite vanzatte tawh a kibang tam peuhmah hi. Cil bung, namsau, munphiah, samsih, samphek dan, samtum dan, lupna lukhung ah gualawng sungah van kep dan cihte Zomite zat ngeinate tawh kibang mahmah hi. Zomite pen Sengam pan mah a pai hiding hi a, Zomite pen Zhou Dynasty mah pan piangte hi ding hihang cih ka um pen hi.

III. ZOMITE TU-IN KOI AH OM, TENG UH HIAM

Zomi te pen Kawlgam-India-Bangladesh gamgi zul teng ah kiteng hi. Hausa leh Upate in khuasung vaihawm in khua hoihna ding leh khantohna dingin mipi huamkim in nasem uh hi. Siampi, siksek, galvil, sawm makai (khangno makai) leh mipi nautang na om uh a, amau nasep ding ciat hanciam in nasep zo tek uh hi.

Mangkang gamkekte in Zogam hong sim in a cil lam in lel himah leh hong luh kikkik uh ciangin Zomite in gal lel in Zogam leitang amau khut sungah lut a, amau ‘zawhthawh thu tawh’ hong uk in, mipi thukimpih hikhollo thukhun honkhat tawh hong khih ziau uh hi. Tua banga thukhun bawltawm a amau tawh kigawm dingin gamkhat ah om khawm ding cih a gel uh ciang Zomite in zong – tua ahih leh ka Zongeina uh hong kepsak unla (noh ngeina ah hong kailut kei unla), ka pupa luahsa Zogam pen Zomite vaihawmna nuai mah ah hong koihsak un, ci uh hi.

Tua a cih uh ciangin Mangkang gamkekte in zong Zogam pen Zomite vaihawmna nuai mah ah omsak a, ahi zongin siahkaisak in a nung pan in khaukhih bangin len uh ahih manin mipi nuntakna hamsa tektek hi. Kawlgam leh Zogam in suahtakna a lakkhop ciangin Zomite haksatna khempeuh a bei pah ding sa uh a, ahih loh ciangin mipi in siahbeina dingin hanciam uh hi. Tua siah beisak ni pen Zomi khempeuh lungdam ni, suahtak ni, Zomi leh Zogam mipite thuneihna nuai ah a om kik ni, mi khempeuh lungdam maitai ni, tuni a i zat ZOMI NAM NI pen ahi hi.

IV. KUA IN ZOMI CI HIAM

‘Zomite tangtawng pek amau leh amau Zomi kici uh hi,’ (They call themselves Zomi since time immemorial) ciin Pu Vum Ko Hau, in a Ph.D. Thesis, Profile of a Burma Frontier Man, University of Prague, Czechoslavakia ah na gelh hi. Namdang tawh kisawhkha lua in na tam tenlo uh ahih manin namdang tawh a kisawhkhak uh ciangin mite in min tuamtuam Chin, Kuki, etc tawh na sam uh hi. Ahi zongin amau leh amau pen Zomi mah na kici uh hi.

A tenna gam uh Zopi sung ahih man hilo in a pupa uh pan amau pianna, amau a suang pupi pen Zo ahih manin Zomi kici uh hiding cih upna pen dik pen ding hi. Hih thu khangthakte in research bawl in hong kan lai ding uh hi. Zomi laisiam masa leh mipil Rev. S.T. Hau Go in, “Zomi pen tangtawng pana ei leh ei kicihna i minam min hi” ciin na gen hi.

Rev Sukte T. Hau Go, a former lecturer of Mandalay University (Burma) also shared the same view, “Zomi is the correct original historical name of our people, from the Naga hill to the Bay of Bengal. To the north of Tedim, the Thadous and other tribes call themselves Yo; in Falam, Laizo. The Tedim people call themselves Zo; the Lushais, Mizo; in Haka, Zotung, Zophei, Zokhua. In Gangaw area Zo is pronounced as YAW, in Mindat Jo or CHO; and in Paletwa Khomi. In Prome, Thayetmyo, Sandoway and Bassein areas they call themselves A-Sho. So, in spite of slight variations Zomi is our original historical national name “.

Zomi pen i minam min ahihna leh a kipaih theihlohna pen i vok, i ak, i khua i tui, i tenna, vanzat, na khempeuh min ah Zo cih na kihel hi; Zovok, Zokhua, Zoak, etc cih bangin. Zomi cih min i zak ciang i bil ah khum ngaungau a, ei-a hipha diak hi. I sisan tawh kizom, i sa sung ah kiphum cih kitel hi. Min dang tawh hong kisap hang ki-awlmawh hetlo, i ik ah zong namlo hi.  Dr. Vum Ko Hau in, “Mite hong sapna min zanglo in ei leh ei kisapna Zomi mah na hilhpah hile hang tuni in hamphatna tampi i ngah khin ding hi,” na ci hi.

Zomite mun tuamtuam ah kithehthang in leitung kiuli ah ki omta a, hong bawl Pasian in deihna nei hi dingin ka um hi. Pianna Zogam Zolei nusia in gamthak tungin i pialkhiat hangin Zogam leh Zongeina mah kilunggulh a, ki-angtang in tua mah thupi kisa a, kipawlkhop mah nuamsa in khat leh khat kimu leng zong ki it in kingai in i kihuai hi. Kipawlna min ding zong haksa hetlo in Zomi bulphuh in kinei ziau lel hi.

Gentehna in, Zomi Christian Fellowship, Zomi Christian International, All Zomi Students’ Association, Zomi Welfare Society, Zomi Democratic Front, Zomi Christian Church, Zomi Innkuan, Zomi Nam Ni Magazine, Zomi Students’ Federation, Zomi Youth Association, Zomi Mothers’ Association, Zomi Elders Association, Zomi Children Fund, Zomi Literature Society, etc. Hihte khempeuh in i kisapna min Zomi hi cih kipsak a, mite hong cihna hilo in tangtawng pana ei leh ei ikicihna min hi cih kitel hi. Zomi cih i sisan sungah kizel a, i sazang ah belh in, i khuak (DNA) ah kivialcip ahih manin i bil ah khum ngaungau hi.

V. ZOMI, MINAM KHAT I HI TAKPI DIAM

Leitung ah minam khat kicite pen kizopna kinaihna om diudeu a, ki-itna, kingaihna zong na om hamtang hi. Beh leh phung kibang a, duh leh deih zong na kibang hi. Zi leh ta in kila in, tek leh mo in kinei in, sungh leh pu in na kizom uh hi. Ciamnuih gen kibanga, nuihzak huai i sakte kibanga, thupi i sakte zong kibang hi. Vun mel, sam mel, maipuak, maiguh, dinsanna leh duangtham kibang hi. Zomite pen biang guh themkhat puak hamtang hi kici hi. (Na ki-en tek dih vo leh guaite, ha ha ha).

Mihing khangthu kante (anthropologist) in Zomite pen – kampau kinawhlo hi, citak in hanciam uh hi, mihing nuntakna zahtak in suah hun leh sih hunte thupi bawl uh hi, phu la kik hamtang uh hi (hih pen Christian suah ciang kikhelta), gal ben, saben uk in kuhkal uh hi, zu leh sa tawh nopbawl in zangkhial lo uh hi, zindo siam in kihuai liailiai uh hi, beh leh phung thupisak in kihuh kien uh a kuamah kitaisan lo, gilkial dangtak in kikoihlo uh hi. Gal lel in, guallel le-uh kithawi kik in hanciam uh a gualtungtuang kik hamtang sawm uh hi… na ci uh hi. Tuate bek hilo, kibatna tampi omlai.

V.1. Biakna Khat Nei

Zomite in biakna kibang na nei toto in Christian i suak ciang zong kisuak khawm ngeingai in kizui ngetngat hi hang. Biakna, ngeina hangin minam ihihna kikhensak nuamlo ihih manin a minam bup in a ngaihsun khawm, a kitaisanlo ihi hi. Christian suahma in zong Tual Biakna kinei a, singbul, suangbul bia in dawi kithoih a, nopni, dahni in Siampite gamtat zia, phuisam zia, khuasung kivaipuakzia, khuamite kikep kipuahzia a kibang khin ahi hi. Hih in minam khat ihihna kipsak hi.

V.2. Pau Kibang

Zomi khempeuh pau leh ham kibangin awsuah tawmtawm a kilamdang bek hi. Awsuah a kibatloh hang kamphen kullo a, pau leng i awsuah kidanga i gennop kibang sitset hi. English nangawn awsuah kibanglo a, ahi zongin a gennop kibang hi. Khua tuamtuam ah hun sawtpi pupate na tuam ten ngei uh ahih manin awsuah a kibanglo pak bek hi a, pau bulpi kibanga pau kithei khin hihang. Pau khat zang minam ihi hi.

V.3. Tangthu Khat Nei Hi Hang

Zomi khempeuh pianna bulpi kibang, Khul a piang hi hang. Tun sung khat a piang hi hang. Nu khat sung pan piang, pa khat suan hi hang.

• A. Eiteng khawlkhawm a tuam omlo
• Vannuai ci peuh KHUL a piang in kilel leng;
• Tun sung khat pan piang hi ngeingei hang e.
• B. Tun sung khat pan piang hi ngeingei,
• Suahpih sanggam
• Laigui zomte hi ngeingei, te hi ngeingei hang e.

Free translation (by anynomous):

• A. We all are of one stock,
• All men under the sun are born of a cave (Khul)
• And born of the same mother.
• B. Being born of the same mother,
• We are all siblings,
• We are all siblings, descendants of the same mother.

V.4. Nau Awih La Khempeuh Kibang Hi

Zomi nupite in nau a neih uh ciangin a nasep kawmkawm mah un kem uh a, naukem ding midang la ngeilo uh hi. A teknu leh tekpa in a keppih a, ama nu leh pa in zong a keppih hi. Tua banga naungek a pian ciangin nasep kawmkawm mah in naungek mailam ding khualna, deihsakna, lungulhna khempeuh la tawh na phuak in na awi uh a, tua Nau Awihla tawh naupangte na khim uh a, na ihmusak uh hi. A nu a pa, a pi leh pute nau awihla a tangtung takpi ahi hi.

• Bawi aw hong khang mengmeng aw,
• Pam a luidawng hong bang aw,
• Pam a luidawng nong bat ciang
• Nu tha khek pa tha khek aw, bawi aw e.
• Khapi aw hong kia, hong kia
• Na koilai na tat na tat
• Zingsang an in bang na huan a,
• Khuangbai anteh ka huan a,
• A ha ka bak ka bak a,
• A tui ka hawp ka hawp a
• Ka gil a puakta kiukeu.

V.5. Kiten Kipi Dan Kibang Hi

Zi khat pasal khat nei hi hang. Sungh leh pu kinei ciat a, mo leh mak kinei ciat hi. Innkuan a kizom diudeu hi hang cihnopna hi. Kuamah tolten lo, kuamah tangtenlo, kuamah meltheih tanau kizoppih neilo a omlo cihnopna hi. Numei in a pasal bel a, pasal in a zi kem hi. Mo man kipia tek a, mokhakna leh molakna kithupisak hi. Nupate in ta a neih uh ciangin a pianna pi leh pute uh mintap in zangin a pi leh pute in min phuak uh hi. Leitungah mintap a nei Zomi bek om hi (adang a nei a om lam kiza nailo ahih cianga!).

V.6. Tangthu Kibang Neite Hi Hang

Zomite in tangthu a kibang nei hi hang. Penglam Tangthu, Cing Khup leh Ngam Bawm, Thang Ho leh Lian Do, Gal Ngam leh Hangsai, Dahpa tangthu, leh a dang tampi nei hang. Tua tangthute Zokam awsuah kibanglote lak ah zong a tangthu kibang khin a, hong hilhsawn pi leh pute theih zahzah a tute in a thei suksuk hilel hi. Laigelh a laikung laidal tawh ciamteh cihte om nailo ahih manin tam a theite tute hampha diak hi. Tuhun ciang laibu ah gelh in a kemcingte ihi ta hi. Zomite tangthute simsim leng Zomi lungsim leh thupisakte, ngaihsutzia leh gamtat dante tampi kimu thei hi.

V.7. Sam Tum Dan Zong Kibang Tek Hi

Zomi pasalte in dek ah sam na tum uh hi. Dek a samtum pen ciangkang khat tawh a pheilam in kilh uh hi. Numeite in sam phek a, a liangko tungah kaisuk sak in a awm zul ah khahsuk uh hi. Numei hi in pasal hitaleh sam sau na thupisak uh a, sam sau dingin na hawi ciat uh hi. Nungak sam sau pen thupi mahmah hi; Lengtonghoih tangthu pan kitheithei hi.

Sengam pan Chindwin gun dung zui in Zomite na tuaksuk uh hi. Kawlte tawh a kisawh khak masakna uh hih bang ahi hi. Ni khat Zolia melhoih Lengtonghoih luinak ah kisil in a samzang khat tui in luitaw lam ah tai hi. Tua luitaw lam ah Kawlmangpa kisil laitak in na tungsuk a, a citungah bang hi. Kawlmangpa in tua samzang a zialzial leh ‘theipum cia’ pha hi.

Hizah a samsau nungak kua hipeuhmah hiam, a melhoih ding hi. Ka zi dingin deih ing. Hong zonsak un,’ ciin a nasemte sawl hi. Luinak lam ah a zontoh uh ciangin a sanggam pasal 7 te in a it mahmah uh Lengtonghoih a va mu uh hi. A tom in gen leng, a kiphallopi zawhthawh thu tawh kila, kipaipih a, Kawlmangpa in zi in a tenpih hi. Tua pen Kawl leh Zomi kisawhkhakna masa leh kizopna masa ahi hi.

V.8. Khampat Mawngpi

Paisuk zel in zangsungah na teng kawikawi uh hi. Khua leh mun kip tampi nei mah leh a kim a pam a tengte tawh kibatna tamlo ahih manin kinaihlua a ten ding sangin a kigamla lua lo ah a kisawhkha tamlo dingin na lunggulhzaw uh uh hikha thei hi. Ahih kei leh pau kitheilo, ngeina kibanglo, gamtat kibanglo tawh kuam khat ah omkhop sangin kitam sawhkhalo a ten ding ngaihsutna om hikha ding hi.

Luitaw lam zuan in a taisuksuk uh leh kham leh zang kikhenna na tung uh hi. Kham leh zang kikhenna a tun uh ciangin mualtung pen mi na teng nailo in mi na tamlo a, gamsa leh gammang lak hi cih na theipah uh hi. Zangsunga tengte tawh kitam sawhkha lo ding cihna tawh phualsat ding hong kipan uh hi. Zangsung pan in kham ah kahtoh ding hong kithawi uh a, tua a kahtohna munpi uh “Khampat” (kham kipatna mun) ciin min na phuak uh hi.

Kham a kahtoh ding uh ciang thu leh la limtak na kivaikhak in, phuisam in thu na ciam uh hi. Tua mun ah Mawngpi khat suan uh a, “Hih mawngpi khangin kuitungin gah dinga, a gah Vaphual in ne ding a, a hiangkai in lei a bat kik ciangin Zomite hih phual ah kisutuah kik ding hi hang,” ciin thu na ciam uh hi. Tua khit ciangin a bawngbawng in khamtung kahto uh hi. A paina gam kuam leh mual na kibanglo in a bawngbawng in tenna gamkhen leh lozau na nei tek uh hi.

Nek leh dawn zonna tawh nitum in hun sawtpi kimulo, kikawmlo; kum tampi, khang tampi a pai khit ciang in a om uh ciangin a awsuah uh hong kidang hiaihiai hi. A tuntoh cilna uh khuapi Ciimnuai pan zong nek leh tak zonna a haksat a logam a gamlat luat ciangin kikhenthang in logam naih bel in khua na kisat kawikawi leuleu hi. Tua bangin bangzahvei hiam kigawmtuah ding sawm in hanciam uh a Ciimnuai pan Geltui ah tengin, Tedim ah teng khuapi a sat zel uh hangin nek ding logam a hamsat ciangin ut man hilo nuntakna zonna hangin khua tuamtuam ah kikhen loh theihloh hong suak zel hi.

Khuapi khat ah tengkhawm utlo hilo napi a nuntak zonna uh hangin utlo pipi mahin khuathak a sat loh a phamawh ahi hi. Ahi zongin kizopna kitatsaklo in ‘hiang kawm’ ciin kum khat khatvei, kum nih khatvei cih bangin kipha tangtang uh a, zu leh sa, nek ding a lim theithei na kipuak tek uh hi. Hiang kawm kisam tek uh ahih manin zin leh leng zong na do tek uh hi. Paunak zong khat kinei a, tua pen Upate in, “Ciimnuai ah sa kibak Geltui ah kithuk” ciin kuamah kimangngilhlo, suahpih sanggam laigui zom i hihna kipletna hi.

Tua banga singnuai gammual a gamsa, thosi thovai lak; vot leh kauphete lak, mual leh guam hal ah a bawngbawnga i tenna pan pau awsuah hong kilamdang a, tua pen a lamdang hilo hi. Namdangte in zong tua bang na nei ciat uh a, English zong awsuah tuamtuam nei pau khat ahi hi. Zomi bek tua bang awsuah tuamtuam nei hi kei hang cih a gen nuam ihi hi. Zokam awsuah tuamtuam i neih pen Zomite kampau a phungcingna khat hi bilbel hi. Kammal kihau pah hi.

Khampat pan mualtung a kahtoh ding lai vua a phuisam uh kuamah in mangngilh lo in lungsim ah phawk den uh hi. Tuni in tua Khamphat mawngkung a hiang in lei banta a, Zomite zong kham panin zangah i kituah ziahziah hi. Pawlkhat in zangsung bek tungsuk lo in a khengval in tuipi gal nangawn i kaita hi. Topa deihna om hiding cih ka um hi.

VI. VAIHAWMNA LEH KIUKNA

Zomite pen Khampat pan Zogam mualtung i kahtoh khit ciang a bawngbawng in khua tuamtuam ah kiteng a, khuasung vaihawm dingin Hausa kinei ciat hi. Mikang kumpi hong lut mateng a behbeh, a bawngbawng in khuapi lian bawl zozo in Hausa na sem in, siah na kai uh hi. Khua hausate in amau khuasung khantohna ding, nek leh dawn zonna ding, zi leh pasal kizopzia ding, thusia thupha khentatna, gamtat luhek dan ding cihte Upa vaihawmte tawh na gel khawm uh hi. Hausa vaihawmna huh dingin Upate ban ah Siampi, Tangko, Siksek, Ham Upa cih bangin vaihawmpih na nei diudeu hi. Tuateng in khuasung vai khempeuh a hoih thei pen in hawm a, mipi in zong amau thu niallo uh hi. Zomi sungah khua leh tui ading a sia a gel omlam kiza lo hi.

Tua banga nuamtak, khamuangtak, gamdai taka eima khua ciat ah i omlai, vai i kihawm laitak in thakhat thu in theihloh gam pan gamkek kumpi hong tunga, Zomite leitung hong lumlet in, muhna, theihna, siamna hong behlap bangin gimna, thuakna, haksatna zong tampi hong nawksak uh hi. A taktak in tua pen leitung khuavak Zogam ah hong lutna hi a, i mitkeuhna dinga khuavak in Zomite hong kappukna bangin kingaihsun thei ding hi.

Tua hun leh tuni kikal thu tampite i kantan dinga, hun dangah a kicingzaw in i sut lai ding hi. Gamkekte hong tun manin, tuni in, ei zong tuipi gal kai, khuamuhna kidang, ngaihsutna kidang, kalsuanzia kidang hi a, hih hun pan mailam bangci kalsuan ding cih tawmcik kikum pak ni.

VII. TUIPI GAL KAI ZOMITE MABAN BANG AHI HIAM

Tuni, ei tuipi gal kai Zomite i maban bang hiam? Zogam leh Zolei ah omlai Zomite adingin a maban uh bang hiam? A hoihzaw leh a nuamzaw, a pilzaw leh a siamzaw i hih ding a thupi penpen hong suakta hi. Tua ahih leh bangcih ding? Bang sem ding? Bangci mainawt ding?

VII. 1. Picing Ding Hanciam Ding Hi Hang

I pu i pate pen na picing mahmah uh hi. A sia na pai in a hoih na kem uh a, thusia nolh in thupha na kipia uh hi. Itna kilak in kamsia na kipia lo uh hi. It taklote it in na huai uh a, kah taklote na kikahpih in na kidinpih uh hi. Tuate mangngilh lo ding hi hang. Christian nuntakna tawh kituak in na nungta uh a, a galte nangawn uh na mudahlo in, a it zo dingin na hanciam uh hi. Ei zong tua mah i hanciam ding hi.

Tuni in nang cih bang cilo peuhmah nang hong langpang hipah lo a, nang cih bang ci peuhmah na lawm hipah tuanlo hi. Pupa khangah mi tuambawl ding leh mi galneih ding cih peuhmah na omlo a, kim leh pam pan nawkna a om ciangin a kidalna ding un lutang kham in na diangkhia uh hibek hi.

Mi it te hi hang. Khangsawnte mi it ding kisinsak zel lai ni. Tua pen picinna hi. Mawhna zon baih hi. Midang phat ding kisinsak kul hi. Mi hoihna muhsak in a hoihna uh phat ni. Hoihna kizong leng phatna ding neilo kuamah kiomlo hi.

VII. 2. Pilna Siamna Sin Ding Hi Hang

‘Zomi na cih uh kuate hiam?’ cih den kei tawh ni tum hun hinawn lo hi. Zomite pianna koi lai, Zomite khangthu bang, Zomite ngeina bang, Zomite maban bang cihte kan hun, theih hun, ciamteh hun, hilhsawn hun hita hi. Na hihna zong theilo a vak ngam hun hinawnlo hi. A kul leh laibu sim ding, a kul leh mi dong ding, a kisam bangbang theihsawm ding hun hita hi. Tualsung thuleng peuh tawh nitum hun hinawnlo a, laibusal ah laibu kiciang zihziahte sunga thumanpha kiphumte kalhkhiat hun hita hi.

Theih loh pen zumhuai ta hi. Sum neihloh pen zum huailo a, thu theihloh pen zumhuai hi. Hunthak ah kilutta hi. Theihna tawmluate heh baih a, lungduai lo uh hi. Ama theih ciang bek leitung a sate tawh kikholh a hun beisak hun hinawnlo hi.

VII. 3. Zolai, Zopau, Zongeina Zuun Ding Hi Hang

Zomi hihna a kipsak Zolai, Zopau leh Zongeinate zangin kem in puah in khangsawnte hilh tohtoh ding ahi hi. Nang zong na siamna dingin nakpi takin na hanciam khit ciang midang tungah hilhsawn ding hiteh. Minam hihna a kitel peuhmah in a minam van leh nate, a ngeina leh a ziate uh it in kem in huai hi. Theihsawm in kan a, a theih ciangin midang hilhsawn hi. Midang kiangah a piaksawn theih ngeina leh laite, kampaute kip in kho tawntung hi. Hilhhilh kul nawnlo ding hi hang. Nang zun kei lecin kua in zun ding hiam. Nang sem kei lecin kua in sem ding hiam.

Vii. 4. Kipattah Ding Hi Hang

Zomi sung bek hilo leitung minam khempeuh in a kisap uh leh minam khangto peuhmah in a hanciam mahmah uh khat pen kipattahna hi. A theizaw khat in midang pattah, a siamzaw khat in midang pattah, a uzaw in a nauzaw pattah cih bangin a seppah ding ahi hi. Makai khatin ama zalaih thei ding mi dang khat a pattah kei leh makai gina hilo hi. Makai tampi a pattahte makai lawhcing ahi hi.

Makai bek kipattah hilo in naupang zong i pattah ding ahi hi. A gol ciang bangsuak leh deih cih pen tu’n a neu lai pan pattah kul ahi hi. Tuni a naupangte tuzawh kum 20 ciang minam ading mi muanhuai a suak dingin nu leh pa, khuasung makaite, mimal kim in i pattah ding ahi hi. A zattaklo a hong khantoh leh nang leh kei mawhna hiding hi. Laisiam ding deihsak leh laisiamna lam ah pattah ding ahi hi. Sumbawl siam ding i deihsak leh sumbawlzia, sum kileizia, sum zuakzia kisinsak kul hi.

Zomite in mihing lungsim sung ah bang om hiam cih zong nakpi takin i kan kulta hi. Mihing lungsim bangci kawi a, bangci tanga, bangci pheipai, to pai, suk pai…cihte theih kul hi. Zomi khempeuh in a theihna dingin kisinsak, kihilh hun hita hi. Sawlna ciang bek sem a manlah hinawnlo in, ngaihsun kawma diang setset a kalsuan hun hita hi. Mi khat cih peuh thudik maw thudiklo cih kan masalo a up khit pah hun hinawnlo a, thudik kana thudik tawh nuntak hun hita hi.

THUKHUPNA

Zomi a hong bawl Pasian tungah ka lungdam. Zomi ka hih angtang ing. Zomi Nam Ni ah Zomi khempeuh a lungdam ihih manin midangte tungah kigualtungtuansak ding hituanlo hi. Zomi hih angtang dingin Zomi khantohna ding ngaihsun ding. Zomi khantohna ding septheihna tek ah sem ding. Sep leh bawl i neih leh zong ‘ken sem ing’ ‘ko sem ung’ cihte kampau lo ding hi hang. Kiniamkhiat tak in minam adinga naseptheih na neih angtang in na lungdam ding hizaw hi. Mite in Zomite pil si, siamsi, thukhual si hong cihna dingin kalsuan, panlak a hanciam hun ahi hi.

Lung kimlohna khat peuh tawh phun a ciakciak a kiguallelhsak keei hun zong hinawnlo hi. Leitungah a guallel ngeilo kua om hiam? A gualzo pen i cihte zong tamveipi a guallelsa vive ahi uh hi. Gualzawh ciang zong a gualzo den ding kisa a uang gawp hun hinawnlo hi. Kiniamkhiat a pilvai tak a gualzawh dan siam hun ahi hi. I sepkhialh a om leh zong a hoihzaw a i septheihna dinga siksan hi a, i sep khakte zong i sepkhialh tampi lak pan a hoih khat na hilel hi. Mailam ah khiallo ding cih kigen theilo a, khialden ding cih zong kigen thei tuanlo hi.

Tua ahih manin mai lam ah – Khoppi tampi i bawl ding omlai, thu kikup ding tampi omlai, nasep ding tampi omlai hi. Lungsim picing pua in – mipil nam, mipil gamtat, mipil lungsim a pua Zomi hi kim ciat dingin hih a 68-veina Zomi Nam Ni, Malaysia ah Zomi bup eite minam a hong bawl Pasian in thupha hong pia kim ciatta hen. Ka Lungdam, Dr. Hau Za Cin (20 February 2016, Kuala Lumpur, Malaysia)