Zomi Nam Ni (Malaysia) ah Dr. Dongno thugenna

Zomi Nam Ni (Malaysia) ah Dr. Dongno thugenna

Ka lungdam. Tuni-in Malaysia aa om mipih Zomite-in itna, tawh ‘Zinmang’ dingin Australia pan nong sapna uh hangin hilai note mai ah thu gen theihna hun ka ngah manin, note tung leh a taangtung sak Pasian tung ah ka lungdam hi. Hih lai pan gam thumna ngakin a om note khempeuh i Topa Pasianin cidam lungdaihna ong pia hen la, asawt lo-in na lunggulhna uh gam nuamte ah ong kha ta hen ci-in deihsakna lianpi tawh note adingin thu kong nget sak hi.

Gam thumna beel ding aa hih Malaysia ong tung masa no mai aa Zomite-in midang sadang hi lo i sanggamte mahin ong tuam bawl, ong deidanna uh hangin, haksatna namcin a phut khaknate uh zong ka za uh hi. Tuate hangin kimuh khialhna zong tampi piang hi. Haksat laitak, lungmuan loh laitak, cihmawh laitak ahih manin, na thuaknate uh neu lo hi.

A hih hangin tuate cillum tawh valhin ong thuak keeikaai un. Pasianin thupha a piak nopte a tha khauh masak ding ong deih hi. Na thuaknate uh amawkna, hi lo ding hi; Pasian deihna khat teitei om ding hi ci-in ka um hi.Tua ahih ciangin, lungduai takin na khempeuh apiang bangbang Topa tung aap in, ngak un. Ni khat ni ciangin Pasian geelna bangin ong taangtung veve ding hi.

Tuni-in thu nam nih gen dingin ka ngaihsun hi. A masa-in, Zomi Nam Ni ahih mah bangin Zomi namni thu gen loh phamawh hi. Ahih hangin kumsimin i zaak sa vive ahih ciangin kong sau gen kei ding aa nidang aa kigen ngei lo atheihhuai thu khat tawh atomin kong gen ding hi. Ka gennop teng lai-in ong kihawm khia ahih ciangin acingin na sim sak un.

A nihna ah, i Zomi Nam Ni pen i kumpi-in Chin National Day ci-in ong ciamteh sak hi. Tua ahih ciangin, Chin leh Zomi thu limgen dingin ka ngaihsun hi. Banghang hiam cih leh Gam-thumna ong tung pawlkhatte-in hih Chin leh Zomi hangin lungbuaina lianpi nei uh hi. Hih bang hunte ah akicing, ataangzai ngaihsutna nei-in thumaan thudik tawh i et ding lunggulh huai ka sa hi. Hih Chin leh Zomi vai pen atuamin lai ong kihawm ding hi. Tua zong na sim sak un.Sim bek lo-in Zomi adeih lo i sanggamte-in dotna ong neih uh ciangin, hoihtak nadawn theih ding uh kisam a atua lai sung ah dawnna ding acingin om ding hi.

Ei Zomite tangthu i et ciangin, gal deih lo, midangte va do ngei lo-in, midangte ukna khutnuai ah om ding zong a-ut lo minam khat i hi hi. Tibet gam pan i pai khiat aa kipan, Sen Gan Emperor masa, Si Huang Di kumpipa khutnuai ah, kulh ciangin i om aa, nuam sa lo-in Kawl Gam lam i tai suk hi. Kawl gam ah Zo kumpi gam nei-in kum tampi i maang ngei hi.

1550 AD in Kawl kumpi Bayinhnaung asih khit ciangin Zo kumpi nihvei na do uh aa amasa-in lel uh hi. A ninveina ciangin, kumpi thum, Ayudiya, Hanthawaddy Pegu leh Tangoo kipawlin a do uh ciangin haksapipi mahin na zo uh aa Zo kumpi ong bei hi.

Kale-Kabaw kuam sung ah Khampat leh Bunglung (Yasacu) khuate ah na teng uh aa amawng suante uh tunidong po lai hi. Tua pan Kawlpi aa Shan Sawbwa Kyittaungnyo khut nuai kitung aa, kulh mah ong kiciang sak leuleu hi.Tua pan Khamtung Gam mualtung lam ki lal leuleu hi.

Khamtung ih tun ciangin midangte-in ong ban nawn lo-in ei le ei Hausa-ukpi te-in ong uk uh aa liinna launa kinei nawn lo-in ngaihmuangtakin ki om hi. Thu leh la a om ciangin Ukpi, Hausate-in ei Zo ngeina om bangin thu ong khen uh hi. A hih hangin Ukpi ki ukna sung ah miim-seu taangseu, innsa-gamsa liang, khuai leh tuktha khaltha siah kipia ahih ciangin haksa kisa hi.

Tua hun lai-in Ukpite vaanglian mahmah uh aa mi khempeuhin zahtaakin, kikta-in amai ah liingin kidawi khiikhee hi. Sialpi vom khat ‘kaang hi’ ci leh “ Himah ei Pu, kaang mah ei” akicih hun ahi hi. Amau’ gen peuhpeuh anial ngam kuamah om lo aa, nial dingin zong kingaihsun vet lo hi.

Gamkeek Mangkang kumpi-in 1890 kumin Tedim ong halin, ong la uh hi. 1896 kum ciangin, amau upadi Chin Hills Regulation Acts tawh ong uk ta uh hi. A hih hangin ngeina lui bangin ukpi hausate mah ong zang lai uh aa, siah ki piapia lai hi.

Minam it ahangsan, nationalist : Zomi Namni thu i gen ciangin Zomite sung ah pawl aneih loh hangin taangpite adingin hangsan takin Ukpite ong ukdan leh siah ong kaih uh a deih lo mikhat pa thu i gen lohin kicing lo hi.

Ukpite hun lai-in vaanglian mahmah uh aa mi khempeuhin zahtaakin amai ah liingin kidawi khiikhee hi. Sialpi vom khat ‘kaang hi’ ci leh “ Himah ei Pu, kaang mah ei” akicih hun ahi hi. Amau’ gen peuhpeuh zuihding hi pah hi. Kuamahin nial ngam lo-in, nial dingin zong kingaihsun vet lo hi.

Song Theu kici mi khatpa-in taangpite haksatna angaihsut sak manin, Ukpite mai ah hangtakin maan asak lohna agen ngam pa ahi hi. Tua ahih manin Ujpite-in pakta lo hi. Deih lo uh hi.

Khatvei, Ukpipa-in “ Song Theu, na neh kai deldal pi tawh…” ci-in ko hi. Aw neem tak tawh dawng kik aa“ E-maw Pu, azawng daipamte tung ah, miimseu taangseu na kaih aa, na mat lohpipi, mi matsa ‘sai ka man, humpi-zaangsial kaman’ ci aa na kisialh kong nehpiikpiik natengin ka neh a tual hi” ci-in dawng kik hi.

Ukpite-in a khua, Kaptel pan hawlkhia aa tua hun lai-in ni nih tangciim paina Tualzang khua ah teng sak uh hi. Ahih hangin ‘hi’ asak bangin lau lo-in gen veve hi. Nikhat ni teh Tedim Vuandokpa tung ah a lungkim loh nateng va gen hi. Vuandokpi-in “Hih bang aa lungkim lo bangzah pha aa kuateng na hi uh hiam? “ ci-in adot ciangin, apawlpih ngam kuama om lo-in amah bek ahih ciangin, Vuandokpa-in “ Na gen teng maan hi. Ahih hangin nang bek na hih ciangin thu suak zo lo ding hi” ci-in gen kik aa, “ Bang deih lai na hiam?” acih ciangin, “ Ka khua lui ah ka ciah kik nuam hi” acih ciangin, ciah kik sak pah hi.

A nung ciangin ‘Ukpite langpan hi’ ci-in thu kibawl aa, Ukpipa gam sung panin kihawl khia leuleu hi. Tua lai-in humpi sahang a tamna taampi sung khe tawh kantanin ni nga ki paina, Kawl zaang, Tahan khua ah a zi ataneute tawh kiteng sak hi.

Kawl zaang ah lawi lo kho-in nuntak baihin nuamsa ahih hangin amaan lopi-in kibawlsiatna thuak nuam lo-in ciah kik ding ngaihsun veve hi. Mawlaik aa Menzi-pa kiang ah aciah kik nadingin ngetna lai khak aa, “Guta, mithatte nangawn akhua uah ki teeng sak hi. Kei guta-mithat ka hi kei hi. Banghangin ka khua ah teeng thei lo ding ka hi hiam?” ci-in lai khak hi. Mezi pa-in Pu Con Bik kiang ah “A gen bang amaan mah hiam?” ci-in dong hi. Con Bikin, “ Maan mah hi” acih ciangin a khua ah ciah kik sak hi. Tua hun pen, WW ll, Khamtung ah Japante ong tun tung lam, 1944 kum ahi hi.

Hih bangin ukpite bawlna athuak hangin, hausa-ukpite ami-in mudah lo-in, thuk kik ding do ding ngaihsun lo hi. Ki ukna leh siah kaihna adeih lo hi bek hi.

Khatvei, Phailengte-in Tedim vuandokpa tung ah “ Kauneite ci-in ong ko hi” cih thu tawh Ukpipa, khia uh hi. Mangkangte ukna sung ah tua bangin mi khat pepeuh, ‘kaunei, dawinei’ kici thei lo-in aci pepeuhin gap tuak hi. Tua thu azak ciangin Pu Song Theu va pai vingvengin, Ukpipa kiang ah “Vuandok zum ah, ‘bang hangin kauneite ci na hi hiam?’ ci-in ong dong ding hi. “Song Theu, ong gen hi ci-in” ci-in vaikhak hi. Um ngam pah lo hi. “ Hih ka bawlsiat pa-in banghang ong huh nuamding takpi hiam?” ci pipi-in adang kiphelh nading om nawn lo ahih ciangin, mang hi. Vuandokpa-in “ Bang hangin kaunei ci na hiam?” ci-in dong takpi aa, “Song Theu ong gen hi” ci hi.

Pu Song Theu kisam aa, “ Na gen hiam” acih ciangin,”Gen mah ing” ci-in dawng kikin, “ Khatvei a khua gei ka pai leh ahuan sung aa vaimim paakleh a dai paakte kau-in bawm lualua in, ‘hih te’n kau nei veh ee’ ka ci mah hi” acih ciangin thu ki bawl thei nawn lo-in athuteng mai diang aa Ukpipa gap tuak ding peng sak lian hi.

Amah haksatna apia, abawlsiate thuk kik ding, phu lading cih lungsim paai peuhmah lo hi. Ahuh theih bangin huh zawsop hi. A khua ah ukpite khual azin uh ciangin, a inn tung sak ngiat in, vok gawhin, taang zu luup in hoih takin zin do tawntung hi.

Hih Pu Song Theu’ ngaihsut daan leh nun daan pen a picing mahmah leh asaang mahmah philosophy, hi aa a ciapteh huai mahmah thu ahi hi. Midang tampite hi leh, “ Ong bawl sia pa maizum ding” ci-in lungdam ding hi. Aman va pai-in va huh hi. A zahtaakhuai ngaihsutna leh nuntakpih pomzia thupi khat ahi hi. Amah bangin thu ngaihsunin, ‘practice’ in zang thei ciat zen lehang Zomite ki-itna, ki pawltheihna khang mahmah ding ahih ciangin etteh huai hi.

Kawlgam ah Saya San nangawnin hibang ciang ‘asenh’, a piicing leh atangzai philosophy a neih leh zat khiatna kigen ngei lo-in nautang mipite-in panpih zuazua lai uh hi. Pu Song Theu pen amah guak bek ahi hi. Hih thu apiang taktak tangthu hi aa ciaptehhuai leh zuihhuai hi. I Zomi Nam Ni aa gen ding kilawm sa ka hih manin kong gen ahi hi.

Kawl Gamin Independence Ngah: Mangkang kumpi-in, Kawl gambup ngattakin ong uk uh aa nuam kisa lo ahih ciangin Kawlte leh mualtungmi tuamtuamte kipawlkhawmin suahtakna nget ding ki thukim hi. 1946 March-in Shan Sawbwa-te makaihna tawh kikupna amasapen kinei aa Tedim panin Ukpipa Pu Pum Za Mang, Falam pan Ukpi Pu Hlur Hmung leh Haka pan Ukpi Pu Kio Mangte kihel uh hi.

A nihveina kikupna 1947 February 12 ni-in Shan gam Panlong ah nei leuleu uh aa, Tedim pan Pu Pum Za Mang dam lo ahih ciangin, a ma taangin Pu Thawng Za Khup pai-in thukimna min thuh uh hi. Hih thukimna hangin Kawlgamin Mangkang ukna sung pan suahtakna kingah ahih manin, Feb. 12, 1947 nipen Union Day ong pian khiat ni ahi hi.

January 4, 1948 ni-in Kawlgamin Mangkang khut sung panin suahtakna ngah hi. A hih hangin, Khamtung gam ah, siahtung siahphei ki pia lai veve aa suahtakna taktak kingah bit lo asuak lai hi. Tua ahih manin, Khamtung gam makaite-in siah bei nading mitsuan pah gige uh hi.

Chin Hills Enquiry Commission : Suahtakna ngah zawh kha khat leh ni nih, February ni 5, 1948 ni-in Kawlgam kumpi’ theihpihna tawh Zo Vuanzi masapen, Pu Vumthu Maung, Chairman-in makai aa, DC, U Thein Maung Secy. in, leh Education Officer U Soe Win member-in Chin Hills Enquiry Commission kiphuan hi Hih Committee in Ukpite ong ukna vai tawh kisai nautaangte leh ukpite deihna kan dingin, khual zinin sawmvei vilvel kikuppihna nei kawikawi uh hi.

Zogam ah Democracy ong tung taktak : Zo Vuangyi Pu Wunthu Maung in Zogam mun tuamtuam pan taangmi (delegates) mi tampi samin Falam khua ah Feb. 19-22, 1948 sungteng kikupna om hi. Tua kikhopna ah Kawlgam Tamadah (Presdent) U Saw Shwe Taik leh Inquiry Commission-te zong kihel in mivekpi 5,000 val pha hi.

Ukpite ukna leh siah beina : Tua Falam aa kikhoppi sung, Feb. 20 ni-in Capt. Mang Tung Nungin Chairman sem in Tedim gam pan Pu Thang Za Kai-in i Zogam a, ukpite ong ukna a bei nadingin thu sung aa, Kanpelet aa Pu Hong Vum (Thang Mawng) leh Falam Laizo pan Pu Con Mangin thukimpih uh hi. Sawtpi aki kupnawi khit uh ciangin, Vuanzi Pu Wumthu Maungin, mee tawh khentat sak hi.

Ukpi tawh ki ukna bei-in ei leh ei democracy paidan tawh ki-uk dingin mi 5,000 dektak-in mee khia aa, ukpi tawh ki-ukna bangin pai lai ding a deih mi 17 bek ahih manin, tua ni pen Khantung gam ah a maan democracy paizia-in ki uk ding kipat ni ahi hi. Pu Wunthu Maungin, Pu Thang Za Kai’ thusun pen “Tangthu sung ah kiciamteh ding bek hi lo-in,Zomite mailam ong zuun ding ahih ciangin Zomi khatciatin phawk den huai hi” ci-in apahtawina Chin Affairs Council ah Oct. 9, 1950 ni-in gen hi.

Zomi Nam Ni Ong piang : Chin Affairs Council in Oct. 9. 1950 ni aa a meeting na uah “ Feb 20 ni, Chin National Day “Zomi Nam Ni” dingin kipsak uh hi. Tua ni pen Zogam buppi kipumkhat diamin hunlui ukpite thuneihna pan hun thak taangpi thuneih nading lam ah kihei ni hi hi.

Kawlgam buppi-in January 4, 1948 ni-in Suahtakna a ngah hangin Zomite-in tua zawh ni 47, kha khat leh alang khit, Feb. 20, 1948 ni aa kipan akicing suahtaakna taktak angah pan ihi hi. Tua ni pen tuni aa i muak Zomi Nam Ni ong pian khiatni ahi hi.

Zomi Nam Ni pen amasapenin, 1951 kum Feb 20 ni-in Mindat khua ah nasia takin kibawl aa Kawlgam Prime Minister masapen, U Nu leh ulian dangte-in zong ong muak pih uh hi. Tua ni aa kipan kumsim Feb. kha ni 20 ni-in Zomi Namni ki bawl den hi.

Video: Dr. Dongno thugenna @ Zomi Nam Ni 2017 Malaysia

Zomi Namni Kinawngkai Sak: 1956 kum pawlin Vuanzi Pu Za Hre Lianin, Zomi Namni pen Feb. 20 ni sangin, i Zogam ah phuitong pak a etlawm hun, December kha in laih ong sawm hi. Tua thu akizak phetin, ki lungso tek aa, Rangoon University Student Union pan sangnaupangte U Za Hre inn uumin lungphona kilak ahih manin ki laih nawn lo-in kip suak hi. Mipi muhna ah tua bang aa Zomi mipite thuneih nading ki pumkhat ni ki zahtaak mahmah aa phuitong pak hun tawh khek dingin kiphal lo ahi hi.

Gen. Ni Win’ Masalah hunpan galkap ki-ukna sung dongin atuamtuamin Zomi Nam Ni bawl ding khalna om den hi. Ahih hangin Zomi makaite hangsan takin ta lo uh aa 2013 kum aa kipan lungmuangtakin Kawlgam leh leitung mun tuamtuam ah i Zomi Nam Ni i bawl ciat aa lungdam huai-in etlawm hi. I Zomi Namni hoihtak i kemcing tawntung ding aa bei ni nei ngei lo ding hi. 69 veina Zomi Nam Ni, Kuala Lumpur, Malaysia Dr J. Suan Za Dong (Sydney, Australia, February 20, 2017)