Zomi leh Zogam – 4

Zomi leh Zogam – 4

Ciimnuai puah ni

1. Amun:

Ciimnuai khua pen Phaileng leh Saizang kikal, Saizang panin tai 1 agamlatna, Tedim-Saizang mawtaw lampi nuai a ciim pona nuai ah om ahih manin Ciimnuai kici hi. Saizangte lo zuatna hi-a, Pu Tual Kho Mang (Saizang Sukte ukpi) lomun leh akim apam teng ahi hi. Saizang panin khelam om a, nailang kipai hi. Motorcycle lampi dingin sial leng sunlang tha tawh apai thei ding hi-a, mawtaw lam sial ding hileng teng 20 bei leh tozo ding hi ci-in khuamite in gen hi. Ciimnuai pen Saizang gamsung ah om hi.

2. Khuasatna Thu:

Zomite tangthu ah Pu Zo suante sung panin Pu Song Thu (Cong Thu) leh Zomi pasal 40 in Kawlzang panin Munpi (Khampat/Bunglung) ah, Thangnual kantanin Thuamvum ah, Vaimual ah tuaksukin zangpitam ah, Ngatan luidung zuisukin Saizang khulpi ah kibusa uhi. Saizang khulpi ah tawlkhat abuk sungin khuamun ding en kawikawi uh a, AD 1200 kimpawlin Ciimnuai sat uhi. Ciimnuai ah khang 8 kiteng (Tawmging beh laibu) a, khang 9na ah Mangsum Thawmte in Ciimnuai panin AD 1506 kumin Saizang khua sat hi (Saizang Jubilee laibu). Pu Song Thu zipita Thawmte panin Pu Mang Sum dong Thawmte khang 9 kizom ukpi semin mang hi(Situi Pu Cin Sian Thang). Pu Song Thu in asanggamnu Nem Nep tawh tapa Guite nei a, Geltui ah ukpi semin mang hi ci-in agen om hi. Saizang khuasat AD. 1506 lak ah Ciimnuai khang 8, khang 1 kum 30 x 8 = 240 hileh, Ciimnuai khuasat pen AD 1266 pawl hiding hi. Rev. Dr. Do Sian Thang in AD. 1400 kimpawl hi ci-in Ciimnuai khuamun ah mualsuang phut hi.

3. Ciimnuai Puahhuaina Thu:

Tibet, Kawlgam -Takaung, Popa, Kawlpi, Khampat, Bunglung ah kiteng ngei hi taleh Zomite tangthu leh behthu pen Ciimnuai ten ciangin kilo thei pan hi. Ciimnuai khuasat Pu Song Thu leh pasal 40te suante behpianna pupite suak a, hih atengkhawmteng in pau khat, ngeina khat leh thuciaptehna thu leh la, lai khat aneih ciangin minam khat suakin, Ciimnuai panin Zomi kilawhna kician om pan hi kici thei hi. Minam dangte akhantoh ciangun apianna mun leh gam thu kanin Doctorate degree ngah uhi. Zomite in zong ipianna, Zomi ikilawh masakna Ciimnuai puahhuain Zomite tangthu kanhuai ta hi. Khangthakte in Zomite pianna Ciimnuai thu atheihna dingun tulai khangte in Ciimnuai puahin athu al akicingin ikoih ding kisam hi.

Lang Khan Khai
Zomi Times