Zomi leh Zogam – 1

Zomi leh Zogam – 1

1. Zomi kuate hi-a, Koiciang huam hiam?

2013 ZBC Khawmpi, Carson Baptist Church, Kalaymyo masiah Zomi leh Chin kizang khawmkhawm a, Zogam icih ciangin Chin State leh Zomi Chinte tenna munteng ihuamsak hi. Zomi adeihlote in zong Zomi acih uh leh Chin cihna hi ci-in sang thei uh a, tulai Chin kicinuamte zong Laimi, Khumi, Laizo… kicilel uhi. Eizong Zomi ikicih pen ZBC hangin angtang takin ikici a, Chin state hangin Chin zong asang theite ihi hi. ZBC pen Chin tawh kikhek nailo hileh Zomi akicite in Chin sang thei lai ding hi ci-in Chin Journalist Network makai Pa Bawi tungah ka gen ngei a, ZBC pan CBC khekna pen Chin gualzawhna leh Chinmi kiamna hi ci-in ka holimpih hi. Leitung kiukna ah Chin hilelin Biakna ah Zomi hileng akikhen nailo ding ihi hi. Ahi zongin ZBC kiteel simin Chin deilote in ahamtang bawl ciangin 1995 kumin ZBCM (TBA, TAB, ZBA, SRBA, TTBA, TVBA, KZBA, KVBA) in paikhiat ding geel a, TBA, TTBA, TVBA leh KZBA kigawmin ZBCM piang hi. ZBCM panin TBA tuam omin TBC hita hi. 2013 ZBC- Carson ah ZBC pen CBC tawh akikhel ciangin CBC ah KVBC lutlo-in tangdin a, Zomi akicithei sensen ZBCM, TBC leh KVBC-mimal 60,000 val om hi. Tuiphum ahilote zong ahun amun zuiin Zomi hing acite tuam om veve hi. Avekpi ahikei zongin atamzaw Zomi (zo) akici thei Kalay Diocese (RC), Tahan Section (AG), Tedim District (AG), SDA (Confrence + Mission) … cih leh Kawlpi, Tamu, Tedim pawlpi phualpizumpi aa aneite hideuh hi. 2013 khit ciangin 2014 Census hong om sawnsawn ciangin Chin leh Zomi(Zo) akikhensiang sitset tawh kibanga, igawm nop lai hangin kigamla semsem zawsop hi. Ei deih leh nial thu hilo-in Kawlgam thuluan tawh kizui hilel hi. Zomi kuate hiam cih tawh kisaiin Zomi hing acite hipah a, Zomi hing acinuamlote huam zolo,amau kihuamkha saklo uhi. Ei deihkaih tawh Zomi kila theilo a, ei deihloh thu tawh kinusia thei hituanlo hi. Kawlgam mi khat Kawlgam leh Kawlgam mihuam ah i’om leh Kawlgam mi kihi a, US citizen asuakte Kawlgam mi kici thei nawnlo, US gammi kici napi Zomi leh Zo minam hihna bei tuanlo hi.

2. Zomi Koipan Kila hiam?

Zomi pen Pu Zo Suante, Zolak aa atengte leh Israel Joseph suan Jomite cih nam 3 panin Pu Zo Suante hihang cih atamzaw in sang thei hi. Zolak leh mualsang aa teng khempeuh Zomi hilo hi. Israel tawh kizopna ineih hangin Israel Pasian biakna dawibiakna aa ineih simloh,ikimematna omlo hi. Pu Zo Suante in lai, pau leh ngeina atuam aneih ciangin Zomi ihi cileng kikhiallopen ding hi. Zo leh Zomi deihte akibang hi-a, Zo leh Zomi apomlo adeihlote minam tuam hipah ding hi. Zomi hihang ci-in igenpihna tawh ahihna atheite Zomi hi-a, Zomi hinapi Zomi akici nuamlote zong Zomi hilo thei hi. Banghanghiam cih leh amah Zomi kici nuamlo hi. Zomite ngaihsutna ah Zomi leh Chin kibang napi, Chin deihte in Chin nuai ah Zomi minam neu khatin koih uhi. 2013 leh 2014 khit ciangin Zomi akicite Zomi hita a, Chin tawh kikhen vilvel ta hi.

3. Zogam In Koiciang huam hiam?

Zomite akicite tenna munteng Zogam hi-a, Zopau bek akizatna mun pen Zomite Inntual hi. Lamka ah Zomi Council nuai ah minamneu tampi kigawm a, Mizoram gambup Mizo/Zomi kici a, Tamu, Khampat, Kawlpi, Tedim, Tonzang, Cikha gam mite in Zomi hi ung ci ahih manin Zomi hiin ateenna Zogam ci uh a, Zotung Zophei Asho zong genpihzo hileng Zomi, Shomi kihithei hi. Zogam Zomi cih aneiteng in Zomi hi ung ci uh a, atenna munte Zogam ci-in lo uhi.

Lang Khan Khai
Zomi Times