Hitler a sih khitciang a zawlta neih kithei pan

Hitler a sih khitciang a zawlta neih kithei pan

Leitung galpi nihna hunlaia Germany makai Adolf Hitler in French numei khat gaai in zawlta nei cih kithei hi. Hih thu pen leitung galpi nihna hunlai a English galkap khat ii’ diary pan in ki mukhia hi. Hih thu London pana kihawmkhia thukizakna Daily Mail ah zong nungkum in kisuaksak khin hi.

Leitung galpi nihna hunlaia galkap engineer khat Leonard Wilkes vankoihna sunga om dairy a tate nih Alan leh Gordon ten mu uh hi. Amah Leonard pen kum 1944 june kha a France gam Normandy a galkah masa ahi hi. Kum 76 pha in 1991 in sikhin zo hi.

Leonard in hoih taka a koih a dairy ah hibang in gelh hi: “September 30, 1944 in leitung galpi khatna hunlaia German galkap corporal Hitler teenna ah ka pai kha bilbel hi. Tua laia French numei khat in Hitler ta a paaina thu gen in tun a tapa pen French galkap ah pangin Germany do saan hi cih hong hilh hi”. Leonard tapa Alan in a pa’ vankoihna paih sawm mahleh a sunga dairy lamdangsa ahihmanin kemcing hi.

A pa in kidona tawh kisai bangmah genpih ngei lo ci hi. A pa dairy a hih bang thu kigelh zong kuaman kan khollo dingin ummawh hi. Ahizongin nikum February kha in France gam thukizakna khat LePoint ten Hitler galkap ahih sungin France gam koi hiam aw khatah zawlta nei mai thei hi cih suaksak hi. Tua khitciangin aman zong apa’ dairy a thu kigelh genkhia pan bek hi.

Hitler zawlta neihna pen French numei Charlotte Lobjoie ahi hi. A tapa min zong Loret ahi hi. A zawlta pen kum 1918 in piang a Hitler tapa ahihlam thei lo hi. A nu’n a sih dek kuan kum 1950 ciangin genkhia hi. A nu gen dan in kum 1917 akipan in Hitler tawh kithuah ci hi. Tua hun lai tak tua numeinu kum 28 pha ta hi.

Tua kum june kha in gai in a suah khit ciang Hitler pen mundangah kisuan ci hi. Kum 1930 ciangin Loret innkuan khatah amau ta banga kep dingin pia in tua innkuan pan hong khangkhia hi. Loret in Galpi nihna hunlai in khatvei German galkap khatin anu lai tawh kituam van a piakna thu gen hi. A nu sih khitciangin a nu lim tuanna ah Hitler min kigelh zong mu hi. Loret pen kum 1985 in kum 67 pha in si hi. N. Pautunthang