Zomi leh Politics

Zomi leh Politics

Zomite politics pen a hun tawh kituak in masawn toto aa, nidang in mipi leh mihon kikaih khopna te ah mun ngah lo himah leh tu in ahih leh lamngei politics pan in Online dongah hong tungta hi. I gam khantoh zia leh Policy kikhel tawh ton in Zomite zong politics lam ah mite nuai ah ki om vetlo hi.

Tuma kum 5 (Nga) lai in online ah Zomi Politics tawh kisai holimna zong lehang muh ding om vetlo cih ding phial hi. A hi zongin tu in ahih leh Zomi Forum, Zomi Political talk, Zomi Movement, ZCD Zum honna, Zomi Party tawh kisai thu kikupna leh mailam kalsuan zia dingte aa kipan sepna bawlnate ki-en, kingai theita hi.

Tu le tu in Zomte adingin online pen i parliament khat hong suak hi. Mun tuamtuam aa om Zomite in minam leh gam ading hoih sak leh gimna/ngelna te sungin na tampi tak mah ki semsem khinta hi. Tua hia, ut in ut takei lehang, sang siam in sang siam takei lehang, thu hoih thupha leh thusia zong tampi kingen ding hi. Hong thapia a om mah bangin, hong hawmthawh zong om ding hi.

Zomi mipil masa te’n thu ciin khat na nei uhhi. “I thu kinial sak ding, a mi ki enkhial loding” cih hi. Tua pen Parliament sung nasep zia ahihi. Gamlia te Parliament sungah thu a kikup uh ciangin kinial cih tak mah in kinial uh a, khedap tuam nangawn suah in kideng zawzen uhhi. A kilai phangphang zong tampi om hi. A dah huai phial ding in i ngaihsut hang, tuate pen parliament sungah a deihna uh khat le khat a kitel sak nop luat man uh leh mipi lungsim lak nading aa kineih na na hilel in a pua atun uh teh niangtui hawp khawm in hoih tak kiho lel uhhi.

A pualam a thupen mipi leh a nungzui mipi tampi tak in na mulo uh ahih man in a kilangpang mahmah ding nasa pah uh aa, mipi kikal na buai mahmah thei hi. Politics i cih pen kimawlna zong hi, galdona zong hi aa, kimawlsiam leh galdo siamte in a zo ahihi. Tua hia, ei Zomite zong khat le khat lungsim sunkhiatna leh sepna bawlnate pulakna pen media leh online ah kilim zat mahamh ta hi. Tua ahih man in lungsim picing tak leh pilvang tak aa, kimawlna neih theih ding kisam hi.

Gensiatna leh kinialnate pen a omding mah ahihi. I gen khat hoih kisa ngai pahpah mawk leh hong Ukpi vai mahmah ding hi. Bang hang hiamcih leh mihing pen a kicing khin cih omlo i hih man in kikup diamdiam leh i thu aki kelki zel zong i hoih sakna leh i deihna tatak a kitel khiat nadingin aw sang leh khat veivei ciang khat le khat kiko, ki tawng in kibuai ding pen thu sia hipeuh mah lo hi.

Khat veivei i ki nial zek kei leh pen minam vaiah akikhauh pai nailo kihi zaw aa, aki mudah hizenzen lo hihang. A hizongin a hoih bek thei in online parliament a ei kinial niloh tawh zogam hong paalun pak loding ahih man in Politics tatak kimawl aa, gambup parliament Nyipitaw ah i makaite in goal a khum zawh nadin, bangci leng Zomite in Myanmar politics ah galzo thei ding cihte lam kikum in thapia in i minam leh i gam adingin mapang ciatni.

Philip Khaipu