Namsia tawh akibang CNF/CNA te nasepna

Namsia tawh akibang CNF/CNA te nasepna pen,

1. Namsia pen nuntakna nei ganhing khat ahihna tawh kikhoih nuamkhol lo hi.

2. Ahi zongin, ihmu theilo lianga ici isa hong pehsak a, isi hong dawnsak ciangin kideh lumkha hi.

3. Nuntakna nei mihing khat ahihna tawh si le nai luangin kikap pah phangphang ding cihna hilo hi.

4. Gualzawhna lampi pen anuai a nam nih siksan lehang bangci nasa uh,

a. Zomi min tawh Chin State bup Missionary nakpitak in khah ding,
b. Hakha, Falam, Mindat khuapite a kipan Chin State bup ah Khuapi khempeuh ah kumpi nasem ulian, thunei, zalian, pilna tawh makaih zo ding Zomite tampi kipantah lehang.

Leitung ah mihingte in lungkim omlo in, ei angsung, ei thuneihna, ei khutsung cih vive kingaihsun hi. Mi khutnuai peuhmah a ut i om kei hi. Ei sang pilzaw, neizaw, siamzaw le picing zaw ahih manbek in anung akizui ahihi.

Keibang lianbel kapilna, kaneihsa, ka thuneihna in cin hileh Leitungbup genloh Universal khempeuh a uk nuam mi khat kahihi. Tua mah bangin, CNF tenzong azawh tantan uh tawh hong keek toto ding ahihi.

Ei lampan in, banglampi tawh thuneihna ngah thei ding cih ngaih sut huai hi. Pilna tawh mainawtna ah,

1) Political Party,
2) Kumpi nasem unliante,
3) Biakna lamah Pasian nasemte,
4) Zomi sungah mihaute,
5) Zomi sungah siamna tuamtuam neite in ih omna ciat panin, Zomi tawisang photphot in, isepna tek panin kipumkhat in kalsuan photphot lehang tulaitak a amau sep luapluapte pen sawtpivei kimang ding nasep hilo hi.

Naki meltheih luatloh khat na inn sungah honglut phei in, na ankuang/anbel hongluh guapguap leh notkhia pah samlo ding hiteh. Khanglui ten, “Kawlzong tuidam in kiho” ci hi. I lungkim lohna lah khiat ciangtawh koih phot hithiat ding hihang.

Hibang thu igam sungah hongtun ciangin, ei le ei in thuneihna ineih loh lam nakpi in hong kilangkhia hi. Tua ziakin, avui atang cihna hipah samlo in, ih omna ciat ah pilna tawh ankuang umzote ih suah photphot ding thupi mahmah kasa hi.

Gul bangin pilvang takin hak gige phot dihni. Zomi akua mapeuh ki lungso suah lua naikei phot ni. Ei lamah Pasian hong om ding, acidam minam ihih ding leh isep ibawlna ciat ah nek le dawn, silh le ten kicing amuzo minam ihih ding kal masa ahihi.

Tua ciangin, Kachin State bangzong enkak vat hilehang, KIA ten luangkham in na sem uh a, Kachin Biakna Kipawlna ten khak tan den uhhi. Ahi zongin, hun hong pai toto in, hong nasiat luat ciangin, Biakna Kipawlna tenzong KIA full support piata uhhi.

WZC-ZIA; ZRC cihte pen athu tawh kizui a, gamtang dinga minam sungah nasemte ahih manin, ipanpih zokei zongin, gensiat luakluak ding hilo a, koih khinkhian ding ahihi. Political Party, Biakna Kipawlna le Avui atang tawh kipawlna te asimtham in kizop dimdiam a, Zomi ading full support ikipiak ding thupi ding hi.

Dal Sian Hung
Kuala Lumpur, Malaysia.

Email: [email protected]
Facebook: [email protected]