Zomi Innkuan USA – Zomi International Conference (ZIC2019KL)

Zomi Innkuan USA – Zomi International Conference (ZIC2019KL)

Leitungbup Zomi-te Minam Khawmpi
Zomi International Conference
Kuala Lumpur, Malaysia
2019 Zomi National Day

A Thu (Statement)
Zomi Innkuan USA Kipawlna vaihawmna, Zomi Association of Malaysia kipawlna leh Malaysia gam sung a om Zomi makai, khuanu khuapate innteekna tawh 2019 kum Zomi Nam Ni hun sung tengin, Malaysia Gam, Kuala Lumpur khuapi ah amasa pen Leitungbup Zomi-te Minam Khawmpi (Zomi International Conference – ZIC2019KL) kibawl ding hi.

Zomi Innkuan USA (ZIUSA) Kipawlna in United States of America Gam sung mun tuamtuam a kiphut Zomi Innkuan kipawlna (49) teng akigawmkhopna phungpi ahi hi. ZIUSA Kipawlna huam sung ah Zomi mimal vekpi (15,000) kiim kipha hi.ZIUSA Kipawlna, Board of Directors pawl in tu laitak a Zomi-te dinmun sittel in, a khinkhai ciangin gam leh minam thu tawh kisai in lung hihmawhna tampi kinei hi. Minam picinna leh thuneihna ngahna, gam suahtakna leh khantohna, khua leh tui nopsakna leh daihna, cidam ludamna leh pilna siamna lam cihte ah kiim leh paam a minam dangte sangin tuantual zaw in kimu hi.

Tuaban ah, Zomi-te in minam khat, si khat sa khat, sanggam unau laizom khat hihna tawh, gam leh minam vaite kikupkhopna, vai hawmkhopna, ma pankhopna cihte kitangsam kisa mahmah hi. Minam buppi tawh kisai thu leh late kikumkhawm a, minam maban loma a kiton theihna ding hanciamna leh madawk in mapanna kisam kisa hi.Tua ahih manin, Zomi-te gam leh minam maban in mai anawt theihna dingin ZIUSA Kipawlna madawk in tanu asem dingin kihanciam a, hih Khawmpi bawl ding akivaihawm ahi hi.

Khawmpi Ni leh Hunte

• Zintun Ni : February 16, 2019 (Saturday) 3:00PM (Check-in)
• Khawmpi Ni Masa : February 17, 2019 (Sunday) 9:00AM~6:00PM
• Khawmpi Ni Nihna : February 18, 2019 (Moday) 9:00AM~6:00PM
• Khawmpi Ni Thumna : February 19, 2019 (Tuesday) 9:00AM~2:00PM
• Zomi Nam Ni : February 20, 2019 (Wednesday) 10:00AM~3:00PM
• Zinciah Ni : February 21, 2019 Thursday) 11:00AM (Check-out)

Khawmpi Mun

• Mandarin Court Hotel
• 55 Jalan Maharajalela
• 50150 Kuala Lumpur
• Malaysia

Khawmpi Mipi (Attendees)

Leitungbup Zomi-te Minam Khawmpi akah dingin anuai pawl tuamtuam panin Zomi Makaite leh Tangmite kisam hi.

• 1. Political Parties
• 2. Revolutionary Organizations
• 3. Civil Society Organizations
• 4. Non-Govermental Organizations
• 5. Professional Organizations
• 6. Religious Organizations
• 7. Leaders, Intellectuals and Experts
• 8. News & Media

Khawmpi Vaihawm Pawl (Conference Organizing Team)

• Project Director : Board of Directors, ZIUSA
• Project Executive : Executive Director & Officers, ZIUSA
• Project Sponsor : Zomi Innkuan USA
• Host (Innteek) : ZAM Kipawlna & Malaysia Zomi-te

Thukipatna (Background)

1. Zomi Innkuan USA (ZIUSA) Kipawlna’ Ngimna Bulpite sung ah Zomi-te in minam picing khat asuah theihna ding cih thu lianpi khat kihel hi. Tua ahih manin ZIUSA Kipawlna in Zomi Movement ah ma kipang in, tha kipia tawntung hi.

Zomi Movement (Minam Maban Kalsuanna) cihciang in 2016 Zomi Khawmpi USA, Political Forum hun sung a kithuminna tungtawn in anuai a bangin kikhung hi:

Zomi-te in leitung minam tuamtuamte lak ah minam kician, minam picing khat hihna tawh Minam Thuneihna Bukim angah theihna dingin hanciamna, mapanna, vaihawmna pen Zomi Movement kici hi.

Minam Thuneihna Bukim cihciang in United Nations Declaration on the Rights of Indegenous Peoples thubulpi sung a Tualsuak Minamte Thuneihna teng gennopna ahi hi.

2. Zomi Movement alawhcin theihna ding ahi zongin, Zogam akiphuh zawhna dingin leitung muntuam gamtuam a om Zomi Minam Makaite, Gam Makaite, Minam Kipawlna Makaite, Khua leh Tui kipawlna Makaite, Gam leh Minam tawh kisai Mipil Misiamte kaikhawm in Gam leh Minam Thu Kikupna – Leitungbup Zomi-te Minam Khawmpi (Zomi International Conference) khat kibawl ding hi.

3. Leitungbup Zomi-te Minam Khawmpi ah Zomi Innkuan USA Kipawlna in Zomi-te Gam leh Minam vai tawh kisai mailam kalsuanzia ding thusunna khat kinei ding hi.

Khawmpi Thubulphuh (Conference Objectives)

1. Zomi-te in minam kician, minam picing khat a hihna tawh Minam Thuneihna Bukim angah theihna ding, (To set foundation for the installation of Self Determination of Zomi as an Indigenous People)

2. Zogam sung – sak leh khang, sim leh mal, tuipi galkhat ah Khantohna Bukim, Zomi-te a’ding daihna leh bitna a om theihna ding, (To implement Political, Economic and Social Development in Zogam and to maintain Peace and Security for Zogam)

3. Gam leh minam kivaipuakzia (Political Status) kician khat nuai ah sak leh khang, sim leh mal, tuipi galkhat a om Zomi-te kigawmkik theihna ding. (For the re-unification of Zomi as One Nation under an internationally recognized Political Status)

Khawmpi Lam-etna (Conference Expected Outcome)

1. Zogam leh Zomi-te a’ding in madawk in ma apang Party, Pawlpi, Kipawlna, Makai Mipil Misiamte maitang kimukhawm in, ankuang umkhawm a kimeltheihna om ding,

(Meeting face to face, introducing and recognizing one another to build mutual respect among leaders of Zomi Political Parties, Revolutionary Organizations, Civil Society Organizations, Non-govermental Organization, and Political Scientists, Intellectuals, Experts, Advocates, etc.),

2. Zogam leh Zomi tawh kisai Ngimna tuamtuam anei Zomi Party, Zomi Pawlpi, Zomi Kipawlnate in a Ngimna teng uh sungkhawm in, Maban kitheihpihna nei thei ding,

(Sharing and contributing of Objectives, Goals, Demands, Charters, Policies and Principles on Political, Economic and Social issues of Zogam and Zomi),

3. Gam leh Minam tawh kisai Zomi-te Mabante khat leh khat kitukalhlo, kithuaplo, kikelkilo a, loma bangin pangkhawm in, lampi khat tonkhawm thei ding,

(Collaboration on each Political, Economic and Social Policies, establishing cohesion among major key players, reorientation and repositioning of stake holders on Zogam and Zomi),

4. Gam leh Minam tawh kisai Ngimna tuamtuamte lemtuah a, Minam khat hihna tawh ahuamkim in Ngimna leh Maban kiciante kikhungkhawm thei ding,

(Policy Development and Coordination on Political and Economic Goals of Zogam and Zomi),

5. Zogam leh Zomi tawh kisai thute kithuzakna, kikupna khang semsem ding a, pawl tuamtuamte kizopna leh pankhopna hong om thei ding hi.

(Promoting Consensus Building, establishing of Networking, advocating of working together for Zogam and Zomi).

Khawmpi Hun-geelna (Conference Tentative Schedule)

1. Khawmpi Ni Masa Ni (Day #1):

• (1) Introduction, Opening Remarks, Key Notes on Conference
• (2) Presentation & Proposals
• (a) Zomi Innkuan USA
• (b) Political Parties
• (c) Revolutionary Organizations
• (3) Open Discussion, Questions & Answers

2. Khawmpi Ni Nihna Ni (Day #2):

• (1) Key Notes on Day #1 Discussion
• (2) Presentation & Proposals
• (a) Civil Society Organizations
• (b) Non-Governmental Organizations
• (c) Professional Organizations
• (d) Religious Organizations
• (3) Discussion & Proposals
• (a) Leaders, Intellectuals and Experts
• (b) Zomi Innkuan USA
• (4) Open Discussion, Questions & Answers

3. Khawpi Ni Thumna Ni (Day #3):

• (1) Key Notes on Day #2 Discussion
• (2) Consensus Building
• (3) Drafting Master Plan for Zogam and Zomi
• (4) Conference Resolutions

Theih ding thute

1. Leitungbup Zomi-te Minam Khawmpi akah dingin dinmun tuamtuam zui in, Zomi Makaite, Tangmite, Uliante, Mipil Misiamte leh Upate tung ah Sapna Laipi kipuak hi.

2. Khawmpi akah dingin akisam Tangmite’ lamsap, annek tuidawn leh zintunna ding vaihawmnate Sapna Laipi sungciat ah kitheisak hi.

3. Khawmpi tawh kisai vaihawmnate a kisapna leh a hun zui in ZIUSA Kipawlna, Board of Directors pawlin puahpha, khel, behlap ding hi.

GSKhup (Go Sawm Khup, Pu)
Chairman
Board of Directors, Zomi Innkuan USA
December 19, 2018. Tulsa, Oklahoma.