Zomi hih nuam semsem! ~ Hau Za Cin

Zomi hih nuam semsem! ~ Hau Za Cin

Mun tuamtuam ah ZOMI KHUADO thu, Zomi te khantohna thu, Zomi te zinsuk zintohna thu, lawhcinna leh gamkekna thute kiza ziahziah a, groupmail hong limci semsem hi. Zolai gelhdan leh Zolai gawmzia zong hong kibang hiaihiai ahih manin Zomi hih nuam semsem hi.

• Taang: No Khuado na zangkhin uh hiam?
• Lia: Nang tawh loin Khuado kizang thei se diam. Nang na zat nai kei leh kei zong a zang nailo hi ning e…
• Taang: ‘Ngaihno’ kong cih pah ding lah zum mai veng in, na zadah phial tam maw…
• Lia: Hong it hong ngai takpi na hih leh na sinlai kulthuk hong leel mai ve…

Korea ah Zomi pastor 40 val bang Church Growth Conference va kah thei cih i zak ciang i lungnuam a Zomi a hong bawl Pasian min i phat hi. Pasian in amah a bel mite thupha pia hi acih bangmah in Zomi pastor hizah leitungbup huam a Pasian nasemte kimuhkhopna ah zong milip tampi a pha nailo Zomi nangawn hong kihelsak ziahziah ahih manin lungdam hang. Tua bek hilo, Korea pan inn lam zuana ciah a om laitak in Korea zuan maha lengkhia om cih iza hi.

Vantung, huihlak ah Zomi te amau tuanna vanleng ciat tawh sak leh khang zuan in kipelh ziahziah cih khawng i zak ciang i pu i pa lamsa, neihsa hi hetlo Topa Thupha i saan bekbek hang hi ciin ‘kei ka ngaihsun hi. Australia lam zuana lengkhia a om laitak in Australia pan inn lam zuana ciahto om a vantung huihlak ah kipelh ziahziah i cih ciang, leilak ah a taai mawtaw nangawn ut banga a zang ziahziah zo nailote eite hong bawlpa in thupha hong nak piak zen si e ka ci hi. Sia Lianpi laphuak: “A dawn lamah hong koihlo in a bul lam ah hong koih hi” cih bang hong ngaihsun sak zuaizuai hi.

India pan Kawlgam pan leh tuipi gal pan laitan zo, degree ngah thak cih bang i zak ziaiziai ciangin ZOLAI hong bawlsak Cope Topa in a om mun pan na nui ciuciau inteh maw ka ci hi. Zomi leh Zomi degree laitan kihilh in English tawh leitung pilna kisinsak ziahziah cih i zak ciang nak lungdamhuai si ka ci hi. Zomi leh Zomi English mah tawh international seminar leh pilna siamna kisinsak cih khawng pen ‘Leivui panin hong laamto’ pa hong geelsak hi a, leivui tawh kineh nawnlo in a sanglam, a tung lam pan a ensuk dingin Topa in hong zang nuam hita hi cihna hi.

Tua ahih manin ei hong bawlpa i mangngilhloh ding, eite kua hi a, koi lai pan kipan hi a, bang hanga hiciang tung thei i hiam cih i ‘kipatna’ ‘hong kitawhkhiatna khukte’ i mangngilhloh ding ahi hi.

National Director, National Secretary, National Consultant, cih leh a tuamtuam National level (gam khat sungah a lianpen tutphah) a tung Zomi bangzah hiam i om theih khawng ka ngaihsut ciang Topa hong laptohna leh hong kepna hang hi ciin ka ngaihsun hi. Hun khat laiin leitung huihsia leh huaiham vaihawmna te in i tenna, i gam i lei hong zeel ngei himah leh tuni ciangin Topa mah in hong honkhia a, hong pusuaksak in, hong kaikhia a, hong lamto in ama nasem dingin hong zangta hi. Eite mitmuh ah thupi a, Topa khutma ahi cih i phawk hi.

Lo khawh singpuakna pan suk leh to zuia khualzinna te hong bei hiaihiai a, khawhsa, suksa, sawpsa bek hilo in a minsa na ngawn hong nesak in, khut buan cih bang om hetlo tanghial in nek leh dawn hong nesakta hi. Balpi, kaithum, vaimim nekna khut buan leh niin cih bang om nawnlo in sikkeu leh ciangkang tawh hong ne sak ziauziau a, muk leh kam nangawn sil kullo in siang sitset in zol hilhial in kivakta hi. Tua banga nungta kha Zomi khempeuh mi hampha i hi a, Topa hong gelsak hi ding hi ka ci hi. Tua bang ahi zo nailo zong omlai ahih manin amaute huh ding, kaih ding, lapsang ding, geelpih, seppih ding pen nang leh kei mawhpuak ahi hi.

Thumaan leh thutak a omlohna gam ah mipite kisia in gam leh lei khangto theilo hi a cih mah bangin Zomi te tenna leh Zomi te lungsim ah thumaan leh thutak bek mah i thupi bawl den ding ahi hi. Thumaan a gum ngamlo, beh leh phung u leh nau ciang a ngaihsun a thudik thumaan a khuallo te amau innsung, vengsung khua leh tui ah khantohna omlo ding cihna hi a, Zomi buppi khantohna ding i ngaihsut leh Zomi bup in thudik thumaan i gup ngam ding, thuman thudik tawh na i sep ding, kal i suan ding, vai i hawm ding cihna hi. Angsung khualna leh ‘kei, ko, ko innkuan, ko beh, ko phung…’ cih thupisak luatna mun ah khantohna kicing om thei ngeilo ding hi. Banghang hiam cih leh thudik thumaan in mihing deidan neilo a, innkuan, beh leh phung, minam deidan lo in universal ahi hi.

Tua ahih manin lungdam hun ciang Zomi khempeuh lungdam khawm liailiai ni. Sep ding a om ciang zong sem khawm diamdiam ni. Nek ding a om ciang a ne masa nuam pen, a kicinglah pen in pang kei ni. Thudik thumaan gup ding a om ciang a man pia ngam ni, gen ngam, sem ngam ni.

Mun tampi ah Zomi Khuado kizangkhin cih i za a, mun tampi ah kizanglai ding cih i za hi. October kha pen Zomi te ngeina ah Vaimim lak khit, Taang lak khit ahih manin annlak khit pawi hitakpi a, Khuado Kha ahi hi. Khuado Khapi zong a liik ding hita a, a vangtaang ah Zomi khempeuh nuamsa in i nui hiuhiau hi. Annlak kizo, nek ding kikhol, kumkhat khom ding maw kum lang khom ding cihte kingaihsun masa nailo in nek ding i neih hong pia pa tungah lungdamkohna leh lungdam mana gualnopna hun ahi hi. A nuam thei pen in gualnop bawl ni. Sa go ni, ann lim huan in nekhawm ni. Tui lim zu lim dawn in nuamsa hi. Kum khat khatvei i ngah hih hun nuam lungdam hun ah nuamsa in aam mahmah ni.

[Christian i suah zawh Christmas in hih Zomi Khuado pen hong liah pian tawh kibang hi. Christmas pen lungdamna ni, nopna ni, eite hong gum dinga hong pai Jesu pianni ciin kitang hi. Ahi zongin Christmas pen kha lam nuntakna ding hi a, Khuado pen nisim nek ding dawn ding ngahna hanga lungdamna hun, gualnopna hun ahi hi.]

Singapore a Zomi omte in zong ZOMI KHUADO zat ding gel uh a, Zomi Engineers te in nek leh dawn sik ding uh hi, kici hi. Kei bel ka lungdam khin. Zomi Engineers, Zomi Nurses, Zomi IT kipawlna cih bang hong om ciangin ka naak vang hanhan hi. Banghang hiam cih leh amau Engineers teng, Nurse teng, IT siam teng amau leh amau pilna theihna siamna kihawmtuah bek hilo in ei Zomi bup in zong amau kiang pan hong leetkhia thuthak te i noptuampih a, amau khateh neng bekbek zong mipi in kinoptuampih hi. Tua manin Zomi siamna tuamtuam kipawlna, kikholhna, kilawmtaatna panin hamphatna tampi i ngah hi.

Zomi Nurses te hong luikhiat uh PIZZA bang nak lim hiven! A namkim kine khin zolo hi lai ei! Thank you Zomi Nurses!! Better than never cih bangin lungdamna tu’n hong pulak pan ing.

I gennoppi pen bang hiam cih leh Zomi te i kipawlkhop ciang na lianpipi kisem thei a, i kituambawl, i tuampai ciangin kithanem hi. Zomi hong it pihlo te in i kituambawl ding, i kitot ding, i kingaihloh ding, i kikholhloh ding, i kihuat ding, i kiholoh ding khawng na hanciam mahmah ding uh hi. Kiho kei un, kikhawl kei un, sem khawm kei un hong ci tangtanglo ding uh a, ahi zongin i kikholh khak ding lau in a nawngkaisakna ding hong geelpih kha ding uh hi. Tua mun ah Topa hong piak pilna leh ngaihsut siamna zanga ‘SATAN’ ci a i nolh ding ahi hi. Zomi te hong kipawlkhawmsaklo pen Zomi mah hilo a Zomi hong haza, hong itpihlo, hong khuallote ahi hi. Zomi teng kikhawl in kipawl le hang kua mah in hong khen zolo ding hi.

“Ak nangawn kitu nawn kei leh ka ci hi” – Rev. Go Za Nang

Ahi zongin Zomi sungah ai tuam hamphatna ding a khuallua i om khak leh tua in mipi thadahna piangsak thei hi cih zong mangngilh kei ni. Mipi in makaite in amau hamphatna dingin hong zang uh hi cih ngaihsutna a neih khak uh ciang mipi thadahna piangsak thei hi.

Muntuamtuam ah om Zomi te Khuado Thupha hangin Khuado Anlak Pawi lungdamna khutlen in kong hopih hi. Topa in mai kum leh kum tampi Khuado hun ah ANN lak ding tampi hong pia in, a gahpha zaw, a limci zaw, a phungpha zaw mun leh mual ah Amah tawh kituahin thupha namkim tawh hong vuk laita hen. Hau Za Cin (Phuitong Liim)