Zomi D.C News: Graduation Ceremony of Tg. Pum Hen Thang

Zomi D.C News: Graduation Ceremony of Tg. Pum Hen Thang (Hen Bawk), Bachelor of Science in Mechanical Engineering, UMCP

Washington D.C Area (DC, MD, VA) kiim aom Zomite Pasian in leitung pilna lam (Secular) ah thupha hongpia in, degree ngah hong kibehlap sak toto aa, tu in zong Pa Kam Tung Nung & Nu Hau Dim te Tapa, Zomi Innkuan Washington D.C Area (Zomi D.C) Kipawlna ii E.C member leh Auditor khat ahi, Tg. Pum Hen Thang (Hen Bawk) in University of Maryland College Park (UMCP), Maryland, USA pan December 19, 2015 ni in Bachelor of Science (B.S) in Mechanical Engineering tawh Degree limci mahmah hong ngah thei a hih manin Zomi D.C kipawlna pan kilungdampih mahmah hi.Amah pen Prince George’s Community College pan Associate of Degree in Engineering a man khit zawh ciang UMCP ah zomto in B.S Degree hong la thei ahi hi.

I biak Pasian ii hong panpihna tawh D.C Area om Zomi te laak pan, D.C Area sung Sangte pan leitunglam (Secular) Sangman (Degree ngah): Master Degree (M.S), Computer Information System – 1; Master of Science (M.S), Technical Management (Engineering) – 1; Master of Arts (M.A), Finance – 1; Bachelor of Science (B.S) , Electrical Engineering – 2; B.S Mechanical Engineering – 5; B.S, Business Administration/Management – 3; B.S, Accounting – 2; B.S, Nursing – 1; B.S, Biology – 1 cih te kiom ta bek thamlo in, Federal Government leh Private Company minthang tuanmtuamte ah nasem zong kiom ta ahih manin Topa min phat hang. Topan Zomite leitung pilna lam ah thupha hongpia semsem ta hen.

Zomi D.C News group

Information Department

Zomi Innkuan Washington D.C Area (Zomi D.C)