Zomi Ading Thukhualna maw? Thuzawhna?

Zomi Ading Thukhualna maw? Thuzawhna?

Zomi ading Hiphop ci-in ih nau ih tate pawlkhat awng-awng uh hi. Hiphop in hong thuzawh sangin Zomi ading Zomi mah in hong thuzawh photphot leh ih lunggulh masa hi. Tua kum zalom 21 sung, a diakin kum 2014 – 2015 sung Zomi te adingin thukhualna sangin thuzawhna kisam hi. Zomi min tawh hih zah ciangin thuzawhna hong neih pih ih makaite hangin angtang mahmah hang. A mei-am kilawhlawh ta hi. Hong mut pha mahmah un. Kuang ta ding hi. Thuzawh phot phot peuh lehang ih thukhual dan ding na thei lua uh hi.

Shianglin siamna maw? Zobuan hanta?

China Sente Shianglin tai siam mahmah a, ahi zongin kilai taktakna ah kizang thei lua lo hi ci-in Bruce Lee in gen ngei hi. Kilaitaktakna ah kitup gawp (boxing), Kibuan gawp (mix martial art) te bek kizang thei a, video sunga siam zalzalna le kilum let zalzalnate kimang thei lo hi. A siam tuaktuak a hatzaw zaw in zolai hi. Siam zalzal sangin hat mahmah ding na thupi zaw hi. Hat suk peuh lehang kinawk zo hi. Kawlte Chinlone a khe tung ciang vuah kia sak loin kimawl siam zalzal mahmah a, ahi zongin SEA game ah a khatna ngah zo peuh mah lo uh lo hi. Zomi te Sen (China) video in hong bum khin lua mahmah ahih manin Sente’ siamna ih muang mahmah hi. Ahi zongin UFC kibuanna khawng ah Sente khawng a kihel sunsun in kuamah hong zawh loh ciangin ih heh bang suak liang hi. Mikang te mah na hat uh hi. Negro te hat zaw kan lai hi. Sen siam zalzalte in kibuanna taktak ah kuamah zo khol lo uh hi. Jetli bangdaan-a siam ih sakte in kuamah hong zawh loh uhteh ih heh bang a suah liangna pen a hi taktak thute in hong thuzawh masa loin, a hi zalzal tengin hong thuzawhna tawh ih kalsuan masak hang ahi hi. Tua ahi zalzalte in a hi taktakte hong zawh loh ciangh lamdang sa-in ih thang bang a paai liang ahi hi. Ahi zalzalte’ hun hong bei hiai-hiai ta dinga, ahi taktak Zomite Pasian’ min tawh gam le minam adingin hong palh khia ta ding uh hi.

Siamna sangin hatna, Shianglin siamna sangin kiZobuan, Thukhualna sangin thuzawhna kimang thei zaw hi. Tuamah bangin Lungdamna thupuak nasepna ah zong Kupna (dialogue) sangin Hilhna (preaching) kimang thei zaw hi. Thupha ngah nop mana piakkhiatna ah thupha om lo a, piakkhiat ding ahih mana piak lelna ah thupha om hamtang hi. Lungdamna thu pen kup ding hi kilkel lo a, hilh ding hi. Lungdamna thuhilh thei lo thuhilh nuam a tam luatna pen ih minam bup adingin a lauhuai mahmah thu khat hi leuleu hi. Tua ahih manin Lungdamna thu ih tangkona ah daan (method) tuamtuam zangin ih siam zalzal hangin mimawh mi khat a kikhel sak pen Topa’ kammal Lai Siangtho bek mah ahi hi. Lungdamna thu Lai Siangtho thu pen a thei nai lote tawh kikup ding hi lo a, hilh ding, lungdamna thu gen ding ahi hi.

Kikup pih lecin, biakna dangte in zong hong gen ding uh nangsangin hau zaw dinga, a tawpna ah “hoih hi” ci-in kisansakna , a kibangteng gawmkhawm-in a kibatlohnate gen lo bek lo paikhia nusia-in dikzul sa-in na inn zuan in na ciah lenlen ding loh ngal bangmah na muh beh kei ding hi. Tua ahih kei leh lah a kitawngsa in na kikhen ding uh hi. Lungdamna thu zeek zia pen hilh ding ahih manin Lai Siangtho a hilh thei Lungdamna thu a genthei dingin Lai Siangtho sang zong a kilawm ciang khat kah pel loh phamawh hi. Lai Siangtho sangkah Lungdamna thugen ding khat a pianthak loh pahmawh hi.

Lungdamna thu pen Kupzia tawh hi loin Hilhzia bek tawh hi zaw hi. Thuhilhna (preaching) pen kinial thei lo ahih manin Pastor pawlkhatte in thuhilhna pulpit tung pan a ut teng gen in, mi kapkap thei leuleu mawk uh hi. Pulpit tung pan thu kigen kinial thei lo hi. Tua ahih manin Pulpit tung pan thukigente in Lungdamna thu a suut theih kei, a gen ngei kei uh leh mipite sung pan kigensiatna phunna hong khang ding hi. Tulai thuhilhsyate’ thuhilh ngai lehang “Christ and Him crucified” zo peuh mah lo mawk uh hi. Thuhilhna (preaching) pen a kinial kik thei nawn lo ding daan (method) khat nei ahih manin Pastor gina lo pawlkhatte in Pulpit tung pan Lungdamna thu hilh nawn loin suangdalama’ lungkim lohna phulakna pulaak nading hun hoih pi khatin nei mawk uh hi. Dah huai mahmah.

Ahi zongin tua a kinial thei lo thuhilhna tawh thu taktak hilh lehang biaknadangte in zong nial kik loin hong um ding uh a, piangthak ding uh hi. Kup pih lecin hong nial hamtang ding hi. Kiholimna (open air/discussion/question and answer) cihte bel a om hun om sam ven cin. Lungdamna thu tangkona genna, gammial nasepna ah genna, hilhna hi a, kupna hi ma sa lo hi. Kupna tawh na pai leh na lel ding hi.

So faith comes from hearing, and hearing through the word of Christ (Rom. 10:17). Mawhnei mi khat in upna hong neih theihna lampi pen lungdamna thu zakna pan ahi hi. Tua lungdamna laigil pen Khrih ii kikhai lupna thu le thawhkikna thu ahi hi. Mite in na thuhilhna tungtawn in Lungdamna thu taktak a zak ding kisam penpen hi. Kinialna hi loin zaksakna hi. Kikupna hi loin hilhna hi. Thukhualna hi loin Thuzawhna hi.

Evan. Suang Dal