Zomi ading pilna sutpi ~ Cing Pum Neam

Zomi ading pilna sutpi ~ Cing Pum Neam

Thumasa
Zo innpikhat alam ding hilehang innkhuam tampitak kiphut a, tua innkhuam khempeuh sungah SUTPI pen athupi penpen innkhuam, innpi akipna dingin a MUNGPI ahi hi. Inn MUNGPI pen mite muhin zong kilang selo napi, inn buppi adingin abulpi nahi gige hi. Tua bangmah in Zomite ading i Sutpi ahi i Pilnate lungngai kika gamkip leh minam khangto i hih theihna dingin, ZOMI ADING PILNA SUTPI ci-in mipil pawlkhatte ii muhdante tawh etkak in i mailam kalsuanzia ding ngaihsutna pawlkhat i gen ding hi.

Hih thului na ngimna ahih le, laisim khempeuh in:
1. Pilna a thupitna hongtel semsem theihna ding;
2. Gam khat khantoh nadinga kalsuanziate akimuhkhiat beh theihna ding;
3. Pilna leh gam khantohna akizopziate telsiam semsem theihna ding; leh
4. Zomite in Pilna tungtawnin Gam leh minam khantoh theihna ding, ma-akipankhop theihna ding; deihna bulpi ahi hi.

I. Zomite-in Pilna I Ngaihsutzia
Zomite in Pilna lam ah mitung kituang mahmah a, gam makai pipi-in ki-om hi. Kicitak mahmah lai ahih manin, Zomite hong kicih nak leh, mite muan dingin na ki-om hi. Ahih hangin hun te hong kikheel to-a, mihingte lungsim ngaihsut zai aki pan, omdan khawldan hong kilamdan ciangin, pilna ngahna dingin sanga Siate gen bek tawh hong kicin nawnloh hun hong hita hi. Ihmut batlah na tampi hong om a, hihte hangin lungsim cinatna piangin, atawp na-ah neihlohna sangin theihlohna-in hong nengniam sak zawta hi.

Mi pawlkhat in, Pilna i zonzawh lohna pen:
(i), neih leh lam in hong tawklo;
(ii) theihnopna, pilnopna tawh sangkahlo; (sawlzawh thu-a sangkah)
(iii) kiimlepaam pan thapiakna omlo;
(iv) degree ngahna tawh annek ding kham kingah zolo;
(v) sang pan lai-onna pen theihna taktak omlo, ettehna peuh, siate mai-et zote peuh; etc,.

hibang thu tuamtuam tampite hangin, khangthakte adingin pilna zon na-ah lungsim thanemna tampi piangsak hi. Tu laitak in gamdang ah sumzong mipih tampi ki-om a, pawlkhatte in, “Kei pen Zolai tan 4 ka hih hang, no Master/Doctorate ngahsate tawh i sum thalawh zah kibanglel hilo maw, sang na kahkah uh sangin, sum zongpah leuteh kimet zaw” cihbang ciang nangwn aa ngaihsutna aom zong ki-om lai hi. Gamdangah i pai nopna pen, adang tampi sangin sum zongding, nektawm ciang peuhmah pataulo ding, cihpen mipawlkhat dinmun ahi hi. I gam ah nekledawn akicingin ngah lehang gamdang kipainuam tuanlo ding hi. Pawlkhat adingin gam sungah, nasep silbawlna-ah suahtakna omlo ahih manin gam leh minam adingin suaktatak-a nasep theihna ding lunggulhna tawh apusuak zong ki-om hi. Hih bang dinmun bilbial sung panin koici bangin gam leh lei ading i-omna muntek panin pan-la thei ding i hiam?

II. Gam Khangto I Cih In Banghiam?
Tu laitak in i gam ah ki-uknazia hong kilaih henla, sumlepaai neihlelam akicingin nei lehang, pilna nuamtak kizong thei dinga, igam khangto ding hi, kici thei hi. A ngaihsut huai thu khat ah, ki makaih zia hong kikhel takpi henla, sum neitak pi le hang pilna zong in, iminam in khantoh na ingah zo takpi diam? Cortes (1982) in gamkhang to acih akhiatna leh, amuhna agen na i-et ding hi. Gam khangto icih in, adiakdiak-in:

(i) “gam sungah nekledawn, silhleteen ahizong, kikhuasakzia, gam kimaihziate, daitak/diktak/steady (Kawlpau in – pongmaan) taka khantohna tawh akimakaihna gamte;
(ii) Khatbek ngaihsutna leh thatang kizang lo-a kiimlepaam tawh pankhopna anei gam hidinga, gamsung mimal kimciatin zong amau mapan theihna munmun panin amau suahtak nate diktak-a azat theihna/akizat theihna gam hiding hi” na ci hi.

Hi hi, khantohna diktak pen Tuita khan banga khantohna hilo dinga, khat bek ngaihsutna, geelna zong hilo ding hi. Mimal kimin amau suahtakna thei-in, diktaka a kizatna/theihna hiding hi na ci hi.

Tua banah Cortes in gam khantohna i cihpen “mihing nuntakna-ah, hong nawngkaisak thei, gilkial dangtakna, natna satna leh zawnna akipan kithupisim lohna, maban neihloh nate khempeuh panin nekledawn, silhleteen kitasamlo-a, suahtakna tawh liangko kikimin, mihing khatlekhat kizahtakna leh eile-ei mahmah zong kitheisiamna a-om na ahi hi” na ci lai hi. Liangko kikim na, khatlekhat kizahtak na banah, ei le ei mahmah zong ki theihsiam na pen na thupi sak hi. Numei leh pasal kikal aa kideidan na, anei khat peuhin beh leh phung kicing khat peuh in kipawlna khat peuhpeuh ah ahizong, khuasung pawlpi sungah thuneihna, cihte i zawnna i hai nate leh i thanem nate paulap den aa lungsim cinat na: eileei kisan siamlohna aom loh nagam hiding hi na ci hi.

Ngiahsutzia atuam tek kinei thei maitak hi-a, ahih hangin kalsuankhop theihna dingin, kalsuanzia apongpi-in anuai-a bangin namthum in i-ensuk ding hi.

a) Vaipuak Kilamzia A Thupilakte
Hih ngaihsutzia athupi ngaihsut pawlte in, “Sanglai sim na in kiimlepaam khantohna dingin kipawlkhopna tuamtuamte zangin panmun lak theih nadingin tha hongpia hi. Tua banah mimal khantohna zomto-in Gam khantohna dingin khantohna bulpi ahi hi” na ci uh hi. (Colllines, 1991)

Hih ngaihsutna-in, nekledawn, silhleteen ading ahizong, kiimlepaam khantohna ding ngaihsunna tawh, mimal khantohna sangin Vaipuak kilamziate khutlet-in, kiimlepaam khantohna ding masak zaw hi.

Cortes (1982) in Pilna zonna tungtawnin anuai aa bangin kiimlepaam khantohna leh mimal hamphatna na enkak hi.
(i) Kimlepaam khantohna leh sumzuak sumleina, cih pen akibangin thupi a,
(ii) Pilna-in sumzuak sumleina leh kimlepaam khantoh theihna dingin lampi ahi hi.
(iii) Hih pilna in mimal aading akisam pilna, theihna, leh nuntakna ding sumzon paaizon theih nading lampi honglak a;
(iv) Midangte’ upna, ngeinate ah theihsiamna leh sansiamnate hong khansak; banah
(v) Kiimlepaam khangtohna dingin akisam bangin Pilna-in hongsui toto-in hongpuah kikkik thei hi” na ci hi.

b) Hih Ngaihsutna Tawh Akilumlet/Alangkawk Ngaihsutna: pawlkhat na-om leuleu hi. Hih ngaihsutna aneite thupisak thu ahih leh (Collines, 1977 pulakna tungtawnin),
(I) Pilna i zonna dingin ahizong nasepna khat peuhpeuh ah sumlepaai tawh na akisem ahih manin Sum tung panin nuntakzia, khantohna kipungvuh in kipuah kik thei hi ci uh hi;
(ii) Hih khantohna aom theih nadingin, mipi-in bangmah semzolo a, makaipite’ vaihawm ding ahih manin Zaa (power) neih ding kisam hi;
(iii) Hih dinmun akitun theih nadingin Biakna, ngeina leh sangkahna mun tungah kinga hi” na ci hi.

Collins in Gam khantohna ding ahizong, akol/akaawm nuntakna leh sumzuak sumleina hong nop theihna dingin akisam, kiimlepaam khantohna pen aomsa khat suksiatkhit cianga akingah dingin ngaihsun hi. Hih bang hong pian theih nadingin mimal thatang ahizong, panmun leh zaa kilaihna ding ahizong, akisam buppi-ah koih ahih manin, makaite sung, mipil mihaute leh mithupi tampitakte kikal ah buaina hong om hi.

c) Pilna Pen Kahlei Bang-a Azangte Ngaihsutna
Hih ngaihsutna anei pawlte-in pilna cih pen thupi mahmah ciang bek hilo-in hih tungtawnin “kiimlepaam khantoh tek theihna ding leh tua zomto-in gamkhantoh theihna dinga kahlei bang-a hong kalsuanpih ahi hi” ci uh hi. Tua bek thamloin, gam khat hong khantoh theihna dingin “pilna bek thupi hi” cihbang om theilo a, avek-in athupitna akibang kim hi” na cithuah lai uh hi.

Hih ngaihsutna thum teng i-et ciangin thupi mahmah tek-a, hihzaw hoihpen i cihding ahamsat mah bangin, paihding zong omlo zel hi. Ahih hangin pilna zonna, sangkahna-in Sutpi bangin abulpi ahih na pen kimuthei hi.

III. Gamkhat Dinmun Etzia
Sumzuak sumleina lam-a, pilna neite, gam ki-ukzia sinna aneite leh khantohna ding lam-a geelna lam asin mite-in gamkhat akhantohnazia a-et ding uh ciangin kumkhat aa asum lutna, zatnate etsak uh hi. Hun khat lai-a aki zang hih sum lut/pusuak etna tungtawnin gamkhat hauhna, zawnna pen adawldawl-in nakhensuk uh hi Ahih hangin tuhun ciangin, Gall (1990) in “gam khantohna akitheihna ingin sumngah sumzatna teng etna-in gamkhat dinmun diktak-in hong lak zolo ding hi, na ci hi. Sumzuak sumleina pen mihau pawlkhat khutsung bek pan akizeek hizaw theih-a, gamsung pongpi nuntakna dik taktak hong lak theilo ding hi. Tua ahih manin mite nuntakna sungah akisam bangteng omlai hiam? cih kantel lehang gamkhat i dinmun dik taktak hong lakthei pan ding hi” ci-in zatdan thak khat hong phuangkhia hi.

Hih tungtawnin The United Nation Development Program (UNDP) te-in zong hibang mahin nasia takin nasepna nei uha, nidanga akizang ngei ahi, innkuankhat/mimal khat sumlut, sumpusuakte ekkakna tungtawn-a, nuntakna dinmun etnate kizang nawnlo-in, nisim nuntakna sungah bangteng kisam hiam, cih etna tawh i gam khawngah na hong sem uh hi. UNDP te in mite kisap nate a theihkhit uh teh pilna bulpuh in huhna aki pia te azatsiam, a geelsiamna dingun pilna tawh, mapanpihna na nei kawikawi uh hi.

IV. Pilna Tawh Gamthak Lamkikzia
Sang khat peuhpeuh ah ngimna, geelna, ngaihsutna leh tupna tuamciat nei uh hi. Nek leh dawn nuntakzia ding athupisak sang a-om mah bangin, sum leh paai zonzia ding ahizong, gam leh lei makaihzia ding athupisak sang, cihbangin na-om tek hi. A sang tawh kizui-in kalsuanzia zong akilamdanna na-om toto hi. Sang khat peuhpeuh in ahih aleh gam khantohna ding mah ngaihsutna, nuntak picing ngah theihna ding mah geelna ahih hangin, kalsuanzia pen kilamdang hi.

Philippines te kalsuanzia ahih aleh atung-a kivaipuakzia namthumte sung panin vaipuak kilamzia athupisakte, kalsuanzia na thupilak uh hi. Suaktatak-in sang ki hong theia, ki vaipuak zia te zong khatlekhat kidem in tua tungtawn in gam khangto ding cih ngaihsutna zong na nei uh hi. Mun khempeuh phial ah, Biakna sang, leitung sang leh atuamtuam sang pen om zihziah hi. Tua bek thamlo-in gam khantohtheihna dingin mikimin pilna neihding abulpi-in ngaihsun ahih manin 1987 Constitution ah, amawkna-aa sangkah theihna ciang dong mapangin hanciam uh hi. Kum-nga geelna (1983-1987) sungin zong anuai-aa teng ngiimna nanei uh hi.

1. sumzuak sumlei na-ah manman/pongman tak-a khantohna aom theihna ding
2. liangko kikim aa hamphatna leh khantohna gah limci akimuh theihna ding; leh
3. apicing mihing khantohna a-om theihna ding (total human development) (NCDA,1982) ci-in nageel uh hi.

Hih bang geelna leh nasep nate pen gam tuamtuamin zong kinei teka, Kawlgamte geelna zong Siapi Thang Za Tuan lai-at “ZOMITE SANG LAI PILNA HONG KIPATZIA LEH MAILAM KALSUANZIA DING” cihna sungah kimuthei ding hi. Hihte khempeuh pen athu-in omkhin a, thupi thei mahmah hi. Ahih zongin Zomite-in koici panlak ding?

V. Thukhupna Leh Ngaihsutna
Gam makaikhat peuhpeuhin thuhoih lahoih geelgeel mah tale, angah dingte-in i sansiam, i zatsiam keile, phattuamna tam kingahzo taktak lo hi. Tu laitak aa gam kimakaihzia tea hizong, nuntak hamsatnate hangin pilma zon na-ah paulap ding tam mahmah kha ding hi. Ahih hangin, tuate kihelloin kithutuak-in semkhawmleng i mapan theih nading tampi-om lua hi. Tuhun ciangin NGO te makaihna tawh Zomite tungah panpihna leh makaihna tuamtuam hong nei uh hi. Sum leh paai tawh ahizong, pilna lamle, akisam bangbangin mite nuntakzia hong en-in hong panpih uh hi. Hih bang nasep danin i sepkhop theihna dingin, Hausa leh Siampi tawh akimakaihte i hih nate lungngai kik-in, tulaitak-aa hong uk kumpite hong makaihziate tel-a, gam khangtote kimakaihziate tawh i-etkak theih ding pen ikalsuan theih masak ding ahi hi.

Nasepna khat peuhpeuh ah, i dinmun i kitel masiah kikhelna-in munla theilo-a, kikhelna khat peuhpeuh aom theihna dingin, … botkhiat ding lephelkhiat ahizong, suksiat ding leh suankhiat ding ahi zong, lam ding leh phuh ding ahizong … (Cf. Jer. 1: 10) om den hi. Pasian in Jeremiah asawl bangin gamle lei minam ading sawlna angah ei te adingin ma isawt ding ahi hi. Khualzin na-ah tai 9 pai na ding kalkhat pan akipat mah bangin mipi kikhelna ding mimal pan hong kipan khia ding ahi hi. Tua panin akikhenkhia theilo Milip/Mipi kikhelna, Ngeina kikhelna leh zuihding lampiding geelsiamna (Lim sunga bang), cih teng pen khauhual bangin akiheek, Suangthu thum bang ahi hi. Zuihding lampi ithei hangin milip in theihna kihual ineih kei leh, ingeina hong khangto theilo ding hi.

Milip-in pilna, thumuhna, leh theihna i neihkim theihna dingin mimal pan kipan in, tu laitak dinmuh, gam kimakaihziate tawh i kalsuan thehna dingin, Biaknalam pan nasia takin na i sep ding ahi hi. Biakna bulphuh in kipawlkhawma mikim in pilna i neih theihna dingin pilna piakna pen i kalsuan theihna ding khat ahi hi.

Pilna piakna sungah hunkhat lai-in mihingte ading akisam bulpi pen Lungsim ading lungnopna, Pumpi ading nekledawn, silhleteen, inn leh lo ahih ban-ah, Kha adingin vantunggam tun na ciang banzom in tuhun ciangin ngaihsutna, lungtung cidam na ding aki pan, sepsiam na, theihtheih na (senses) teng ading kigeelta hi.

Zomite Topa’n thupha hongpia in, minam khat i hih hang, gamkhat zah in Leitungbup tawh thu leh la akivaihawm, aki kalsuan ihih nate lungngai kawmin i om na gam peuhpeuh panin hanciam in mapang tek ni. Zogam Khansau tahen!

Dr. Cing Pum Neam

Etkak laibu:
Abuso, Julian E, Fe C. Garcia, Fe Corazon T. Labayen, Remedios
Baretto,1998: Socio-Cultural Foundations of Education. (http://en.wikipedia.org/wiki/Human_Development_Index)
(http://www.blackwell-synergy.com/…/10.1111/j.0020-8701.2004…)
Ciimnuai Khuavak Vol II