Zolai Simbu Kum 100 Cin Pawi Ah (9) ~ Hau Za Cin

Zolai Simbu Kum 100 Cin Pawi Ah (9) ~ Hau Za Cin

[*Kaptel a Pasian thu um masa a upna a khahsuah nuamlo mi citak pa a min Pu Khup Zuan hi in a zi min Pi Dam Zel hi. A suan a khakte uh tuni in Kawlpi ah a teeng uh hi.] Ka laigelh masa ah a min ka khialh khak ding lauin ka gelh loh pen ka theih mah na dik. A zi min zong theihbehlap ing, ka lungdam.

Kei zong deihsakna tangin thusunna hun ka ngah a, “Tuhun Nate (science) pilna leh Khangnote” cih hi a, bangci gen ding, bangteng gen ding, bangci pat ding, koi ciang gen ding, a sanglam gen ding maw, a mipi nautang teltheih cianga gen ding maw cih ka lungbuai mahmah hi. Siate leh makaite hong deihsakna nakpi in ka lungdam a, hibang Kum 100 Cin Pawi ah ka khatvei hun ngahna bek hilo in mipi hizah kikhopna ah thugen in ka din a khatveina ahih manin lawp mahmah napi Siapi Thuam Khan Thang cih bangin ka ‘kihta sim pian’ hi.

Ahang pen mipi lametna leh a ngai mipite theihtel siam dingin gensiam kei leng ka hun, ka sum bei, ka kisakkholhna khempeuh a mawkna hikha ding cih ka lim ngaihsut mahmah hi. Tua manin ka hun zat simin a tam thei pen mipi lam pan dotna leh a theihnopte uh dotna hun a om thei bangbang ka hihtheihzah in hanciam in dawng ding cih ka kiginkholhna hi.

Nate pilna thu i cih pen a omsa, a kibawlsa nate thu tel taka theihna pan hong kipan hi a, thudik, thuman theihna namkhat ahi hi. A omsa leh a kibawlsa cih ciangin kuate in a omsa hisak a, kuate in bawl hiam cih kantel mahmah ding kisam masa hi. Mihing in a bawltawm nangawn theihtelna pen pilna ahih leh mihing a omma in a piang nate theihtelna pen pilna kulthuk hizaw kan lai ding hi. Tua nate khempeuh a bawl pen nang leh kei hilo in mikang mipil masate zong na hilo in Pasian ahi hi. Pasian bawlsa nate tel taka kantel a, theihtel a, a kizatna, a phattuamna, a hoihna, a manphatna, a thupina, a tona, etc cihte theihna pen nate pilna (science) in a sinte hi a, a taktakin i Pasian bangzah in lian hiam cih a kankan, a suutsuut, a telkankan ihi hi.

Mihing in a omsa sing leh suangte, sikte sutuah in inn leh lo lamin mawtaw khawng, vanleng khawng i bawl a, gunkuang leh tembaw khawng bawl in a sungah tuangin mun khat pan mun khat i pai a, khe tawh pai sangin tawldam zaw in kitungbaihzaw, kimanlangzaw ahih manin tua bang hihtheihna, hihsiamna leh tua bang piansak theihna, bawl theihna siamna neite mipil, misiam, khutsiam, khuakpil, a ngaihsun zo ciin i pakta a, nate pilna thuthuk thei ciin i ciamteh hi.

A taktak in a omsa, Pasian bawlsa, Pasian omsaksa nate lemtuah, gawmtuah in a dang khat a bawlpak ziau uh hi a, a kipatna taktak a bawltheilo vive mihing ihi hi. Pasian bawlsa nate i hei kawikawi dante khawng a vekpi a bawlpa adingin a nak thupiloh ding dan pen ama thu theihna leh pilna nakpi in lianzaw thamtham hi. Piancilna 1:1 ah, “A kipatcil in Pasian in vantung leh leitung a piangsak hi,” cih om hi. Nate khempeuh tua piansakna pan a omsa ahi hi. A kipiangsaksate zat dan, zeek dan nangawn mihingte adingin limtak kisin kul a, a piangsakpa in bel “Om hen” cih leh a om hiziau lel hi. Tua manin nate pilna thu i sin ciangin a bawlpa i mangngilhloh ding a thupi penpen hi cih ka gen masa hi.

Phim muk khat ah zong atoms awn 5 (5millions) bang om himawk ahih manin sik them khat nangawn ah atoms tam a om ding dan kitheipah hi. Zomite in sik van zat i neih lak pan a neu penpen in i ciamteh pen ‘phim’ ahi hi. Phim pen puankhuina, lingkheina, tangsiat dawtna, etc cih bangin Zomi te in i zang hi! Tua pen sik nam vanzat i neih lak pan i lim zat mahmah ngei hi in, a neu mahmah genna in zong a kilimzat mahmah ahi hi. A omsa lak pan samzang pen a neu genna khat hileuleu a, phim tawh a kizang khawmkhawm ahi hi.

Na khempeuh pen a tom tampi a kigawm ciangin a mel, a puam hong om pan ahi hi. Inn lamna dinga leisek banga na khempeuh kibawlna bulpi pen atom ahi hi. Tu hun ciang atom sungah zong a neuzaw omlai kici toto lai hi… Zomi khangnote in pilna thuk i sin ding om lai hi. Mikangte bek in theikhin zolo uh ahih manin Zomite khuak leh pil ngaihsut siamna khempeuh zong huh in va seppih leng a siatna omlo ding hi.

Pasian bawlsa i theihloh tampi omlai i cihnopna hi. A bawlpa bangzah in a pil zen tam.

Zomi sungah nate pilna tawh kisai in a kilim theih nuam mahmah khat pen – Aji-No-Moto ahih kei leh Mehza (mikangpau in MSG or Mono-sodium Glutamate) ahi hi. Meh limsak nadingin kilimzat mahmah a, pawlkhatte bangin zasan tawh gawi in, a haizaw diakte bangin ci bangin liak ngam uh hi, kici hi. A pil gam, a khangto gam leh minamte in lim zatlo bek hilo in zanglo kikeuh zaw uh hi. Ahang pen a cidamna uh thupisak uh ahih manin.

Ahi zongin, sumbawl pawl leh sum muhna in a zang mite in anzuakna ah limtak in zang hamtang nuam uh hi – ahang: meh limsak, ankam limsak, a vanzuak uh khawng, mite in a ann uh limsa. A nek sung uh limsa ding, a sum a ngah khit uh ciang a cinat lawh phial uh zong summetbawlna ah a sumzongte tawh kisai nawnlo hiven! Nek loh theih leh hoihpen. A hang bel tawmcik ne leng phamawhlo napi a kisam zah val nek khak baih lua mahmah in tua hileh awmna, awmbing, thau, cithak, luna, ihmutsuak, etc cih bang tawh kizom pahpah hi.

hauzacinHong kidong mahmah khat leuleu pen i huan ah mehteh mehgah te lungno leh kau in a nekloh nadingin thoza leh ganhing thahna te i buak pen mihing te adingin a siatna om hiam cih ahi hi. Thoza pen gam khangto te ah a kizat phal nawnloh kum 60 bang val khinta hi. Gam zawng leh khangto laitak te in a zanglai bek himai hi. A tom in gen leng cancer, meima, cibawk, thabawk piangsak hi. Leihoihza zong a tam luat leh a sunga chemical (dat) te mihing in kinekhawm ahih manin a piak ding zah val i piak khak ciang mihing in kine khawm lai hizen mawk in kidop huai, a zat dan siam ding kisam hi cih khawng ka gen uh hi.

Nate pilna a kipat pan tuni ciang donga khantohna tuamtuamte a lim tawh lak in a thu tawh gen in ka kidot nop uh ka kikupnopte uh kikum in ka om uh a, ni thum sung cim hetlo in hun bang ‘tom’ ka sa phial mai uh hi. A ni behlap le ung kikupnop, gennop omom lai leh kilawm. Mailam ah tua bang hunhoih hong om ding cih lamen in thungetna tawh lungdam takin Zolai Simbu Kum 100 Cin Pawi ah kei thusunna hun zong nuamtak in ka zo thei uh hi.

Ka muhkhiat pawlkhat pen:

1. Zomi te in nate pilna thu (science) leh khantohna pen kilunglut in kithei nuam in zaknop kisa, kikan nuam hi cih ka mu hi.

2. Zomi te in a khangto minamte lungsim pua in khantohna thu a hih peuhmah leh lunglut in ciltuikai liangin ngai, za nuam, kum nuam in thei nuam hi hang.

3. Thudotna sungah a thuthukpipi hong dong zong om ahih manin Zomi sungah nate pilna thu a thuk sut mahmah mi honkhat om in a theihna uh zong sang, telcian mahmah uh hi cih kitel hi. Zomi khuak in nate thu pilna namte kanzo, bun, theizo lua hi.

4. Khangno tawh genkhop ding himah leh thungai, thusinna sungah mi 20 val deuh khawng bek kum 35 nuailam pha mawk ahih manin khangnote in nate pilna thu lim sin ding, thupibawl ding hi cih ka ut zah in ka gen thei kei a, khangno sitset vive lak ah gen kikkik dingin iplahhuai kasa mahmah hi. Tua bang hun a om theih ding leh hanciamhuai kasakna thu zong mipite mai ah ka pulak hi.

5. Kha damna ding bek hilo pumpi cidamna ding leh nuntak sauna ding thu zong Zomi sungah kilunglut, kikan, kitheinuam in cinat ding kikemkhol nuam tampi om hi cih ka mu hi. Tua manin nek leh dawn tawh kisai ah dotna tam pha mahmah hi.

6. Technology lam tawh kisai dotna tam mello hi. Tuate tawh kisawh tam nailo ihih man hikha inteh.

7. Mailam limci in hih thulu a kiza ut mel kei tam ciin ka lunglau giugiauna teng thusun masa ni khit ciang hong bei henhan hi.

8. Thusin a hong pai, thungaite a tamzaw siate leh upate, makaite ahih man un amau khua ciat ah a ciah ciang, amau pawlpi ciat ah a ciah ciang a zak thute uh na gensawn dinga Zomi khangthak sungah nate pilna thu a sin nuam leh a lunglut hong tam semsem ding hi cih ka um ngam hi.

9. Zomi sungah a hun manman in hih bang thutheihna leh thusinna pen kinei den zo leh i minam sungah theihna leh khuamuhna khang semsem ding hi cih ka um hi. Khangno pilna sin teng bek in hih bang thusinna nei hilo in mipi tungah zong i hawpsawn zel ding a thupi hi.

10. Zomi te minam a hong bawlpa Pasian in a bawlsa nate thu a sin thei ding, a tel thei ding, a genkhia kik thei ding leh Ama thupina a kilatna dinga a bawl nate a gol mahmahna, a neu mahmahna, a zat cing mahmahna, a kipuahpuah theihna, a hoihzaw sem a a kibawl tohtoh theihna te Zomi te in zong nakpi takin i uangbawl ding hi. A khangto minam peuhmah in tua cih uh hi.

Hih bang hun thupi leh hun manpha ah ka kihelkhak ka lungdam a, manpha ka sa a, ka kihel loh khak ding bang ka lau kik zawzen hi.

Van leh lei Pasian bawlsa ahihna thu, van dumpi leh van kuumpite huih lak ah a khaina thu, tungleng vasa leh nuaia kibual ngasate nuntakzia thu, singkung leh pak hoihte, guam leh mualpite a kilawmzia thu, mihing leh ganhing namkimte thu, nek leh dawn leh a zonzia thute cih bang a tuamtuam – gennop tampi omlai hi; gengen dingin zong hoih hi, theih dingin zong hoih hi, zatpah theih ding tampi om a, mailam nuntakna hong makaih thei ding thuhoih zong tampi om hi. Mailam ah gengen, sutsut, sasa lai ni…

“Pilna kisam na om uh leh Pasian kiangah ngen un. Mi khempeuh tungah Pasian dikin cingh mahmah ahih manin hong pia ding hi.” (James 1:5) (zop lai ding) Hau Za Cin