Zolai Simbu Kum 100 Cin Pawi Ah (8) ~ Hau Za Cin

Zolai Simbu Kum 100 Cin Pawi Ah (8) ~ Hau Za Cin

Zomi lasiam J. Lianpu lasak youtube pan ka et thapai leh ka laigelh ding nangawn mangngilh dektak e! Sorry. Rev. Dr. Thuam Khan Thang, Vice President, Zomi Christian Literature Society thugenna keima notebook pan ka tomlak hong luikhia ing. Ama gendan kammal khempeuh kigelh khin manlo a, a kicingzaw VCD ah hong kihawmkhia ding hi.

Lai Siangtho simna: 1 Korin 10:11: Leitung bei kuan hun sungah a om eite adingin hih thupiangte i etteh dingin thu hi a, eite hilhkhohna dingin lai sungah a kiciamteh ahi hi.

Hih nitak hun ka ngah ciangin ka lungdam mahmah a, ahi zongin Hebrew laigelhpa in ka kimkot ah upna ah mi masate in hong umcih dimdem hi acih bangin ka kim ah Doctor vive in hong umcih ahih manin ka nuamna hong kiam deda hi. Ka lungdam man hi. Mite in Sia Thuam in thu a gen ciang sawt lo hi, ahi zongin a kum a tam semsem leh a thugen zong sau semsem hi ci uh hi. Tua manin a sawtlua dingin a ngaihsunte adingin sauveilua lo dinga, a tom lua dingin a ngaihsun te adingin tomlua lo ding hi…mipi kinui zaizai hi… A thulu ah lutsuak pah a:

1. ZOLAI ZOMI LEH I MABAN

Tangthu: Pu Mangtal in a laigelhna khat ah minam dangte in mintap, thalloh, tanu, thusa, zawl… cihte neilo uh hi. Zomi te bek hih banga ngeina a neite hi hang. Zomite midangte pen a zi ding, a pasal dingin minamdang a la tam ngeilote hi. Cimnuai ah sa kibak Geltui ah kithuk cih a nuntakpihte hi hanga -lungdamna a thukkikte, a mangngilhlo te hihang. Sutpom, mawhmaisakna ah zong Judahte biakna tawh kibang hi.

Hallelujah cih i zat ciangin zong a kisam teng bek ah zang ding hi hang. Hallelujah cih taklo te khawng hallelujah cilo ding hi hang. Ngeina a kician bek ah zang ding hi hang. Ka tan sawm kah laiin lawmte khat in sangkahna ah buh huan in a siamloh ciang buhcim suak hi; tua khit ciang hallelujah ci mawk hi. Tua bang a thupilo a hallelujah cihtak lo hi. Pasian thu manpha bek ah hallelujah cih ding hi.

Pasian gam adingin kithawikholhna, lunggulhna, deihna nei i hih manin sangmangte kibawlsialo hi. Leitung dang ah kithat, ngawng kitan cih bangin in om hi. Zogam ah sangmang hong paite in lai hong tonpih uh hi. Lai hong pattah uh hi. Lai hong pua uh hi. Lai i neih pen Pasian thu tawh hong ton hi. Sangmangte tawh hong ton hi. Zolai pen Romanize ahih manin lawm kawlte lak lak leng lamdangsa uh hi.

Zomi te minam khat ihihna pen mikang vai takin kawlgam ah puanten tenglo in long pant bek mah a teng nuamte ihi uh hi. Mikangte in Zomi te leh Gorkha te bek amau tawh kithuah dingin na deih uh hi. Ahang – citak uh hi. Penglam movie sungah “lem incia, lem incia” ci den hi. Zomi ngeina tawh kituaklo hi. Zomi te pen citak hi hang. A lemlo dingpi ‘lem incia, lem incia’ ciin a lemdingin vai a hawmhawm (nah-le-muh) a zangte hilo hihang. Thudik thuman ngakin a kilem hun a ngakte hizaw hang.

Tangthu khat hong gen nuam ing. Zomite a citakte hi hang. Kaptel ah nidangin Tapidaw suak masa (a min mangngilh pak ing ei – HZC) lawmta nih singphuk, khat sing in deng in si ding hita a a lawmpa in zu tulh in hopih hi. “Hih ka zu tak khat dawn lecin sialpi tawh hong vui ding, na luang hong pham ding, sanggam laiguizom bangin hong la ding hi ing, khasia kei in,” ciin zol hi. Amah’n a dawnkikna ah, “Lawm aw, Zomite in lo i khawh ciangin singphuk in, lohal in, lopawi in, lokho in khaici a gah ding ngak hi hang.

Kua mah in anlak ding ciangin lo taisanlo, lo nusia ngeilo hi. Tua manin ka Christian upna nusia in zu dawnlo ding hi ing. Kei a hong dawn ding vantungmite hong tungta hi. Christian teng ka kiangah hong nai un. Thu umlo mite na kikhin un,” ciin Christian khempeuh in thungetna neikhawm uh a Amen a cih uh ciang amah na paita hi. Tua zah in a citak, a upna a lenkip Zomi te hi hang. Tuni in hong kicileh e leh?

2. TUHUN

Sia Enno in a laigelhna sungah khat ah kum 2000 khit pen Zomite khut kiletkik hun hi. ZCLS in kum 2009 kumin hunzatna consultation khat hong neihpih a, nuam kisa hi. Zomite zong a bul ah kipankikta hi. Beh leh phung u leh nau vai ciang bek tawh kibuai lunglung nawnlo hi. A lianzaw nate sem dingin a kikhutlette hita hang.

1. Puahkik hun hi. Khamtung pen JCB zanga lei kito tawh kibang hi. Mun tuamtuam ah JCB leito mawtaw tawh kito a, khamtung khua tuamtuam kito khinta hi. A mualbote kito tam in, a guam thukte kivukta a, khantohna lam kimanawh hi. Khamtungah a ettehtak pen Kaptel hi. Kaptel khua leh tui khangin khua leh tui ki it a, kipuah hi. Khamtungah computer 100 kikoih hi. I gam hong khangto semsem hi. Computer 100 kikoihna na mu ngei uh hiam? Zogam kipuahkikta hi.

Laibu bawl kihatta hi. Sia thawngno in laibu bu 100 val bawl khin a, mipi sim theih dingin hong luikhia hi. Lasiam zong kitam, CD zong kibawl hi. Kamsen bang siam ka sa hi. Kawlgam biakna makaipi khat in Karen te in zu khamsa in la mah na sasa laiin Zomi te ahih leh na khangto in Doctorate degree vive na ngah ziahziah uh hi ciin gen ngei hi. A khangto Zomi hi hang.

2. ‘Pa ken a guh pet zo’. Tuhun pen ‘Hun’ kikhel hi. 1960 kumin Japan te in battery nai bawl hi. Hoih hi. Ahih hangin Swiss te in a theih ciangin battery nai peuh ciin thusimlo hi. Pawlkhat in umlo, awlmawhlo hi. Japante demna dingin Swiss te in a nai bawl uh hoihsak semsem tamman semsem, tua kikal in Japan te in tampi na bawl mengmengin leitung na zel khin uh hi. A sawtna ciang mite in Japante nai lei in Swiss te in a zuakna ding hamsa sata uh hi. Tua manin hun kikhelkhel hi. Swiss te in hun kikhel theilo in hun na laplo uh hi. Sumbawlna bek ah hilo in leitung pilna sinna vai, nek leh tak zonna vai ah zong a hun lap kul a, hun kikhel theih kul hi.

Khatvei ka tanu in meh limlo sa ahih manin, “Pa, ken meh lim salo” ci hi. Paulo in ne lel in a cih hang ei meh lim sakte i tate in lim sa nawnlo in zong gen ngam lel uh, pulak ngam uh hi. Hun kikhel hi (paradigm shift). No hun leh ko hun kibang nawnlo hi ci lel uh hi. Sakollam lam ah numeino khat na pilzaw hi. “Pa, ken meh lim salo,” a cih leh a hauzacinpa in, “En zong i neu lai in sa meh khawng ne ngei kei hang,” a cih leh, a tanu in, “Pa, nang na pa zawng, kei ka pa hau,” ci lian mawk; a pa zong lungdam lua a ipsung sawk, “Hiah sum, sa va lei aw,” ci pah lian ci hi. Pawlpi sungah zong khangnote in pawlpi biakna sung nuam a sak uh leh pawlpi a nuam hilel hi. “Ko hun lai” cih den ding hi nawnlo hi. Khangnote i delhcip ding hilo in amau nung i delh ding ahi hi.

3. Sepkhawm hun hi (cooperation). Gualkhadi gui zong a bul a tuamtek ahih hangin a gui zam sau semsem in mi huang, kei huang cih omse lo in zam kawikawi a, mi a ei huangah hong zam lut in ei a mi huang ah va zam nelh hi. Ahi zongin a gah a kilawh ciangin eima huang ciang bek kilo hi. I bul ciat pan po dingin ahi zongin a dawn lam ah kizom ding hi hang. Eima upna ciat tawh ding dingin a dawnlam ah semkhawm ding hi hang. Pawlpi bulpi khat ciat nei ding hanga ahi zongin na semkhawm ding hi hang.

Gamgi khen hun zong ahi hi. Eima gam ciangciangah gamtat hun zong ahi hi. Tua ka cih ciangin khangno leh khanghamte hun kigi ah kitelsiam ding ahi hi. Nute in na tate uh no na pai kei uh zongin na sawlsawl le uhcin a hoihna tampi om veve hi. Tu hun pen mimal Christian suak hun zong ahi hi. Mimal Christian suahna kitelmaw kitello cih theihtel mahmah ding kisam hi. Mimal tapidaw suahna ka nei taktak hiam cih na kidong ciat ding uh hi? Thukhenni ciang kei a lehlam ah ka om khak ding lauhuai kasa hi. Na nuntakna a kikhel hangin na gamtatna in a lah kei leh a mawkna hi.

4. Cihtakna nei hi hang. Kim leh pam tawh kilemtuah den pen na-leh-muh hi, hoihlo hi. Cihtakna len kik ding hi hang. Zomi te a citak minam hi hang. Cihtakna ah kim leh kiangah a hoihlo a omleh a hizaw ah kalsuan ngam dingte hi hang. Lem incia cih tawh a kalsuan ding hilo in thudik thuman leh cihtakna tawh a kalsuan dingte hi hang.

5. Lai nasepna a thupi sim hi hang. Na laigelh in nang bang mi na hiam ciin hong lak hi. Master degree ciang na neih leh laibu 5 ciat, Ph.D. ciangin bu 10 bawl dig hi hang. Laibu tampi kisam hang ei. Lai zong simsim ding, simsim ding. A piangsa khempeuh etteh ding hi hang. Pupate cihtakna etteh ding. Ngeina hoih a neih te uh etteh kik ding. Gamtat hoih a neihte uh etteh kik ding hihang.

Minam maimai hilo in minam kiciante hihang. Itna a bulphuhte hi hang. Pasian, theihloh Pasian a zongte hi hang ei. Unknown god a zongte hi hang. Sangmangte in lai tawh hong pattah manun degree ngah zong tam mahmah hang ei. Degree kilala mai hi. Mi citakte zong hi hang. Cihtak manin kumpi pan zong hamphatna om hi. Gam sungah khantohna om hi. I gam Topa in hong puah hita. Kawlpi zong meihoih ta ding. A man tam ci lo dingin a mei a hoih nak leh a man tam taleh pia ziahziah ding hi hang.

Tapidaw lim leh mel: Ka pi in, “Kawlte a kam san,” ci hi. Tun tua banga kamsan ka muhteh ka pi gente ahi tam ci ing. Zomite a cihtakte ihi hi. Vaimim leh gatam tawh a khangto, kam bel a khuah ngeilote hi hang; haza leh hanawtna tua hunin na omlo hiven. Bishop Felix in Vatican ah a pai in vaimim tawh khangkhia hi cih a gen ciangin lamdang sa uh a, vitamin kisap nei niteh ciin um uh hi. A sit uh leh vitamin kisap nei tuan peuhmahlo hi. Kamsan a neilote, vaimim leh gatam tawh a khangto a kamsung a siangthote hi hang. Tuhun ciang kamsan ka muh leh ka pi ‘kawlte’ a hi ding vive in ka ngaihsun hi.

Tun Zolai kum 100 cingta, ahi zongin zunzun puahpuah kul lai hi. Laibu bawl ding hi hang. Sia Thawngno bekbek kawi taisaksak lo ding hi hang. Huh in panpih ding hi hang. A mawkna bek in ngahsawmlo in a sum tawh lei ding hi hang. Topa in thupha hong pia ciat ta hen. Amen. (zop lai ding) Hau Za Cin