Internet nazat ciang pilvang in: virus te kiangpan kidawm in

Internet nazat ciang pilvang in: virus te kiangpan kidawm in

Nang Hacker(computer sung a thusim gu te) te leh online pan in mi a nawngkai sak te khong pen Video sung bek ah om thei ding sa na hiam? Hilo hi. Ngaih sun pha in. Internet pen mi citak te a om mah bang in, mi hoihlo te zong tam mah mah hi. Tua mi hoihlo te in pen na Facebook password hong guk sak nuam, na Smartphone sungah virus hong thun sak nuam leh na Online Banking account password te gusim nuam in hong en sim gige thei uh hi.

Tua hacker te in pen mi deidan nei tuam lo in, mi khempeuh kiang pan a ngah theih theih uh a gu nuam ahi hi. Mawlware Program (computer virus nam tuam tuam te aki sap na) te in pen nang kua mi kua sa ci in hong teel tuamlo ding hi. Tua a hih man in, internet na zat ciang pilvang aw.

Virus gal pan ki dawm in

Na computer sungah Antivirus program leh Anti Malware(Malwarebytes) install hamtang in. Free antivirus a hoih tam mah mah hi, a hih hang in sum tawh lei antivirus program te hi leh bel a free te sang in bel tampi takin hoih zaw hi. A tawm pen nipi khat ciang khat vei ta na computer scan den in.

Website na muh khempeuh pan file khong, software download ziau ziau kei in. Tua dan in website na muh khempeuh pan file leh software na deih te om tah ci in na download leh a ki sam lo a tuam tuam te zong na theih loh kal in na computer sungah download kha ding na hih man in hoihlo hi. software khat na download nop leh tua software bawl te ih website ah pai in la download in.

Mi khat peuh peuh in na theih ngeiloh program khat a hi zong in, software khat a hi zong in hong khak a hih leh download kei in la install peuhmah kei in maw. Tua program khong software te khong in pen na passwords te, files te khong hong guk sak thei hi. Na computer sung a na file thupi te khong hong phiat(delete) sak thei hi. Bang bang na hih man in ngaih sun masa in.

Na Unau te, na nai huai leh lawm leh gual te khong in online pan in Program khong software khong hong khak leh a hong khak te tungah, a hong khak takpi hiam ci in, dong kik tang tang in. Bang hang hiam cih leh khat vei vei ciang Hacker te in tua dan a lau huai software khong hong khak nop uh ciang na theih ngei te khat ki neih in hong khak thei ahi hi. Jerome Khai Lek Src: Kaspersky Lab