Zogam, Zomi, Zolai, Zo ngeina – 1

Zogam, Zomi, Zolai, Zo ngeina – 1
(Zomite in Ngimna kician neihkul)

Zomi ciin kam dimdim ipau hangin Zomite in bulna ding kician Kawlgam ah mun kinei nailo a, belh ding leh lungmuanna ding makai leh kumpi gam kinei nailo hi. Kawl, Shan, Kayin, Kaya, Kachin, Chin, Rakhine leh Mon in state nei a, Naga, Danu, PaO, Palaung, Kokang leh Wa in Minam kumpigam (SAZ/SAD) nei uh a, mina, galkap zong nei uhi.

Zomi sung ah Zomi adeih pawlkhat in Kawlgam minam galkap neihpen ahoihlo lamin gen uh a, Zomi adeihlo pawlkhat in SAZ/SAD pen mizawng miginalote kipia sakha uhi. Zomite sangin Wa, Kokang leh adangte hauzaw tham uh a, Nagate zong India leh Kawlgam sunga omte enkhawm leng hauzaw pilzaw uhi. Zomi akicite pen Kawlgam leh India a a’pm itam hangin Naga leh Meiteite pilna hauhna ah kiphalo hi.

India leh gamdang azin khollo Kawlgam ulian pawlkhat leh gam makaite in Kawlgam bek enin thu gen uh a, gamdang om Zomite peuhmah lungsim ah tuatkha ngeilo uh ahih manin Kawlgam Zomite ulian mipil mihau tampi om hang ciin kisial napi omna ding khutpekcia zong Zomi min tawh anei nailote ihi hi.

Chin state igengen hangin Chin min tawh hibek a, atawpna ciangin na gam uh koiteng hiam hong kici leh Tedim, Tonzang leh Cikha bekmah ikhawk veve ding kimlai, tua teng nangawn apuah azun nuamlote ihi hi. Hithei hileh Kalay-Kabaw sung ah Zomi mimal sim leng Kawlgam mipi 0.1% iphak leh Minam Mangpi kinei thei hi. Tualo zong, Kalay-Kaw leh Tedim, Tonzang, Rih, Cikha kigawmin Minam gam ( SAR) kingen thei hi. Tua hileh minam gam leh kumpi, galkap anei isuak ding hi.

Zomi Times Editorial

Lang Khan Khai