Zogam tuahsiatna sungpan sisan in thugen

Zogam tuahsiatna sungpan sisan in thugen

It ZOMI pih teng, Abeisa Zogam le ZOMI te khuapi Kawlzang Tuivai tuahsiatna te i ngiahsutciangh tuni tan mah ikhasia a, idipkua vengtheilo hi .I thaneem a, koilam bangci ding cih thei loin khat vei le ei le ei kimawhsak,i Pasian nasem te mawhsak zel, i Zogam leitang mawhsak zelzul in cimawh beidongin i omlaitak ei ading leitung hunsia hongsuak mawk hi Atawpna ah Pasian in bang ngimna nei aitam? Cikmah a paing ngeilo hih thu te ituahlaitak in Pasian in hong thei lua zen ding aihciangh Pasian le thu tuamtuam mawhsak loin ei mimal gitlohna lungsim te suahkhia phot in kiniamkhiat in Topa kiang zuan kik dingin kahongzawn nuam hi.

Atung a, thuteng hongpian ma ,nungkum in kawlgam kumpi le UNO kipawl in Kawlgambup misimna Census nasiatak in hongbawl uh itheihsa tek hi Tua hunlaitak in ZOMI te sungah bangthu teng piang hiam? ZOMI 914 ZOMI utlo in Tedim Chin ,Zo Chin , Siyan Chin Khauno Chin ,etc, Sisan khat, unau khat, Beh khat, Phung khat ,lawmlawm ZOMI ut le utlo tawh ZOMI omlo aci tawh Kawlgam kumpi Pa tung nangawn ah Ei le Ei kiheekna lai kawl lai in i phah zawzen hi Ki liansak in uzaw kituh in Gal le sa bangin sanggam mel ikimaa liang hi

Zosuan Zota ZOMI lawmlawm kicih nadingin gamdang pan sum kidong liangin ma ipang tazen hi ,Ataktak in ZOMI kicihna ding sumtha kisamlo a ,ihihna i Sisan ZOMI kicihziau ding pen sum tawh kizawl laitazen hihangh ,tua nangawn Chin hizaw hang ci in Kawlkumpi nasem luiteng le mipil akisa laitan nei honkhat kumpi le Chin lamte mai et in kipei lai uh hi

Hih 2014 kawlgam misimna huhau in ei ZOMI te sungah ki elna, ki kona, ki dona, ki gensiatna , kitungnuntuhna ,ki liatsakna,kumpi tungh kiheekna,ki langneihna te huaisia tak in hongpiang a Zogam mun pawl khat bangh ah tuni tan vengnailo mawk hi Awkaih le tongsuah kilamdanna ciang lel pen minam hilo a, beh le phung kikan lengh Beh khat Phung khat vive ihi lel uh hi Pau le ham tawmcik kilamdanna hangin no tua te ci in Pasian deihloh laimal ginalo le kampau lipkhaphuai tampitak tawh Pasian mai ah sangam melma in ikitawng zaak mang uh hi Pasian thu le Pasian deihna kanlo in Awkaih zui in pawlpi kikhen kham in Pasian um ingh kam in cinapi Biakinn khat ah Biakpiakna pia khawm thei nawnlo tazen hihangh Vantung gam tawh kigamla mawk in um ingh

It Luat ZOMI u le nau te aw 2014 kum Kawlgambup misimna hang a hongpokhia Lungsimsia Pasian deihloh nasung a ikibual nate Pasian itaihsat nate , Pasian thu tawh ki elpuak lungsim ipaai nate,le Tukum Tuivai in Zogam le Kawlzang tuahsiat nate Ngaihtuah kik dih ni Pasian deihloh na bangteng semkha ihiam? Thumaanna le Chitakna Khahsuah khin ta ihi tam maw? Zeisu sang a Thupha zongzaw Kha ihi tam? Gupkhiatna thu gen ding awlmawh nawnlo in Thupha ngah nading lampi bek Bulphuh zawkha ihi tam? Kua mah kimawhsak lo in ei le ei Topa kiang zuan in kiniam khiat kimawhsak phot ding lunggulhhuai kasa hi

Thu khupna ah 2014 kum Kawlgam bup misim lai in unau belkang kituh bangin ZOMI , ZO, Tedim , Sizang, Chin , Khauno ,Teizang cih bangin lungsim te kithehthaang in kitot kiselna kum , kido ki elna kiheekna kum suak in Minam, Pawlpi Kipawlna sung Laimal tawh Net sung, ZOMI TV ZO TV te na ngawn ah ikisel ngeingai a , Sisan kibanglo minam kibanglo bangliangin i om hangh Kamphen kul lo, Ngeina daan te i Ciin thu te isuut late kikaidang theilo Suul khat suan Zosuan Zo tate Tunnsungkhat Piang ZOMI ten 2015 Zogam le ZOMI te khua pi Kawlzang Tuivai tuahsiatna ituah ciangh Sisan in Thu Hong Gen ta.

Leitungbup a om ZOMI te khempeuh lainatna khakham veina in nei in Kuamah awkaih kikhen man nawnlo , No tuate kicih ngam nawnlo 2014 in no natua ci veuvua cih te kingaihsun man nawnlo in Pawlpi in huh ta le Minam kipawlna in huh ta le Note Nopawl cih kammal bei ta in , hong kigen sese takei le kihuh kipanpih diamdiam ta hihangh Pasian deih lungsim, Unau lungsim, Paingthak lungsim kimu kik ta hi Tuahsiatna sungpan Ki Pumkhat nading Thu Hoih or Tuahsiatna sung pan Sisan in Thu hong gen taktak ta hi. Zosuan Zotate tu akipan Sisan bek thugensak ni. ZOMI te Pumkhat Suah ding lunggulhna lianpi tawh, Thomas Thang Than Tuang (Chicago 630 923 8881)