Zogam khantoh niciang a ding etkholhna ~ Deih Tung

Zogam khantoh niciang a ding etkholhna ~ Deih Tung

Zogam pan ka khual zinzawh kum 10 khit teh Zogam ah ka ciah kik a, tua ka ciah na tungtawn in ka theih khak thu te leh ka muh khak thu te hong hawm sawn nuam ing.Zogam ka tun tak in ka lawm pa inhong na dawn a, a inn ah nuam takin zin tung in ka tawl dam hi. Ka sanggam te kiang pen ka khua uh Tedim pan ki gam la pian a hih man in hih ni pen ka khua dong ka ciah suak man kei hi. Ciah suak man lo cih sang in ka lawm pa tawh ki thuah nuam leh ki khawl khawm nuam ka hih man zong a hihi.

Nitak khuamui kuan, huihdam nung hiau hiau lak ah lam siau in ka lawmpa tawh ka vak uh hi. Lampi pen nidang in vuikhu lua kisa in a puang keei hi ta se mah leh tu in a hih leh lampi hoih lua kisa in vom dik dek bek hi. Kawlpan in Tedim pen nidang in mawtaw tawh nai 5 sung ki pai hi ta se mah leh tu in lam pi hoih a hih man in nai 2 sung inki tung ta hi hong ci in ka lawm pa in hong gen kawm kawm in lam ka siau siau uh hi.

Nidang lai kei theih lai in a hih leh Tedim khua sung ah video zone pen mun tam pi om ngei hi. Tua lai a bat khak leh ci in cimphawng video en ding ci in a vak ka hi uh hi. A hi zong in video zone khat zong na om nawn lo a, ka lawm pa kiang ah video zone om nawn lo maw? A bang ci a hia? Ka cih leh lawmlawm aw nang thei nai lo maw? Khanglo haksi cia hong cih san hi. Banghang maw ci in ka tel dot teh Tedim ah video zone a om nawn lo a hih lam ka thei hi. Banghang hiam cih leh inn kim ah TV om in, video ih et nop teh DVD khui ki lei, ki kawm in ki en hi.

Video zone ah et kul nawn lo in inn tek pan ih muh nopnop ki en ta hi hong ci hi. (Tu ma kum 10 lai khawng in a hih leh video etkhat ciang mikhat Kyat 50 ta a hihi. Sum ki nei lo in ki en zo ngei lo lai hi. Video va en sun sun leng zong pawlkhat te a khui awk in a man siang dong ki en thei lo lai hi.) Tu hun teh khangno te cimphawng ding in Cinema hall lian pi pi zong Tedim khua sung ah 10 val om ta hi hong ci thuah lai a hih man in ka video et sawm pen ka ki suang liang hi.

Video ki en thei lo a hih teh ci in ka lawm pa tawh nidang a kunza ka lei gut na sai lam vuah ka pai pih phei hi. Kunza sai mun ding ka tun uh teh kunza zuak dan ding mi mu lo ka hih manin ka lawm pa kiang ah kunza zuak na sai koi ah om a hia ci-in ka dot lehka lawm pa in hong tai gawp leu leu hi. Tedim ah kunza hai khat zong ki om nawn lo in, kunza zuak te in khawng nawn lo sem sem uh a, kunza zuak om nawn lo hi hong cih san zel hi. Lamkim lam kiang ka et teh ninbung khawng siangtho tak inki koih sit set a hih man in lamdang ka sa liang hi.

Video lah ki en thei lo, kunza lah ki hai theilo ai teh ci in sumbuuk sai neu khat ah ka lut a, sahdah ka zong hi. Sumbuuk neinu in bang deih na hia? Hong ci a, ken zong sahdah a om hia? Ka cih leh om lo hong cih san hi. Sahdah a om kei leh khaini a om hia? Ka cih leu leu leh Khaini zong omlo hong ci leu leu hi. Zanah na zuak beek hiam ka cih leh zanah zong om lo hong ci sawn sawn lai hi.

Tedim ah zanah, khaini, sahdah om lo cih mawk pen a bang ci hi mawk hiam? Zogam hi lo in Gamdang khat a tung ka hiam ci-in kei leh kei bang ka ki sit pha zaw zen hi. Ka lawm pa kiang ah bang hang Tedim ah tep leh muam om lo mawk hiam ka cih leh lawm aw…Tedim ah teplehmuam a zangh omnawn lo a hih man in sumbuuk te in azuak nop uh hang kua mah inlei loding cih thei uh a hih man in zuak nawn lo uh hi hong cih san hi.

Khua mui zipzip ta in ka dang hong tak pian a, nidang a kazu neknek na sai lam zuan in ka lawmpa ka pai pih hi. Nidang in a hih leh a konggei vuah leikang tawh lai ki at in zuhang kingah, zuning ki ngah cihdan in lai a kisuang ngei cih pen ka mitkha in ka mu hi. A hi zong in tu in ka pai teh a kongbiang tung vuah Zeisu in Topa hi cih na ki suang in ka lut ngam kei hi. Ka lawm pa kiang ah hih kiim ah zusai a om hiam? Ci in ka dot sim khian khian leh hong nuih san a, ke’n zong bang hang hong zah pih na hia?

Nidang zu ka dawn lam hong thei lo maw ci-in ka lawm pa bang ka taigawp kha liang hi. Ka lawm pa in zu pen Tedim ah a kizuak loh zawh kum 10 pha khin hi. Tedim ah zudawn kua mah om nawn lo in nitak ciang in zukham ki ko bang kua mah ki za nawn lo hi. Nidang tawh ki bang nawn lo hi hong cih san leu leu hi.

Bangbang hi leh lawm aw… tuni tak ih vak na pen a mawk na suak keei mawk in ciah ni ci in ka gen hi. Ka ngaih sut na ah inntung leng nitak nai 10 hi leh meihong mit kha ding ai tehci in Khuaimeivak lei leng hoih in teh ci inka ngaih sun hi. Zanciang zong thokaang thak lua mah mah ding ai teh Thokang za zong lei loh pha mawh ci in ka lung ngai hi. Ka lawm pa tawh sai thu pi simsim khat ah ka lut uh a, saisung ah khuaimeivak leh thokangza ka zong zong hi.

Ka zon zon hang in muzo lo ka hih man in a sai pa ka dong hi. Saingak pa in hong nuih san a, bang ding ci dih dih na hia? Khuaimeivak leh thokangza ka zuak loh zawh uh kum 10 val khin hi hong cih san hi. Tua leh ka lawm pa kiang a banghang hi mawk hiam ci in ka dot leh ka lawm pa in Tedim ah meimit cih om nawn lo hi. Nai 24 sung mei hoih tak in ki ngah in meisia cih bang om ngei lo hi. Tua a hih man in khuaimeivak cih te ki gal muh khan nawn lo hi. Tedim ah nisim phial in thokang za, leh lungno hoih lo tuam tuam a sih na ding in a za ki kap den a hih manin thokang zong omnawn lo hi. Hih te a kisap na om nawn kil kel lo hi ven lawm hong cih san zel lel hi.

Kalawm pa tawh inn ciah ding ci in ka pai kawm in ka phone ka et leh WiFi ki ngah cih ka phone in hong na lak hi. Eh a bang hi mawk a hia? Ci in lamdang sapian ka hih manin ka connect sakleh hong ki ngah pah in lamdang kasa mahmah hi. Ka lawmpa kiang ah WiFi a ki ngah tak pi mah maw ci in ka dot phat kik leh Zogam bup WiFi a free in a ki zangh hi a, na ut zahzah in na zangh thei hi hong cih san hi. Tua bekhi lo, nang hih tak Malaysia khawng, Singapore khawng sa maw? Gamdang ah zong gam bup internet a free cih bang om zo nai lo hi. A hi zong in ei Zogam bup in internet a free in ngah ta hi. Cih hong gen kawm in hai hongsa sim sim pian dan in hong en gega a hong gen hi.

Ka lawm pa innkong mai ka tun uh teh akong khak uh pen a mathu in hong ki hong mawk hi. Eh lawm na kong uh kua in hong hon a hia ka cih leh hiah tawh ka pua ve in ci in a control pen hong lak ziau hi. A inn uh ah a nute na lumkhin uh a, ko te gel bek in nitakan ka ne uh hi. Nitak an leh meh na vot kik pian a hih manin mehlum sakkikna setsung ah minit 3 sung khawng ka koih uh leh hong so vat vat keei hi. Nuamtak in an ka nek khit uh teh kalawm pa in alengla khaan ah hong tut pih a, laptop na zangh nuam hiam hong ci in a laptop Apple te khat keihong pia hi. Keizong gam dang ah zong a ki zang zo lo pi khat Zogam ah nuam tak in kizangh thei tacih ka ngait sut khak teh ka mangtawh ki bang ka sa liang hi.

Phalbi tun kuan ahih man in khua dam hun a hihi. A hi zong in ka khua lum pem pam in khuadam cih bang ka phawkkhak loh teh lamdang sa in ka lawm pa kiang ah na inn sung uh lum si e, a bang ci a hia? Ka cih leh settha tawh mei a ki lum sak a hi hong ci in hong gen teh lamdang ka sa hi. Mit in mu in, tuakkha ka hih man in zuaulah hilo, mitphial hi lo buang ding in thupi kasa mah mah hi. Hih zan pen nuam tak in a innvuah giak thei in ka ih mut nuam hi.

Zingsang khuavak tunglian in zing ki tho baih a, lamsiau ding in kipai ziahziah hi.Midang te zong lawmsiau kawm in mitampi tak zingtung in vak khia uhhi. Ka lawm pa tawh ko zong lamsiau in ka vak uh a, kalawm pa in Biakinn ah hong pai pih kawm in thu ka ngen khawm uh hi. Thu nget man teh Niangtui sai ah ka tu uh a, niang tui leh moh menu ka et suk suk leh nam 100 val bang na om hi. Zogam ah dawn theih nam 100 val bang ki zuak mawk cih pen lamdang ka sa lua hi.

Zogam pan in akibawl a hi Lenggah tui, Apple tui, Theitui, Haitui…cih dan in nam tam lua mah mah hi. Moh menu zong nam 100 val bang mah napha leu leu hi. Alu moh, Vaimim moh,(Vaimim moh bekbek pen namtam pi tak phalai hi) Kawlkai moh, (kawlkai mohsung pan nam tam pi in ki khen lai hi.) Moh minthang tuam tuam zogam leitang pan in piang ziah ziah ta cih pen lamdang sa lua ka hih manin ka mang a bang hi.

Niangtui nek khit teh a innvuah ka ki sil uh a, tui vot lua leh khuadam tawh ki sil nuam keng ka cih vial leh tui a lum a kisil na zong na om a hih man tuilum tawh ka ki sil hi. Ka lawmpa te inn pan in ka khua dak leh ka galvuah vanleng neu no no a leng ka mu a, kalawm pa kiang ah lawm aw, hua lai a vanleng te laileng ki khah a hia? Ka cih leh naupang te vanleng hawl a ki sin uh hi. Hong cih san hi. Lawm aw vanleng nei Tedim ah om maw? Ka cih leh innkim phial in nidang a siksakol neih dan in ki nei ta hi.

Kozong 3 nei ung hong ci a, a huan vuah tuipuan ki khuh sa in a om 3 ka mu suk hi. Tedim ah vanleng nei tam pi om in nuntak khua sak dan hih zah tak in a khan toh na ding in bang ki sem zaw zen a, bang zah in ki hau thei a hiam ci in ka dong hi. Ka lawm pa in Tedim sum hauh na pen khat na ah Topa thu pha zong ki ci thei hi. Sum zon na bul pi zong aki nei hi tuan lo a, Kawlgam, Sengam, India gam ki kal a om gam ih hih manin sum zuak, sum bawl lem mah mah a,tuate tung tawn in a ki hau hi hong cih san hi. Lawm aw tua ai lehnang na sep bang hi a, bang cidan sum ngah na hiam ci in ka dong hi. Ka lawm pa in Hua pam deuh a Shoping Mall na mu hiam hong ci in ka et phei leh a inn pam vuah inn thatsang mah mah khat ka gal muh phei hi. Huoooo ci in ka dip lawng kawm sa in nasia lua hi lo maw ci in ka phat hi.

Ka ki ho kawm un ka lawm pa a phone lut a, a lawm te khat tawh ki ho hi. Tua lai tak in a tapa sangkah ding in hong pai khia a, a pa kiang ah siamah nu hong tung ta hia? Ci in Computer mai ah tu hi. A pa in siamah nu hong tung dektak ta ci in a gen laitak siamah nu hong lut hi. Sanginn ah sanglai a sin ding ka sakleh siamah nu a inn ah sam a, lai a sin uh a hih lam ka thei hi. Banghangin thei ka hiam cih leh minit 45 khit teh siadang khat mah hong pai in lai hilh uh hi. Ka lawm pa ka dot loh hang in sanginn ah sang ki kah nawn lo in inntek ahsang lai kisin sak ta cih ka thei hi. Asangkah dan te uh ka tel dot dot teh laivuan ciang zong online pan in laivuan uh cih zong ka theih beh laihi.

Ka lawm te inngei ah ah Mawtaw hoih no no tawh 10 val ding bang hong ki zui ziah ziah uh a, ulian te hoh pia hi phial hiam ci inka lim et mah mah leh ka lawm pa in bang en na hia lawm Khuata neu pan a, Tedim hong pai te uh hi ei hong cih ciang lam dang ka sa hi. Kei theih lai in a hih leh Khuata pan in Tedim pai te khe tawh pai uh a,singpeuh pua kawm, sengpeuh pua kawm uh hi. Tu in a hih leh sengpua a, a mi zawng cih dan pen tangthu bek in ki gen ta hi.

Ka lawm pa tate tung ah mizawng te omdan, nidang lai nuntak dante ka gen kik ciang zak nop sa mah mah thei sawnsawn uh hi. Zomi leh Zogam zawn dan pen tangthu bek in ki thei ta maw cih ka phawk kawm in kei zong ka khua pih te in mawtaw tawh hong pi ding in ka lawm pa inn ah hong tung uh hi. Ka khuapih te in mawtaw tawh hong dawn uh a hih man in keizong ka khua vuah nuam tak inka tung kik theihi. Deih Tung