Zo vontawite laitual lenna Swe-tui vangkhua – 1

Zo vontawite laitual lenna Swe-tui vangkhua – 1

Zomite pianna gamnuam itlo-ngailo hi peuhmah lo-in nuntakna hamsatna hangin gamtuamtuam ah ih pai hi. Ih gam ih lei hong ukte’ bawlsiatna hangin zong a tung ih om hi. Ih lam kiatna leitang ih Zogamah ih innteekzo kei hi. Va-ak anne bangin ih dipkua den hi. Sweden gamah pianpih laizomte a om diam ci-in ka dawp kiaukiau leh Leilum pan U Cinno (Nang Khan Cin) tawh email tung tawnin ka kiho kha aa, Zomi Innkuan Sweden tawh kimuh nopna ka gen ciangin amau zong hong kikum uh aa, hong lemtang pah hi. Sweden gamtung Zo mite’ innpi ahi Sia Lian Do te zong na om ahih manin senpi mahmah hi. Amah ZISweden ah thuvanpi hi a, u Cinno in thuzeekpi a sem ahi hi.

14 May 2011 ni-in amaute thusiamna leh deihsakna hangin meileng tuangin Stockholm panin mipihte’ omna Ljusdal khua ka va paitoh leh Sia Lian Do, U Cinno leh England panin hong hawhpak sia pauno (Sia Zam Heh Pau) makai-in laizom zomi khangnote in hong na dawn ngeingai uh aa, ka pianna nulepa, sanggam ulenau leh Zogamnuam a mu bangin ka kingaihsun a ka lungsim hong zenlua mahmah ahih manin, ‘Zo vontawite’ laituallenna Swe-tui vangkhua,’ ci-in ka lungsim sungah hong kilo niloh hi.

Sia Lian Do in a motor hoih mahmah maibukah hong tuangsakpah lian aa, zinmangpi muak bang lianin hong dawn ahih manin ka lungdam pha mahmah hi. Cope Topa’ jubilee khit –aa thang Zolukhu khat khu ka hih manin Khaipi in, ‘Sia aw na lukhu hong nusiat in,’ hong ci aa, ‘A hoih zaw omlai,’ ka cih leh nang-aa bek deih hong cih ciangin Sweden te’ bawllung siampa Zlanta Ibrahimovic bang ka phawk peuhmah hi. A nitak ciangin bawngsa sungkua a kizohuan ngiat tawh hong vak lian mawk uh ahih manin Zo ngeina a bawlbawl bangin ka kingaihsun hi. Kamphen kullo Ciimnuai mi 50 bang om ahih manin Sweden gam pen Zo vontawite’ laitual lenna taktak ahi hi.

Khualzin Theihna Thugui

Myanmar Institute of Theology (MIT) leh Stockholm School of Theology (THS) te in sangnaupangte´ thutawkna khan nading sinkhopna(joint program) khat 2010 kum beikuanin nei uh hi. Tua manin MIT ah “Peace Building: Theory and Practice” cih thulu (elective) khat sangnaupang mi 8 teelkhia-in hong sinsak uhi.Sangnaupang a ut khempeuh in siau aa, interview-aa kiteel ahi hi. Hih thu sinna tung tawnin Sweden gamah khual a kizin thei ahi hi.

Peace Study Centre panin staff nih tawh mi 11 pha-in Revd Dr Maung Maung Yin, Vice principal, MIT, in hong makaih hi.THS panin Prof. Kjell –Åke Nordquist in tavuan hong la deuh hi. Sumlepaii tawh kisai-in Sweden International Development Agency(SIDA) in a bei khempeuh hong huh ahih manin visa fees nangawn hong kimap hi. Zomi 6 lakah Ciimnuai mi kei ka kihel kha hi. Kachin 1, Kayah 1, Kayin 1 leh Kawlte 2 hi ung.( Khen nihna pan tomlak pak)

Thai Airways (TG ) leh Theihhuai Thu

May 5,2011 ni-in TG 304 tawh ka zinkhia uh hi. Kawlgam ah Sweden Embassy omlo ahih manin Bangkok ah zan khat giakin Schengen visa ka siau uh aa, ngak kullo-in ka ngahpah uh hi. Schengen visa cih pen European Union sungaa kihel gam 14 pai theihna visa ahi hi.Bangkok International Airport pen theihsa ciat mah bangin nasia sim ahih manin a thu ka kan leh , ”Mid-1960 kimin Kawlgam in tua International Airport bawl theih nading a ngah linlian hinapi’n U Ne Win in nolh hi,” ci-in hong kigen hi.

‘Pammaih tak ei! ma taw,’ ka ci bek hi. Hih Thai International Airport pen 1960 kumin Bangkok ah a kilam hi takpi aa, tu-in jet vangleng 85 tawh leitung mun tuamtuam 72 bangah khualzinte puak uh hi. 2010 kumin khualzin min awn 18 om hi, ci uh hi. YANGON-BANGKOK tai 368 bang kigamla aa, nai khat val deuh bek kileng hi.

BANGKOK pan STOCKHOLM

6 May, 2011 nitakin TG 960 tawh BANKOK SUVARNABHUM pan ka leng kiaukiau leuleu uh aa, nai 10 leh minute 40 bang ka lenkhit ciangun ARLANDA Airport,STOCKHOLM cidam takin ka tung uh hi. BANGKOK- YANGON- CULCATTA-LAHORE-MOSCOW khuapite kikantan deudeu-in STOCKHOLM khuapi a kitung ahi hi. Tai 5157 bang kigamla hi. Tuipi pan a sanna pi 39000’ ngenin vanleng leng aa, nai khat in tai 569 mph tawh leng hi.STOCKHOLM tun tak ciangin hong kidawn aa, na khempeuh a thak vive-in kimupah hi.

Teologiska högskolan stockholm (THS)

THS ah hong giaksak uh aa, tun cil aa kipanin lecture kingaipah ngekngek hi. Kongkhak hondan, coffee dawndan, leh Swedish an nekdan ka sin uhi. Tui khempeuh dawn theih lian hipah hi. Tuilum leh tuivot deih bangbang zat hi pah hi. Muh ngeiloh theih ngeiloh vive ahih manin a nuihzakhuai tampi ka tuaktek uh a, coffee leh jurgot a dawnkhawmkha tawh, niangtui leh coffee hel a dawnkhawmkha tawh, tui salua tawh a kisilkha tawh ka om phengphang uh hi.

Aktui kang pawl in meikhusak lua ahih manin alarm hong hampah zeza hi. Ka ciah ma-un bel ka siamtekta uh aa, tun bel ahih leh mangan nekzawh ding bek in sam zawta hi. THS sang pen Tuiphum, United Methodist leh Mission Covenant Church cih pawl nam thum kipawlkhawmin a huh uh ahi hi. Hih thu pen thangah huai ka sa mahmah hi. Bek tham lo-in tua pawlpi thumte a sawt lo-in hong kigawm ding aa, United Church khat hong suak ding hi.

Leitung Khristian Pawlte’ kipawlna tuamtuam BWA; WCC cihte ah kipawl ding uh aa, Local pawlpite in zehsak thu(ordinance) ah amau san dandan zat theih dingin lungkim tek uh hi. A ettehtak kipawlna khat hi dingin ka lamen hi. Hih bang a piantheihna pen a khangnote un na a sepkhopkhop man uh, ci uh hi.

Lecture-te zong zaknop thei mahmah aa: Theology, Human Dignity and Church Work, What does it mean to be a minority?: An International Law Perspective, Social Work and Global Realities- Human Trafficking and Diaconal Work, Friction or Freedom?: The Church and Its Conflicts, State Formation and Ethnic Identity, The Sami Council- Indigenous Rights and Political Realities, leh Being Sami, Living Sami, Believing in Sami cih thulute mun tuamtuam ah khualzin kawikawi-in ka ngai thei uh hi.

Revd Karin Wiborn tawh Holimna

10 May, 2011 ni-in Swedish Baptist Union-aa thuzeekpi sem Revd Karin Wiborn(Numei) tawh ka kimu uh aa, “America gam peem Swedish sangmangte in ko Zomite lungdamna thu hong hilh hi, “ ka cih leh, “ nungin zong Dr Simon (Sia Enno) in zong hong gen,” hong ci hi. Tua khitteh tu kuma kipan , “No Zomite Pasian’ thu ah hong kem dingin ko Baptist Union in pastor khat ka khan ding uh hi hong ci hi. I sanggam Khalkhate khat hih tuak hi.

Nitak lamciangin khuapi sungah ka vak kawikawi uh aa, Noble Museum, King’s Palace, Concert Hall leh City Hall-te ka va en uh hi. Noble prize a kipiak ciangin Concert Hall ah kipia aa, annek pihna City Hall ah kumpipa leh prime minister-pa makai-in neihpih uhhi. Tua khit ciangin WCC in 1968 kumin Meetingpi a neihna a nasia mahmah Cathedral ka va en uh hi. Tua biakinnpi Scandivinia gamte lakah university ham pen Uppsala university huang sungah om hi. Suang Khen Pau