ZIUSA pan Khuado Thuphapuak

Zomi Innkuan USA – Executive Committee

KHUADO THUPHA

K’ong it Zomi, laizom u leh nau, nu leh pate aw,

Dam maw! “Lungdam Khuado Thupha” ci-in, Zomi Innkuan USA kipawlna Executive Committee pan itna lianpi tawh hong muak ung.

Kumsim October kha ahong tun’ ciangin ih Zogam ah an kilakhinta ding a, khuazang in Khua a do dingin lawptak in ih kithawi tawntung hi. Tu hun ciangin Zogam sungbek hilo, tuipi galkhat dong ah, ih tuntunna pan minam picing khat hihna tawh ih ngeina manphate kemcing in, ih khuazang in Khua ih do ziahziah hi.

Zomi-te’n pawi lianpi khat-aa ih neih ahi, hibang Khuado hunpha sung ah, Zogam sung a kipan muntuam gamtuam a om Zomi khempeuh in, ih innkuan sung ah ahi zong, a lawm a lawm in ahi zong, khua leh tui kipawlna min tawh ahi zong, cidam lungmuang takin, Khua do in, ih biak Pasian hong piak thuphate simkhawm a, lungdam ako theiciat dingin thu ka ngen uhhi.

Ih Zonngeina ahi Khuado thupi’tna in, akhang akhang in, pupa ngeinate ih luahsukna hi a, tua ngeina hoihte tungtawn in anungta Pasian bia-in, lungdam kohna tawh thupha ngenkhawm thei ihih manin namdangte sang’in Ngeina manpha mahmah khat anei ihi hi. Tua in minam dangte lak ah, ih thupi’tna, minam kician khat ih hihna hong kilangsak hi.

Zogam ah suakta takin “ei’ thu e’n khensat theihna” (Self Determination/Federal System) neizo theibang hi le-hang, Zomi Khuado Festival Holiday ci-in, leitung bup Zomi khempeuh in ani ahun a kibang-aa a bawlkhawm thei ding cih ih ngaihsutteh lawp huai mahmah leh hanciam huai mahmah hi. Tua ahih man-in, Zomi mimallip in Ngeina hoih khat bek in ngaihsun mawkmawk lo-aa, ih ngeina hoih te tawphah (siksan) in ih kipumkhat theihna ding hanciamciat ni.

Khuado a hongtun sim-in, alawp mahmah ih om zah khat-in, khuanung ngaihsun-aa, a lungleeng khuangai zong tampi omkha ding hihang. Tua a hoihlo khempeuh mangpha khak, nusia-aa, ih kibatlohna khempeuhte nusia-in, ih kibatna ahi, ih Zongeina sungah kipawlkhawm aa, ankuang umkhopna tawh Khuado Pawipi hunnuam ih zang ding hi.

Tua hi a, Khuado Thupha ahi anungta ih biak Pasian Thupha namcin leh khanglui ih pulepate’ ki-itna, kilemna thupha khempeuh hong tungkik tahen ci-in Zomi Innkuan USA kipawlna min tawh “Khuado Thupha” ka hongpuak uh hi. “Happy Khuado”

Tu kum ih Khuado Pawipi sung a kipanin;

• Zomite khatlekhat ki-itna khang semsem tahen!
• Zomite khatlekhat mawh kimaisakna om tahen!
• Zomite mainawt tahen!

Executive Committee
Zomi Innkuan USA, Inc.

Tang’in;

Pa Thang Tul Mung
Vice President
Dallas/Fort Worth, TX, USA
October 1, 2014