Zite’ lungnopna kim a pasal ~ Tdkhen

Zite’ lungnopna kim a pasal ~ Tdkhen

A kiten zawh uh kum 25 a phak’ma deuhin nupi khat, nitak-anneekkhopna mun khatah a va kihel hi. Leitunga Violin(music)tum siam Paderewski(numei) ankuang um’na ah a kizom kha uh hi. Tua nupi nu in Paderewski kiangah Northampton Academy of Music sanga a kahlai-a a music tum’ zaknop a sak thu a gen hi. Paderewski in zong, “Tua na sanglui vuah na pai kik ngei maw” a cihleh nupi nu in, “Pai kik ngei e, ka kikhopna munte vuah pai-in, ka tutna munte ah ka tu a, ahi zongin tua ka tutna munte-a ka tut laitaka ka lungnopna sangin tu-a ka lungnop zawknate ka ngaihsun sun hi” a ci hi.

Tua thu a gen takciangin Paderewski in lamdangsa in, a annek laitak tawlnga photin, “Tua na khangno lai-a na omdan sangin tu-a na nupi’zawh cianga na om’dan nuam sa zaw a ci na hia” ci-in a dot pahleh, “Hi e, tua pen a hive ka gennop” a ci hi. Paderewski in zong amah nohset kawmin a mai-ah kun a, “Pi aw, na pasal munuam mah sing’ee” a ci hi.

MAWH NGAMNA IN MAWHMAINA HI

King William kumpipa pen Potsdam thonginnah a pai hi. Thongkia mite khatkhatin a kiatna thu uh a dong hi. Thongkia mite in bangmah mawhna nei lopi, a kiman khial vive-in a gen uh hi. Ahi zongin khatpa pen pau lo-in a ding niloh hi. Kumpipa in, “Na gen’ding theilo na hiam” a cih ciangin, “Kumpipa aw, kei bel ka mawh, ka khialhna hang mahin a kia ka hi hi” a ci hi. Kumpipa in zong thongcingte’ kiangah, “Thongkia khempeuh lakah hih pa bek mawhnei ahih manin, a lawmte a lawhma-in amah khahkhia pah un” ci-in thu a pia hi. Amah zong a inn lam zuanin a ciah pah vingveng hi.

NISIMIN MAT HONG KILA

Kenya gam, Nairobi khuapi-a gamukpa’ nuai-a ulianpa’zi in nungakno khat a nasem dingin a ompih hi. Kha thum sung a sawt ciangin a pi’kiangah, “Pi aw, Moslim kumpipa’ zi meltheih hilo na hia mataw, ama’ kiangah zong kha thum sung ka omtheih nadingin lai hong gelhsak in” ci-in a gen hi. A pi in, “Ka kiangah hong om lai ve, na khasum zong hong khang sak ning maw” a cihleh nungakno in, “Pi aw, khasum khan ding deiha paikhiat a sawm hikei ing.

Bang biakna zui ding ka hiam cih khensat theilo ing a, na kiangah Khristiante’ om dan kha thum kong sinkhin a, Muslimte’ om dan sin dingin kha thum mah om’ ka ut hi. Tua ciangin ka zuih pen ding biakna ka thei tading hi” a cihleh a pi in, “Aw tua himawk maw; nong om’tuung’in na tupna hong thei hizen leng maw” ci-in a kiphawk mahmah hi. Tdkhen