Zingdai hawhna (Visited Early Morning at Garden Tom)

Zingdai hawhna (Visited Early Morning at Garden Tom)

Khanglui te’n han hawh, han a pai pen daihawh cih kammal na zangh uh ahih manun daihawh cih kammal kong zat ahi hi. Jesu Kivuina Huansung leh Calvary Mual (Garden Tomb & Calvary) a kici pen ei Zomi pau in Jesu ki vuina huansung cileng, telnop pen dingin ka lamen hi. Mihing lutang guhmah bangin in suang bekbek mualkhat aom hitakpi in Lai Siangtho sunga I simte a takpi ahih lam hong phawksak semsem hi. Garden Tomb tawh ki zomin Lutangguh (Golgotha) mual nuai pen Garden Tomb hipah hi. “Golgotha” pen khatvei leh “Calvary” kici a, khatvei leh, “place of skull” kici hi.

Golgotha pen Greek kam pan hi-a, Calvary pen Latin kam pan hi-in mangpau in a khiatna place of skull naci uh hi. Zokam in “lutangguh mual” kici hi. Jerusalem tawh mile 20 kim khawng kigamla a, Kumpi David in hih mun ah a galpa Goliat lutang phum hi, ci-uh hi. “King David cut off the Head of Goliath and took it 20 miles to Jerusalem and buried it at Mount Calvary” “The place of the Skull”…..Satan’s seed was crushed by Jesus Christ” cih kigelh hi. Akim apam inn leh lampi dimkhinta hi.

A huansung ah singkung tuamtuam omin hing sitset a, tua singnuaite ah tutna ding, singtutpahsau koih kawikawi uh hi. Tuateng video zaih, mankhit teh, Jesu kivuina han, suanghawmpi kici khat omin tua sungah ka lut uh hi. A suanghawm gol mahmah a, dinsa in kilut in a sungah sikkhau golte tawh deikhat kidei-in tawh kikalh a, tua sungah Jesu a sih khitteh kisial hi, ci uh hi.

Tuasung siang mahmah-in ngil kiukeuh a, tangtak enpheileng abang tungah a sanin singlamteh neucik khat kisuai a, tua singlameteh kikal atung le anuai, a ziat le avei kikalte ah Greek lai in a santawh YC XC A W hih danin kigelh a, a khiatna pen Jesus Christ Alpha and Omega( Jesu Khazih a patna le a tawpna) a cihna ahi hi.

A sungah lut-in khukdin sa-in lungsim thungetna ka nei a, Topa Jesu aw, keima mawhna hangin nang hih suanghawm sungah hong kisial hilawmlawm maw, leitung hun beimateng, Zomite a khangkhang in hih mun hong ensak in, cih bangdan a tuamtuam in thu ka ngen hi.

Tua suanghawmpi ka etkhit uhteh hih huangsung a, Chapel hall neu khat omin tuasung ah ka lut uh hi. Christiante a pawlpawl in a paipeuh mah, hih chapel sungah thungetna, lasakna le neekkhawm neizel uh hi. Ko pawl in zong tuadan mah in ka nei uha, thunget leh lasak zong nuam ka sa mahmah uh hi. Kha Siangtho nasep dan lamdang mahmah, thupi mahmah khat keima tungah hong kilang hi.

Bang dan hiam cih leh ka thungetlai tak-un ka lungsim sungah “Topa Pasian Nangma khut a na bawlsa, leitung khempeuh ka ngaihsut ciangin ah,” cih la sakkhiat ding, hong suak-a, kei zong mi thungen kimlai hih la pan-a vasak dihdih ding, ci-in ka kisuang a, lasa pahlo in lawmte ka ngakbawl hi.

Thungente zong khat mandek pan leh khat in panzel, hong tawpthei mahmahlo uha, a tawpna ah hih la ka sakkhiat leh ka lawm dangte in zong hong sakpihpah ngeingai uha, tua khitteh ka thunget uh ka manthei uh hi. Hih Chapel sunga kikhop pen a innsung aneu mahmah hang, Kha Siangtho in hong ompih in kikhop nuam mahmah kasa uh hi. Mangngilh theih loh ding khat himawk ei.

Hih mun tawh kisai a theihhuai diak pawlkhat:

1. Hih mun pen 19th century masiah Jerusalem huam sungah om nailo a, Topa Jesu hunlai in Jewste thukhun ah a kikhailum peuhmah Jerusalem khuapua lam-ah kikhai lumding ahih ban-ah, Jerusalem huam sungah vuitheih loh ahi hi.

2. Tua mah bangin Jesu in zong, ama sisan tawh mite mawhna a siansak theihna dingin khuapi pualam ah a si hi. Habrew 13:12.

3. Jesu ki khaina mun pen Jerusalem khuapi tawh kinai ahih manin Judea gam mi tampi in hih lai kigelh asim uh hi. Tua lai pen Hebrew lai, Greek lai le Latin lai in kigelh hi. Jn 19:20.

4. Jesu Singlamteh tungah a ki khaina mun tawh kinai ah huan khat om a, tua huan sungah kuamah a kivui ngei nailohna hankhuk thak khat aom hi. Tua ni pen kigin ni hi-a, Jews mite Sabatth ni hong naita ahih ban-ah tua hankhuk tawh kinai ahih manin tua lai mun-ah Jesu a vui uh hi. Jn 19:41-42.

Jesu thokikzo, hing kik zo cih pen a nungta Pasian Jehovah Pasian a anei leh Ama kammal Lai Siangtho a um eite ading ahi hi. Biakna dangte tawh i ki lamdan napi pen zong ahi hi.

“Han sung pan hong thoto zo, Vanglianpi tawh galte zogawp zo, Khuamial gam pa’n galzo in hong thoto zo, A misiangte manpihding hingkik zo hi, Hing kik zo, hing kikzo, Hallelujah hing kik zo!” Rev. Do Khan Khai