ZBCA Khawmpi 7 veina ~ Thang Van Lian

ZBCA Khawmpi 7 veina ~ Thang Van Lian

America gam a om Zomi biakna bulphuh kipawlnate lakah a lian pen khat ahi ZBCA kumcin khawmpi 7 veina pen Zomi Agape Church, (Sia Huampite) te inteekna tawh Dallas khuapi, Texas ah July 19 – 21, 2019 sung teng nuamtak kizang thei hi. Kei mimal ading leh ka Pawlpi uh Zomi Laizom Christian Church, Atlanta te adingin khat vei ka kihelna uh hi a, mi 35 ka kihel thei uh hi. Thangah huai leh lawp huai sa mahmah tek ung. Tutung khawmpi pai khempeuh mipi 1100 pha, ci-in makaiten gen uh hi.

Makaipite, Praise makaite, tumging tumte, media te leh innteekte kipiakzawhnate leh mipite omdan kilawm mahmahte etteh taak, lungdam huai leh thangah huai sa mahmah ing. Zogam pan US ah i puak, ngeina hoih lo – hun man lo, thugen nuam tam lua leh gen nop hau lua, nin pheng paih, thungai mel lo kihoho, phone khoih khoih… cihte bel a khangto gam a teeng ihih tawh kizui-in damdamin hong beibei lel ding ahi hi.

Khawmpi pan ka phawk khak pak theih huai leh thangah huai ka sak teng anuai abangin hong hawmsawn nuam ing. Hihte pen Sia Pau Khai, GS-ZBCA in zg mipi zakin a taangko sa ahih manin makaiten zadah lo dingin lamen ing.

1. ZBCA pen Pawlpi 44 te kipawl khopna hi-in Baptist World Alliance, Christian Churches Together, North American Baptist Conference cihte ah full member hi a, USA gam Zomi biakna kipawlna ah a pawlcing pen leh nasepna ah zong a tangzai pen khat hi.

2. Gampua pan zin zahtak ulian leh lasiam tampite in hong uap thei uh hi: Lasiam JK Kam (Norway), Lasiam Esther Sian (Australia), Lasiam Rody Zaliensing (India) te; Lasiam Stephend Mang (Myanmar) te akipan Khanglui khangthak lasiam tampite; Myanmar ulian Pi Dr. Anna (Vice President 2, Pu Van Thio’ angkawi), Pi Cing Ngaih Mang (MP); Gamsung pan Pu Go Sawm Khup, Board Chairman, ZIUSA leh Myanmar gam biakna lam pan Rev. Tuan Khan Mung, President (ZBCM), Rev. Langh Za Kap, GS (ZBCM), Rev. Dr. Ciin Sian Khai, Vice Principal, ZTS te leh BWA pan Dr. Phillips cih bangin khual le tual pan sangkahte leh ulian tuamtuamte in khawmpi hong uap thei uh hi.

3. Tutung khawmpi ah Pawlpi 5 ciapteh thakna leh Partnership neihpih Pawlpi 3 kiciamteh thak a, Pastor 8 ordination kipia-in MC mi 8 kiciamteh thak hi. Tuate lakah kei zong khat in hong ciamteh uh a, ordination ngahsa ka hihna zong hong kipsak uh hi.

4. ZBCA Khawmpi A 8 Veina pen Zomi Baptist Church, Portland, Oregon State te innteekna tawh July 31 – August 2, 2020 sung teng kinei ding hi.

5. ZBCA gamsung local Pawlpite in Pastor pension dingin tualsung Pawlpi hatna zui-in 3% – 5% peuhmah Pension fund a kholsak ding kithukim hi. Tua banah GP Fund 10 % , family allowance leh house rent zong local Pawlpite in hanciam a ngaihsutsak ciat dingin kithukim hi.

6. ZBCA min tawh USA ah Lai Siangtho sang – Zomi Christian Theological Seminary kihong ding a, gampua pan sangkah ding mi saptheihna I-20 issue theihna ding kumpi phalna kihanciam ding hi.

7. Kum 2020 ciangin ZBCA gamsung a om Pastor 50 valte in amau ip sung sawkin leitungbup mun tuamtuam a om Zomi Pastor/zi meigongte phawkna leh itna letsong pia khia ding uh a, a kisam bangin ZBCA in zong vai dinpih ding hi.

8. ZCLS innteekna tawh ZBCA in main sponsor semin 2020 March kha sungin Kawlpi ah biakna/leitung lam Zomi makai muan leh suan kigawm mi 1000 kimuh khopna lianpi khat kinei ding hi.

9. Baptist World Alliance Congress Khawmpi pen Rio de Janeiro, Brazil ah July kha tawpna ah kibawl ding a, ZBCA min tawh mi 200 peuhmah pai zawh ding kigeel hi. Zomi min tawh ‘ngeina lam’ lak dingin ZBCM – Tulsa te gambup in kiseh hi. Nidangin BWA Khawmpi mipi a tam ciangin mi 200,000 bang kipha a, 2020 pen Youth zong kigawm ding ahih manin mipi tulzanih val pha dingin kilamen hi.

10. Kum sim sangnaupang 16,000 val bang a om denna Baylor University, Texas tawh pang khawmin Zogam ah pilsinna lam nasepna lianpi pen 2020 pan kipan thei ta ding.

11. ZBCA hanciampihna tawh ZBCM in APBF leh BWA ah full member hihna ngah banah mailamah India gam a om member tul sawmguk bang a nei EBC, Mizoram a om ZBC leh Kawlgam a om biaknate tawh pang khawmin nasep ding maban limci tampi tak nei hi.

12. ZBCA gamsung ah biakinn pankhopna fund kumsimin kinei a, Pawlpi khat ciangin $ 2000.00 tawh kilawmin kumsim kipang khawm ahih manin Pawlpi khat tungah biakinn huhna $ 80000.00 bang tawh kumsim akihuh zo suak hi.

13. Zomi khangthakte thapiakna khat ahi Myanmar gam tan 10 All Distinction ngah Zomi sangnaupang pil tungtuangte pahtawina mi khat Ks. 1,000,000.00 (MMK One Million) ta a kipia pen mi 40 val tungah kipia khin a, mailamah zong kizom toto lai ding hi. Thang Van Lian