Zawn baihna thusim ~ Job Cinpi

Zawn baihna thusim ~ Job Cinpi

Hauhna thusim a om mah bangin zawnna thusim zong na om hi. Zawnna thusim kici ahih manin theih loh kaal-in hong zawngsak thei ziau ding hi. Mi pawlkhatte in hauhna thu bek kan uh a, bang hangin kizawng cih kan lo uh hi. Tua hangin mi pawlkhatte khasum tampipi ngah, sum tampipi a met dingin na semin sum zong uh hi. Ahih hangin a zon masaksak uh khol theih mel nei lo uh hi. Sum lut a tam mah bangin a luangkhia zong nasia pah hi. Tua bang mite in zawnna thusim thei uh leh tua thusimte piel thei ding uh hi.

” Zawnna thusim”

1. Nopzat le mawkzat khen thei ding

Sum cih pen a zat dinga kibawl ahi hi. tua manin zang ngam lo a, singkuang sungah kalhcip ding ahi kei hi. Ahi zongin zat nading a kisapna munte ah zat ding hi beka sum zat nading zon kul lo hi. zat nading mun a zang theite sum a nop zat hi uh a, sum zat nading a zongte a mawk zat ahi uh hi.

2. Ngahna sangin a tam zaw zatnopna

Khat veivei ciangin ngahna sangin a tam zaw zat loh a phamawhna mun a om hun om ding hi. A diakin khasum sang lo a, mun masak nek masak a thuah nektawm zongte adingin a sep a bawl nai loh nangawn a ne khin om thei lai ding uh hi. Mi hai mi mintangte in na hauh nadingin na kivak penpen sim in, ci uh hi. Ahi zongin nasep bawlkhatte pen bang zah takin i kiva phial zongin hauh nading lampi a om thei lo, nasep pawlkhat om thei hi. Tua bang nasep a semte adingin ngahna sang a tam zaw zang lo ding cih pen an ngawl ding cihna tawh kibang thei hi. Ahi zongin hauh ding a hanciam nuam, nasep hoih tawh sum a zong nuamte adingin ngahna sangin a tam zaw zatna in zawnna kipatna ahi hi.

3. Gualnopna le kitahna uk luatna

Nungak tangval gualnopna ahi a, zu le sa khamtheih guih theih tuamtuamte tawh gualnopna ahi zongin tuate a lunglut lua mi peuhmah bang zahtakin a hau zongin zawhna tawh kimaituah ziau thei uh hi. Kitahna tawh a hau mi om nai lo uh hi. kitahna cih pen a taktak ciangin a kizongsang thei khat ahi hi. A sawtna ah a sum a met cih ding sangin kitah himhim ding cih lungsim tawh a kitah nuam mi pawlkhat om thei uh hi.

4. Sum leitawi’ hangsan luatna

Hau nuam lua ahih manin ama neihsa in a cit loh nasep lianpi khat sep ding gelna tawh a inn a lo pong lianga sum a leitawite, a ngah ding om ahih manin tuate lametna tawh sum a leitawite dinmun pen a lau huai mahmah ahi uh hi. Hau ziau thei uh a, bom ziau thei uh hi. A theihtel mahmah, a siam mahmah nasep khat a semte ahih uh leh hauih nading lampi om thei hi. Ahi zongin a sep ngei loh, a kihanthawn cihte tawh a septe ahih uh leh bem val ziau thei uh hi. A tei mahmahte nangawn zong a bem val ziau tampi om khin uh hi.

5. Deih le kisap a khentel thei lote

Na khatpeuh a lei ciangin hih ka na lei pen ka kisap a hiam, ka deih mawkmawk a hiam cih a khentel thei lote zong zawnna lamah niam kiat baih mahmah uh hi. Mihau mahmah khat in hih bangin gen hi. ” Van khat ka lei ding ciangin tua van pen a tawm pen mun nih bangah a kizat theih kei leh lei loh ding ka kizo zaw hi,” ci hi. Khat veivei ciangin deihna in zo zaw ahih manin i deh khempeuh a kisam tawh kibang pah lel thei hi. Ahi zongin tua a kisapna taktak bang hiam cih sittel ding kisam hi. Job Cinpi (Zomi Laisim nuamte)