Zanni Zomi, tuni Zomi, zingciang Zomi ~ Thang Cin Khai

Zanni Zomi, tuni Zomi, zingciang Zomi ~ Thang Cin Khai

Mangkang te in, leitung gamtuamtuam te la kawikawi uh a, 1885 Kum ciangin, Kawlkumpi ukna teng laksak in, Kawlkumpi Thibaw Min zong man uh in, akhantawn Innsungah khumcip uh hi. Tua ciangin Zogam zong ong sim to uh in, Ih Zogam zong Mangkang te khutnuai ah ong tung hi, Hih mangkang ten ih zogam ong lak masiah pen, Ei leh ei ana ki uk khin te ih hihi. Galpi nihna aven ciangin Mangkang te in, amau khutnuai ah om gam te suahtakna piakkik ding ngaih sun uh hi.

Tua laitak in Kawl te makai pi General Aung San in, Zomite, Kachinte, Shiante na zawn a, suah takna ngah khit teh hih asuak ta gam nga teng kigawm in, belpawl gam khat phuh dingin, 1947 Kum Feb 12 ni-in, Panlong thukimna a kici, Minam kee tuamtuam ukpi te, Sgin thuhna hi a, Ei Zomi te sung pan in, Saizang Ukpipa, Pu Thawng Za Khup pen, Panlong Agreement a Zomi te sgin thupa ahihi. Tua tungtawn in Panlong thukimna ci-in, nakip sak uh hi. Anung lam the Karen te in zong, belpawl gam a kihel ding khentat uh a, amau tawh asuakta teng kigawm in Gam khat in na ding uh hi. Tua pen, tu a ih kumpi ki ukna kawlgam ahihi.

Hih thu kimna tungtawn in, 4th Jan 1948 Kum ciangin, Mangkangte in belpawl Gam suah takna pia hi.1948 Kum Feb 19-22 sung, Falam ah suah takna ngahna lung damna pawi leh ki ukna thak tawh kalsuan zia ding mipi tungah theihsakna bawl uh hi. Tua ban ah, Pu Thang Za Kai thusun pi pen ahih leh, Gambup Innpi ah atu thei ding pen, Ukpi te bek hilo in, mipi tetel te zong tu ding cih thu sun ahihi.
= Pu Thang Za Kai pen Galkap bu bawk 2 ( Indian rank Subbdar hi) Tuithangkhua te hi a, atapa upa pen zong Lt.Col. Kam Do Khup hi. Mitam theih zawk na dingin Sia Rev. Kam Khaw Thang pano hi.

1947 Kum a, Ukpite Panlong thukimna leh Pu Thang Za Kai thusunna tungtawn in, Mangkangte a bawlsak Chin Hill Regulation Act ( 1896) thukhun tawh kalsuan ding pen belpawl Gamtengin thu kimna nei thei uh hi.

Hih hun sung pen, Zomi cih kithei napi hangin, Minam Min in adingzo nai lo i hihi.
Hih pen zanni Zomi te din mun a hihi.

Tuni Zomi te din mun:

Tu ni Zomi din mun pen, Ih Minam min tawh din khiat ding ki hanciam lai tak ahihi. Tua hangin ei leh ei suahtakna ngahna zahzah tawh ei omna, munmun ah, Chin hilo ihih man in Zomi aki ci tangtang din mun ah om lai Minam Zomi te i hihi.

1. 1891 Kum June 23 ni-in, Zomi Pu Hau Cin Khup. Leh Capt. Rose ten Fort White, Khuasak ah kiciamna bawl khin ta

2. 1901 Kum March in, Zomi Pu Hau Cin Khup tungah, Mr. H.N. Tuck in, Ukpi za pia hi. Pu Kam Hau Ukna sung khua 143 pha hi.

3. 1913 Kum ciangin Zolai ih neihna dingin, Missionary Joseph Herbert Cope in hong bawlsak hi. 1915 Matthew le 1932 ciangin NT ten cih bangin Zolai ih nei totot hi.

4. Panlong Agreement minthuhna ah, Chin Hill ong cihna sung pan un, Pu Thawng Za Khup pen Zomi hi-in, 1947 Feb 12 ni a, Panlong Agreement Kawlgam suah takna ngahna dingin, sgin thuh pa hihi.

5. Zolai I neih zawh Kum 35 khitteh, Kumpi te leh Minam makai te tungtawn in, Zomi Nam Ni kibawl thei ta hi.

6. Zomi Nam Ni pian na dingin kikupna ah, Pu Mang Tung Nung in, hun uk in, Pu Thang Za Kai leh Pu SongTheu te kihel hi.

7. 1953 Kum March 5-7 akipan, Chin Hill sung Biakna lam Baptist pawlpi lam te in zong Kum 60 bang Zomi kipawlna min ZBC mah nazang khawm uh hi.

8. 1991 Kum ciangin, Kawlgam ah ZNC Political Party in, kidding khai ta a,Tuni ciangin ZCD min tawh MP6 tawh Minam Party akikal suan lai tak ahihi.

9. Chin State sung minam kee MP nei pen, Zomi te bek i hihi.

10. 2014 Kum ciangin, UN ah ZIUSA in, Zomi min tawh Economic and Sicial Council Status tawh ciap tehna ngah hi.

11. Tu hun ciangin, Biakna lam atuamtuam te ah zong, Minam min Zomi min tawh kiciaptehna ongkhang to semsem ta hi.

12. 2019 ciangin, Zomi National Council of Myanmar ( ZNC M) in UN ah Economic and Social Council Statua hongngah leuleu hi.

Zingciang Zomi:

Zing ciang Zomi ding pen tu a bang lian in, Ih Zomi Minam hihna tawh I kal suan toto nak a leh, Zing ciang Zomi din mun ding pen, Limci mahmah in, Thangmualdawn a zing ni hongsuak ih gal muh bangin, Zingciang ih minam dinmun ding pen kigal muh thei-in, kigal et thei ta hi.

Mipawl khat te in, Zomi cih pen mipawl khat deih peuh sakha uh hi. Hilo hi Kei pen Zomi ka hi a, Nang zong Zomi na hihi. Thang Cin Khai