Zan ihmut theihloh hunte Pasian minthanna ding ~ Rev. Thang Van Lian

Zan ihmut theihloh hunte Pasian minthanna ding ~ Rev. Thang Van Lian

Zan ihmut theih loh hun om thei den hi. Pasian in hong lah nop om ahih manin hong ihmu theisak lo hi thei hi. Tulai thuthangte hangin leh inn sung kikhumcipna hangin zong ihmut theih loh hun tampi om thei hi. Tua ihmut theih loh hunte pen Pasian’ minthanna dingin na zang thei hi. Tua bangin zan ihmut theih loh hunte Pasian’ minthanna dingin na zat nop leh anuai ah ngaihsutna thulu 8 kihawmsawn nuam hang.

1. Thungetna:

Na innkuanpihte, na tanau meltheihte, na minamte, na Pawlpite, na kumpite leh leitungbup a om Siavuan Siamahte adingin thungetsak in. Thungetna tawh kisai hymn late ngai hiauhiau in. Lai Siangtho sung a thungetnate sim in. Thungetna pen nasep lianpi khat hi, cih thei in.

2. Lai Siangtho sim in:

Lai Siangtho pen Pasian’ kammal hi, cih um na hih manin Pasian in bang hong gen hiam, ci-in Lai Siangtho sungah zong in. Pasian’ hong kamciam thute, Pasian’ hong gupkhiatna Lai Siangtho munte zong in la sim in. Pawlkhat lotngah sawm in. Na sim zawh nawn loh ciangin audio tawh ngai in. Bible audio Zomi version: https://www.bible.com/audio-bible-app-versions/368-tdb-tedim-bible

3. Lai khak in:

Na lawm itte, na tanaute, na Siate leh thanem ding a na up mawh mite lai khak in la tha pia in. Lungdam koh huai mite tungah lungdamna ko in la, midangte na pahtakna a tam theithei khak in. Na siate, na makaite, na lawm hoih luite kiangah na phawkna message khak in.

4. Lungdam ko in:

Pasian’ liatna leh hong hehpihna hangin lungdamna koh ding kisin in. Thusia namcin leh natsia satsia tung a thuneipa Pasian’ muanhuaina hangin Topa tungah lungdamna ko in. Nang hong itnate lung ngai in la, tua dan late ngai hiauhiau in.

5. Laibu sim in:

Lai Siangtho banah na inn ah bang laibu nei na hiam, sim in. Na laibu simte a lem bangin notebook sungah ciamteh in la, na lawm itte kiang, na Pawlpi group khawng ah sharing bawl in.

6. Lai gelh in:

Laigelh siamte pen a siamsa in a suak uh hi lo hi. Na innkuan tangthu khawng lai tawh gelh in. Na neulai thu khawng, Pasian in hong tonpih dan nidang hunte khawng lungngai kik in la lai tawh gelh khia in. Na Pawlpi leh na mipihte kiangah na laigelhte hawm sawn in.

7. La sa, la ngai, la phuak in:

La uk, music uk mi na hih leh lasakna, la ngaihna, la phuahna in hun zang in. Midangte lasak dan, performance siam dan khawng nangma uk dan zui-in ngaingai in la sinsin in.

8. Faceook leh Youtube:

Facebook leh youtube a hoih lam a manpha a met thei lamin zat siam sawm in. Thuhoih, Pasian tawh kinaina ding la leh sermon kigente, cidamna, sumbawlna… cih bang a hoih te tawh manlah in la a sia lamsang peel in. Rev. Thang Van Lian