ZAM Thupuak :: 29 Dec 19 (Happy New Year)

ZAM Thupuak :: 29 Dec 19 (Happy New Year)

Malaysia gam sung om Zomi a kuama ciat na taklam khut uh kong len uh hi. Kumthak thupha mikim tungah hong tung tahen. Ni le kha te hong paipai in 2019 hong bei ta in, 2020 cih kum thak sung a lut ding I hi ta hi. Hih 2019 sungin genthei dongtuakna tampi I tuak a, tua bangmah in nopsakna, lawhcin na zong tampi I ngah hi. 2019 sung in Zomi te luang 30 kim bang I bei lawh a, ahi zongin gam thum na lam zong tampi mah I leng khia thei hi.

UN maban nei te a ding 2019 December hong bei in I card te hong renew thei nawnlo ding I dipkua in I om na pan in Pasian tungah kiko in, I hih theihna ciat pan in mapang in I sep khopna te tungah Pasian in hong thukim pih in I vai te hong kizom to kik thei a, Card ki laksak mi tampi te maban ding zong I hanciam tohtoh laitak ahi hi.

Tua ban 2019 sungin Malaysia leitang tungah Zomi te adingin a khat veina ahi Zomi International Conference pi zong nuamtak in kibawl thei a, leitung mun tuamtuam pan Zomi makai te kigawm tuah in Zomi te mailam ding thu kikum khawm thei in, ei Malaysia gam a om Zomi te in inntek I sem thei hi.

2019 Zomi Nam Ni te zong Pawlpi te, Khua Kipawlna te leh mimal mahmah kipawl in I hanciam khopna te hangin lawh cing tak in I zo thei a, minam kician mahmah khat I hih na I lak khia thei hi.

Zomi te in ngeina kician mahmah a nei minam I hih na zong Zomi Khuado Pawi nopci tak in kibawl a, Khua kipawlna te, Pawlpi te leh mimal I hanciamna tawh nopci tak in I gualzo thei hi.

Hong tung ding kum thak ah zong Zomi Nam Ni, Khuado pawi cih te ban ah 2020 Kawlgam bup kiteel pi zong hong tung ding hi leuleu a, hih sungah zong I minam mailam leh kalsuan zia ding tawh kisai in na lianpi I sep dingin hong ngak lai ahi hi.

2019 sungin Zomi te Pasian in hong tonpih in, hong kalsuan pih mah bangin 2020 sungah zong Topa’n a ma telsa minam ahi Zomi te hong mapi in, lam hong lak in hong kalsuan pih ding cih I um mahmah hi.

Zomi te mimal kim ciat in 2019 sung Topa hong kalsuan pih na te lungdam ko khawm in, 2020 sungah I muh ding a ma nasepna thak te a dawn siam thei dingin Topa’n mimal kim thupha hong pia tahen. Happy New Year 2020.

UN AH APPOINTMENT KILA THEI

UNHCR zum ah mithak san na a lunggulh te in online pan in appointment kigen thei hi. Hih pen ei mimal tek in I om na mun pan in lak theih ding in hong gelsak uh hi a, ahi zongin ei leh ei lak ding lem a salo te in I kipawlna ahih manin a thusaupi ding tawh gel khol ding kisam hi.

Tua ban ah hih appointment ngetna ah I zat Phone No. te pen khel thimthum loin hoih tak I zat ding kisam hi. Ei Zomi te sungah phone No. a nawh khel mahmah om a, tua bangin I khel leh UN pan appointment hong pia in hong sap ciang contact ngahloin om leng mi dang supna hilo in ei mahmah I supna pi suak ding hi. Tua ahih manin zum ah I piak sa contact No. te it in kemcing ding zong thupi hi. Hih online pan appointme -nt lakna ei leh ei a la nuamtein ; http://www.refugee-malaysia.org ci-in Google ah at leng hong suak pah ding hi.

Innkuan lutpih nuam a ngah thei nailo te zong online pan in appointment kila thei hi. Ei leh ei a hih thei lote in zong kipawlna zumte pan zong nisim in kihih sak den hi.

2020 ZSM LAIBU KINGAH TA HI

Malaysia zomi Genvai Kipawlna (ZSM) 2020 ading ki lut thei ta a, ZSM laibu te zong kila thei ta hi. ZSM lut man mi khat ciang kum khat ai RM 20 hi a, hih na lutna hang tawh ahamsa a dong tuak I mipihte a panpih, a dah akap hun ah a khitui anulsak na hi gige hi. Hih ZSM ah member na lut na in nang a ding a pia na hikei a, panpihna akisamte a panpihna hizaw hi. A kisam khat I panpih na in Pasian deihna zong ahi hi. 2019 sungin zong tu ciangciang Zomi pih te luang (29) bang lei ah I tuh theihna in nang leh kei I pankhopna ahih bang mahin mailam ah zong mapang khawm lai dingin zong kong zawn phapha uhhi.

ZOMI CUP OM DING

Kumsim I neih ngei mah bangin Zomi Nam Ni muakna in I neih ZOMI CUP zong nasiatak mah in kibawl ding hi. Zomi Cup 2020 lutman pen team khat ciangin RM 1000 hidinga, Deposit RM 400 mah hiding hi. Champion a ngahte RM2500 + Cup + Medal, First Run -ner Up a ngah te RM1500 + Medal le Second Runner Up a ngahte RM1000 + Medal hiding hi. Ki mawl ding ni pen January 24-28, 2020 (Sen kumthak sung)sung hi ding hi. Kimawl ding hun leh a mun te a hun zui in hong kizasak toto lai ding hi. Hih Zomi Cup ah Khua Kipawlna min bek tawh kilut thei ding a, pawlpi leh min dang tuam tuam tawh kilut thei lo ding hi.

Zomi Cup a lut nuam te anuai a phone No. te ah min sazian kipia thei ding hi.

• Sia Khuppi 016 383 8014
• Sia Tuang Pu 016 254 4093

Team min sazian piak nunung ni ding pen January 13,2020 ni hi ding a, tua ni mah in Team Leader meeting leh Group khenna kinei pah ding hi.

A lut ding khempeuh in aman langin sazian nong piak na ding uh zong I kiza sak phapha hi.

PILVANG TAK IN OM SAWM NI

Tuhun laitakin kimat kihen hong tam mahmah a, Malaysia kumpite in a gam sungah phalnalo tawh om mi tampi tak siangsak nuam ahih manin kimat kihenna hong tam to semsem ding hi ci gen khia khin uh hi. Mun tampi ah Oparasi lut kawi kawi ahih manin I omna ciat ah kidawm tak, pilvang tak in om ding hanciam ni. A thukin lua mahmah ahih kei leh vakvak kei zaw ni.

A diakdiak in Immigration te leh CID te uniform silh loin vakvak uh a, tua tungtawn in pawl khat in sum zon na in hong nei beh lai uh a, hong pang kawikawi in tampi pi tawh hong kitan sak uh hi. I vak suk vaktoh na ah kiim leh pam zong hoih takin I et theih ding hong thupi mah mah hi. I omna veng kim veng pam ah zong gam tat zia om zia te hoih tak kidawm ciat ni. Mite mitdong ding leh midangte a nawngkaisak lo dingin kidawm ciat ni.

Kimat kihen bek hiloin migilo zong tam ahih manin I kim I pam om zia hoihtak telpha in gamta ciat ni. Na sepna ah thunei te in sitna khat hong neih leh kei pen UNHCR ah gambel in hong san ding ngak in a om hi ing/UNHCR card tawi gambelmi ka hihi. Ka nuntak nading hih teng ah part time tawh na a sem pak hi ing ci-in I gen theih ding thupi ding hi. Malaysia om Zomipih a kuamaciat I omna gam huihnun zia tawh kizui in kidawm ciatni cih hong zasak phapha ung. A zenzen in kimat kihenna khat natuak leh ZAM zum ah hong zasak pah in. Nang ading in a ready sa in om den uh hi.

WELCOME TO ZAM

Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang in thapiakna leh idea tuam tuam piakna nong neih na dingun kong zawn phapha uhhi.

DAHPIHNA PULAKNA

Pa Anthony Mang Do Sut in 24. 12. 2019, Tuesday 1:00am hun pawl in Kajang Zatopi pan in a it angaih a innkuanpihte le pawlpi mite natna satna lungkhamna omlohna mun amah a nei Pa Pasian’ kiangah hong ciah san ta ahih manin a luang hawm pen 27 December 2019 (Friday) ni in Kuala Selangor hanmual ah kivui hi. ZAM/ZSM member ahih na tawh kizui in a vai khempeuh ZAM/ZSM in kibuai pih hi. A dah akap te tawh kibangin ZAM/ZSM pan in i dahpih hi. Topa’n a dah akap khempeuh hong hehnem tahen.

LUNGKHAMNA IN HONG GUAT PUMPI GIMNA NAM (7)

1. Thau-vatna (or) Gawng-vatna (Unusual Weigh Change)

Lunggim luatna in pumpi sungah Cortisol Hormone hong tam sak hi. Tua hormone in a thau dat, sa dat leh Carbo -hydrate te pian zia hong nawnkai sak a, pumpi thau-vatna (or) pumpi gawng-vatna hong piang sak hi.

2. Pumpi vun tungah a bawk a thak a san a phual tuamtuam posak

Lungkhamna na thuak ciangin na pumpi pan Histamine hong pusuak hi. Lungkhamna in na pumpi natna dal zawh na tha zong kiam sak ahih manin tua histamine te do zolo a, pumpi citung ah a phual tuamtuam hong po sak thei hi. Nidang a na zat ngei mai za te, khutsawpna tui te na vun in thuak zolo in hong san hong phual sak thei hi.

3. Lu hong zing meimai sak (Fuzzy Head)

Lungkham ciangin pumpi sungah hong tam deuh Cortisol Hormone pen hong tam semsem leh lungsim palang sak a, ciamteh zawhna tha hong kiam sak hi. Lungkiatna zong piang sak hi.

4. Lutang na sak (Headache)

Lungkham luat ciangin pumpi satak te hong ton a, lutang na sak hi. Lu phellang natna piang sak nuam deuh hi. Sataina zong piang sak hi.

5. Gilna sak

Lungkhamna in angawina acid tui te tam sak hi. Tua acid hong tam hangin dip sa sak, gilpi sungah huih tam sak, sungpuakna hong thuak sak thei hi. Angawi manlang lua ahih manin satai thei hi.

6. Sampulh sak (Hair falling out)

Lungkham luatna hangin natna dalna tha hong kiam ciangin sam a kipan pumpi mul hong pulh thei hi.

7. Cina pahpah sak

Lungkhamna in pumpi natna dalna tha hong kiam sak ahih manin natna lungno tuamtuam te hong lut baih deuh hi. Hun sawtpi sung cisa, bukhuh natna hong thuak sak thei hi.

Lungkhamna tawh kidim leitungah lungkhamna do zawh na ding nang leh nang bek in na hanciam theih ahi hi. A piangsa thu te ah a hoih lam a ngaihsut zawhna, an hun man in nekna, ih mut ciim sakna leh khut leh khe tangin exercise bawlna in lunggimna hong noptuam sak thei hi. Ref: Prof: Dr. Chit Mg/ Haulun I gelh kik Zomi Daily pan kila kik hi.

ZAM ZUM KIKHAK DING

Hong tung ding January 01, 2020 (Wednesday) ni pen kumthak ni ahih manin ZAM zum kikhak ding hi. January 02, 2020 (Thursday) ni pan in a ngeina om bangin kihong kik ding hi.

UNHCR ZUM KIKHAK DING

Hong tung ding January 01, 2020 (Wednesday) ni pen kumthak ni ahih manin UNHCR zumpi kikhak ding a, January 02, 2020 (Thursday) ni pan in a ngeina bang mah in kihong kik ding hi.

TUKAL SUNG ZATO LAM BUAIPIH TE

• 1. Kam Sian Khual (Vangteh) Ampang Zato ah
• 2. Eng Deih Pau (Pyidawtha) Mission inn ah kipuak

ZATO LAM TAWH KISAI

Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

KIMAT KIHEN NA TUAK LEH : Zomite kimat kihen natuak zenzen uh leh hih phone no. te ah na hopih pah in. Nang adingin atawn tungin kiging sa in om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

ZOMI TE ADING NASEP

1. Lian Suan Pau (Kapteel) Batang Kali ah nasep kipuak

Malaysia gam sung om Zomite nasepneilo in nasem nuam mahmah napi nasep zon nang a lemlote in ZAM zum ah hong dawp un. Zomite ading man ngenloin na sep kizon sak den hi. Contact – Sia Mamang – 018 231 1365

LUNGDAM KOHNA

1. Thet Myat (Hlaingtayar-Yangon) RM50

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi bangin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hong pia tahen.