ZAM Thupuak :: 26 Aug 18 (Khuado, Idol, Football)

ZAM Thupuak :: 26 Aug 18 (Khuado, Idol, Football)

ZOMI IDOL MALAYSIA – 2018 MIN KIPIA THEI HI :: Kumsim ih neih ngei om mah bangin Zomi Khuado pawi muakna in ih bawl zel Zomi Idol Malaysia-2018 ah a lutnuam te in min ki ap thei ta hi. Zomi Idol Malaysia-2018 a ding in Idol Committee pan in hong teel khiat uh late pen

• (1) Zomi Sunni (Theinkhai)
• (2) Mite sang (VC Mang)
• (3) Nang leh Nang (Khuppi)

hih dawng (3) hi ding hi. Idol tawh kisai in a nunung min piak theih ni ding pen September 10, 2018 hi ding a, kidem ding ni pen 17, 24 September leh 01 October nite ah hi ding hi. Idol lut man pen RM 150 hi ding a, sound track pen Committee pan in hong kivai hawm sak pah ding hi. Idol tawh kisai in tel beh nop a om leh Sia Thawng Pi 016 644 3011, Sia Enpi 017 334 2760

ZOMI LEAGUE : Ih bawl ngei a om mah bangin Zomi League 2018 zong nopci tak in kibawl ding hi. Hih Zomi League ah hong makaih sak dingin

• (1) Sia Pau Sian Piang – 016 3185 296
• (2) Sia Thomas Piang – 018 3566 881
• (3) Sia Gin Go Mang – 018 2021 216
• (4) Sia Kam Sian Mung – 018 3122 957

Zomi League tawh kisai min sazian pia nuamte in kipia thei ta a, a tunga siate kiang ah kipia thei ding hi. Dot nop tuamtuam te zong kidong thei ding hi.

MAPANG KHAWM NI ZOMI KHUADO 2018

Zomi Khuado pawi bawl ding tawh kisai in 08 August 2018 (Wednesday) ni-in ZAM zum ah thudotpi te tawh kikup khopna kinei in, Zomi Ngeina Khuado Pawi limtak bawl dingin thukimna kinei hi. A mun dingin Zomite Khuado Hall, Chin Woo Stadium mah ki kipsak hi.

Khuado pawi nasiatak a bawlna dingin sum leh pai tampi hong kisam ahih manin muanna leh lametna lianpi tawh Khuado Committee in anuai a bangin ma pang khawm dingin kong zawn uh hi. 1. Khua kipawlna pan RM200 pan a tungsiah, 2. Biakna pawlpi khat ciang RM300 pan a tungsiah leh 3. Khua kipawlna leh Pawlpi panbek hilo in, mimal in zong ma ih pan khop na dingin kong ngen uh hi. Khuado ni dingin 15 October 2018 (Monday) ni dingin kikip sak hi.

Zomi te kumkhen Khuado pawi ah Malaysia leitang tung a om Zomite khempeuh khatzong pelemlo a, ih kihel kim theih nading deihna tawh kong theikhol sak uh hi. Tuasung ah Zomite maban ding thugenna, Zomi Idol Malaysia 2018, Laam tuamtuam, lasaknate a kipan kivakna/talent show tuamtuam zong om ding a hihmanin khuahun sia leh thusia tuamtuam te tawh kipelh nadingin thungen ciatni. Zomi Khuado pawipi muakna in ih neihngei sa mah bangin in Zomi League kimawlna zong om ding hi. By: Khuado Committee 2018

ZOMI KHUADO PAWI ADING PANPIHNA HONG PIA SA TENG

• 1. ZCF -Kota Damansara -RM300
• 2. MZCC Pawlpi -RM300
• 3. Harvest Christian Church -RM200
• 4. ICA -Songai Long -RM150
• 5. Rawang Zomi Innkuan -RM300
• 6. ZAC Pawlpi -RM300
• 7. ZCCM Pawlpi -RM500
• 8. MLPP Pawlpi -RM350
• 9. IZCC Pawlpi -RM300
• 10. Dal Sian Hung Ministries -RM100
• 11. Saizang Khua Kipawlna -RM200
• 12. Mualpi Khua Kipawlna -RM200

UN CARD RENEW TAWH KISAI

August kha ni khat ni pan kipan in UNHCR zum ah Card renew (Tettan tuu) na pai ciangin ih gengen sa om mah bangin teelna nam (2) sung pan khat hong telsak ding uhhi.

Teelna (1) Hih na teel leh 31 December 2019 dong na card hong renew sak dinga, ahi zongin 31 December 2019 pan kipan in UNHCR te mi kahinawnkei ding hi cih lungkimna suaikaih (Signature) hong hih sak ding uhhi. Kum khat leh kha 5 sung khawng UNHCR misuak lai ding cih na ahihi.

Teelna (2) Hih na teel leh appointment laidal hong pia pah ding uh a, tua zui in interview phi kik kul ding ahihi. Kawlgam ciah kik theih lohna, galtai hih na cih te amau thukhun a huam dingin ih phi theih ding kisam ding a, tua dan ih phi theih leh UNHCR card hong pia kik in gam 3 na lam kizom thei ding hi. Ahi zongin UNHCR card ih ngah cil hun lai ih interview tawh hong kibang khollo ding a, ei lam pan thu leh la tampi tak kician takin ih gelkholh ding thupi ding hi. Amau thukhun sungah ih lut zawh kei leh hehpih ngetna lai khat vei ki at thei lai ding a, tua ah zong ih lut zawh tuan kei leh UNHCR tawh kisai nawnlo kihi pah ding hi.

Ahi zongin hih sungah Pipe Line sung a tungsa te kihel lo ding hi. Zomi pih akua ma ciatin ih mailam ding hoih tak ngaihsun kawmsa in ei mahmah lungkim takin ih khentatna lampi mah ih zuih ding hong thupi ding hi. Midang khat khentatna tawh ih kalsuan ciangin kimawh sakna leh ki khasiatna tam thei ahih manin ei ma khentatna mah tawh kalsuan ding ih ki hanthawn hi.

ZAM FREE CARD KINGAH TA

ZAM in kumsim a manngenloin ih bawl zel mah bangin Malaysia Zomi khua kipawlna makaipite leh pawlpi kem Pastor te ading ZAM card free in kibawl sak ding hi. Tua ahih manin Khua kipawlna makaite leh pawlpi kem siate in August 1st-31st sungteng nisim 9:00am-6:00pmkikal hunngahni khat peuhah ZAM Free Card nong bawl nading un ZAM zum pan zahtakna lianpitawh kong zasak uhhi. A thei kha nailo a om leh MZCA, ZCMC leh kipawlna tuamtuam te pan nahilh sawnsak un.

UNHCR ZUM KIKHAK DING

31 August 2018 (Friday) ni pen Merdeka Day (Malaysia National Day) ahihna tawh kizui in UNHCR zum kikhak ding hi. 03 September 2018 (Monday) ni pan in angeina bangmah in zum kihong kik ding hi.

ACTS ZATO KIKHAK DING

ACTS zato pen 31 August 2018 (Friday) leh 01 September 2018 (Saturday) nite ah kikhak ding hi. 02 September 2018 ni pan kipan in angei bangin kihong kik ding hi.

MyRC CARD

MyRC card abawl nuamte in ZAM zum ah min sazian kipia khol thei lai hi. A bawl nuamte in a manlang thei in sazian piak kholh ding kisam a, ZAM card a tettan om lai te bek kibawl thei ding ahihmanin ZAM card te zong hoih tak ih et phat ding kisam hi. A sawtloin sazian ki-ap ta ding ahihmanin abawl nuam/alunglut te in a man lang in ZAM zum ah sazian hong pia-in na card te uh nong sit phat nading uh zong kong zasak uhhi.

ZAM ZUM AH HONG HAWH

Malaysia gam sunga om Kapteel khuami te kipawlna ahi Teeltui Vontawi makai Sia Thang Sian Mung leh Pa Thang Suang Dongh te ZAM zumah hong hawhin Len nupa vai leh minam vai tuamtuam te kikupna kinei thei bek thamlo in thungetsakna zong hongnei uh a, kilungdam mahmah hi.

DAHPIH NA PULAKNA

Tuimang Khuami Pa Thawng Do Tuan leh Nu Dim Za Niang te tapa Tg. Piang Zom Khai (Kum-22) in TB natna tawh Ampang zato pan in 19 August 2018 ni-in hong nusia aa, a luanghawm pen 22 August 2018 ni-in kawlgam ah kipuak thei hi.

Tuitawh Khuami Pa John Tual Lian Nang leh Nu Pudontiana Goih Khan Ciin te ih tapa Augustine Gin Za Mang in 24 August 2018 ni in hong nusia aa, a luangha -wm kawlgam puak dingin kigel in 27 August 2018 (Sunday)ni-in kawlgam kipuak thei ding hi.

Hih hong nusia ih sanggam te nih hangin ih dah mahmah na ZAM/ZSM pan in ih pulak khia hi. Topa’n a nusiat a innkuanpih te alamdang in hong hehnem tahen.

TUKAL SUNG ZATO LAM BUAIPIH TE

• 1. Khai Tan Thuam (Saizang) Kalena Jaya Clinic
• 2. Suan Khan Gin (Zonuamzang) Melaka

ZATO LAM TAWH KISAI : Zato lam tawh kisai-in vai khat peuhpeuh na neih leh Contact :Sia Mungpi 018 3122 957

THONG LAM BUAIPIH TE

• 1. Thang Muan Khup Bukit Jalil Camp ah
• 2. Langh Lian Tuang Bukit Jalil Camp ah
• 3. Gin Khan Suan Bukit Jalil Camp ah
• 4. Go Khan Khup Bukit Jalil Camp ah
• 5. Lian Khat Pum Bukit Jalil Camp ah
• 6. Kam Khan Lian Bukit Jalil Camp ah
• 7. Lian Than Mawia Bukit Jalil Camp ah
• 8. Nang Suan Khai Bukit Jalil Camp ah

BELANTIK CAMP AH KIHAWH THEI

Belantik Camp ah kihawh in Camp sungah om Zomi Pasal 18 leh numei 6 te tawh kimu thei hi. Camp sunga om te tawh hun khat kila khawm thei a, thunget khopna kinei in camp sung aa om ih sanggamte lungdam lua in a khitui hong luanguh ih muh ciang ih nakngek hong na mawk hi. A tawm atam hilo in ih sanggamte noptuam ding ci in ip sungah om sunsun kipia khia thei hi. Amanlang in hong suaktak nang thungetna ah phawk lai ni.

KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kibaih sa in om den ding uh hi. Sia Tuang Pu : 016 254 4093, Sia Go Mang : 018 202 1216

ZOMI TE ADING NASEP : Subang ah Factory Store general Worker pasal citak 3 ki nawh deih hi. Omna pia-An pialo. Nasep hun-Monday to Friday 8:00am to 7:00pm/Saturday 8am to 5pm Nai khat sung khawlhun. Off day- Every Sunday. Khasum-Rm1400. Pau – English or Malay

Uptown Puchong Nigh Bazaar ah na semding pasal 2 ki nawhdeih hi. Nasep hun-Nai 10 sung. Khasum-Basic Rm1200 tawh kipanding. Omna pia- Anvak. Offday-kal1 khatvei off. Amun-Puchong
Zomi nasep neilo te in nasep tawh kisai dotnop na neiuh leh :Sia Khuppi—016 3838 014, 011 3563 2059

LUNGDAM KOHNA

ZAM zum leh nasepna te adingin mapan khopna hong pia te tungah lungdamna lianpi kong pulak khia uh hi. Zomi te itna veina taktawh ih zumpi a dingin hibangin mapang khawm in nong dinpih na te hang mah uh tawh tuni ciangdong a kikalsuan toto zo ahihi. Mailam ah zong a piakhia zo semsem dingin TOPA’N thupha hong pia henla, a zahtampi in hong thukkik tahen.

• 1. Sian Hawm Sang (Buan) RM50
• 2. Dal Sian Hung Ministries RM50
• 3. Raymond Thang Tung Nung (Saizang) RM50
• 4. Thang Kap Sing (Tongsial) RM20
• 5. Sian Hawm Sang RM50