Bishop Felix Lian Khen Thang in Zomi te ading hong ngetsak
May 21, 2015 ni-in Bishop Felix Lian Khen Thang (Kalay Diocese – Bishop & Catholic Bishops Conference of Myanmar – President), Rev. Fr. Robert Kam Hau leh Rev. Fr. Martin Dal Ngaih Do te UNHCR zumpi a vahawh thei uh a, holimna a neih khit uh ciangin gambel/galtai te ading nuai a bangin lungdamkohna leh deihngetna te hong neih sak thei uh hi.
Lungdamkohna:
⦁ Tu ciangciang Zomi tampitak gam 3 na ah hong puaksakna uh lungdam kohna.
⦁ Zomi damlo te zato kahna leh kibawlna tampi honghuhsak na uh lungdam kohna
⦁ Thong kia tampi te UNHCR in hongtat khiatsak na uh lungdam kohna
⦁ Refugee naupang tampi te pilna sintheihna le lai hilh nading hong vaihawm sak na hong huh na uh lungdam kohna
Deihngetna:
⦁ Kawlgam pen nong theihsa mah bangin khantoh lam ki mamawh in, ahih hangin hilai a hong paite pen hamsatna tuamtuam tawh hong pai uh ahih manin hong na et sak lailai un.
⦁ UN in gamthumna vaiah lampi a om naak leh pivom ta, pikang ta cih bang hongkhen kei in la Zomi te hong mangngilh sak kei in.
⦁ Thongkia leh damlo a mau haksatna tawh ki zui-in nong huh sak lai nading.
⦁ CO Class (Culture Orientation) ah Zolai tawh Handbook aki Translate khin pen hong zangsak nailo ahih manin phalna tawh hongzatsak nading.
⦁ IOM (International Organization for Migration) khutnuai ah Zomi kampheen hong koihsak nading.
Richard Towle a dawnna ah “UNHCR in, no pen tagah bangin hong nusialo ding hi. Lungnuam tak a na nasep theihna dingun Work Permit hong kivaihawm sak ding hi. UN nei khinsa peuhmah in Insurance bawl hamtang uh hen” ci hi.
Tua banah Bishop Felix Lian Khen in Vatican Embassy ah hawh in thuneipipa Joseph Mario (Nuncio) kiangah Zomi te haksatna te va genin, Malaysia gam a Archbishop Julian kiangah zong Zomi te hamsatna thu va genpih hi. Korea pan hong tunkik ciangin ACTS ah Rosemary tawh zong kimu lai ding uh hi.
Bishop Felix Lian Khen Thang leh Rev. Fr. Robert Kam Hau leh Rev. Fr. Martin Dal Ngaih Do te tungah lungdam mahmah hi.
UNHCR-CDU tawh ki muhkhopna
May 20, 2015 ni zingsang nai 10:30pan 12pm kikal UNHCR-CDU makaihna tawh kipawlna makaite UNHCR Conference hall ah ki muhkhopna ki nei hi. Hih ki muhkhopna sungah UNHCR-OPI panin Usher leh Deva te hong kihel thei uh a kimat kihen vai teng hong genkhia thei uh hi.
UNHCR Card ngahsa te deihloh penin hong kimat leh hih phone nambatte ciamteh in la sampah in.
03-2118 4800 extension 4877/4865/4868
UNHCR Hotline 012 630 5060
UN Card neite hong kimat ciangin theih ding thu pawlkhat
⦁ Lau ken la, hong cihcih uh mang phot lel in.
⦁ Hong kimatna ahang dong hamtang in.
⦁ Na UN Card lak inla, na UN Numbat gen pah setset in.
⦁ Nang hong man Palikte hihHotline 012 630 5060sak in.
⦁ Hong kimat ciangin UNHCR/na innkuanpihte/na lawmte kiangah anuai a teng theisak pah in:
⦁ Na UN Numbat
⦁ Hong kimatna mun leh
⦁ Hong paipihna Palik zum theisak pah in.
Hong kimat khit ciangin
⦁ Thu hong dong ding uh a, thu hong gensak ding uh hi.
⦁ Na thugen khempeuh kiciamteh dinga, thukhenzum hong puak uleh na thugensa teng mah hong thupi pen ding hi.
⦁ Palikte’n ni 14 tungsiah hong kep nop uleh thukhenmangpa (Magistrate) tung pan phalna a nget masak uh kul hi.
⦁ Nang hong man Palikte’n nang pen hong khah khia kik thei, Thukhenzumpi hong tun thei, Immigration Detention centre ah hong puak thei uh hi cih mangngilh ken.
⦁ Bang bang ahizongin na lu pei ahikei leh na lukuun kha peuhmah kei in. Thu dangpi khat suaksak ziau thei uh hi.
Thukhenzum sungah
⦁ Hong gen uh thute na tel kei leh kam hong letsak thei ding mi ngen in.
⦁ Nang hong huh thei ding Sitni (Lawyer) ngen in.
⦁ Malay pau na theih kei leh kamphen ngen in.
⦁ Thukhenmangpa (Magistrate) kiangah UNHCR tawh akizom UN mi khat na hihna pulaak in.
⦁ Nang vai (Gentehna in – Innkuan a vaakpi pen na hihna, sumlehpai haksa na sakna, na damlohna cihbang te) khemepuh kician takin Thukhenmangpa zasak in. Amah pen nang hong gum ding pa hi.
⦁ Immigration Act sung pan Section 6 (1) (C) tawh hong mawhmat uh leh khial ingh ci kha vet kei in.
⦁ Thukhenna zum sung na tun ciangin na Case numbat ngen inla, ahitheih leh zum hong tunna thu kigelhna laidal Copy khat nang kep dingin ngen hamtang in.
⦁ A tawpna ah thong hong denna thei ding uh a, ahikei leh sum hong liausak thei ding uh a, ahikei leh saat hong thuak sak thei kha ding uh hi.
⦁ Thu hong kidot ciangin tel a na tel kei zongin, bang thu bang thu hong kidong zongin na lukuun or sing kha het ken maw. Kam hong phensak ding mi ngen hamtang in.
⦁ “UNHCR” cici lel in. Ahihkei leh UNHCR tawh hong kihosak un cici lel in.
A thupi penpen ah “Kuakua na hizongin Malaysia gam sungah na om laiteng Malaysia kumpite thukhun na zahtaak sak ding thupi pen hi. Na paina, na vaakna khempeuh ah na UNHCR Card (Original) pua tangtang in. A meihtuu (copy) pen na muan mahmah mi khat kemsak in.
Source: UNHCR Detention Hotline pan Zokam tawh ZAM zumpan a kilet khia ahi hi.
United States Ngeina le Dan Thusinna Khutzat Laibu : ZOMI (azom)
Thukhenzum hong kitun leh UNHCR, na innkuanpih, na lawmte zasak masa hamtang in. Tua te na hopih theih kei lehThukhenmangpa kiangah UNHCR tawh hong kihosak masa in ci hamtang in.
Thaman sum sazian pulakna
Gentehna in nasep thaman nai khat in $10 hi dingin nasepna khatah nai 10 nasep zenzen hang thaman Dollar 100 ngah hing cihna hipahlo hi. Sumlut khempeuh kigawm i 20% – 30% pen phiangsiah adingin kiciapteh sak ding hi. Sumlut phiangsiah leh adang panpihnate kidokkhiat banah, nasemte kipawlna-ah pawllutna sum zong kihel thei hi. Tua thaman sum sazian pulakna ettheih dingin anuai a bang ahi hi.
Hamphatnate
Nasepna pute a ki banglo nihte kikalah nasepna tungtawn a hamphatnate ki lamdang hi. Tua hamphatnate sungah:
Cidamna tawh kisai: Damlohna tawh abei sum piak kullo hi. Ahih kei leh a langbek piak theih hi. Cidamna lam saite in nasepna pute khat
peuhpeuh hamphatna pia thei hi. Pawl khatte in hibang cidamna lam hamphatna ngah theih nading pialo uh hi.
Damlohna, tawlngak hunlakna, pension lak ding vaihawmna: Nasepna pute tung kinga in thu le la kician leh dan a tuamtuam ki banglo thei ahih mah bangin i sepna pute pawlkhat in hih a tung thute tawh kisai hamphatnate hong pia thei hi.
Nasep neilote ading liausum: Mimal buaina leh thu khat peuhpeuh hangin, nasepna pan tawpsakna hong neih khak zenzen leh a hun ciangtan khat sungin sum le pai liausum kingah thei hi. Ahih hangin mimal utthu tawh ahih kei leh nasep napan ong ki tawpsak leh liausum ki ngahlo ding hi.
Nasemte’ hamphatnate
America gammi khempeuh tawh ki bangin galtaai mi khempeuh in zong hamphatna a ki bangin kingah thei hi. Galtaai mi i hih laitak in, nasepna pan hong ki nawlkhinna ahih kei leh nasepna pan zakhanna ding ki nawlkhinna, pian kum tungtawn in, pumpi thanemna a om manin, Nu le Pa hangin, minam neu, ahih kei leh pianna gam, minam, biakna, numei/pasal cih bang tawh nasepnei i pu ten hong deidan theilo hi. Ahi zongin gammi hihna aneite ading kumpi nasem khenkhat ki om hi. Nasem mi khat i hih mah bangin, nangma ngah ding kilawm khasum, tawlngak theih hun, hunval nasepna, damlohna tawh khuanlakna, suakta tak a nasepna cih leh adangdangte aki bangin hamphatna kingah thei hi. Gam khenkhat leh khatte thu khun zong ki banglo ahih manin, nang man nakan nadawp kul ding hi.
Nasepna pan khawlna
Mimal in i gim man ahih kei leh haksa i sak manin, nasem mi khat in a ut thu in nasepna pan tawpsan zeu cihbang om theilo hi. Nasep na i pute in na sem ding tangmi amuh theihna ding khawlnopna ahang/athu genkholh masak kul hamtang hi. Nasep tawpsan nading vai bangmah genkhollo a tawpsan na in nasep neite a dingthu haksa pi nutsiat thei hi. Nasep khawlding ki pulakkholh genkholna i neih leh nasep neipa kikal ki theihkhialhna omlo zaw a, a tawm pen nipi kalnih bang ki sapin genkhol le hang hoih pen hi.
Gualzawhna thusim
Nasep silbawl kipan dingin nasep i lut khit nak leh tua i sepna munah khotak a om zawhna ding kisam, thupi mahmah hi. I nasepna mun sungah nasepna mazan theih nading leh i gual zawh theina ding:
Nisim hunsim in, hun mandet sawm in. nasep hunsungin manneitak in sem in. Thu khat peuhpeuh hangin nasep nalap zawh kei ding leh na maite a hunlap in theisak masa in hamtang in. Adamlo takpi vaithupi takpi na hih leh aki ciangtan hunphate zang thei hi teh.
Sep leh bawlding in thu ong ki gente tello na neih le a hunlap in dong kik in.
Hoih takin na naseptheihna dingin akisamthu leh teellohte dot kikding zumkei in. lawm leh gual, kimleh pamten na bangci sep cih zong kanding thadah kei in. sepding vai khat peuhpeuh ah mawkpuak ding masak sawm hamtang in, sempah in.
Seppih lawh leh gual kikal kizopna a hoih theipen ding in hanciam in. Ahi zongin nasep hun sungin ki lawmtatna vai tawh nahun mawkbei sak kei in.
Midangte zahtak in thupi bawl sawm hamtang in. America gam ngeina leh dan khat in numei/pasal mineu/milian cih bangin deidan omlo in nasepna mun ah akibang ahi hi. Nasepna ah minhoih ngah sawm hamtang in la, nasepna mun khat peuhpeuh ah atawm pen kha 6 pan kum 1 sung sepsawm hamtang un. Tua hi leh na nung thu ong hoih ding a, nasepna mun thak ah minpha na ngah thei ding hi. Nasep khawlding in na khentat khin leh atawm- pen kal nih ma in na pute theisak masa hamtang in. Zopzop lai ding …
Kawlgam in Rohingya thubuai siangsak hen
SHAH ALAM, May 17 (Bernama) : Muhyiddin Yassin in a genna ah “Kawlgam in amau gamsunga Rohingya vai thubuai teng siangsak hen. Tua hi leh ASEAN kipawlna tengin Rohingya vai vangik teng a puakpih kullo pah ding hi. Kawlgam ah hih buainaa vengsak dingin mihing leh mihing kikhualna om lo a hiam?” ci hi.
Sunday thukikupna sungah Muhyiddin Yassin in “Bangbang ahi zongin a tawpkhakna ah ei ASEAN sunga kipawl tengin hih Rohingya vai vangik pen ih puakpih a kul hi mawk hi” ci hi. Malaysia in bangci ciangin hih Rohingya vai ah panpihna neizo ding hiam cih thu a kidot ciangin Muhyiddin in hi bangin dawng hi “ Hi thu tawh ki sai-in Malaysia kumpi in mun lak leh lak loh dinglimtak a ngaihsut laitak hi a, Kawlgam, Indonesia leh Thailand tawh thu kikupna nei ding uh hi. Foreign Ministry lampan in thu hong gen uh ciangin pilvaang takin thu hong pulaak khia uh leh hoih pen ding hi” ci hi.
“Hih thu pen thulianpi hi mawk ahih manin Malaysia panin Foreign Ministers teng leh Kawlgam, Thailand, Indonesia te tukhawm in kihona a neih phot ding uh kikhentat hi. Banghang hiam cih leh ei gamsung ciat ah daihna a om ding kideih ciat a, tua kawmkal ah mihingpihte itna leh khualna lungsim neih kul zel ahihman in thulian nih kigawm hi mawk hi. Haksa hi. Kawlgam in Rohingya te hizah a gampua lam a zuatna a hang om ding ahih manin, hih buaina pen gamsung panin vengsak in siangsak zo leh hoih pen hi. Tua ahih kei leh amau puak vangik pen gamdangteasuan suak ahih manin thuhoihlo piang thei hi. UNHCR in zong hivai ah mawhpuak lianpi nei napi upmawh bang zo taktak lo uh hi” ci hi.
Tulaitak Langkawi gei a tuipi tungah gunkuang dim in Rohingya leh Bangladesh mi kigawm 1,158 omuh hi. Amaute pen laibu lo tawhhi in, gamdang ah phalna om lopi in luta sawmte a hi uh hi. Muhyiddin in a genna ah “Deih lohna hilo napi hih mi tul valte pen Malaysia leitang hong siik khak ding mahmah a kilunghimawh pen hi” ci hi. Source: http://www.bernama.com
Tusung ZAM Palaai te buaipih diak teng
⦁ Hau Lian Khual (Zampi) May 15 ni-in Dangwangi palik zum panin hong suakta thei.
⦁ Thang Lian Pau (Saizang) May 17 ni-in Dangwangi palik zum panin hong suakta thei.
⦁ Pau Khan Suan (Kapteel) May 18 ni-in Seapark palik zumah ki buaipih.
⦁ Thuam Khan Khai (Pyidawtha) May 19 ni-in a vai kikan sak.
⦁ Sum Pu (Tualzang), Kajang thongah a vai ki buaipih.
⦁ Thang Biak Sang (Buanli) Kajang thong ah a ki buaipih laitak.
⦁ Zam Suan Thang (Haupi) Langh Cin Thang (Haupi), Lang Khen Kap (Buanli), Cin Khen Kap(Buanli), Mung Sian Tuang cidam in hong suakta thei uh.
⦁ Pa Khen Sing (Tonzang) leh David Khup Thang (Kawlpi) te tapa nausuah lai kilakpih thei.
⦁ Lian Mung (Tamu) ACR Card tawi khat Setapak palik zum panin kitan khia thei.
Theihding:
Damlo leh thong ki buaipih pawl khat in Thupuak ah hong suaksak ken ci ahih manin kisuak saklo hi.
2014 Census result ki genkhia ta ding
2014 Kawlgambup mimal kisimna (census) te 29 May 2015 panin Kawlgam bupah ki tangko khia ta ding a, abeisa in 914 a kigelhte genkhialo ding a cih uh pen tu in a vekpi in genkhia dingin Party 70 valte tawh a kimuhna vuah atung a bangin gen uh a, hih kimuhkhopna hunah ZCD panin President & Secretary zong va kihel thei uh hi. Asawtlo in i ngaklah mahmah 914 Zomi hong ki tangko ta ding ahih manin i lawp mahmah hi.
Malaysia ah Kawlgammi refugee tam pen
UNHCR genna ah Malaysia gam a Refugee om teng lakah Kawlgam pan Refugee tam pen hi ci hi. Amau hibangin na ciamteh uh hi.
Refugee om teng khempeuh 152,570
Tualak panKawlgammi 141,570
Tua sungah Chin State pan 49,800
Rohingyas 45,170
Kawlgam Muslims 12,340
Rakhines leh Arakanese 7,320
Tua teng hi-in, a cianlai 11,000 teng pen gamdangmi hi ci-in UNHCR in ciamteh hi.
Tua banah Bangladesh mi leh Kawlgammi tak Andaman tuipi leh Malaca tuipi gei tengah gunkuang tawh awkcip lai uh hi. Tua lakah mi 1,158 pen May 10 ni-in phalna omlo in Langkawi leitang siik khinta uh a, BelantikImmigration te in Sik khua ah koih in an leh tui pia in cidamna lamsang a veelsak laitak ahi hi. Malaysia Home Minister pa in a genna ah “Hihte pen Malaysia kumpi’n UNHCR tawh semkhawm in Refugee dingin simhuai mah hiam cih thu a kansan laitak hi” ci hi.
ZYA kaamsina laibu ki khon kikta
ZYA Kawlpi pan hong kizuak kaamsimna laibu a kemlai khempeuh in kikhak kik nuamta ahih manin May khabei ma in ZAM zumpi ah na khot zahzah uh hong ap kik na ding un kong zasak uh hi.
Na omna (address) a maanin pia in
Zato paina, zum khat peuhpeuh paina ah na omna hong kidot ciangin na omna mun address mah pia pah lel in. Na om ngeilohnapi na lawmte inn, kipawlna zum, biakinn cihte na piak leh nang adingin mailam ah buaihuai hong tungzaw ding hi.
Nang Card lo zatsawm kei in
Zota paina, nasepna, mat le hen khat peuhpeuh ah nang card zanglo a midang card na zatsak leh zum pan hong kibuai pih zolo ding hi. Tua ahih manin na paipaina ah na card puak ding mangngilh ngei ken.
Zum vai tawh kisai lai kigelh sak den
Innkuan lutpih (DS), REG, RSD, RST, RSC, DHS leh IOM ah lai gelhsak nuam peuhpeuh ZAM zumpi panin a khawnkhong in lai ki gelhpih den hi.
Tony Abbot in Refugee deihlo
Tu sung teng tuipi tunga kinusia mi 3,000 valte in Malaysia leitang siik ta uh hi. Amau vai tawh kisai Indonesia Foregin minister pa in a genna ah “Australia pen UN member a hihman in hih Rohingya te a gam sung vuah lutsak hen. Australia pen UN Refugee Convention a min thuhte lakah kihel hi. Amau mawhpuak hi. Minthuh cih ciangin a deihna tua hi” ci hi. Ahi zongin Australia kumpipa Tony Abbot in “Hihte ka huh vet kei ding hi. Bang hang hiam cih leh huh lehang a dang tampi a hanthawn suak ding hi hang” ci miau hi. Thukante tungah zong “Australia in hih mite sang ngiatlo ding hi. Huh kha in hi leng a haksatna uh a vengpah ding hi tuan lo a, midang tampite in zong amau mah bangin lametna tawh gunkuang tung tuang zel lel ding uh hi” ci hi. Atawp khakna ah Indonesia leh Malaysia in kum khat sung kep dingin la uh hi.
Tune Insurance leinuamte ading
Tune Insurance leinuam peuh mahin UN zumpi ah Monday, Wednesday & Friday (9am-5pm) kikal kingah den hi.
Zomi Card tawite ading nasep
⦁ UNHCR-EST nasep zonsakna panin KL kiim teng moh bawlna leh ansai neuneu te sem UN ngahsa Mangpau leh Malay a thei mi 50 ki deih. Alunglut khempeuh in ZAM zumpi ah May 17 (Wednesday) ma in form hong fill up un. Nasep hun nai 8 sung. Kha khat ni 5 off. Kha sum RM900. An man ding kha khat teh na boss te un RM150 pia ding. Omna man kha khat RM50 kat ding. OT nai khat 1.5. Kumcin teh bonus om.
⦁ Veng tuamtuam a om KK Super Mart saite a sem thei ding Zomi citak pasal/numei Malay or Mangpau atel honkhat kideih behlai hi. Nasep hun 8am-8pm. Sun nai 2 sung khawl. OT nai 2 sung omden in nai khat teh RM6.50. Kha khat RM1237.50 ngah ding. Omna leh an pialo. Na omna veng tawh kinai penpen ah septheih nading hong ki vaihawmpih ding.
Theihding : May 18 leh 20 ni a interview te May 26 leh 27 ni zingsang nai 8am-6pm ciang nasepdan sinna (training) om ding hi.
KK Super Mart alunglut te Monday & Wednesday ni sun nai 2pm in ZAM zumpi ah interview na om ding hi. ‘ 012 367 4665
Lungdamtakin hong kisang ding hi
ZAM nasepna te tha na piak nopleh lungdamtak in hong kisang ding hi.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: [email protected]
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...