ZAM Thupuak :: 19 October 2014

ZAM Thupuak
ZAM :: Zomi Association of Malaysia

KHUADO NOPCI TAK A BAWLZAWH LUNGDAM KOHNA

Tukum Khuado Pawi ihbawlzawh nading in hong vaihawmkhia Malaysia Zomi kipawlna (ZAM) leh Khuado Pawi Committee, sumlehpaai tawh hongpanpih Malaysia gamsung aom Khua kipawlna, Biakna Pawlpi leh mimal khempeuh…
Zomi Idol, Zolia & Zotaang te vaihawmzawhna ding in akisam sumlehpaai hongsik: U Kaino & U Man Mang te innkuan (New Eden Services Company Limited), U Philip Mawng (Taungzalat) te innkuan, Pa Tha Piang te innkuan, Aungnandaw te innkuan, Pa Pau & Nu Cing te innkuan, Pa Gin Go Mang (Zolimtui Ansai, Klang) te innkuan, John Mungpi te innkuan…
Pawlpi khat le khat kilawmtat nading in ihneih tukpeng kidemna Zomi League ah hong kihel Pawlpi khempeuh tung leh akimawl mimalkim tungah…
Zomi League ah agualzote pahtawina Cup hongsik Sia Thang Za Nial (Nialpi) te innkuan…
Tukpeng kimawlte a khatna leh a nihna Medal hoih mahmah hong piaksak Pa Pau Khat Suan (Singapore) te innkuan…
Zomi Innkuan Singapore pan Pu Hang Khan Lian & Dr. Hau Za Cin, Eric Tuang leh India pan Sia Mungbawi leh gamtuamtuam pan hongkihel khempeuh…
Zomi Idol leh Zolia & Zotaang vai ah Judge hong sepsak Mr. John Tan, Mr. Michael Masterson, Ms. Stephanie Van Driesen, Ms. Sharmaine Van Driesen, Sianu Deih Mang, Lengtong Pauno, Pa Suanno, Vai, Sianu Niang Suum te leh Sound System hong letsak Tungpi, Chit Khai leh Cinpi te tungah…
Zomi Idol a kihel khangthak lasiam mimal 49 teng leh Zolia 11 & Zotaang 20 a kihel khempeuh te tungah…
Zomi Idol Top 20 kidemna ding biakinn hong saapsak Sunway Youth Fellowship te tungah…
Zomi Idol Top 10 kidem nading Methodist College Chapel hong kawm KLIFF Pastor Michael Moey tungah…
Mipi hongdawn/hongmuaksak ZEC sang-naupangte tungah…
Banner Design hoih mahmah hong bawlsak ZAM Palaai lui Mungpi (Paukxi) tungah…
Awmsuan Badge hongbawlsak Kimpu (Zion) tungah…
Lasakna tawh hongkihel khempeuh…
Video record hoihtak hong neihsak Zomi Daily leh CS Sangpi te tungah…
Photo (maan) hoihtak hong zaihsak Khampu (Haleluijah Media) tungah…
Leitung mun tuamtuam pan sim theih dingin a laitawh hong gelh sak Sia Hau Thang tungah…
Khuado hongsim khualpan, tualpan Zomi akua mapeuh tungah ih minam na itna, na thupit sakna uh leh Khuado nong sim tangtangna hangun lungdam mahmah ungh. Khuado Committee

KHUADO PAWI THU NUNGKAL A AZOM…

4. KHEEKLEH NI
Hih ni pen Khuado ni nihna ‘Khelleh Ni’ kici hi. Hih ni in khuai tawh ai kisanin, nitaakin annkuang sa kuang ki-uumkhawm leuleu hi.

Zingsang khuavak tuungin khuailate khuaibu tawh inn lam zuanin ciah uh a, khuasungah lut suak loin khua mualah kinga-in khuaibu pen taangpi taangta muh theih dingin singkung tungah koih uh hi. Khua muala khuailate neek ding dawn ding khawsung pan nungakte in annphel tunsa leh zu va puak uh a, Khuailate in khua mualah khuazaangpi kim ngakna in la tuamtuam- khuai la, mualbawl la, khua mualpi late sa-in lamlam uh hi. Khuazaangpi a tun kim khit ciangin zu kitulh, ann kibaakin nuamsa mahmah uh hi. Tua khit ciangin Tualteekpa in khuaibu sangin khuasung lutpih uh hi.

4.1 Khuai Tawh Aisanna:a tun ciangin khuaitawipa mah masa in khuaibu pen Tual biakna mun lam manawhin kipaipih leuleu hi. Tua munah a na ngak upate in, “Sanno na hih leh na kik in, miim leh sawmtaang na hih leh hong lut in,” ci-in na kal’ uh a, tua leh khuaitawipa in, “Sanpi, sanno hi keng; miim leh sawmtaang hi’ng” ci-in tua banga thumvei a kikalh a kidawn khit uh ciangin lutsak pan uh hi. (Sanpi, sanno cih pen natpi, natneu cihna hi). Tual a lut khit uh ciangin vial khat kiimkotin hih bangin khuai la sa uh hi:

Ngaltun e, ngalthen a, khuai aw e,
Ka lo paama khuai aw e, sim ngalthen, zo ngal then,
(B) Nang in kum khua na theia kong dong e,
Ningzu a ken dong, aisaa ken dong.

Tua khit ciangin khuaibu pen tualsuang tunga a kiciing mawngkung tungah koih uh hi. Khuaibu tungah khualu lam, khuataw lam giitin ciaptehna kibawl a, khuainote paan honsa in koih uh hi. Tua khuaibu pen numei naupang leh nupi naupaaite et kiphal lo hi. Nitaak lam ciangin Upate in khuaibu veel uh a, khuaibu sunga khuainote in a a khuhna a paan a na lam kik uh leh miimbeem taang beem a lamlam hi, ci uhin kum kik ciangin ann kihau ding hi, ci-in ngaihsun uh hi. Khuaino a si peuh a na om leh kum kik sungah a si a mang om ding hi hang, ci-in khuazaangmite mabaan ding hilhkholhna in ngaihsun uh hi. Upate in khuaibu pen sia leh pha leh, mipi lungnop theihna dingin “Khuai Hoih Hi” ci-in pulak pong uh hi.

Ann haute in geelzu a kici pen a beel a beel hong pua-in kiluup zihziah hi. Hih zu pen mai kum cianga ann hauh na’ng phuisamsakna ahih manin a hau nuam peuhpeuhin zu guansa in hong tawi uh hi. Tualteekpa in zu teepin khua lam nga-in phih kawikawi hi. Tua khit ciangin zu pen taangpi taangta in teep thei pan hi. Khuangtumpa in mipite cim dong laampih, la a oihpih khit ciangin mipite a inn ciat ah ann ne ding kikhen uh hi.
4.2 Geelzu: Geelzu pen taang sawm nih zu ahi hi. Khanglui hun lai-in ann khempeuh lak panin taang a minthangsak pen uh hi. Tuuk tun ciangin tangvalte in mi ann neih zah ciamteh uh a, khuado cianga neek dingin taang sawmnih nei ciang peuhmah geelzu luup dingin gaam pah uh hi. Taang sawmnih a nei lote zong peng(h) thei tuan loin, tangvalte’n lawh hoih bek khat bawlin, khawtaw panin dong to uh hi. Hun khat khit ciangin taang sawmnih a nei zo haksa ahih manin vaimiim sawmli a nei ciang zong geelzu kiluupsak hi.

5. KHUAISAAKTAN NI
Khuado a ni thumna hi in, ‘Khuaisaak Tan Ni’ a hih kei leh ‘Khuai-aih Ni’ zong kici hi. Hih ni kuamah a pua pial thei loin a sawm ciat uhah om khipkhep uh hi. Khuai pen vok tawh ahi zongin, kel tawh ahi zongin, ak tawh ahi zongin ki-ai thei hi. Kel tawh khuai a aite pen a sih khit uh ciangin a luang bawm ding thote khuai in hung hi ci-in ngaihsun uh ahih manin kel tawh khuai aih ding thupi ngaihsut mahmah uh hi. Nitaak lam ciangin nungak leh tangval lamtual mahah kisutuahin geelzu luupin, la sa in, lam lialiai leuleu uh hi. Hih ni in zong a sawm ciat uhah khuai-aihna sa kuang ann kuang uumkhawmin gualnuam mahmah uh hi.

6. ASIAN NI
Khuado tawpna ni pen ‘A Sian Ni’ kici hi. Mi khempeuh a utna tekah kihawh kiciah thei hi. Geelzu mah zeekcing zo pen ahih manin mipite lamtual mahah kisutuah kik uh a, gualnop nunung pen ni ci-in la sasa-in, lamlamin khat leh khat ki-aamin nuamsa mahmah uh hi. A beisa ni nih ni thum sunga gamtat gualnopzia teng lungsim sungah thaam denin nungak leh tangval lawm kitop, lawm kingaih neihkhiatna pawi bang suak a, aam mahmah uh ahih manin zu leh sa kicinna-ah zanhak kha lai zong om thei hi. Gualnuamin nuam kisa mahmah ta leh zu lah peeng ta, laamlaamna, la oihoihna, tanuk tatsuk tattohnate hangin ci leh sa lah gim ta ahih manin aam laipi mah innlam zuan tekin, Khuado pawi kikhinsan ta hi. Nungak leh tangval bek tham loh, mi kim adingin khuado pen kum khat tawntunga gualnop pen hun ahih manin khuado kaal ding kingaklah thei mahmah hi.

7. THUKHUPNA
Zomite Kumlui leh Kumthak Khenna, kum khat sung tawntung i sep i bawlnate-ah thupha hong guan i biak Pasian kiangah lungdam kohna, mailam ading Thupha ngetna, Siatna hong tun thei Dawi leh Kaute tawh i kipelh na’ng leh eimah-mahah i hoih lohnate tek pana i kisiansuahna ding hun thupi ‘Khuado Pawi’ bawl pen Khristian ngeina leh Pasian deihna tawh kikingkalh lawmlawm lo cih i phawk thak ding deih huai mahmah hi.

Khangthakte in Khuado pawi i zat ciangin, i pu i pate in i khanglui hun lai leh i ngeina tawh kituaka a zat danun kizang thei nawn lo hi. I theih ding thupi-a ka ngaihsut pen Khuado Pawi i zat ciangin Khuado Pawi a khiatna leh a deihna ngaihsunin, tua leh i khristian biakna leh tuhun tawh kituakin leh i omna mun tek tawh kituakin i zat ding kisam sa ing. Tuhun ciangin Zomite leitung mun tuamtuamah ki-om ta a, ‘Ngeina kician neite –Minam kician’ a hih mah bangin i omna tekah i pawite khahsuah loin keemcing in, Zuunin, i thupi bawl ding kisam hi.
J. Thang Lian Pau
Laibu Etkaakte:
1. Ciimnuai Magazine 1994, Yangon
2. Guite Khang Thu, Kalemyo, 1986
3. Khanglui Ngeina, Aizawl, 1999.
4. Zolai Simbu Kum Sawmgiat Cinna, Lamka, 1993.
5. Zolai Sim Bu (Class IV ), Tedim, 1997.
6. Zolawkta Oct. 1999 Issue, Aizawl

Tusung Palaai te buaipih diak teng

Piang Kap Lang (Zozang) Jinjang lockup ah ki buaipih.
Hung Lian Cing (Thangnuai), Pum Sian Mung leh Thawn Khaw Zam Kajang thongah ki buaihpih.
Tg.Sawm Tuang (Phaiza) GHKL ah kibuaipih hi.
Tg. Thang Sian Kap (Zampi) IAD ah ki buaipih.
Pa Dal muan (Kawlpi) Sungai Buloh zatopi ah ki buaipih.
Thawn Khen Mang (Lailo) Sungai Buloh thongah Oct. 10 ni-in ki buaipih.
Thang Ko Sian (Lailo) Bukit Jalil camp ah Oct. 6 ni-in ki buaipih.
Thang Ngaih Mung (Zonuamzang) Bukit Jalil camp ah Oct. 5 ni-in ki buaipih.
Thawn Khan Sut (Lailo) Semenyih camp ahOct. 16 ni-in ki buaipih.
Donnu (Taakkhawl), Cing Sian Hau (Heilei) Oct. 7 ni-in IAD ah ki buaipih.
Lam Za Cin (Laaitui) Oct. 7 ni-in UKM zatopi ah ki buaipih.
Lam Mang (Thalmual) Oct. 9 ni-in Tzuchi ah ki buaipih.
Cing Za Dim (Thalmual) Oct. 17 ni-in Tzuchi leh Ampang zato ah ki buaipih.
Cin Lam Thang (Valvum) HKL zato ah ki buaipih.
Kai Lam Mung (Tuitawh) Tzu Chi zato ah ki buaipih.
UNHCR-OPI ah Zomi thongkia Bikit Jalil ah mi 22, Langkap ah mi 15, Melaka ah mi 5, Semenyih ah mi 21, Lenggeng ah mi 6, KLIA ah mi 3, Tanah Merah ah mi 2 Oct. 14 ni-in ki report sak thei.
Abeisa palaaite buaipih Zomi pawl khat Bukit Jalil thongpan Oct. 16 ni-in hong suakta thei ahih manin ki lungdampih mahmah hi.

UNHCR-CDU tawh khasim kimuh khopna

Oct. 16, 2014 ni-in-CDU vaihawmna tawh UNHCR Conference hall ah UNHCR-IAD cidamna lam vaisai pawl tawh amau nasep teng pulak khiatna leh mailam kalsuan zia dingkhutnuai a refugee makaite kiang genna hong neihi.
Malaysia gam ah UNHCR te nasep a kipatcil na pen Combodia refugee te hia, Terengganu ah 1975 kum a hihi.
UNHCR te nasep a thuguipi thum in anuai a bang a hihi.
Refugee te a pianna gamah puakkik theih nang.
A belhna gammi te lakah suakta tak a nuntak khuasak theih nang.
A tunga tegel tawh ahi theilo teng gamthumna lentheih nang cihte a hihi.
Tukum 2014 August khatawp dong refugee a ki ciamteh pen 14900 a phakna sungah Kawlgam mi te bekbek pen 137790 kipha ta a, a dangte a hih leh Sri Lanka, Somalia, Iraq leh Afghanistan te pan a hi uh hi.

The Third International Human Rights and Peace & Conflict in Southeast Asia Conference ah Zomi te

October 16, 2014 ni-in Swiss Garden Hotel ah “The Third International Human Rights and Peace & Conflict in Southeast Asia Conference” ah ZAM panin palaai te zong kihel thei hi.

Dr. Lisa Hartley leh Dr. Caroline Fleay tawh holimna

October 16, 2014 ni-in HEI zumpi ah Australia gam panin Malaysia sunga Community makaite tawh holimna a nei khawm ngiat dingin UNHCR ah thunei Dr. Lisa Hartley Dr. Caroline Fleaypai uh hi. Amau tawh HEI zumah holimna kinei hi.

Dr. Lisa Hartley pen CHRE ah Lecturer a sep laitak hi. Asylum-seekers te hitaleh Refugees te hitaleh a mau thuak haksatna, deidan tuam nei a kideih sakna leh minam tawh kisai a kihuatna om theite nasia takin a kan laitak ahihi. Refugee te dinmun leh community sunga om mipite lungsim puakzia tawh kisai laibu hon khat zong bawl khin hi. Lisa in ama lunglutna tawh kizuiin Refugee te tawh na sem khawm a, Asylum-seekers te tangin kum bangzah hiam khat Sitni sepsak khin hi. Tudong mah in Australia gam sunga mi kimatna mun tuamtuamte veh in vaan den lai hi.

Dr. Caroline Fleay zong CHRE ah Senior Lecturer khat ahihi. Australia gama om Asylum-seekers te thu leh Human Rights tawh kisai laibu honkhat bawl khin hi. Asylum-seekers te phattuamna ding na asep zawh kum sawm val khin ta hi. Tua banah Western Australia a mat leh hen tuakte kikoihna munte ah tuni dong mah nisim phial in hawh den vaan den lai hi.

Hih holimna sung a kihel kipawlna makai teng khempeuh zong pahtawina letmat hongpia uh hi.

Zolia & Zotaang Malaysia kihel teng

Zolia Malaysia 2014
sCing Lam Lian sVung Sian Nem
sVung San Cing sDim Za Niang
sDon Lam Vung sCing Gawh Mang
sCing Sian Deih Muang sDim Siam Ngai
sZam Lam Dim sCiin Gah Ngai
sCing Muan Lun

Zotaang Malaysia 2014
sPau Sian Mung sCin Khawh Thawn Mang
sMung Suan Tuang sHau Lian Mang
sThang Langh Siing sMung Sian Muang
sPau Sian Khai sMung Tul Tuang
sZam Mun Thang sGo Sian Muang
sZam Muan Lian sKhan Suan Mang
sNang Sian Muan sTung Sian Muan Tuang
sKim Khan Khai sZam Sian Mang
sMark Khualpi sKC Thawngno
sKapno sHau Deih Khual

Zolia & Zotaang pahtawina ngah teng

Zolia Malaysia 2014 : Vung San Cing
Zolia 1st runner up Malaysia : Zam Lam Dim
Zolia 2nd runner up Malaysia : Don Lam Vung
Zotaang Malaysia 2014 : Hau Lian Mang
Zotaang 1st runner up Malaysia : Tung Sian Muan Tuang
Zotaang 2nd runner up Malaysia : Khan Suan Mang

People Choice Award ngah teng

Zolia People Choice Award : Zam Lam Dim
Zotaang People Choice Award : Cin Khawh Thawn Mang

Zomi Idol pahtawina ngah teng

Zomi Idol Malaysia 2014 : Suan Ki Thang
Zomi Idol a 2 na Malaysia 2014 : Nang Sian Cin
Zomi Idol a 3 na Malaysia 2014 : Suum Ngaih Muan

Zomi League pahtawina ngah teng

Champion : Zomi Adventist Church (ZAC)
Anihna : Zomi Catholic Community Malaysia (ZCCM-St. Francis)
Athumna : Myanmar Mission Church (MMC)
Alina : Christ Mission Fellowship (CMF)

Hehpihna tawh hong kanpih un

Pa Kam Thian Suan (Limkhai) pen October 7 ni-in Mantin pan KL ciah inn hong tunglo in thu kizakna bangmah omlo ahih manin a mukha na om leh a sanggampa Nang Lam Mung 011 1224 4789 tungah hehpihna tawh hong zasak un.

ZAM zumpi pan dahpihna

Tuipi khuami,Pa Lian Sian Muang (Kum 36) ZAM-17450cisa natna tawh Klang zatopi panin hong nusia hi. Oct. 13, 2014 ni-in Klang RC biakinnpi ah lungkim huaitak in thungetna hunte a kineih khitciangin Klang Meru Christian hanmual ah lungkim huaitak in kivui thei hi. Sanggam pa pen ZSM lut Zomi khat ahih bangmah in vai khempeuh zumpi panin kibuai pih hi. Tuaban ah ZAM member lut ahihna tawh ki zui-in ZAM thukhun ombangin sanggam pa mangpha khakna RM500.00 tawh ZAM zumpi panin mangpha khakna zong kinei beh thei hi. Adah akap khempeuh tawh akibangin Malaysia Zomi Kipawlna (ZAM) panin ih dah khawm hi. Topa’n hehnepna hong tungkim tahen.

Sunway Immanuel Pawlpi pan Crusade sapna

“Tua thambelpite sungah tui adim in koih un.”
(Jn. 2:7)
Speaker : Rev. Dr. Kam Cin Hau
Ani : Oct. 23-26, 2014.s
Ahun : 8pm-12am
Amun : Praise Emmanuel Biakinn
No.17-1, Jalan PJS 8/10,
Dantaran Mentari, Bandar Sunway, 46150,Jaya, Malaysia.

Ha bawlnuamte ading Ha bawl theihna

Ha suan nuam, Ha phop nuam, Ha bot nuam, Ha sawpsiang nuam, Ha bawlnuam te khempeuh in Ha Siavuan Sia Kai tawh na kizom un.
Ph. 011 2763 6516

Mopawi nongsim uh lungdam

Ka mopawi uh hong uap Pawlpi mi, u leh nau, lawm leh gual akua mapeuh lungdam mahmah ungh.
Joseph Tuangpu & Lucy Ciacing

Lundamkohna

Zomi Christian Ministers Council (ZCMC) in ZAM nasepna te thapiakna in RM100 hongpia ahih manin ki lungdam mahmah hi.
Gamsung gampua leitung muntuamtuam pan ZAM nasepna te tha napiak nopleh lungdam takin hong kisang ding hi.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…