ZAM Thupuak :: 19 Jan 20 (Zomi Cup kipan tading)

ZOMI CUP 2020 KIPAN TA DING

 Hong tung ding February 20, 2020, ZOMI NAM NI pahtawina I bawl Zomi Cup pen January 25-27, 2020 sung Padang Bola E RRI Sungai Buloh tualpi ah kimawlta ding hi. Tukum Zomi Cup ah khua 13 pan team 14 hong kihel thei uh a, Tuipi khua pan in A leh B in team nih hong ding khia uhhi. Zomi Cup –2020 ah team 14 te Group 4 in kikhen hi. Zomi Cup –2019 hon pawi pen January 25 ni zingsang nai 10:30 AM hun in kipan ding hi.

***Zomi Cup -2020 ah kimawl ding ahi zongin, a en ding a hong pai ding te ahi zongin zuu khamsa leh zuu thawl, beer bung cih te pua sa in nong pai loh nang uh leh kuncil te peuh mah lampi tung, inn umna kawmte tung cih te ah nong thangsiat loh ding uh zong I kithum phapha hi. Zomi te minam neu hiloin minam picing leh minam lian I hih na kilang sak ni. Hall ahi a, kimawlna mun te ahi zong khat vei nih vei I zat khit ciang hong kideih nawnlo pahpah cih din mun pan in pusuak khia in I hih na peuh ah hong kideih in hong ki it ding leh I minam picing hih na a pulak khia ding ei teng mah I hi a, tua bangmah in I minam hong ki neu muh theih na ding a sem a bawl zong ei teng mah I hih lam ki phawk ciat ni.

Zomi Cup 2019 ah Champion pen Anlangh te hi a, First Runner up pen Ngalzang leh Second Runner up Tuipi khua te ahi uh hi. Zomi Cup 2020 ah kua in Champion hong ngah ding cih a sawt loin kimu ta ding hi.

• Group A
• Anlangh
• Bukphil
• Heilei
• Buan
• Group B
• Ngalzang
• Tuipi (B)
• New Darkhai
• Group
• Vangteh
• Phaiza
• Singzung
• Tuimui
• Group C
• Tuipi (A)
• Voklaak
• Ngente
• Groud D
• Vangteh
• Phaiza
• Singzung
• Tuimui

PASTOR SASA LE ALAWM TE ZAM ZUM AH HONG HAWH

Korea Pastor Sasa makaih na tawh Pasian nasem leh cidamna lam a sem siavuan te kikop in ZAM zum ah hong hawh uh a, Malaysia om Zomi te din mun, Kawlgam pan I pai khiatna thu cih bangin thu tampi kikum khawm thei hi.

Tua ban ah sang nau -pangte leh cina pawl khat zong hong vel sak in a kisam bangin hong bawl sak uh hi.

Zomi te thu teng I gen ciangin hong vei mahmah in thungetna zong nasia takin hong neih sak ban ah mailam ah Zomi te ading in a sepnop tuamtuam te uh zong kikupkhopna ki nei thei hi.

ZOMI NAM NI AH PANKHOP DING NGETNA

Malaysia a om Zomi ten kumsim a i bawl den ahi i minam ni a sawtlo in hong tung ding hita hi. Abeisa kumte mah bangin tukum zong thupitak leh picing takin bawl theih na dingin 06 January 2020 in ZAM zumpi ah kimuh khopna kinei hi. Zomi te in minam picing leh minam kician I hih na kician takin I lah na leh I minam I pahtawina tawh in 2020 Zomi Nam Ni zong nopcitak leh picingtak a i bawl zawh na’ng sum leh pai tampi mah hong kisam ding ahihmanin muanna leh lametna lianpi tawh Zomi Nam Ni Committee in anuai a bangin ma i pankhopding kong zawn uhhi. Mi khat peuh ahih kei leh kipawlna khat peuh I pawi hi loin Zomi te I minam ni pawi ahih manin mikim in mawhpuak la in pang khawm in I sep khop ding zong I kizawn hi.

 Zomi Nam Ni adingin sum leh paai tampi mah kisam a I pan khop ngeina bangmah in tutung zong Khua ki pawl nate panin RM 200 leh biakna Pawlpite panin RM 300 tawh mapang khawm dingin I kizawn hi. Khua kipawlna, Pawlpi bek hi loin mimal mahmah in zong ka minam ni pawi ading kihel nuam ing a ci te zong lungdam takin kisang hi. 2020 ZOMI NAMNI Committee

ZOMI NAM NI ADING PANKHOPNA HONG PIASA TE

1. ZEM Pawlpi        RM-300

UN AH APPOINTMENT KILA THEI

UNHCR zum ah mithak san na a lunggulh te in online pan in appointment kigen thei hi. Hih pen ei mimal tek in I om na mun pan in lak theih ding in hong gelsak uh hi a, ahi zongin ei leh ei lak ding lem a salo te in I kipawlna zum te pan zong ki hih sak thei ding hi.

Tua ban ah hih appointment ngetna ah I zat Phone No. te pen khel thimthum loin hoih tak I zat ding kisam hi. Ei Zomite sungah phone No. a nawh khel mahmah om a, tua bangin I khel leh UN pan appointment hong pia in hong sap ciang contact ngahloin om leng mi dang supna hilo in ei mahmah I supna pi suak ding hi. Tua ahih manin zum ah I piak sa contact No. te it in kemcing ding zong thupi hi. Hih online pan appointme -nt lakna ei leh ei a la nuamtein ; http://www.refugee-malaysia.org ci-in Google ah at leng hong suak pah ding hi.

Innkuan lutpih nuam a ngah thei nailo te zong online pan in appointment kila thei hi. Ei leh ei a hih thei lote in zong kipawlna zumte pan zong nisim in kihih sak den hi.

2020 ZSM LAIBU KINGAH TA HI

Malaysia zomi Genvai Kipawlna (ZSM) 2020 ading ki lutthei ta a, ZSM laibu te zong kila thei ta hi. ZSM lut man mi khat ciang kum khat ai RM 20 hi a, hih na lutna hang tawh ahamsa a dong tuak I mipihte a panpih, a dah akap hun ah a khitui anulsak na hi gige hi. Hih ZSM ah member na lut na in nang a ding a pia na hikei a, panpihna akisamte a panpihna hizaw hi. A kisam khat I panpih na in Pasian deihna zong ahi hi. 2019 sungin zong tu ciangciang Zomi pih te luang (29) bang lei ah I tuh theihna in nang leh kei I pankhopna ahih bang mahin mailam ah zong mapang khawm lai dingin zong kong zawn phapha uhhi.

ZSM ADING PANPIHNA HONG PIA TE

• 1. MBF Pawlpi        RM300
• 2. Taaklam Khua Kipawlna      RM200
• 3. ZEM Pawlpi        RM1500

PILVANG TAK IN OM SAWM NI

Tuhun laitakin kimat kihen hong tam mahmah a, Malaysia kumpite in a gam sungah phalnalo tawh om mi tampi tak siangsak nuam ahih manin kimat kihenna hong tam to semsem ding hi ci gen khia khin uh hi. Mun tampi ah Oparasi lut kawi kawi ahih manin I omna ciat ah kidawm tak, pilvang tak in om ding hanciam ni. A thukin lua mahmah ahih kei leh vakvak kei zaw ni.

A diakdiakin Immigration te leh CID te uniform silh loin vakvak uh a, tua tungtawn in pawl khat in sum zon na in hong nei beh lai uh a, hong pang kawikawi in tampi pi tawh hong kitan sak uh hi. I vak suk vaktohna ah kiim leh pam zong hoih takin I et theih ding hong thupi mah mah hi. I omna veng kim veng pam ah zong gam tat zia om zia te hoih tak kidawm ciat ni. Mite mitdong ding leh midangte a nawngkaisak lo dingin kidawm ciat ni. Kimat kihen bek hiloin migilo zong tam ahih manin I kim I pam om zia hoihtak telpha in gamta ciat ni.

Na sepna ah thunei te in sitna khat hong neih leh kei pen UNHCR ah gambel in hong san ding ngak in a om hi ing/UNHCR card tawi gambelmi ka hihi. Ka nuntak nading hih teng ah part time tawh na a sem pak hi ing ci-in I gen theih ding thupi ding hi. Malaysia om Zomipih a kuamaciat I omna gam huihnun zia tawh kizui in kidawm ciatni cih hong zasak phapha ung. A zenzen in kimat kihenna khat natuak leh ZAM zum ah hong zasak pah in. Nang ading in a ready sa in om den uh hi.

 WELCOME TO ZAM 

Kawlgam, Vaigam, tuipigal leh gam tuamtuam pan Zomi tampi omna Malaysia ah hong zin Zomi makai  te’n Zomi zumpi ahi Zomi Association of Malaysia(ZAM) ah hong hawh/phak hamtang in thapiakna leh idea tuam tuam piakna nong neih nadingun kong zawn phapha uh hi.

ZAM ZUM AH HONG HAWH

Lingthuk Khua mi, Yangon ah Mercy Baptist Church ah Senior Pastor asem Rev. Pau Khan Khual in Malaysia ah hong zin sungin Zomite a itna leh a vei na tawh kizui in ZAM zum ah hong hawh in thapiakna leh thungetsak na hong nei thei hi. Topa’n siapa nasepna te ah hong lawhcingsak semsem ta hen.

NATGUAL (Influenza) TAWH KISAI TANGKO NA

UNHCR Pan in NATGUAL (Influenza) tawh kisai tangko na ong nei uhhi.

Hih natgual (influenza) natna pen huih dikna lampi (respiratory system) pan in hong lut in a kilawh baih mahmah natna namkhat ahihi.

Hih anuai a dan natna bang in lim hong lah leh zato ah amanlang in kilah pah ding hoih pen hi.

• 1. Cisa in 38 C sang tamzawh a hihleh
• 2. Ci leh sa na, nungzang khut leh khe na
• 3. Khuasik in khua-ul nel kaikai 4. Lutang na
• 5. Bukkhuh
• 6. Thabei in gim thapai
• 7. Nakbing in naptui tolh den

Hih natna a ngah baih phadiak te

• 1. Kum cing nailo naupang te leh uham sa te
• 2. Cina don nasem te leh naupang a kepna ah nasem te
• 3. Mitampi tawh a om khawm te
• 4. Cancer, Zatui zangte, HIV, AIDS dan in pumpi a zawmsak natna a nei te
• 5. Zunkhum, sikhum leh awmsung natna a nei te
• 6. Naupai te in ngah baih pha diak uh hi.

Hih natna pan kikep kidal theih na dingin

• 1. A tungah natna bang kipan in limlahna te a om leh zato ah a manlangin kilak pah in.
• 2. Na khut siangtak in sil denin. Na nak, nakam leh na mit te na khut sawpsiang loin lawng/nuai kei in.
• 3. Mi tam na mun peel in

Hih natgual natna pan kidalna a hoih pen in

• 1. Khut hoih tak leh siangtak in sil den ding
• 2. Khuh laitak ahih kei leh sneezing laitak muk leh kam hum ding.
• 3. Nak, kam leh mit te khut nin tawh sawk lo hamtang ding
• 4. A zenzen in hidan dam loh-na na-neih leh nai 24 sungbang inn ah om in tawlnga hamtang ding.
• 5. Damloh laitak in natna kilawh loh na dingin midang tawh kiho, kizom selo ding
• 6. A thei zato lam siavuante tawh hoih tak kilak pah ding.

Vaikhat peuh Dot nop a om leh ZAM:03 9226 1926/ 60 16 293 9027

TUKAL SUNG ZATO LAM BUAIPIH TENG

• 1. Ram Mawi Aa (Tahan) Serdang Hospital ah kibuaipih hi.
• 2. Dim Niang (Tedim) Sungai Buloh zato ah kibuaipih hi.
• 3. Khai Kua Hau (Laaitui) Sungai Buloh zato ah kibuai pih hi.

ZATO LAM TAWH KISAI

Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

TUKAL SUNG THONG LAM BUAIPIH

• 1. Cin Za Khai (Suangzang) Bukit Jalil Camp ah kimuh pih thei.
• 2. Piang Ngaih Thang (Zangtui) Bukit Jalil Camp ah kimuh pih thei.
• 3. Tual Deih Lian (Zozang) PJ Mahkahmah ah kibuai pih
• 4. Pau Sian Mang (Zozang) Serdang Lock up ah kimuh pih
• 5. Lang Than Thang (Laaitui) Pokok Sena thong ah kimuh pih
• 6. Zam Ngaih Sang (Ngalbual) PJ mahkahmah ah buai pih

KIMAT KIHEN NA TUAK LEH 

Zomite kimat kihen natuak zenzen uh leh hih phone no. te ah na hopih pah in. Nang adingin atawn tungin kiging sa in om den uh hi.

• Sia Tuang Pu     : 016 254 4093
• Sia Zo Mung    : 017 663 6087
• Sia Maa Mang  : 018 231 1365
• ZAM Hotline    : 016 293 9027

ZOMI TE ADING NASEP

Malaysia gam sung om Zomite nasepneilo in nasem nuam mahmah napi nasep zon nang a lemlote in ZAM zum ah hong dawp un. Zomite ading man ngenloin na sep kizon sak den hi. Contact – Sia  Mamang – 018 231 1365