ZAM Thupuak :: 15 Mar 20 (UN pan mipitung zaksakna)

ZAM Thupuak :: 15 Mar 20 (UN pan mipitung zaksakna)

UNHCR PAN COMMUNITY TE TUNG AH ZAKSAKNA :: Pulnatna namkhat ahi COVID-19 nasiatak in a kilawh loh na dingin mi tampi kikaikhawm in omlo ding cih Malaysia kumpi lam pan hong thuzasakna tawh kizui in UNHCR in na kisem toto hi. March 13, 2020 (Friday) ni a kipan in UNHCR pan in March kha leh April kha sung a, UNHCR zum ah appointment a nei te damdam in ani kikhin toh sak ding hi.

Refugee leh Asylumseeker te in UNHCR pan in thuzaksak kik na a om matengin UNCHR zum ah nong pai loh na ding uh zong kong thei sak uh hi. UNHCR in March kha leh April kha sungin zum ah appointment anei te appointment ni a kikhin na thu mimal in Message pan in kiza sak hi.

UNHCR in nasepna nih ahi Kimat kihen vai leh Cidamna tawh kisai te ahih leh Monday -Friday zingsang nai 8:00AM pan nitak nai 10:00PM dong Hotline tungtawn in thu kizasak thei ding hi. Kimat kihen tawh kisai in 012 630 5060 leh Cidamna lam tawh kisai in 03 2118 4879 te ah kizasak thei ding hi.

Thupiang a om bangbang ahun zui in hong kizasak toto ding hi. Theih beh nop a om leh ZAM zum ah zong kidong thei ding hi. 03 2141 6659, 016 293 9027

COVID-19 TAWH KISAI THEIH HUAI TE

COVID-19 natna tawh kisai in World Health Organizati -on te in Leitungbup pulnatna (Pendemic) in tangko khiata a, 12 March 2020 ciangciang ah leitung gam 116 ah kilawhta in mimal 126,401 in neita uh a, 4, 641 in sih lawh khin uh hi.

Hih natna pen Sen gam pan kipan hi aa, South Korea, Italy, Iran, Japan leh France gam te ah natna nei leh a kilawh tam pen hi ci uh hi. Zomi tampi gambel in i om na Malaysia gam sung mahmah ah zong hih natna nei pawl khat kimu khia khin ahih manin Zomite zong kidawm ciat ni.

Hih natna a nei mimal tungah et phatna a neih ciangin hih natna a nei te tungah anuai adanin natna lim kilak khia hi ci uh hi.

• 1. Cisa (Fever)
• 2. Bukkhuh (Dry Cough)
• 3. Om dan nuam lo, vangpil mello (Fatigue)
• 4. Khaksawh tam pha diak (Sputum Production)
• 5. Tawl pahpah (Shortness of beath)
• 6. Gawngtawl na (Sore Throat)
• 7. Lutang na (Headache)
• 8. Satak te leh guhtang te na (Myalgia or Arthralgia)
• 9. Khuasik (Chills)
• 10. Luvai in luaksuak (Nuausea or Vomiting)
• 11. Nakbing (Nasal Congestion)
• 12. Sungpai (Diarrhea)
• 13. Bukkhuh in si pai (Haemoptysis)
• 14. Mitna (Conjunctiava Congestion)

Hih COVID-19 natna leh khuahun kikhelna hangin i ngah theih bukkhuh vei (Seasonal Influenza) kilam dang napi pen in hih COVID-19 pen kigim zaw leh hong nasia zawin kibawl nading zatui om nailo hi. Khua hun kikhelna hangin i ngah theih Bukkhuh vei (Season Influenza) te ahih leh zatui om hi.

COVID-19 natna a kibawlna ding zatui om nailo ahih manin kidal kholh ding thupi pen hi. Tua ahih manin hih anuai a bangin kidal ding thupi mahmah hi.

Hih natna pan in I kidal theih na dingin

• 1. Tuap lam damlo te tawh kinai tak in om khawm lo ding
• 2. Na khut siangtak in sil pahpah lecin hoih pen hi.
• 3. Na bukkhuh ciang leh hatchai (Sneezing) ciang in na nak leh na kam hoih takin hum ding (Tissue ai kei leh dial tawh hoihtak in hum hamtangin)
• 4. Na bukkhuh ciang leh na hatchai (Sneezing) ciangin na kidalna tissue te hoih tak in tun in ninbung ah pai in. Na ut na peuh ah thangpaih kei in.
• 5. Tua tissue ahi a, na kidalna khat peuh na lawn khit sim in na khut siangtak in sil kik pah in.
• 6. Na pumpi siangtho na hahkat in tha om ding ann te ne in ih mut ciim sak mahmah in.
• 7. Ganhing tuamtuam te tawh kisukha, kisawk kha lodingin om in.
• 8. Sa a min siang loin ne kei hamtangin. Sasan na zat leh zong a minsa atna leh a sial atna khen hamtangin.
• 9. Mitamna mun te ah pai ding kidawm inla napai leh zong na muk leh na kam tuam hamtangin.
• 10. Tuisa lim dawn in. Hih lungno in a vot thuak zoin a lum thuak zolo hi.
• 11. Nisa kimu sak zelzel in na puan te zong nisa mu sak zelzel in.

Hih a tung a bangin damlo na khat na neih leh aman lang pen in Siavuan te tawh kilak pah in. A pua lam ah vakvak loin innsungah hoih tak in tawlnga in.

UNHCR TAWH KISAI A VEK IN SUM PIAK KULLO HI

UNHCR zumpi pan hong kisep sak khempeuh in sumpiak kullo (Free) ahi hi. A diakdiak in

• 1. UNHCR tawh kisai laikung laidal zatte, thu leh la report nate khempeuh sum piak kullo hi.
• 2. UN card piakna (Register) leh UNHCR pan huhna le panpihna khempeuh zong sum piak kullo (Free) mah ahi hi.
• 3. Gambel mi in ciamteh na ngah na ding tawh kisai, gam 3 na kipuak nang a kipan vai tuamtuamte zong sum piak kullo (Free) mah ahi hi.

UNHCR pan in hong kipanpih na khempeuh sum piak kullo (Free) hi a, tua hong sepsak na dingin sumpiakna pen thuman lo gamtatna ahi hi. Mi khat peuh in na vai a manlang ding na ut leh sum hong pia in hong cih leh piak het loh ding ahi hi.

A zenzen in tua dan hong sum hong ngen, ahih kei leh nang tung pan na khat peuhpeuh hong kinget leh anuai a mun te ah aman lang thei in khiat pah ding ahi hi. Mi khem sa in om kei inla hong kikhem loh dingin pilvang in. UNHCR :[email protected] Inspector General’s office :[email protected] UNHCR zum mai a om laibung asan (Red) ah zong lai kikhia thei hi.

2020 ZSM LAIBU KINGAH TA HI : Malaysia zomi Genvai Kipawlna (ZSM) 2020 ading ki lutthei ta a, ZSM laibu te zong kila theita hi. ZSM lut man mi khat ciang kum khat ai RM 20 hi a, hih na lutna hang tawh ahamsa adongtuak I mipihte a panpih, adah-akap hun ah a khi tui anul sak na hi gige hi. ZSM member na lutna in nang ading apia na hikei a, panpihna akisamte a pan pihna hizaw hi. A kisam khat I panpihna in Pasian deihna zong ahi hi.

ZSM ADING PANPIHNA HONG PIA TE

• 1. MBF Pawlpi RM300
• 2. Taaklam Khua Kipawlna RM200
• 3. ZEM Pawlpi RM1500
• 4. Phunom Khua Kipawlna RM-200
• 5. Phaiza Innkuan – Malaysia RM-200
• 6. ZCF-Kajang Pawlpi RM-200
• 7. Agape Puchong Pawlpi RM-300
• 8. Ngalbual Khua Kipawlna RM200
• 9. Haupi Khua Kipawlna RM200
• 10. MZCC Pawlpi RM500
• 11. ZCF-Bethany Pawlpi RM200
• 12. Suangpi -Tedim Khua Kipawlna RM200
• 13. Zomi Innkuan- Rawang Pawlpi RM300
• 14. Cingpikot-Keizang Khua Kipawlna RM200
• 15. Singzung Khua Kipawlna RM200
• 16. Saizang Khua Kipawlna RM200
• 17. Mualpi Innkuan Malaysia RM200
• 18. Buanli Khua Kipawlna RM200
• 19. Tuithang Khua Kipawlna RM200
• 20. Zion Christian Church -Songailong RM150
• 21. Zonuamzang Khua Kipawlna RM200
• 22. Praise Adonai ZCF Pawlpi RM200
• 23. Mualnuam Khua Kipawlna RM200
• 24. Vangteh Khua Kipawlna RM200
• 25. Lailui Khua Kipawlna RM200
• 26. ZCA Pawlpi RM300
• 27. Laaitui Khua Kipawlna RM200
• 28. MLPP Pawlpi RM300
• 29. Mualbeem Khua Kipawlna RM200
• 30. ZCCM Pawlpi RM300

PILVANG TAK IN OM NI : Tulaitak I omna gam ahi Malaysia gam sungah gamvai tawh kisai in buaina neng neng om ahih manin I omna ciat ah pilvang takin om ni.

A diakdiak in I omna inn te ah gamlum lua, veng leh pam nawngkai sak zah dongin I gamtat loh dingthupi mah mah hi.

I veng I pam leh midangte mit ah kilawmlo dingin gam ta loin om dan I siam ding hong thupi mahmah hi. Vai thupi mahmah a om kei leh zong vakvak selo in hoihtakin I om na ciat ah I om ding thupi hi. Lam block tuamtuam zong om denden ahih manin ei lam pan kidawm thei leng hoih pen ding hi.

Lampi ah I paiciangin zong gamdang mi I hihna a kilang dingin pai luailuai, phone kihosa in pai in a ngaih pipi in awngbaba cih te pawl zang kei hamtang in.

Mun tampi ah Oparasi lut kawikawi ahih manin I om na ciat ah kidawmtak, pilvangtak in om ding han ciam ni. A thukin lua mahmah ahih kei leh vakvak kei zaw ni. A diak diakin Immigration te leh CID te uniform silh loin vakvak uh a, tua tungtawnin pawl khat in sum zon nain hong nei lai uh hi. Hong pang kawikawi in tampi pi tawh hong kitan sak uh hi. I vak suk vaktohna ah kiim leh pam zong hoih takin I et theih ding hong thupi hi.

DAHPIHNA : March 08, 2020 (Sunday) ni zingsang lam nai 5:30 kim pawl in sanggamte nih ahi Sakhangyi khua a teng Pa Thawng Lian Mang leh Nu Cing Don Niang te tapa David Kam Lian leh Zozang Khua a teng Pa Thang Go Lian leh Nu Cin Khan Cing te tapa Nang Pian Thang te in Jalan Loke Yew lamzikpi a kan laitak in motor in phukha in a nuntakna hong bei san uh hi.

Innkuanpih te lunggulhna tawh kizui in kawlgam kipuak a, I sanggamte nih tawh Malaysia ah hun nunung zatkhop na 11 March 2020 (Wednesday) ni-in Kajang misi buk ah kinei hi.

Hih hong nusia I sanggamte nih hangin adah akap khem peuh Topa’n alam dangin hong hehnem henla, Zomite sungah hibang sihnate hong tun nawnloh nadingin thungetna ah kiphawk ciat ni. ZAM/ZSM pan in zong dahpih na I pulak khia hi.

ZATO LAM TAWH KISAI : Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

TUKAL SUNG ZATO LAM BUAIPIH

• 1. Pau Sian Suai (Kawlpi) UKM Hospital
• 2. Mung Suan Khai (Tonzang) DSH Specialist
• 3. Don Sian Khai (Laaitui) Shah Alam zato ah kibuaipih

TUKAL SUNG THONG LAM BUAIPIH

• 1. Tuang Sian Muang (Tedim) Sungai Buloh thong ah kimuh pih
• 2. Hau Pian Dang (Singzung) Camp pan ciah na ding kivai hawmpih
• 3. Nang Lam Sang (Phunom) PJ Mahkahmah ah kibuaipih
• 4. Sut Lam Khai (Darkhai) PJ Mahkahmah ah kibuaipih
• 5. Gin Deih Sang (Suangsang) PJ Mahkahmah ah kibuaipih
• 6. Cing Deih Thang (Bukphil) PJ Mahkahmah ah kibuaipih
• 7. Nang Sian Mung (Vangteh) PJ Mahkahmah ah kibuaipih
• 8. Dal Khan Siang (Ngalbual) Camp pan a ciah na ding ki vai hawm pih

KIMAT KIHEN NA TUAK LEH : Zomite kimat kihen na tuak zenzen uh leh hih phone no. te ah na hopih pah in. Nang a dingin atawn tungin kiging sa in om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

LUNGDAM KOHNA

1. Pau Suan Thang (Phaileng) RM50

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi bangin I pankhopnate hangin tuni dong a kalsuanzo I hihi. Topa’n Zomite adingin mapang zo semsem dingin thupha hong pia tahen.

ZOMI TE ADING NASEP : Malaysia gamsung om Zomi te nasep neilo nasem nuammahmah napi nasep zon nang a lemlote in ZAM zum ah hong dawp un. Zomite a dingin man ngenloin nasep kizon sak den hi. Contact – Sia Mamang – 018 231 1365