ZAM kum 9 cinna khawmpi leh palaai kiteelna ah sapna
June 8, 2015 (Monday) ni ciangin ZAM kum 9 cinna leh 2015-2016 palaai kiteelna ding pen nung kum a zatna Chinese Assembly Hall mah kizang kik ding a, zingsang nai 11pm-5pm sung kumcin pawi leh palaai thak ki teelna kinei ding ahih manin, Zomi a kua mapeuh nong kihel kim ding un zahtakna lianpi tawh kong zawn uh hi.
Hun masa pen ZAM kum 9 sung lam honglak, hong kithuah pih Topa tung lungdam kohna leh 2014-2015 palaai sem te kiang pan sep khiatna pulak hun hi ding hi. Hun nihna ah a kisehsa anuai a Election Committee te in kitelna hong makaih ding uh hi. Hong kihel mipi khempeuh sunan leh avot kine masa ding hi.
1. Rev. Dr. Cin Sian Pau (Convener)
2. Rev. Thawng Ngaih Khup
3. Rev. Gin Do Khup
4. Rev. Thang Do Khen
5. Rev. Gin Khan En
6. Pa Thang Za Khai
7. Sia Nangtak
8. Sia Hau Thang
Theihding:
⦁ Counter pan Registration kibawl dinga, thu ngai ding leh Mee (vote) khia dingte, atuam in kitusak ding hi.
⦁ 2015-2016 kum ZAM Palai teelcing te’ Kiteel ni ciang Mipi mai ah “Kiciamna” leh thungetsakna Election Committee te’n hong makaih ding hi.
⦁ Kiteel niciangin, Khua makai leh Pawlpi upa/siate zing sang nai 11:00 am hun alaplote Mee (vote) kikhia sak nawnlo ding hi. Abeisa kumte tawh kibanglo ding ahih manin, hih hun sunga kihel khempeuh hunlap sawm hamtang ni.
⦁ Kiteel niciang Mee (vote) khia dingin Khua kipawlna leh Pawlpi panin tang mi 1 ta pello a, ih paikim ciat nadingin zahtakna lianpi tawh kong zawn uhhi. Election Committee
RSC & DHS pan May kha sung contact kingah zolo teng
Anuai a Contact ngahlo nambat sungah na nambat a kihel khak a leh ZAM zumpi ah hong pai in. Contact ngah kik theihna dingin hong ki huh ding hi. Adiakin avom tawh ki gelhte Zomi sung pan hi.
791-10C08254 354-09C06325 791-09C07816 791-10C05451 791-10C06752
354-11C06188 791-09C01865 354-14C04435 354-05C06977 791-09C12700
791-10C04903 791-10C04091 791-09C18346 354-09C07298 791-09C01649
791-10C00877 354-10C11560 354-11C04998 791-09C05740 354-09C06354
791-10C03941 354-09C04250 512-04C01503 512-04C01178 354-09C07161
791-10C04634 354-14C00945 512-04C02628 354-14C13472 354-09C05784
791-10C00753 791-09C15007 791-09C07556 354-09C08292 354-13C00068
354-11C07467 354-13C02235 791-09C09829
791-10C04416 354-11C00256
791-09C00984 512-05C01590 354-10C01975 354-09C06315 354-11C05987
354-09C04141
ZAM cidam khansau hen la, Zomi tulza tampi adingin thupha hiden ta hen!
Zomi Association of Malaysia (ZAM) a (9) veina Kumcin’ Khawmpi nuamtak ih bawltheihna ding hunnuam hunpha ong musak ih biak Topa Pasian tungah lungdamna ih pulak masa hi. Kum (9) sung tawntung a nungta Pasian in haksatna leh gentheihna a tuamtuam sung pan hong ompih in Pasian’ hehpihna mah tawh ih Zomi Kipawlna hihciang maa a suanthei ihhi hi. Tuni Kumcin Khawmpi hong pai upa teng leh pawlmi akuama khempeuh tungah ih Kipawlna tangin lungdamna kong konuam hi. Zomi itna taktak leh veina taktak tawh hong pai na hih man un, Zomi khempeuh taangin zong a lungdam huai mahmah ahi hi. Upa khat hih man, EC member khat hih man, ahih kei leh hunbit a ki piakkhiat zawh man bek a Zomi it, minam a vei cih hi zenzen lo in, pawlmi khat hihna tawh pawlmi khat ii sepding thu, zuihding thu, ahih kei leh pawlmi kician khat ii hihding khat peuhpeuh hihna pen in, Kipawlna leh minam aa ding a thupi penpen nasep kipatna khat hipah hi. Na hun manpha uh piakhia in, ih Zomi Kipawlna aa ding lungsim bek thamlo pumpi mahmah tawh nong kihelna uh in, pawlmi na hihna uh tawh minam na itna uh leh minam na veina uh teltak in hong lak hi.
Tuakhit ciang, ZAM a kiphuh cil aa kipan aban aban in tuni ciang hunbit aa aki piakhia palaai teng khempeuh leh makai masa khempeuh tungah lungdamna ka pulak nuam lai hi. A diakdiakin, makai masate, palaai masate in Zomi aa ding itna bulphuh in hangsan takin na ki 
piakhia masa uh hikei leh tuni in Malaysia ah ei Zomi te ih dinmun pen hih sangin nakpi tak niamzaw thei lai ding hi. Pasian’ hehpihna tawh Zomi te aa ding ih kisap mahmah laitak Zomi a it a vei mahmah ih makai masate hong ki piakkhiatna uh hangin tuni in hihbang in Kipawlna kician tak aa a dingthei ihhi hi. Tuabek thamlo in, makai masate, palaai a sem masate in hong paisan khit uh ciang aban aban aa hong zom toto makaite leh nasemte ii kipiakkhiatnate zong mangngilh theih ding hilo hi. Amaute hanciamna tawh tuni ciang hihbang dinmun a tungthei ih hi hi. Tua ahih manin, ih Kipawlna makai leh palaai hong sepsak ngei khempeuhte tungah ahi zongin tu laitak aa a seemlai makai teng khempeuh tungah ahi zongin lungdamna lian mahmah hi, cih Kipawlna min tawh ih pulak hi.
ZAM pen Zomi teng ih kipawlna hi. A diakdiakin Zomi mah a bulphuh nuam teng, Zomi mah a pom tinten teng ii kipawlna hi. Hih Malaysia ah, ei Zomi pen mimal (30,000) val om dingin ki ciamteh aa, tualak pan ZAM pawlmi hong lutkhin pen (29,260) val tham phata hi. A tamzaw ahih kei leh a vekpi phialin gambeelmi ciaptehna ngahnuam leh gam thumna lunggulh vive ihhi aa, Kipawlna nasep bulpi in zong gambeel vai mah hipah hi. A kipatcil lamin gambeel vai maapan’na ah kipawlna a omsate’ munlaakna hangin Zomi min in mui ih butzawh loh hang, tu in ahih leh Zomi ih hihna a kinial theilo ahih mah bangin Zomi min tawh ih sep leh bawlnate ah kuamah in hong khaktan zolo in, ih hihna bangin hong ki sangthei hita hi. Abanah citak tak aa ih septoh nak leh gambeel vai ahi zong, Zomi vai ahi zongin ih kipawlna tawh ih sepnate hong lawhcing tektek ding hi. Tua ahih manin, Malaysia aa om ei Zomi te ki pumkhatin ih kalsuan semsem ding thupi mahmah hi. Nidang in, Malaysia ah Zomi te in maipha mu ih kisak kei phial leh zong, tu in Zomi ih hihna hang tawh bangmah lungneuna ding, lunghiangna ding om nawnlo hi. Bang hang hiam cih leh UNHCR in Zomi te ki thutuakna ih kipumkhat nate zong hong theihpih in amau tawh nisim sepkhopnate, kumsim in hong tamto tektek in ih lamet ngamvet loh leh cikmah hun apiak ngei nai loh uh kipawlna 60 val lak panin ZAM kipawlna “Best Community-Based Organization Award 2014” hong piak tak ciangin nasepkhopna te thangah mahmah leh lungkim mahmah cihna hi. Ih Minam Kipawlna kiptak hong dingtang in hong thahat leh ih minam bup aa ding ih liim, ih vaangpi hong suakthei ding aa, minam dangte in zong hong zahtakin Zomi te hong simmawh ngam nawnlo ding uh hi. Tuhun pen, ki pumkhat theihna, sepkhop theihna a thupit mahmah hun ahih mah bangin a ki pawlkhawm theite a hampha hi-in, a kipawlkhawm theilote a hamsiat hun ahi hi. Malaysia ah tawmcik ih omhun sungin, “Zomi ihhi hi” cihtawh Zomi kampau kitel teng ki pumkhat aa, ih kipawlkhop theihna in ih zuatna ding leh ih teen na ding gam tekah Zomi te mailam ding lampi hoih lampi maan a sialkhol ih suakding aa, ni khat ni ciang Zomi te tangthu kisuut leh Malaysia gam aa om ei Zomi gambeel huhna zong mite ki pumkhatna pen a etteh huai mahmah tangthu hong hiding hi. Tua ahih manin, “Zomi ihhi hi!” Zomi sungah semkhawm in mapangkhawm tawntung ni ci-in aki hanthawn nuam ihhi hi.
ZAM in mimal khat leh nih peuh ii muhdan sandan leh ngaihsutna, thu neihna tawh ki kalsuan mawkmawk hilo in, kipawlna piicingte ngeina tawh kituak aa Thukhun leh Dante tawh kalsuan ahih manin zong Zomi te midangte mai ah ih hihna bangbang a maan leh diktakin aki pulak thei ihhi aa, namdangte leh adang kipawlna tuamtuamte mai ah ih minam kipawlna in a angtan huai leh a zahtak huai, a khangto semsem kipawlna hong suak hi.
Kumkhat sung tawntung ih sepsa ih zawhsate pawlmite tungah ih pulak ciangin kisak theihna kisialhna cihbang hilo aa, a phamawh thu ahih manin aki pulak khia hizaw hi. Ih sepsate enkik in mailam aa ding tha la ding, asia apha kantel ding hang aa, mailam ah a hoihzaw aa ih kalsuan theihna dingin hanciamto ding hi hang. Kipawlna piicing, a kician khat ahih nak leh, kum khat khit kum khat khangto semsem ding, lian tektek, zai tektek ding, nasep tam tektek ding, nasep pulakna tam tektek ding cih pen a ngeina ahi hi. Abeisa kumsung sangin mai kum ciang zong pulakna, khantohna hong tam tektek ding, nasep zia leh mabante zong hong taangzai tektek ding hi.
Tua ahih manin, ih teelding ih makaite in mai kum sung a taangzai zaw leh a lawhcing zaw dingin maa hong pang ding uh aa, ei mipite in zong ih makaite nakpi takin panpih ding, tha piakding kisam mahmah hi. Banghang hiam cih leh, mipite lo in ih makaite in gualzawhna hong lawhpih zolo ding uh hi. Makaite leh Zomi ading aki piakhia a semkhiate tungah mipi in tha pia in panpih ciat ni! Tha ii piak zawh kei phial leh zong a thanemna ding un bawl kei ni. Makaite leh nasemte in zong mipite aa ding itna veina lianpi tawh na semin hanciam ni!
ZAM cidam khansau hen la,
Zomi tulza tampi adingin thupha hiden ta hen!
United States Ngeina le Dan Thusinna Khutzat Laibu : ZOMI (azom)
Sum zatdan geelsiamna
Sum le paai tamlua zangkhazel cihdan a omloh nading in sumbuk ah vanleiding paikhiatciang, a nuai aa sumbukte pan sumbuk van leileng sum le paaitampi kibei lo khading hi.
⦁ Sumbuknote pan van ii lei sang sumbuk golpite pan van lei leng.
⦁ Vanman kikhep ziauziau theina lai (coupon) tawh a kithuah vante leizaw leng.
⦁ Zattheih na/van kibang veve napi’n sumbuk golpite ah manham deuh se ahih ciang, sumbuk neuneute pan leizawlel leng,
⦁ Van na lei ciang, van tungah a kisuang lai na et khitteh, a gikna sit pha in. Vangolpite tawmman zaw thei hi.
Inn le lo, mei le tui, gas meitui vai nasepnate
⦁ Innsaap man tawm mahmah in, khawpi lua a hikhol lo khawneu te ah zong a tung aa vanzat te kikeng thei lel ding hi. Innkuanpih neilo khatkia bek a om te ading bangbelh midang te tawh kipawl in omkhawm theileng thukhat peuhpeuh vaihawmna baihzaw ding hi.
⦁ Huihvot bawlna set (Air conditioner) cihte pawl leh khualum sak sette i zat hunciang in kongvang neu/tawlet te khakding kisam ding hi. A taktak in ci leng khuadamna lamah a tengte ading ahih leh khawlum sakthei set nasiatak zangin omding sang, khuahun tawh kituak in omtheih ding kisin huaizaw a, puan tungsilh/puanlum te silh in innsung ah om khinkhian ding hoihzaw hi.
⦁ Sum tang kul silbawlna/nasep nakhat peuhpeuh ah zong mei leh tui saap a tam leh atawm tungtawn in kipia ahih man-in kisam lopi aa mawk zat/motzat huai lo hi. Thu khat peuh ah a ciil thei/a zeeksiam te mah nuamsa/daupai zaw kici hi.
A kizang khin sa, a hoih lai (second hand) vante USA gammi te in zong second handvante angtang takin zanglel uh hi. Nektheih dawntheih van pawlkhat te leh innsung vanzat tuamtuam, vanzat dang nengneng pawlkhat te bangzong amanzah ding a kiciangtan zah (original price) sang aniamzaw (discount) tawh innmai sumbuk neuneu te leh second hand sumbuk te pan kileithei ding hi.
Kizopna telephone zat zia
⦁ Telephone zang in kizop huncianga kizang phone Company te le kizop hun bangtan kaai cihdan tawh ki zui-in gamdang tawh kizopna sumbei zah ki lamdang thei hi. Telephone nazat leh kizop man sumbei zahding munkhat leh mundangkhat kibanglo thei ahih manin koi ci ki lamdan hiam theih huai masa ding hi.
⦁ USA gamsung tuaktuak kithuzak/kizop hun ciang inn phone zathuai zaw hi. Gamdang tawh kizop ciangzong man tawmno tawh a kizuak phone cardte zathuai ki ci leuleu hi.
⦁ USA gam ah hand phone a kici ziauziau Mobile Handset te zatman tam mahmah thei a, Company te tawh thukimna laipi bawl tangtang kulding hi.
Zin le vaakna
⦁ Nasep nei in nisial a paikhia den te’n kalkhat sung a hihkeileh khakhat sung a kimangding bus, meileng tuantheina card te leiding kisampha mahmah hi.
⦁ Naupangte, saang naupang te leh khangham te leuleu pen aciah akuan na khem peuh ah discount omden lel hi.
Sumkhakna lam
USA gam a tung/teeng khat dinmun cih pen pianna gamlei ah a om innkuanpih khuapih tuipihte’n sum tampi na khakding lamen gige hi. Amasa penin na khamkhop ciang ding thupi hi. Nang le nang nadin zawh khit nungah na pianna gamlei, innkuanpih, sanggam meltheih te enkik zopan ding na hihlam phawk gige in. Zopzop lai ding …
A ngaihsut huai thu
Ka phuahsa late keima thukimna leh phalna omlo in lasa thei a kisa honkhat in hong thaang sak sak gawp in khui sung khawngah hong khumsak uh pen lungkimlo hi’ng. Hong kisimmawhna leh hong ki neubawlna in ngaihsun ingh. Ka la phuah “Meitei Guun” bang pen Dalpi in na sa a, Thein Khai in zong ama ut bangin a Music bawl tawm in na sa hi.
Malaysia Zomi Idol Ki Thang in zong kei phalna om lo in ka late khat a thulu laih in na sa hi. Ka hehna hai dimlet ta ahih manin mailam ah hi bangin ka la phuahsa te kei thukimna om masa lo in hong kisak sak lai leh mawk koih nawnlo ding hi’ng.
Ken pen Pasian thupha tawh tapa thum ka nei hi. Ka late pen ka tate go leh gamh ding hi. Mailam ah ei neihsa ahih kei naakleh midang neihsa cihna hi. Tua ahih manin ei neihsa ahilo na khat peuhpeuh ih zatnop ciangin a neite tawh kiho tangtang phot ni.
Lengtong Pauno
ZAM Palaai te buaipih diak teng
⦁ Huaikhek (Pyidawtha), June 1 ni-in Subang Specialist ah kibuaipih.
⦁ Ciin Sian Cing (Phaiza) June 3 ni-in Ampang zato ah ki vehthei.
⦁ Hau Khek (Mualpi) June 4 ni-in HKL ah ki buaipih.
⦁ Man Za Niang (Haupi), Lian Don Zam (Kapteel) leh Cing Za Dim (Thalmual) te June 5 ni-in Pudu Specialist ah ki buaipih.
Buaipih pawl khat hong ngetna bangin ki suaksaklo hi.
ZYA Kaamsinna laibu ki khon kikta
ZYA Kawlpi pan hong kizuak kaamsimna laibu a kemlai khempeuh in kikhak kik nuamta ahih manin June 12 ma in ZAM zumpi ah na khot zahzah uh nong ap kik na ding un kong zasak uh hi.
Na omna (address) a maanin pia in
Zato paina, zum khat peuhpeuh paina ah na omna hong kidot ciangin na omna mun address mah pia pah lel in. Na om ngeilohnapi na lawmte inn, kipawlna zum, biakinn cihte na piak leh nang adingin mailam ah buaihuai zaw ding hi.
Nang Card lo zatsawm kei in
Zota paina, nasepna, mat le hen khat peuhpeuh ah nang card zanglo a midang card na zatsak leh zum pan hong kibuai pih zolo ding hi. Tua ahih manin na paipaina ah na card puak ding mangngilh ngei ken.
Pianna gam ah simmawh bawlsiatna om hang a pai khia hi kei
Yangon, June 4: US kumpi in “Kawl kumpi in Lutuam kalate Kawlgam sunga gammite mah bangin hamphatna (Rights) ngahkim sak hen” acihna tawh kizuiin Kawlgam kumpi in Lutuam kalate hanga Southeast Asia sungah haksatna hong pian pen ko amau ka simmawhna hang uh hi khin lo hi. Mi muhna ah Kawlgam kumpi in Lutuamte a deidan man leh a manin a omna uh Rakhine State a nusia uh hi a cih uh pen thumaan hi lo hi. En mah dih un Lutuam kala gambel teng Kawlgammi hih na cih uh hang a tamzaw Bangladesh gam pan hi” ci hi.Kawl kumpi in kawlgam sunga Lutuam kalate 1.1 Million a phak zenzen uh hangin Kalgammi in ciamteh lo hi. Tua lakah 140,000 pen Budhists te tawh kisiatna hangin inn leh lo nei lo in om uh hi. Hih thu pen Kawl kumpi in a genna ah “Arakan state sungah mipi ki honthahna piang mah hi. Ahizongin tua pen Arakan State sunga om Budhist tawh amau kikaal thu hi. Tu in Bangladesh mi hong tam ta uh ahihman in ko a gammite ading panin lungmuan huai nawnlo hi. Asawt lo in ko sangin hong tamzaw ziau thei kha ding hi” a cihsan ziauna hangin Bangladesh palaipa Mohammad Sufiur Rahman lungkim lo in bangmah gen nuam nawn lo hi. Kawlgam panin thunei mahmah khat ahi Shwe mann in June 3 ni-in UN Secretary Ban Ki Moon tungah Media tungtawn in mikim sim theih dingin Open-letter laikhak in “Ko nong telkhialhna uh leh ka gamsung vuah tualgaal om den hi cih ngaihsut khialhna na neihte uh pen na khiam ta un” ci hi. (Irrawaddy)
ZAM pan dahpihna
Lailo khuami Pa Khual Za Kap leh Nu Gin Zen Cing te’ tapaTg. Do Ngaih Gin (Kum 34) Buansing beh, ZAM-15452, ZSM-1083pen 28.5.2015 ni-in nasepna mun pan inci nuam phalo kisa a Clinic a kilah leh Siavuanpa vel sungin gim zatzat in tawmvei no sungin anuntakna hong beizual a, haksatna te nusia in tawlngak na Topa Pasian ang sungah tawlnga dingin hong ciahsan ziau hi. Ama hang a adah akap Nu leh Pa, sanggam teng leh khuapih, Pawlpi te tawh kibangin ZAM zumpi panin ki dahpih mahmah hi. Sanggampa luanghawm pen 3.6.2015 ni in ZSM makaihna tawh Klang Meru Christian hanmual ah lungkimhuai takin kivui thei hi. Adah akap khempeuh tungah Topa hehnepna kicing hong tungta hen.
Buan khuami Pa Do Za Nang leh Nu Man Niang te’ tapaPa Gin Za Tual (Kum38) Sotebeh, ZAM-21801sawtpi nakhol lopi in 1.6.2015 nitak lamin a omna inn Jln Alor, lupna khansung panin nuntak haksatna gam nusia in tawlngakna Thangvan ah hong ciahsanta ahih manin ama hang aa adah akap Nu le Pa, sanggam te leh adiakin tano teng tawh kibangin ZAM zumpi in ih dahkhawm hi. Pa Tual ii luanghawm pen ZSM makaihna tawh 3.6.2015 ni in Sungai Buloh hanmual ah lungkim-huai takin kivui thei hi. Adah akap khempeuh tungah Topa’n hong hehnem ta hen.
3.6.2015 nizingsang tungin khat, nitak lamin khat hi a nikhat sungin luangnih kivui mawk hi hang. Malaysia Zomi te tangthu ah a khatveina ahi hi. Hi bangin ih ki huai zawhna dingin Zomi a it mipi tul tampi te in ZSM kipawlna ah kum khat ai RM20 tawh na lutna, na piakkhiatna, na kipawlna hang ahi hi. Na piakna leh na veina hangin Topa in nang leh na innkuanpih te hong damsak in khansauna thupha hong pia ciat hen.
Zomi Card tawite ading nasep
⦁ UNHCR-EST nasep zonsakna panin KL kiim teng moh bawlna leh ansai neuneu te sem UN ngahsa Mangpau leh Malay a thei mi 50 ki deih. Alunglut khempeuh in ZAM zumpi ah form hong fill up un. Nasep hun nai 8 sung. Kha khat ni 5 off. Kha sum RM900. An man ding kha khat teh na boss te un RM150 pia ding. Omna man kha khat RM50 kat ding. OT nai khat 1.5. Kumcin teh bonus om. ‘ 012 367 4665
Lungdamkohna
⦁ June 3 ni USA honglensan Pastor Pau San Lian te innkuan in ZAM panpihna RM50 hong hong pia khia ahih manin ki lungdam mahmah hi.
Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email: [email protected]
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website 
tungpan kongsuaksak zelzel uhhi.
Note :: PDF tawh na simnop leh
Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Comment piaknop aomleh...