USA, Georgia ah kum 4 aphapan Zomi naupangno Lun Thang (Lun Nuam) mawtaw in taihlum

USA, Georgia ah kum 4 aphapan Zomi naupangno Lun Thang (Lun Nuam) mawtaw in taihlum

USA, Georgia State sungah naupangno kum 4 aphapan khat mawtaw in Wednesday zingsanglam in taihlum cih Fox News pan kiza hi. Tua naupangno ii aminpen Lun Thang kici hi.

Georgia, DeKalb County sung aom Clarkston City ah thupiang hi a, ataihkha mawtaw pen taisuak kicihi. Indian Creek Elementary School ii alanglam aom North Indian Creek Drive, 700 Block ah mawtaw khatin ataihlum ahihi.

DeKalb Police te genkhiatna ah Lun Thang pen Indian Creek Elementary School ah sang akah hi a, Pre-K Student khat cihi.

Lun Thang ii innkuanpih te genkhiatna ah Lun Thang ii meltheih “Aunt” khatin Lun Thang leh asanggam kum 6 khat sanginn ah akhading in apaipih cihi.

Wednesday zingsanglam 6:45am hunpawl in Crosswalk ah lamzikpi akanlaitak mawtaw khatin Lun Thang pen ataihkha ahihi. Police te genna ah mawtaw in ataihkhak ciangin Lun Thang pen huihlak ah kilonto in, akiatsuk ciangin mawtawdang khattawh kinawkkha leuleu cihi.

Tuaciang in Lun Thang pen amanlang in Hospital ah kipuakpah a, Critical Condition cihi.

Lun Thang ii apa Zam Thang in agenkhiatna ah katanu pen mawtaw in anawkkhak ciangin kilawnkhia a, Pi 100 bang kilawnding hi ci’n genkhia hi.

Apa Zam Thang in agenbehna ah atanu Lun Thang pen asanggamnu tawh khutkilensa in Crosswalk panin lamzikpi akantan uh cihi. Tualaitak in Northbound lamzuan in apai Sedan mawtaw khatin Lun Thang taihkha in, huihlak ah kilawnto a, akiatsuk ciangin Yellow PT Cruiser tungah tusuk cihi.

Police te genkhiatna ah tua ataihkha mawtaw pen Lun Thang ataihkhak khitciangin amawtaw Control theilo in, tawmvei khawlpak cihi. Tuakhit ciangin tuaphual panin amawtaw hattak in taikhiasak vingveng hi. Mawtaw Driver papen ataihkhak naupangno zong a ending in kumkhialo in, ataisuak cihi.

Ataihkha mawtaw pen Dark Color, Sedan Model aluite khat kici a, Toyota ahih keileh Honda khat hitheiding kici hi. Mawtaw pen amailam zong siatheiding a, amai Headlight zong kitamding kici hi.

Lun Thang pen amanlang in Medics te’n Egleston aom Children’s Healthcare of Atlanta ah puakpah uh himahleh, tuapan in anuntakna beiziau hi.

Christ Mission Church panin Deacon Pau Kap in agenkhiatna ah hih Lun Thang te innkuan pen innkuansung nop asak mahmahding laitak uh hi a, ahi zongin tuzingsang thakhatthu in hihthu hongpiang hi. Anu pen kapthapai ahih manin, hihte innkuan adingin thungetsak kisam mahmah hi ci’n genkhia hi.

Related: US, Iowa State ah Pa Stephen Pau Suan Kim (Tonzang, Naulak) thautawh kikaplum

Police te’n hih mawtaw Driver papen amanlang in amathu in hongki ap nadingin tangkokhia uhhi. Khuasung mipi amukha te’nzong amanlang in DeKalb County Police Department ah hong zasak un ci’n genkhia uhhi. Dahpihna lianpi tawh, Sawltak #zomidaily

Update:
Hongnusia Lun Thang akici pen Fox News te ii suahsak dandan in hongki gelhkhia hi a, Zomi te theihna ah amin taktakpen Lun Nuam kici hi. Amahpen Tungzang khuami, USA, Georgia, Atlanta ateeng Pa Zam Go Tuang leh Nu Cing Saan Niang te tanu nihna ahihi.