ZAM Thupuak :: 06 March 2016

Mental Health and Psychosocial Support (MHPSS) Meeting ki neikik :: UNHCR makaihna tawh 03 March 2016 ni in UNHCR Meeting Hall ah a (4) veina “MHPSS Working Group Meeting” ki neikik thei a, ZAM paninzong Palaai te nih ki helthei hi. Hih atom in MHPSS akici “Mental Health and Psychosocial Support” pen Malaysia gamsung aom gambeel galtai Refugee leh Asylum Seeker te lakah ngaihsutna kicinglo leh khuaklam ahat mello te panpihding in aki pankhia ahihi. Tuaban ah Detention, Shelter, Training cihbang in Sub-group in ki helsuk a, thongkia te vai, damlo belhding neilo te vai leh bangci bangin panpihding cih Training piakzia ding kikupna te ki nei hi.

MHPSS Steering Committee Members sungah ACTS, HEI, ICMC, MERCY Malaysia, Taylor’s University School of Medicine, Tzu Chi, UNHCR leh ZAM (Zomi Association of Malaysia ) akihel hi a, Kawlgam pan galtai kipawlna tampi aitang in ZAM hongkoih uh ahihi.

Hih Meeting akineih simin ACTS, HEI, ICMC, Mercy Malaysia, Tzu Chi, ICRC leh UNHCR zumpi pan IOM, OPI, CDU, IAD Officer te hongki helzel uhhi.

Tutung Meeting sungah thongsung aom damlo te vai ki limkup phadiak hi. ACTS panin Ms Janet in nungdiak in Detention Center apaina pan atuahkhak thute leh thongsung ah damlo te kikepzia hong pulak hi.

UNHCR (Health) pan inzong Dr. Susheela in hih Detention te ah gamdang mite kikepzia adiklo te kumpi thunei te tung pulakding geelna te hong genkhia hi. Tuaban ah Penang lam ahzong gambeel mite kumpi zato akah uhciang sum tampibei in hamsatna tampi phukha cihte hong pulak a, amah ngiat maikalsung in Penang ah vazinding a, zato tetawh ki kupkhopna vaneiding uhhi. Adiakdiak in nausuakding te asumbei hong khiapsak nading uh, Discount hong piaktheih nading in va vansak dinghi.

Insurance vai Update:

Insurance vai tawh kisai abeisa in akizang ahi Tune Insurance tepen lemnawnlo ahih manin, adang Insurance Company aki zongkik hi a, April khasung in Insurance aleinailo te in ki leikik theikha tading cih zong Dr. Susheela in hong zasak hi.

UN panin zato vaitawh kisai sumbei bangmah huhna aom nawnloh banah zato kahman sumbei tezong tamsemsem ahih manin, Insurance pen aki leitheih nakleh leitektek ding thupi mahmah dinghi. Ei Kawlgam mi atamzaw in azatding ciangbek in ki leisawm panpan a, tuapen ziakai luathei hi.

Insurance vai tawh kisai Kawlgam mite’n atelbaihzawk nadingin Video Clip khatzong UN panin abawl uh hi a, asawtlo in mansiang tading hi. Ih pawlpi sungah, ih khuapih sungah, ih meltheih sungah Insurance ii athupit zia leh akisapzia hoihtak in ih genpih ciatding thupi mahmah dinghi. Insurance neilo in zato ah buaina khat tuakleng abuaiding eitengmah hihang cihtawh ihki hanthotding kongcial sawnsawn uhhi.

Qualitas Medical Group:

Malaysia gamsung ah kumpi zato te zato kahman akhan semsemna tawh kizui in UN zumpi lampan inzong atuamtuam hong ngaihsutsak uh hi a, tulaitak Qualitas Medical Group tetawh kizoptheih nading ahanciam mahmah laitak uh ahihlam Dr. Susheela in hong genkhia hi. Hih Qualitas Medical Group te’n Malaysia gamsung vengtampitak ah Clinic neikawikawi uh a, UN tetawh hongki thukimtheih uhleh sunkal zankal Clinic paipaktheih nading in tampitak nuamtuam dinghi.

HEI ah Mental Health Training om ding:

Kum sialin Health Equity Initiative (HEI) te makaihna tawh a kinei den Mental Health Training Course pen tukum 2016 ading in asawt lo in kipan ta ding hi. HEI pen Malaysia Kuala Lumpur bulphuh in 2007 kum in a kipankhia NGO khat hi in, gambel (refugee & asylum Seeker) te leh a kinengniam mite (marginalised group) panpih in cidamna ding kibawl kidonnate ah deidan om lo in ngah theihna ding asem phadiakte ahi uh hi. Training hun pen kha 8 sung peuhmah sawt ding a, nipi kaalkhat in khatvei ta (a tamzaw Saturday) hi ding hi. Training kah zah a tawmpen 80% a ngahte bek Certificate pahtawina kipia theid ing hi.

HEI pen lungkham sinkhamna leh deidanna, nenniamna tuamtuam tawh kidim Malaysia gambelte nuntak khuasakzia hong telpih mahmah kipawlna khat zong a hihi. Hih lungkhamna te koici kantan zawh ding, kipawl khopna bulphuh in koici thalak ding, lungsim pumpi leh kha cidamna a khan theihna ding leh damlohna a om lohna dingin kikoici dal kholh ding cihte hong sinsak ding uh hi. Tua tham lo in a theih huai thumanpha tampite mipil misaim ten hong hilh in hong sinsak ziahziah ding uh hi. Mangpau thei lo cih kuitung sak kei inla, sinnopna lungsim leh mite ading thupha bawl nopna lungsim na neih naak leh kah sawm hamtang in. Kisik lo ding hiteh. Kamphen zong om den dinga, na lamsaap leh na anman ding zong hong guan lai ding uh hi. Lunghei lo takin na lunggulh zahzah dong thei, kan thei in sin theihna ding hunhoih akihon laitak ahihi. A lunglut ten min piak theih ni a nawnung pen 21 March 2016 (Monday) ahihi.ZAM zumah zong kipia thei hi.

Mimang pawlkhat hong kanpih un:

1). Thang Sian Muang, a khualui Thangzang hi in, a omna Sakollam Tedim hi. Tuiphum pawlpi mi ahihi. Apa min Langh Do Dal, anu min Ciin Suan Cing hi. Malaysia Balakong a nasem hi in, October 2014 a kipan a thu ala kiza nawn lo hi. A omna a thei ih om zenzen leh a nuaia

Phone number te tawh hong zasak un: Ban Kim 018 9878 298, Sia Zam Do Nang 011 2614 3885.

2). Sawng Deih Suan pen kum 15 pha pan hi in, 10 October 2015 ni akipan a omna kithei nawnlo in mangcip suak hi. Apa min Lang Khen Cin hi in, atheikha ih omleh ZAM zum ah hong zasak un.

3). Mang Lam Sing (354-13C04593) kum 15 bek mah a pha pan zong a omna kitheilo, mangthang cip hi. Polio natna zong anei hi a, abil zong khua zacian mello khat ci uhhi. Atheikha ih omleh ZAM zumah hong zasak un.

4). ZK Ngo Khan Khup, a khua Nguasing hi in, a nulehpa pen Nang Kap leh Nian Ngaih Ciang hi. December 2014 kum akipan a mang hi in a mu kha ih om lehPh. Number 011 123 00186, 011 122 80386 ah zasak pah ni.

5). Nang Ngaih Mang, a khua Suangzaang hi in, a nulehpa pen Zam Za Sei leh Man Khan Dim hi. 2015 kum sunga mang hi. A mu kha ih om leh leh Ph. Number 011 123 00186, 011 122 80386 ah zasak pah ni.

Sia Kam Mung tungah lungdam kohna:

2012 kum pan Zomi kipawlna sungah nasep kipan in Zomi Genvai “Zomi Social-welfare of Malaysia “ZSM” ah mipi teelna tawh President mun len hi. 2013 kum ZAM palai kiteelna pan mipi teelna tawh ZAM Vice President mun len kawm in USA gam apai ni ciang ZSM lutangpi mun tawh thuah khawmin Zomi sungah itna, veina, lainatna tawh asun azan cilo in lungsim, pumpi, hun leh theihna khempeuh sitlo in nasem a, asep sungin Thong inn leh Detention campte ah pai kawikawi hi. Thong inn sung tung Zomi te delh in vaan hi.

Malaysia gam State tuamtuam a om Zomi akiman te vanin pai kawikawi a, damlo te huh in zato leh Clinicte ah paipih a, damlo pawl khat te in UN minsan na a ngah theihna dingin vaihawm pih aa, damlo pawlkhat te UN minsanna ngah pih hi. Zomi te luang phamna ahi Zomi Social welfare of Malaysia “ZSM” ah lutangpi asep sung January 2012- February 2016 sungin naseppih lawm leh gual tawh kithuhual in hangsan takin nasem a, Malaysia gam sunga tuahsia Zomi (151) te luang phaam in han tang sak zo hi.

A innkuanpihnu tawh pang khawmin cimawh dongtuak Zomi te kem in khoi uh a, mi phattuamna ding nahoih tampi sem uh ahihman in Zomi tampite adingin thupha naak khat suak uh hi cilehang zong kikhial het lo ding hi. Sia Kammung pen thugen siam mahmah hi. Kam zong siam hi. Amel a tha zong cingh in a zahtaak huai mi khat ahihi. A kipiak khiatna leh minam a ding nahoih a sepna khempeuh ZAM zumpi in ciamteh a, mipi lungsim sungah cikmah hunin mang ngei lo ding hi. A tuntunna ah a nungta Pasian in thupha pia in ompih tawntung ta hen.

RSC & DHS pan contact ki ngahlo:

Anuai a Contact ngahlo nambat sungah na nambat a kihel khak a leh ZAM zumpi ah hong pai in. Contact ngah kik theihna dingin hong ki huhnuam hi.

Insurance Card abawlsa te:

2015 kum November & December sungin ZAM pan Insurance abawlsa te ading Card thak hong tung ta hi. Man Za Niang leh Tel Khan Dim pen kum cing khin uh ahihman un Insuarnance Card ki ngahsak nawn lo uh hi. Insuarance zat hun ding theih kholh hilo ahihman in na Card nong kan mengmeng ding uh hong zasak ungh.

Palaai Prayer Meeting:

ZAM Palaai te’n khakhat in khatvei Malaysia gamsung aom Pawlpikem Pastor te ki samden a, thu ngetkhopna ki neiden hi. Tukha March kha Palai Prayer Meeting pen 04 March (Friday) ni in Adonai Christian Fellowship pawlpikem Rev. Zam Tuang in hong makaih thei a, tha ki ngah mahmah hi.

Zomi Nam Ni DVD ki leithei ta:

Zomi Nam Ni a Video kizaih teng DVD khat in kibawl a, tun lei theih hi ta hi. ZAM zumah khui khat ciang RM10 in a deih ten hong la un. Tutung ZND khui pen mipi lam kilimzaih mahmah hi. Nang zong kihel ngelngel ding hi teh!

 Note :: PDF tawh na simnop leh

Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.