ZAM Thupuak :: 05 Jan 20 (UN Appointment kila thei)

ZAM Thupuak :: 05 Jan 20 (UN Appointment kila thei)

LAWHCIN NADING THUKHUNKIP TE: 1. Kamphatna (Accidental gap) : Kamphat leh lawhcing ning na cih leh na lawhcingzokei ding hi. Ka gelkholh dan in hong pian leh lawhcing ding hi ingh ci in. Lawhcin ding gelkholhsa in na neih ding hia, kaamphathun na ngak ding hilo hi.

Ki ginkholhna + lungsimpuakzia man + hunhoih + sepkhiatna=kamphatna. Hibang dan in lawhcin na hong pai ding hi.

2. Kicinna (Perfection gap) : Na khualzinna lamtawp dong na mukholnuam kha ding hi. Ahizongin nuntakna sungah tuabang kicinna kingah lo hi.

Na paipai phot dinga, na pai kawmkawm mah in na muh nailoh na lampi ding a mu toto ding na hi zaw hi. Na muh theih siat ciangin pai ning na cih leh cikmahhun in lawhcinna na ngah kei ding hi.

3. Khialhna (Mistake gap) : Sang i kah lai in khialhna a omlo dingin hong kipantah hi. Khialhna i bawlleh dan hong kipia den hi. Hih pen i nuntakna sungah i puasuak hi.

A taktak in: Na lawhcin nop leh khialhna na bawl khak ding lau ngaihsut kei in. Khialhna tam na bawl leh na tampi a sem zaw na hi pah hi. Na tampi sem lecin pilna tampi a ngah na hi hi.

4. Paizia (Timing gap) : Lawhcinna na ngah nop leh sepzia ngeina cih bang omlo hi. A lawhcing mite sepzia ettehpha in. Khat veivei ciangin ngeina sepzia sungah lawhcinna omlo hi. A hunzui in nasep zia ngeinate na laih tohtoh ding thupi hi.

5. Lawpna (Inspiration gap) : A lawhcing mite a lawp mahmah te cih hi tuanlo hi. Ka thangah mahmah ciang, ka lawp mahmah ciang nasep kipan ning na cih leh na lawhcing zokei ding hi.

A lawhcing dingte in a nasepna sungah lawpna leh thangahna a piangsak uh hi zaw hi. Sem masa inla tua ciang in lawhna leh thangahna neihbehbeh sawm zaw in.

6. Lametna (Expectation gap) : Na khat peuhpeuh na sep ciangin na lametbangin hong pianglo tampi om ding hi. A lawhcinglo dingte in “ka lametna tawh kituak kei lua, sem nawn kei ning” ci uh hi.

Lametna tawh a kituaklo in nate hong piang lua ding hi aa, tuate tungah lungkiatna na neih leh a lawhcinglo ding na hipah hi. Na lametna bangin hong pianloh hangin semzomsuak in. Na lametna bangin a pianna dingin a hanciamding nang mah na hi hi.

7. Pilna (Knowledge gap) : Midangte lawhcing napi nang na lawhcin theih kei leh a kisam khat om hi. Tua pen pilna ahi hi. Sumlepai vai ah, innkuan sungah, makaihna ah, lawmlegual lak ah, nasepna ah pilna kisam hi.

Thuhilhna munte ah pai inla laibu te zong sim in. Na pilna khanlecin na lawhcinna lampi hong tangzai zawpah limlim ding hi.

8. Upmawhna (Assumption gap) : I neulai in i guhletang leh i pumpi vante a ma thuthu in hong khang hi. I sep theihna hong khangin i pumpi phakcia zong hong khang hi. I liatkhit ciangin tua bangin kikhang nawnlo hi.

Mipawlkhat in lawhcinna zong a hunzui in ama kaingah a pai ding bangin ummawh mawkmawk uh hi. Lawhcinna kimawkngahlo a, hanciam ding kisam hi cih phawk tawntung ding ahi hi.

9. Ki tehkakna (Comparison gap) : Lawhcinlohna khat peuh i tuak ciangin midangte en in i lungneu thei hi. Tua pen a kikhial mahmah kitehkakna ahi hi.

Midangte a mau lampi tungah a pai uh hi lel a, nang zong na maban a om na hihi. Nangsang a pilzaw, ahauzaw, melhoihzaw, a lawhcingzaw te tawh kitehkak in ki lungneusak kei in. Tuate bangin na pian nading hanciamzaw in.

10. Lungsim puakzia (Mindset gap) : Dotna thupi na neih leh hong kidawnna zong thupi ding hi. Mi pawlkhat in “hih lampi tungah ka hun bang tan bei ding hiam” ci uh hi. Ngaklahna leh phunna kam ahi hi.

A lawhcing ding te’n hih lampi tawh bangtan gamla zo ding ka hihiam? ci pah uh hi. Mikim sungah launa leh ki uplohna a om mah hi a, a lawhcinglo te in tua launa ki uk sak hi.

A lawhcingte in tua launa tungah ukna nei uh a, umphalo pipi, lau pian sim pipi in sem khia ekhekh uh ahih manin midangte ngahloh lawhcinna lianpi te ngah uh hi. (Siamsin Library) Ref: Zomi Dialy pan kila kik hi.

UN AH APPOINTMENT KILA THEI

UNHCR zum ah mithak san na a lunggulh te in online pan in appointment kigen thei hi. Hih pen ei mimal tek in I om na mun pan in lak theih ding in hong gelsak uh hi a, ahi zongin ei leh ei lak ding lem a salo te in I kipawlna ahih manin a thusaupi ding tawh gel khol ding kisam hi.

Tua ban ah hih appointment ngetna ah I zat Phone No. te pen khel thimthum loin hoih tak I zat ding kisam hi. Ei Zomite sungah phone No. a nawh khel mahmah om a, tua bangin I khel leh UN pan appointment hong pia in hong sap ciang contact ngahloin om leng mi dang supna hilo in ei mahmah I supna pi suak ding hi. Tua ahih manin zum ah I piak sa contact No. te it in kemcing ding zong thupi hi. Hih online pan appointme -nt lakna ei leh ei a la nuamtein ; http://www.refugee-malaysia.org ci-in Google ah at leng hong suak pah ding hi.

Innkuan lutpih nuam a ngah thei nailo te zong online pan in appointment kila thei hi. Ei leh ei a hih thei lote in zong kipawlna zumte pan zong nisim in kihih sak den hi.

2020 ZSM LAIBU KINGAH TA HI

Malaysia zomi Genvai Kipawlna (ZSM) 2020 ading ki lutthei ta a, ZSM laibu te zong kila thei ta hi. ZSM lut man mi khat ciang kum khat ai RM 20 hi a, hih na lutna hang tawh ahamsa a dong tuak I mipihte a panpih, a dah akap hun ah a khitui anulsak na hi gige

hi. Hih ZSM ah member na lut na in nang a ding a pia na hikei a, panpihna akisamte a panpihna hizaw hi. A kisam khat I panpih na in Pasian deihna zong ahi hi. 2019 sungin zong tu ciangciang Zomi pih te luang (29) bang lei ah I tuh theihna in nang leh kei I pankhopna ahih bang mahin mailam ah zong mapang khawm lai dingin zong kong zawn phapha uhhi.

ZSM ADING PANPIHNA HONG PIA TE

• 1. MBF Pawlpi RM300
• 2. Taaklam Khua Kipawlna RM200

ZOMI CUP OM DING

Kumsim I neih ngei mah bangin Zomi Nam Ni muakna in I neih ZOMI CUP zong nasiatak mah in kibawl ding hi. Zomi Cup 2020 lutman pen team khat ciangin RM 1000 hidinga, Deposit RM 400 mah hiding hi. Champion a ngahte RM2500 + Cup + Medal, First Runner Up a ngah te RM1500 + Medal le Second Runner Up a ngahte RM1000 + Medal hiding hi. Ki mawl ding ni pen January 24-28, 2020 (Sen kumthak sung)sung hi ding hi. Ki mawl ding hun leh a mun te a hun zui in hong kizasak toto lai ding hi. Hih Zomi Cup ah Khua Kipawlna min bek tawh kilut thei ding a, pawlpi leh min dang tuam tuam tawh kilut thei lo ding hi.

Zomi Cup a lut nuam te anuai a phone No. te ah min sazian kipia thei ding hi. Sia Khuppi 016 383 8014, Sia Tuang Pu 016 254 4093

Team min sazian piak nunung ni ding pen January 13, 2020 ni hi ding a, tua ni mah in Team Leader meeting leh Group khenna kinei pah ding hi. A lut ding khempeuh in aman langin sazian nong piak na ding uh zong I kiza sak phapha hi.

PILVANG TAK IN OM SAWM NI

Tuhun laitakin kimat kihen hong tam mahmah a, Malaysia kumpite in a gam sungah phalnalo tawh om mi tampi tak siangsak nuam ahih manin kimat kihenna hong tam to semsem ding hi ci gen khia khin uh hi. Mun tampi ah Oparasi lut kawi kawi ahih manin I omna ciat ah kidawm tak, pilvang tak in om ding hanciam ni. A thukin lua mahmah ahih kei leh vakvak kei zaw ni.

A diakdiakin Immigration te leh CID te uniform silh loin vakvak uh a, tua tungtawn in pawl khat in sum zon na in hong nei beh lai uh a, hong pang kawikawi in tampi pi tawh hong kitan sak uh hi. I vak suk vaktohna ah kiim leh pam zong hoih takin I et theih ding hong thupi mah mah hi. I omna veng kim veng pam ah zong gam tat zia om zia te hoih tak kidawm ciat ni. Mite mitdong ding leh midangte a nawngkaisak lo dingin kidawm ciat ni. Kimat kihen bek hiloin migilo zong tam ahih manin I kim I pam om zia hoihtak telpha in gamta ciat ni. Na sepna ah thunei te in sitna khat hong neih leh kei pen UNHCR ah gambel in hong san ding ngak in a om hi ing/UNHCR card tawi gambelmi ka hihi. Ka nuntak nading hih teng ah part time tawh na a sem pak hi ing ci-in I gen theih ding thupi ding hi. Malaysia om Zomipih a kuamaciat I omna gam huihnun zia tawh kizui in kidawm ciatni cih hong zasak phapha ung. A zenzen in kimat kihenna khat natuak leh ZAM zum ah hong zasak pah in. Nang ading in a ready sa in om den uh hi.

WELCOME TO ZAM

Kawlgam, Vaigam, tuipigal leh gam tuamtuam pan Zomitampi omna Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah hong hawh/phak hamtang in thapiakna leh idea tuam tuam piakna nong neih nadingun kong zawn phapha uh hi.

DAHPIHNA PULAKNA

Pa Khen Sing zi, Dimlo Khuami Nu Cing Sian Huai leh atapa tegel Tg.Thang Sian Sang (Kum-4), Tg. Pau Khan Lian (Kum-2) a omna uh Balakong vengpan Kumthakni zingsang nai 8:00AM hun pawlin mawtaw in taihkha in i biak Pa Pasian kiangah hong ciahsan uh hi. Hih I sangam te I luanghawm pen innkuanpih te lunggulh na tawh kizui-in kawlgam ah kipuak ding a, a vaite a hun zui in hong kiza sak toto lai ding hi. A vaiteng ZAM/ZSM pan in abuai pih laitak a hihi. Hong nusia I sanggam te tawh Malaysia ah hun nunung bawl na ding a mun leh a hun hong kizasak kik ding hi.

Adah akap khempeuh Topa Khasiangtho in hong heh nem tahen.

Mailam ah Zomite sungah hibangin mulkim huaina te tawh kipelh theih nadingin zong nakpi takin thungen khawm lai ni.

ZATO LAM TAWH KISAI

Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

TUKAL SUNG THONG LAM BUAIPIH

1. Cin Suan Dal (Tongsial) Bukit Jalil Camp ah kimuh pih

KIMAT KIHEN NA TUAK LEH

Zomite kimat kihen natuak zenzen uh leh hih phone no. te ah na hopih pah in. Nang adingin atawn tungin kiging sa in om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

ZOMI TE ADING NASEP

Malaysia gam sung om Zomite nasepneilo in nasem nuam mahmah napi nasep zon nang a lemlote in ZAM zum ah hong dawp un. Zomite ading man ngenloin na sep kizon sak den hi.

Contact – Sia Mamang – 018 231 1365

ZAM ZUM AH KILEI THEI

ZAM zumpi ah I ngeina van tuamtuam ahi Zopuan Design tuamtuam, Zoniik Design tuamtuam, Puanten, Puandum, Zodial(Silk), Puanlaisan, Zokhi, Tanghciin, Khephiau, Zolukhu, Zothungkuah, Zodial cihte akipan naupang puan tuamtuam te deih zahzah kilei thei hi. Tua bek loin khui tuamtuam leh anuai a laibu te zong kilei thei hi.

• 1. English to Zomi Dictionary RM50
• 2. Kawllai Laisiangtho RM30
• 3. Galhiam Labu RM30
• 4. Zolai Simbu RM30
• 5. Gual Tawh Tan Bang Kim RM25
• 6. Kristian Labu RM30
• 7. Nisim Tongdam RM30

ZAM ZUM HON HUN 9:00AM-6:00PM sung nisim kihong den hi.