ZAM Kiphuhni pan-in ~ Zokhai

ZAM Kiphuhni pan-in ~ Zokhai

Ngaih Zomi Sanggamte, Tusung hunzong ngah-kisa, lungsim-ah Zomi Kipawlna alungluut mite’ ading theihhuai ding-a seh kahihman-in khualumlela thuakkeeikaai- in honggelh-ing, banghanghiam cihleh tuni Melbourne Suahlam-ah khualumna Digri 41 hi-euau-hi.

Amasapen-in Zomi thukhual leh apiicing upa pawlkhatte-in Malaysia Zomi Kipawlna-pen mimal’a hilo thamlo-in minam kipawlna bulpite’ lak-ah khatbang-in hong saansak man-uh’n naakpi-in ZAM makaaite’ ading lawp-huai, thangahhuai leh angtanhuai sa mahmah-ing.

Piicing upa-pawlkhatte’ hong saansakna akipna ding-in ZAM kiphuhzia aneng atawng-in kong suutto dinghi, banghanghiam cihleh ZAM mintawh nasepna tawhkisai thugen lasakding omleh akiseh theiding mi 5 lak-ah khat kahikei zong-in 10 lak-ah khat ka-hihding ki-lamen kahihman ahihi.

Hihbang kongsuut ciang-in thuhoih deihna hi-a, ZAM akiphuhzia akitel nading, makaaite-in bangcibang-a naseemkhin, makaaite-in bangcibang-a maa-nawtding, bangcileh Zomi minamsung-ah noptuamna piangtheiding, makaaite’ kipiakkhiatna leh ahaanciamna- uh bangcibang-a mipi-lam pan-in tawsawn theiding cihte lametna-tawh kongsuut ahihi.

ZAM Akiphuhciilni:

Konggelh ngeisa mahbang-in Malaysia-ah Zomi dongtuak naakpi-in tam-a, gamdang gamnuam-a Zomite (minam-it mite) inzong hongza, hongthei, hongveipih uhhi. Tuate’ lak-ah USA pan-in Pa. Thang Khen Pau (Kawlgam ciahding hi-in Malaysia-a Zomi upate-tawh thukupna neinuam ahihman-in. Mi pawlkhat-in “Innciahding hongbaang maimai-peuh” hongcihsak hang-in innciahding hi-in vaaikuanding hitaleh minam veina-tawh Malaysia hongbaang midangte-in kipawlna upate khawm ngeilo ahihnazong phawkdinghi) hongpai-a, ZCF makaaipite U Maang Bawi, Pa Kim te-tawh nakimu uhhi.

Zomi minam upate-tawh kimuhkhopna aneihnopthu agenciang-in U Maang Bawi te mah-in ZNC (LA), Zomi Innkuan, Tonzaanglawmm, MZO, Liimkhai kipawlna cihbang-a kipawlna tuamtuam pan-in upate hong zasak uh-a, June 7, 2006 Nitaak nai 7 hun-in anuai-ateng- in Pa Langh Suan Cin’ Niangtuisai, KL-ah kihokhawmna kinei-hi.

1. Pa Thang Khen Pau (USA)
2. Pa Neng Hau Kim (President of ZNC. LA)
3. Pa Khawm Khen Maang (ZCF)
4. Pa Zaam Cin Daal (ZNC)
5. Zokhai
6. Langh Suan Cin (ZNC)
7. Suan Ngaih Thang
8. Langh Khan Thawng
9. Dongh Za Khai
10. Jacob Mungpi
11. Henrry Thang Khang (Zomi Innkuan upapipa, tu-in NZ-ah)
12. Thawng Lam Tung
13. Thomas Suan Khan Kaap (Cikhakual Kipawlna)
14. Nang Do Pau
15. Zaam Cin Khual
16. Pum Khan Daal
17. Maang Suan Pau (Pa Kim’ zom-a ZAM Lutangpipa)
18. Zaam Suan Piang
19. En Suan Khai
20. Nang Gin Mung (TL Mungbawi)
21. Thanwg Sian Pau
22. Thang Khan Maang
23. Thang Hen Khup
24. Thawng Khan Khai
25. Khai Sawm Dal
26. Nang Zawh Vuum
27. Gin Khan Hau
28. Pau Kaap Thang
29. Neng Lian Maang
30. Pau Khawl Lian
31. Mung Than Tuang
32. Pau Khan Kim
33. Pa Thang Lian Tuang (ZAM LungtangHuhpipa)
34. Nu En Khan Nuam
35. Don Sian Taang
36. Maan Saan Cing
37. Nang Za Thang
38. Pau Khan Kham
39. Muangpu
40. Nang Suan Mung
41. Thang Lam Tuang
42. Thang Cin Khai
43. Cin Lam Mung
44. Zaam Lian Pau
45. Nang Khan Zaam
46. Neng Thawn Thang
47. Pau Khan Suan
48. Cin Pum Pau
49. Thawn Khan Thang
50. Ciin Khan Dim
51. Zaam Lem Thang
52. Lian Suan Thang
53. Pau Muan Suum
54. Thang Lian Khup (Khuupsan)
55. Robert Khen Pian Suum (New Zealand Zomi Innkuan Advisor)
56. Thang Khan Tun
57. Kaap Mung (Enpi) (tu-in NZ-ah)
58. Maang Sawm Lian
59. Nang Thawn Mang
60. Thawng Cin Zaam (Bukit Tinggi ZCF Makaaipipa)
61. Hau Muan Lian
62. Vung Deih Kim (tu-in Sweden-ah)

Tuahun-in amau’ represent’ na-pawlpi theikimlo kahihman-in no nakantawm unla, tuhunlian-in amau’ omnazong theikimlo sawnsawn kahihman-in hongtelsiam- un.

Hih Zomi sanggamteng- in amau’ hoihsak ciatciat sungkhia uh-a, Zomi minam kipawlna khatpeuhmah phuhding hoihsa ciat-uhhi, tuate’ lak-ah Pa Khupsan-in kisam asaklohna gen-a ahizong-in (vote 57 for & 1 against, 2 neutral, 2 minor- kumcinglo) tawh Zomi Kipawlna bawlding kipsakna kinei-hi (Thuciamteh, Zokhai)

Hih thukhensatna tawhkizuui-in mi 7 kiteelkhia-in Donghu Upa ding-in kisehhi. Tuate’ vaaihawmna-tawh June 30, 2006 ni-in kimuhkhopna masa mah-ah upa-thukupna nei uh-a, Pawlpi minvawhna leh panmun sehna nei-thei uhhi.

Ngiimna bulpi:

Malaysia-a dongtuak Zomi sanggamte ahitheizah-a huhding
Minam kician I-hihna namdangte’ lak-ah kilanghsakding
Gaaltaai-bukna Phualpi-ah Minam Kipawlna mintawh phu-ding
Suahtaakna gam-a akiphut pawlpite bang-in ahihkeilh political party tebang-in Thukhunpi cihte-pawl khauhtak-in kikhung lohi, banghanghiam cihelh Makaai seemding ahizong-in Khawk Thuvaan seemding ahizong-in zotzot, nepnep akisamngiat ahihman-in hih atung-a thukimna sung-a akihel khatlehnih nangawn anualam meeting te-ah khatveizong kihel nawnlo phialmah lehzong pawlpi pan-in phiat, lakhia cihtepawl kibawl ngeilo-hi. Ahizong-in thukimna hunmasa-a kihel gige-a, ZAM makaaite naakpi-a hong siatgen mite amimal-in sam-in kigencianna- hiam, theihngawhsakna- hiam khatpeuhpeuh kibawl zeel-hi.

ZAM nasepna 2006 – 2007

Zomi dongtuak taktakte’ belhtheih ding-in Innpi-khat kisaap-a, tualaai-ah cina, liamlehbaaite kikhoi-a, ahizong-in aciillam-in zatuizaha leh zatosaapte kisikzo lo-hi.

Liamlehbaai leh natnalian (UN Registraltion ngahkhomdingte) ahitheizah-in UNHCR kizotih-a, natna, liamnabaaina leh nausuahna-tawh Registralion angahzong Zomi sungpan tampi om-a, oltak-a angahpak hetlozong tampi-mah omhi.

Tuaciang-in Malaysia Zomi pawlkhatte’ theihkhaakloh khat: zukham-a liamma angah pawlkhat zatopi kipaipih-a (misuamte’ suam bang-in kigenpih himahleh) zato-ah Alcohol Concentration tehna nei-khiinkhian ahihman-in UN uliante ciahkiik ziauziau-a, tua-pen zukhampa-in theilo ahihman-in nawngkaai theizeel-hi.

HIV aneite leh TB aneite ahihleh haksalo-in angah ziauziauvive hi-a, ahihang-in sanggamnu khat bangpen sawtpimah hong-uai veve uh-a, hong muangmawh mandekphial ciang-in ngahpanhi.

Adang natna-ah nattun (malaria) bangpen lungtangbuuknat nattun (dengi) natna-tawh akigawm keileh UN-in registration pialo-hi. Dengi-tawh Zomi hoihkhomkhat- in UN registration ngah uh-a, UN ngahkhit ciang-a dengi-tawh asidektak-a abuaizong omzeel-hi. Sanggampa-khat UN ngahsa hi-a, dengi anatpen University Hospital-ah nakilak ahihman-in tualaai-ah damnading kibawl lo-in anatna (Research) bawl hiit-hiat ahihman-in sidektak-a, Zomi Innpi hongtun ciang-in General Hospital-ah kipaipih pahhi. Tuabangdaan nihlehthum om-a,zato siampite-in “zekaai-lua, banghang-in hitanvei koih” ci-in sumngahloh hapgawpna kituak zeelhi.

ZAM akidin hun-in UNHCR te-in Registration apiak-uh akhawl laaitak-hun ahihman-in Zomi alomlom-a UN luuttheih nading lampi naakpi-in ki-lungngai himahleh hongpiang paklo-hi.

Pasian’ Hoihna kiciing ahihman-in gamgiahphual cihkhat ZAM makaaite-in hong lungngaikha uh-a, amau mahmah-in gamlak-ah buuklam hongkipan uhhi. Dengkil gamlak-ah kilam-a, ZAM mintawh akilam ahilianlo Kampong Stenga (Laaizom Camp) pintu satu, pintu tiga cihte ahzong Zomite abu tampi omhi ci-in UNHCR-ah laaiphah kipuak-hi. Dengkil pan-in kipan-in damdam-in lawhcinna hong-omhi.

Kajang, Kepong te-ahzong mi 200-ta giahphual saatding-in kiseh-a, amunding Khaw Thuvaante’ zonding-in kisehhi. Miphazah ahihleh UNHCR-ah kipuak khol-a, ahizong-in buuklam mateng minmalsim kipuak theilo ahihman-in ki-koihphot- hi.

Pasian’ Hoihna hangmah-in Kepong-ah ZAM minsese-tawh buuk akisaat zawhloh hang-in sanggamte pawlkhat’ makaihna-tawh buuk-khat kilam-a, mi 100 kiimbang omding-a akiseh hunsung-in UNHCR te-in “Na mite-uh 200 kiim ci-hilo nahi-uhhiam? Adangte koi-ah omhiam? Ahihkeileh hihte Zomi hilo-hiam?” hongcih ciang-in “Ko’ mi mahhi, adangteng neektawm zong-a apaikhiapak hidinghi” kaci-hi, banghanghiam cihleh tualaai-in CRC te-in I-lawhcinna atheih ciang-in camp bawl uh-a, UN te asap-uh hang-in UN te pailo uhhi.

Hihbangteng’ nua-ah Rawang Giahphual kilam leuleu-a, akhang-ah sanggam akician pawlkhatte-inzong amauleh amau lam-in minmalsiam hongpia-uh ahihman-in UNHCR-ah laaiphah kipuak leuleu-hi.

Giahphual tungtaang-ah Rawang-pen aki-lawhsam penpen hikha dinghi, ahizong-in neeklehdawn lamsang huhna kingah zeuhzeuh-a, lamkhatpan-in tuabeektawh hongki hehneem hi’ncia ci-in kithuak keeikaai phot-hi.

Hihbang kawmkawm-in mattuakte kibuaipih niloh-a, mattuak a-ol laai-a akitankhia-thei pawlkhatzong omhi. Pawlkhat thonginn taktak ahilo gilbeem-ah kipuak-a, tuapan-in UNHCR’-ah laaiphah puak, UNHCR-te’ n vala-khia zeelzeel-hi. Hihpen pawlkhatte-in CRC te’ laakkhiat sa uh-a, Zomite-in amau a-el mahmahte minpha avapiakzeel ciang-in kidah mahmah ahihman-in tuahun-in Internet-ah kinialna, kikona bekbek tampitak pianghi.

Bangbang ahizong-in hihbangtengtawh maa akizopna-ah tuni ciangdong ZAM makaaite’ lak-ah mimal phattuamna khatbeek omlo-in gensiat thuak akullna-ah thuak, liau akuulna-h liau liang-in maa kizomzomthei ahihman-in angtanhuai kasa mahmahhi.

ZAM itna ahilo, Zomite itna-tawh Kamsuahte:

“Feb 6, 2007 nitaak nai 6 hun-in Malaysia pan-in Australia-ah Zokhai leengding” cih UNHCR pan-in thu hongpai ciang-in…. …. Denteh zomlaaini! Zokhai (Melbourne, AU)