ZAM cidam khansau henla, Zomi tulza tampi adingin thupha hiden tahen!

ZAM cidam khansau henla, Zomi tulza tampi adingin thupha hiden tahen!

Zomi Association of Malaysia (ZAM) a (9) veina Kumcin’ Khawmpi nuamtak ih bawltheihna ding hunnuam hunpha ong musak ih biak Topa Pasian tungah lungdamna ih pulak masa hi. Kum (9) sung tawntung a nungta Pasian in haksatna leh gentheihna a tuamtuam sung pan hong ompih in Pasian’ hehpihna mah tawh ih Zomi Kipawlna hihciang maa a suanthei ihhi hi. Tuni Kumcin Khawmpi hong pai upa teng leh pawlmi akuama khempeuh tungah ih Kipawlna tangin lungdamna kong konuam hi. Zomi itna taktak leh veina taktak tawh hong pai na hih man un, Zomi khempeuh taangin zong a lungdam huai mahmah ahi hi. Upa khat hih man, EC member khat hih man, ahih kei leh hunbit a ki piakkhiat zawh man bek a Zomi it, minam a vei cih hi zenzen lo in, pawlmi khat hihna tawh pawlmi khat ii sepding thu, zuihding thu, ahih kei leh pawlmi kician khat ii hihding khat peuhpeuh hihna pen in, Kipawlna leh minam aa ding a thupi penpen nasep kipatna khat hipah hi. Na hun manpha uh piakhia in, ih Zomi Kipawlna aa ding lungsim bek thamlo pumpi mahmah tawh nong kihelna uh in, pawlmi na hihna uh tawh minam na itna uh leh minam na veina uh teltak in hong lak hi.

Tuakhit ciang, ZAM a kiphuh cil aa kipan aban aban in tuni ciang hunbit aa aki piakhia palaai teng khempeuh leh makai masa khempeuh tungah lungdamna ka pulak nuam lai hi. A diakdiakin, makai masate, palaai masate in Zomi aa ding itna bulphuh in hangsan takin na ki piakhia masa uh hikei leh tuni in Malaysia ah ei Zomi te ih dinmun pen hih sangin nakpi tak niamzaw thei lai ding hi. Pasian’ hehpihna tawh Zomi te aa ding ih kisap mahmah laitak Zomi a it a vei mahmah ih makai masate hong ki piakkhiatna uh hangin tuni in hihbang in Kipawlna kician tak aa a dingthei ihhi hi. Tuabek thamlo in, makai masate, palaai a sem masate in hong paisan khit uh ciang aban aban aa hong zom toto makaite leh nasemte ii kipiakkhiatnate zong mangngilh theih ding hilo hi. Amaute hanciamna tawh tuni ciang hihbang dinmun a tungthei ih hi hi. Tua ahih manin, ih Kipawlna makai leh palaai hong sepsak ngei khempeuhte tungah ahi zongin tu laitak aa a seemlai makai teng khempeuh tungah ahi zongin lungdamna lian mahmah hi, cih Kipawlna min tawh ih pulak hi.

ZAM pen Zomi teng ih kipawlna hi. A diakdiakin Zomi mah a bulphuh nuam teng, Zomi mah a pom tinten teng ii kipawlna hi. Hih Malaysia ah, ei Zomi pen mimal (30,000) val om dingin ki ciamteh aa, tualak pan ZAM pawlmi hong lutkhin pen (29,260) val tham phata hi. A tamzaw ahih kei leh a vekpi phialin gambeelmi ciaptehna ngahnuam leh gam thumna lunggulh vive ihhi aa, Kipawlna nasep bulpi in zong gambeel vai mah hipah hi. A kipatcil lamin gambeel vai maapan’na ah kipawlna a omsate’ munlaakna hangin Zomi min in mui ih butzawh loh hang, tu in ahih leh Zomi ih hihna a kinial theilo ahih mah bangin Zomi min tawh ih sep leh bawlnate ah kuamah in hong khaktan zolo in, ih hihna bangin hong ki sangthei hita hi. Abanah citak tak aa ih septoh nak leh gambeel vai ahi zong, Zomi vai ahi zongin ih kipawlna tawh ih sepnate hong lawhcing tektek ding hi.

Tua ahih manin, Malaysia aa om ei Zomi te ki pumkhatin ih kalsuan semsem ding thupi mahmah hi. Nidang in, Malaysia ah Zomi te in maipha mu ih kisak kei phial leh zong, tu in Zomi ih hihna hang tawh bangmah lungneuna ding, lunghiangna ding om nawnlo hi. Bang hang hiam cih leh UNHCR in Zomi te ki thutuakna ih kipumkhat nate zong hong theihpih in amau tawh nisim sepkhopnate, kumsim in hong tamto tektek in ih lamet ngamvet loh leh cikmah hun apiak ngei nai loh uh kipawlna 60 val lak panin ZAM kipawlna “Best Community-Based Organization Award 2014” hong piak tak ciangin nasepkhopna te thangah mahmah leh lungkim mahmah cihna hi.

Ih Minam Kipawlna kiptak hong dingtang in hong thahat leh ih minam bup aa ding ih liim, ih vaangpi hong suakthei ding aa, minam dangte in zong hong zahtakin Zomi te hong simmawh ngam nawnlo ding uh hi. Tuhun pen, ki pumkhat theihna, sepkhop theihna a thupit mahmah hun ahih mah bangin a ki pawlkhawm theite a hampha hi-in, a kipawlkhawm theilote a hamsiat hun ahi hi. Malaysia ah tawmcik ih omhun sungin, “Zomi ihhi hi” cihtawh Zomi kampau kitel teng ki pumkhat aa, ih kipawlkhop theihna in ih zuatna ding leh ih teen na ding gam tekah Zomi te mailam ding lampi hoih lampi maan a sialkhol ih suakding aa, ni khat ni ciang Zomi te tangthu kisuut leh Malaysia gam aa om ei Zomi gambeel huhna zong mite ki pumkhatna pen a etteh huai mahmah tangthu hong hiding hi. Tua ahih manin, “Zomi ihhi hi!” Zomi sungah semkhawm in mapangkhawm tawntung ni ci-in aki hanthawn nuam ihhi hi.

ZAM in mimal khat leh nih peuh ii muhdan sandan leh ngaihsutna, thu neihna tawh ki kalsuan mawkmawk hilo in, kipawlna piicingte ngeina tawh kituak aa Thukhun leh Dante tawh kalsuan ahih manin zong Zomi te midangte mai ah ih hihna bangbang a maan leh diktakin aki pulak thei ihhi aa, namdangte leh adang kipawlna tuamtuamte mai ah ih minam kipawlna in a angtan huai leh a zahtak huai, a khangto semsem kipawlna hong suak hi.

Kumkhat sung tawntung ih sepsa ih zawhsate pawlmite tungah ih pulak ciangin kisak theihna kisialhna cihbang hilo aa, a phamawh thu ahih manin aki pulak khia hizaw hi. Ih sepsate enkik in mailam aa ding tha la ding, asia apha kantel ding hang aa, mailam ah a hoihzaw aa ih kalsuan theihna dingin hanciamto ding hi hang. Kipawlna piicing, a kician khat ahih nak leh, kum khat khit kum khat khangto semsem ding, lian tektek, zai tektek ding, nasep tam tektek ding, nasep pulakna tam tektek ding cih pen a ngeina ahi hi. Abeisa kumsung sangin mai kum ciang zong pulakna, khantohna hong tam tektek ding, nasep zia leh mabante zong hong taangzai tektek ding hi.

Tua ahih manin, ih teelding ih makaite in mai kum sung a taangzai zaw leh a lawhcing zaw dingin maa hong pang ding uh aa, ei mipite in zong ih makaite nakpi takin panpih ding, tha piakding kisam mahmah hi. Banghang hiam cih leh, mipite lo in ih makaite in gualzawhna hong lawhpih zolo ding uh hi. Makaite leh Zomi ading aki piakhia a semkhiate tungah mipi in tha pia in panpih ciat ni! Tha ii piak zawh kei phial leh zong a thanemna ding un bawl kei ni. Makaite leh nasemte in zong mipite aa ding itna veina lianpi tawh na semin hanciam ni! ZAM cidam khansau hen la, Zomi tulza tampi adingin thupha hiden ta hen!