Yangon khuasung YBS Bus tungah damiah ataih mi 2 kiman

Yangon khuasung YBS Bus tungah damiah ataih mi 2 kiman

Yangon khuasung atai kawikawi YBS Bus tungah damiah ataih, sum angen pasal nihte Yangon Police te’n mankhiata uh cih kiza hi. Hih pasal nihte pen abeisa Monday ni in YBS Bus tungah kahtoh uha, tualaitak pen CCTV panin Video Record kibawlkha hi.

Tua Video Clip pen nungsungteng Social Media tungah ki thehzak in, Yangon Police te’nzong kankhiapah uhhi. Hih pasal nihte pen zukhamsa in YBS Bus tungah kahto uh a, khatpa in guatawn khat tawikawm hi.

Bus tungah akahtohkhit uhciang in Passenger te tutnalam zuanlo uh a, anih un Bus Driver pa geiah khawlcipsuak uhhi. Tuakhit ciangin Bus Driver pa hopihpih uh a, Bus Stop panin Passenger hong kahto tezong mawtawsap sum nangen in, kemsuak uhhi.

Tuaban ah Bus Driver pa tungah sum ngetbeh uh a, ahi zongin Bus Driver pa’n sum ka ngah khempeuh sumbung sungah aki khiasuk pahpah ci’n adawnkik ciangin atawh hongpia in cileuleu uhhi. Bus Driver in atawhzong kemkeng, Head Office te kiangah atawh kikem hi ci’n dawngkik hi.

Video: Police catch armed men who robbed YBS passengers

Bus Stop adangkhat atunkik uhciangin Bus Driver pa’n ka zunsuak ci’n atutna panin adingkhiading kineih a, tuaciang in damiah sumngen mi 2 tezong kumsuk masa uhhi. Tua damiah te akumsuk khitciangin Bus Driver pa’nzong kongkhak khakkik mengmeng in paikhiatsan hi.

Hihvai tawh kisai in Bus Route No. 20 Company te’n Hlaingtharyar police station ah Police Report bawlpah uh cihi.

Related: Yangon YBS mawtaw nungzui numei khatin anik lemsan

Wednesday nitaklam in hih damiah sumngen mi 2 tepen palik te’n mankhiapah uhhi. Tua tegel pen Hlaingtharyar sungah ateeng, kum 21 aphakhin Yan Shin akici khatleh Htantabi sungah ateeng kum 30 aphakhin Thiha Soe ahihi. Anih un Section 386 of Penal Code thukhun ombang in thu kibawlding cih kiza hi. Sawltak #zomidaily