Yangon – Mandalay Bus tungah khualzin Passenger khat asisa in kimu

Yangon – Mandalay Bus tungah khualzin Passenger khat asisa in kimu

Yangon leh Mandalay kikal atai “Zayar Shwe Pyi” kici Express Bus tungkhat ah atuang Passenger khat asisa in kimu cih Facebook thuthang tungtawn in kiza hi. Tua Zayar Shwe Pyi Express Bus pen Yangon panin Mandalay khuapilam zuanin apai ahihi.

Tuni zingsanglam 5:30am hunpawl in tua Zayar Shwe Pyi Express Bus pen Mile 284/4 mawtaw khawlna, tawlngakna atun ciangin hih Express Bus tungah atuang Passenger te tawlnga dingin kumsuk ngeingai uhhi.

Ahi zongin tutna Seat No. 7 ah atu U Htein Lin Aung pen mawtaw tungpan in kumsuklo in, atutna ah omcip cih akitheih ciangin Bus Conductor inzong aphongding in kahto hi.

Ahi zongin U Htein Lin Aung pen asikhin nahimawk a, aci asa zong votkhinta hi. Tuaciang in ageinai aom Police Station ah amanlang in ki zasakpah cihi.

U Htein Lin Aung pen kum 27 aphakhin khat ahihi. Hih Zayar Shwe Pyi Express Bus tungah Passenger akigawm in mi 15 bek atuang hi a, numei 3 leh pasal 12 ahihi. Bus golpi sungah Passenger mi 15 bekbek atuang ahih manin, ageinai ah atu kuamah omlo a, asihlam zong kuaman aphawkkhalo hihtuak hi.

Police te’n tua misi pen hoihtak asician uhciang in apualam ah bangmah liamma omvetlo in, atutna ah sawitutsa in asi mu uhhi. Tuaciang in aluanghawm pen galkap mawtaw tawh Meiktila Hospital ah kipuak cih kiza hi.

Related: Yangon khuasung atai YBS Bus sungah Passenger khat asisa in kimu

Nungdiak mahmah August khasung inzong Yangon khuasung atai YBS Bus tungah Passenger khat asisa in kimu ngei hi. Tuazong a ihmusuakziau hiding kici hi. Tualozong Yangon zuanin apai Bus tungah Passenger asi cihpen tunai kizaknawh simpian hi. Sawltak #zomidaily