Yangon aom Kandawgyi Palace Hotel meikanggawp
Myanmar, Yangon khuasung aom Kandawgyi Palace Hotel pen tuni Thursday (October 19) zingsanglam in meikanggawp cih kiza hi. Hih Kandawgyi Palace Hotel pen dolsing “teak” vive akilimzat mahmah hi a, mei akat ciangin meikuang pen huaisia mahmah in, Level 5 in ki ciamteh cihi.
Mizzima te pulakna ah hih meikatna hangin pasal khat asi kimu a, tuapa pen Japan gammi hiding in ki ummawh cihi. Adang misi zong pawlkhat omding in ki ummawh ci uh a, ahi zongin sazian akician in bangmah kithei nailo hi.
Xinhua News te pulakna ah anhuanbuk sungah akizang Gas bung “Gas Cylinder” puakkham in, tuapan in meikuang akilawhgawp cihi. Meikat akipat pen zingsang 3am hunpawl hi a, zingsang 7am hunpawl ciangin meikuang ki phelhsiang zopan cihi.
Hih Hotel meikat atheih ciangin asungah zintung in aom Chinese gammi numei khat pataulua in inndawl 3rd Floor panin lengkhia a, akawng liam cihi. Tua Chinese numeinu pen Yangon General Hospital ah zatui kibawlding in kipuak cih Red Cross te tungtawn in kiza hi.
Meiphelh in apai Firefighter khatin mei aphelh laitak liam ahih manin, Yangon General Hospital mahah kipuak cihi.
Hih meikat laitak in Kandawgyi Palace Hotel sungah khualzinmi akigawm in mi 90 bang zintungding kici a, atamzawtham pen gamdangmi Foreigner vive ahi uhhi.
Meikatna hangin Hotel pen natsiat mahmah cih kiza hi. Hih Kandawgyi Palace Hotel pen U Tay Za’s Htoo Group te ii neihsa kici hi. 1990s kumpawl in Kandawgyi Lake kici bualtui gei ah akilam ahihi. Ahi zongin hihmun pen 1934 kumpek inzong Rowing Club in kizang ngeikhin ci a, tuapan in Kandawgyi Palace Hotel ci’n akizomto kici hi.
Related: Yangon luidungteng ataiding “Water Bus” kipan taktakta
Hotel akipatcil in Bangkok-based Baiyoke Group of Hotels te’n apatkhiat hi a, tuakhit ciangin 2010 kumin Tay Za in aleisawn ahihi. Akilei hunlai in US$29 Million tawh kilei kici hi. U Tay Za in Kandawgyi Palace Hotel aleikhitzawh kilimpuah mahmah in, Yangon khuasung ah Hotel ahoihpen khatinzong akiciamteh ahihi. Sawltak #zomidaily
Comment piaknop aomleh...