White House pan theihhuai pawlkhat leh US thu tuamtuam (September 11)

Covid-19 Update XXVIIi: White House Press Briefing pan atheih huai thu pawlkhat leh tulai tak US sung thu tuamtuam te: (September 11, 2020)

1) White House Briefing pan news update pawlkhat: President Trump in August kha sung in nasep (job) 1.4 million kibehlap aa, unemployment rate zong 8.4% ah kiam suk hi ci in taangko khia hi. Abeisa kha 4 sung unemployment rate pen 6.3 percentage points kiam suk aa, Covid-19 hang aa akia US ii economy zong hong hoih to to ta hi ci hi.

President Trump in adiak diak in Holiday weekend sung Covid-19 natna kilawh loh nang in 1) Social distancing bawl un 2) maituam (mask) thuah un 3) Khut sial den un ci in White House new briefing pan mipi te tung hanthawtna nei khia hi.

President Trump in July kha pan tuni ciang dong US gam ah Covid-19 natna ngah thak pen 44% hong kiam suk ta hi ci in zani (September 10) new briefing pan genkhia hi.

President Trump pen Isarel leh United Arab Emirates (UAE) kikal kilemna abawl sak zawhna leh Peace agreement sign a thu sak zawhna hangin leitung ah Prize mingthang pen khat ahi Nobel Peace Prize kitelna ah nomination khat in kitel khia ahih manin kiangtang mahmah hi ci in White House Press Secretary Kayleigh McEnany in new briefing pan genkhia hi.

2) Fourth coronavirus stimulus package update:

Senate Majority Leader Pu Mitch McConnell in zani agenkhiatna tawh kizui in tu ni (September 10) ni in Senate ah $300 billion apha stimulus package neu khat vote na kinei aa, ahi zongin vote 52-47 tawh lelh uh ahih manin Pu McConnell ii thu sunna pen senate ah athukim zolo suak phot hi. Senate ah a pass nading vote 60 kisam aa, Republicans avekpi in thukim aa vote akhiat ciat uh hang Democrats te thukimna om kei leh a ki pass zolo ding hong suak hi.

Bang bang hi ta leh hih stimulus package bill hong pass theih nading in Party nih te negotiation bawl aa a thukim ciat ding uh kisam cihna ahi hi. Abeisa hun in Replubicans lam pan $1 trillion apha stimulus bill proposal a sun khiat uh hi aa, Democrats lam pan $2 trillion val sungkhia uh hi. Democrats makaipi Pi Nancy Pelosi in belh $2 trillion na thukim uh leh belh kikhupna kipan kik thei hang ci pha pha lai hi.

Pu Trump in belh Democrats lam ten stimulus deal a thu kim loh uh pen hong tung ding November election ah ka kitel kik theih nang hih stimulus bill in hong huh ding ahih man in hong haza uh leh deih lo uh ahih manin thu dang zong zong uh hi ci in Labor day new briefing ah genkhia hi. Hih stimulus bill in I gam ii econmy hong hoih sak kik dingaa, mi tampi in zong phat tuamna ngah ding uh cih Democrats ten thei na pi uh in election ah gawlzawhna ka ngah kik ding deihlo uh ahih man un a zekai sak to to uh hi ci hi.

3) Corona virus vaccine update pawlkhat:

President Trump in coronavirus vaccine pen “special day” acih uh tung ding election day ni ma in kihawmkhia zo thei ding hi ci in Labor day ni in White House new briefing pan genkhia hi. Abeisa hun te en kik leng President lui Obama hun sung in vaccine khat thoh khiat nading kum 3 bang sau vei aa, hih coronavirus vaccine pen kum khat sungin akibawl khia zo ding ahih manin vaccine bawl khat na record ah amanlang pen hi thei ding hi ci in Pu Trump in genkhia hi.

US Surgeon General Dr. Jerome Adams in zong coronavirus vaccine pen November kha ni 1 ni kiim in kihawmkhia thei ding ahih manin US gam sung aaom health department teng na kiging khol un ci in White House pan taangko khia hi. Pu Trump leh Pu Dr. Jerome Adams te taangko khiat ma in US Centers for Disease Control and Prevention (CDC) in US gam sung ah Covid-19 vaccine pen October kha bei ciang hawmkhia thei ta ding hi ci in genkhia masa uh aa, agenkhiat zawh uh asawt lo in Kumpi ulian pawlkhat leh mipil scientists ten a up loh thu uh leh ahih zawh nai loh ding uh pulaak khia uh hi.

Vaccine hawmkhiat ding Kumpi thu nei lam pan atangko khiat zawh ciang Pu Dr. Scott Gottlieb, former commissioner of the US Food and Drug Administration in tu kum sung Covid-19 vaccine hawmkhiat zawh nang hak sa mahmah kha ding hi ci in CBS tawh interview na ngah genkhia hi.

Covid-19 vaccine hawmkhiat nang US kumpi tawh thu kimna la in contract abawl khin sa ahi Germany Pfizer and BioNtech company ten vaccine phase 2 na kipat ding in phalna ngah ta uh hi ci in taangko khia uh hi. Pfizer CEO leh co-founder Ugur Sahin in belh Phase 3 na pen October kha sung bawl zawh ding gelna ka nei uh aa, tua phase 3 na man zo le ung October kha sung in vaccine hawmkhiat ding ka ready thei ding uh hi ci in CNN tawh interview ah genkhia hi.

Pu Ugur Sahin in tukum sung vaccine doses 100 million bawl khiat zwah ding leh 2021 sung doses 1.3 billion bawlkhiat zawh dinguh geel na ka nei uh hi ci hi. US Federal kumpi tawh vaccine thoh khiat zawh nading nasem khawm ahi UK biopharmaceutical company AstraZeneca leh US company Modern ate in zong vaccine Phase 3 clinical trial akipat lai tak uh ahi hi.

AstraZeneca company in vaccine phase trial 3 na abawl na ah volunteer khat vaccine zatui a sut zawh ciang a ci na gawp ahih manin vaccine phase trial abawlna pan khawl bawl phot uh hi ci hi. Ahih zongin vaccine pen tu kum bei ma in hawmkhiat zawh ding kihanciam ding hi ci uh hi.

4) Maine state mopawi khat ah Covid-19 hang mi 147 kilawh, mi 3 si:

Miaine state Millinoket khua, Big Moose Inn ah akibawl Mopawi khat pan Covid-19 natna kilawh gawp aa, tua lai ah akihel te tung tawn in Covid-19 natna kilawh mi 147 pha in tua sung pan mi 3 si hi ci in Maine Center for Disease Control and Prevention spokesman Pu Robert Long in CNN leh news tuamtuam te tung genkhia hi. Tua mopawi pan akipan khia Covid-19 kilawhna pen tua kiim aaom Nursing home leh Thong te dong na leng kilawh lawp hi ci uh hi. US gam sungah zong akua ma peuh in Mopawi leh Biakpiak kikhop cih te I bawl zen zen leh zong social distancing I zat tek ding, maituam I tuak ciat ding leh CDC guidelines te I zuih ciat ding thupi mahmah hi.

5) Labor holiday weekend sung Covid-19 natna ngah tampi kibehlah ding ki um mawh:
US gam sung ah Labor holiday weekend sung in natna akhang mahmah na munte ah mi tampi te in social distancing bawl lo, maituam thuah lo uh aa, kikhopna, kithuahkhopna nei zih ziah uh ahih manin natna ngah thak tampi khang dingin um mawh uh hi. Tulai tak Covid-19 atna khan mahmah na state khat ahi California state, San Francisco khua Ocean Beach ah mi 1000 val bangin picnic bawl, party bawi bawl uh ahih manin natna ngah tampi kibeh lap thei ding ahih manin tua hun sung tengah akihel te in ei leh ei I ki sit tek ding thupi mahmah ding hi ci in San Francisco Mayor London Breed in genkhia hi.

Labor day kipat ma deuh in zong Dr. Anthony Fauci, director of the National Institute of Allergy and Infectious diseases in Labor day sung mipi te apua I paikhiat ciang maituam (mask) thuah hamtang ding hantawn aa, Covid-19 vaccine hawm khiat ma siah Covid-19 dalna ding hoih pen in maituam thuahna hi ci in genkhia hi. White House coronavirus task force coordinator Dr. Deborah Birx in Labor holiday weekend khit ciang mipi lak ah akihel khempeuh in Covid-19 test bawl ciat ding hantawn hi.

6) US gam sungah Labor holiday weekend sung Vanleng tawh khualzin mi 4.1 million pha:

US gam ah Labor holiday weekend sung vanleng tawh khualzin mi 4.1 million val dong pha to aa, Covid-19 pandemic hong kipat khat zawh Vanleng tawh khualzin mi atam pen hi thei ding hi ci in Transportation Security Administration (TSA) in genkhia hi. Ning kum tu hun sung in vanleng tawh khual zin 11.3 million bang pha aa,vanleng tawh khualzin pen ningkum sang tampi kiam zaw cih na ahi hi.

7) Kentucky state sungah naupang tampi ten Covid-19 natna ngah:

Kentucky state sungah kum 18 nuai siah naupang te lakna natna ngah khang sem sem aa, natna ngah thak (new cases) ii 20% pen naupang te hi ci in Gov. Andy Beshear ii zumpi pan taangko khia uh hi. Nung Monday ni in natna ngah thak mi 291 kibehlap aa, tua lak ah mi 52 ni pen kum 18 nuai siah naupang no te hi uh in, tua natna ngah te lak mah pan akum neu pen kha khat hi ci in Governor pan genkhia hi.

Tu sung pen Kentucky om Zomi te lak ah zong natna ngah thak hong khang kik cih kiza ahih manin akua ma peuh I kidawp ciat ding leh social distancing bawl in maituam I thuah ciat ding, kikhopna cih te I bawl leh zong CDC guidelines te I zuih hamtang ding thupi mahmah ding ahi hi.

8) Remdesivir zatui kicing nawnlo:

Tulai tak Covid-19 ci na anasia zaw deuh te kibawlna leh noptuam sakna zatui minthang khat ahi Remdesivir zatui pen US gam sungah Covid-19 natna nei thak tampi hong kibelap lap na hangin kicing nawnlo aa, state 12 sungaa Zato te ah bei siang ta hi ci uh hi. US Congress pan Representatives bawl khat leh zatui thohna company pawl khat ten Remdesivir zatui pen zatui company khempeuh in thoh khiat theih nang President Trump kiang ngen uh hi. Ahi zongin hih zatui pen US company khat hi Gilead Science company te ii neih zatui hi aa, amau phalna omlo in adang kua mah in thoh khia thei lo phot ahi hi.

9) US gam ah naupang Tul 50 val in Covid-19 natna ngah:

US gam sungah naupang 513,000 (Half-million) in Covid-19 natna ngah (positive) uh hi ci in American Academy of Pediatrics and the Children’s Hospital Association in zani (Tuesday) ni in genkhia uh hi. Abeisa August 20 pan September 3 sung naupang 70,630 in natna ngah uh aa, 16% bang khang hi ci uh hi. US gam sung State 6 te ahi Indiana, Kentucky, Missouri, Montana, North Dakota and South Dakota state te ah naupang Covid-19 kilawh tam pen leh nasia pen hi ci uh hi.

Tuni ciang dong US gam sungah Covid-19 hangin naupang 103 si ta hi ci uh hi. Tua hi aa, Covid-19 natna pen naupang te tung zong tampi kimu khia ta ahih manin, Nu leh Pa ten I ta te hoih tak I kep ciat ding thupi mahmah ding ahi hi. Adiak diak in naupang te kilawhna atam zawh pen Sang kah na pan kilawh ci uh ahih manin Nu leh Pa te in Sang kah I ta te hoih tak I khoi ciat ding thupi mahmah ding ahi hi.

10) University of Tennessee ah Covid-19 kilawh gawp:

In-person class ahong Sang te sung pan University of Tennessee ah Covid-19 natna kilawh gawp aa, mi 600 in Covid-19 natna ngah hi ci in University of Tennessee Chancellor Donde Plowman in genkhia hi. Tua lak ah sangnaupang 592 leh Sang nasem mi 8 te kihel hi ci hi. Tu lai tak Covid-19 natna kizeek gawp na hangin mi 2112 te quarantine alut lai tak uh ci in Pi Plowman in gen khia hi.

11) IRS in Federal stimulus check a ngah nai lo mi million 9 te kiang lai khak ding:
Internal Revenue Service (IRS) te in abeisa hun sungaa Cares Act tung tawn aa mipi te tung akipia Federal stimulus check ngah nai lo mi million 9 te kiang lai khak in theihsakna kinei ding ci in IRS in taangko khia hi. Tua te lak ah stimulus check ngah ding kilawm na pi online tung tawn in ngetna abawl kha lo te, ngah ding aki um mawh lo te zong tampi kihel ding hi ci uh hi.

Tua te lak ah federal income tax a bawl lo te tampi zong kihel kha ding hi ci in IRS in genkhia uh hi. IRS pan lai angah peuh mah in October 15 ciang dong IRS te ii website tungaa “Economic impact payments ii nuai aa “Non-filers” acih na ah ei ma information khempeuh phih kul ding ding ahi hi. Tua ahih manin stimulus check ngah nai lo aa, IRS pan lai I ngah khak zen zen leh amanlang thei pen in IRS website tung ah ei ma information teng phi ding ahi hi.

IRS pan theihsakna lai ngah na pi uh in October 15 ma information a phih kha lo te in mai kum ciang Tax return abawl kul tei tei ding uh hi ci in IRS in theihsak na nei uh hi. Stimulus check pen US citizenship leh Greencard ngah nai lo tampi te kipia lo hi ci uh hi. Hih stimulus check pen abeisa hun te ah Tax pia nasem mi 160 million te tung akipia hi aa, Tax pia single khat in $ 1200 leh Nupa kop khat in $ 1200 leh kum 17 nuai siah Ta te khat ciang $ 500 ta akipia ahi hi.

12) Tulai tak Kawlgam Covid-19 din mun:

Kawlgam kumpi cidam na lam ahi Ministry of Health and Sports te suah khiat sakna ah September 11 ni Kawlgam hun zingsang nai 8am in Kawlgam sungah natna ngah thak 115 kibehlap aa, Covid-19 natna ngah avekpi 2265 pha ta in asi mi 14 pha ta hi. Yangon bek bek ah natna ngah mi Tul val ta aa, Rakhine gam ah 600 val ta hi.

Nung deuh in Yangon, Thingangyun khua sung om Music Zone akici ansai pan nasem pi 72 te zong kihel uh aa, tua sai bek bek pan pan Covid-19 natna ngah mi 86 pha ta hi ci in Duwun News in genkhia hi. Tua ansai pen tulai tak lockdown kibawl aa, tua ansai ah asem mi 100 val te quarantine kilut sak hi ci hi.

Covid-19 kilawh gawp na hangin Tuni pan kipan Kawlgam sung Vanleng khempeuh khawl phot uh hi ci in Kumpi thu nei ten taangko khia uh hi. University leh College khempueh khak hamtang ding leh laisin na peuh mah neih loh ding taangko khia uh hi.

Kawlgam ii Khuapi ahi Naypyitaw ah Kumpi pa ii Inn aa asem Kumpi nasem za gol khat in Covid-19 natna ngah hi ci in Duwun mah in taangko khia hi.

Abeisa hun in Pi Suu Kyi om na Yangon Innpi ah nasem khat in zong Covid-19 natna ngah (positive) aa, Pi Suu Kyi aading zong kipautau mahmah hi. Pi Suu Kyi in belh ka inn ah Covid-19 kimu ahih manin hong thum ing ci in Online thu kikupna ah genkhia hi. Tulai tak pen Kawlgam ah Covid Hual nihna (covid-19 second wave) alut lai tak hi aa, natna kilawh ziah ziah ahih manin alahuai din mun hong tung to ta ahih manin Kawlgam aading thu ngetna ah phawk tek ni.

13) Johns Hopkins University & Medicines te report na tungtawn in September 9, 2020 ciang dong Leitung ah Covid-19 natna ngah mi 28,171,109 (28 million) pha ta in asi mi 909,614 pha ta hi. US gam ah natna ngah mi 6,397,227 (6.3 million) leh asi mi 191,789 pha ta hi. Kawlgam ah natna ngah mi 2265 pha ta in asi mi 14 om ta hi. Kawlgam ah tulai tak Covid-19 natna akilawh ziah ziah lai tak hi aa, US om ei Zomi te sungah zong Covid-19 anei tampi kibehlap toto lai a hih manin i om na ciat ah i kidawp ciat ding leh I innkuanpih te hoih tak I kepcing ciat nang thupi mahmah ding hi.

Note: Nung Wednesday ni nitak ZNTV pan Lia Zo Bawi hong taangkoh khiat pawlkhat zong gawmkhawm in Lai tawh asim nuam te aading “news version” tawh kong suahsak kik ahi hi. Thomas On Sian Mung (Thomas Mung Guite) Washington D.C September 11, 2020 Momno Media & Museum