Covid-19 Update XXI: White House Press Briefing pan atheih huai thu pawlkhat leh tulai tak US sung thu tuamtuam te – (June 28, 2020)
1) Tulai tak US gam sung COVID-19 dinmun: Tulai tak US gam ah COVID-9 natna khang mahmah aa, nung Friday (June 26, 2020) in COVID-19 natna ngah thak mi 40,000 pha in, COVID-19 vai buai zawh ni khat sung atam pen leh nasia pen hi ci uh h. US gam sungah Tunipi sung state 30 te ah natna ngah thak khang tek tek hi ci uh hi. State teng lak pan Texas, Florida, California, Arizona, Georgia, Louisiana, Missouri, Utah, Oklohoma leh North Carolina te ah natna ngah thak atam pen cih kimukhia hi. Mipil scientist ten US gam ah first coronavirus wave (akhat veina covid tuihual) pen bei nailo aa, anih veina tuihual pen summer zawh ciang hong pai kik dinghi ci in theihsakna nei uh hi.
2) White House coronavirus task force ten nung Friday in in public briefing bawl uh aa, tualai ah Vice-President Mike Pence, Robert Redfield, director of the Centers for Disease Control and Prevention, leh Dr. Anthony Fauci, director of the National Institute of Allergy and Infectious Diseases te kihel hi.
Adiak diak in tulai tak US gam ah COVID-19 natna ngah thak kibehlap tek tek leh state 30 bangah akhan mahmah lai hun in briefing abawl uh ahi hi. Task force ah kihel US Health and Human Services Secretary Alex Azar in zong tulai tak US gam sungah COVID-19 hangin asi leh zato lum hong kibeh lap tek tek pen Kumpi lam pan zong kipatau mahmah hi ci hi. Zani in US ah COVID-19 natna nei mi 2.5 million cing ta aa, leitung gambup ah 10 million val ta hi.
3) White House Coronavirus Response Coordinator Dr. Deborah Birx in mipil scientists te muh khiatna tawh kizui in maituam (face covering) thuahna in COVID-19 natna kilawhna tampi dal pen hi ci hi. Tu sung teng US ah natna akhan mahmah na ahang khat in khangnote in mipi lak ah maituam zang nuamlo uh ahih man in nakpi tak in kilawh hi ci hi. Tua hi aa, akua mapeuh in mipi lak leh kikhopna I pai lim lim ciang maituam thuah hamtang ding thupi mahmah hi.
4) COVID-19 natna khang tek tek ta ahih manin July 4th weekend (Independence day) hun sung in US gam sung ah beaches tampi khak ding uh ci uh hi. Florida state Broward county in zong amau county sungaa beaches teng khak ding in taangko khia uh hi.
5) US gam ah Kum tawm Khangno te sung COVID natna kilawh:
Kumpi thu nei lam te in tu sung teng COVID-19 natna pen khangno te tung atamzaw ah kimu ahih manin kum tawm khangno te kidawp ciat ding theih sakna leh pulaak khiatna nei uh hi. Mississippi state ah Khangno te kimuh khopna party pawi te pan Khangno tampi COVID natna kilawh hi cih kumpi thu nei ten genkhia uh hi. North Carolina state sungah khangno kum 25 pan kum 49 kikal te sung akilawh tam pen cih Gov. Roy Cooper in genkhia hi.
Tulai tak COVID-19 natna akhang pen state khat ahi Texas ah khangno kum 30 nuai siah natna ah tampen aa, party pawi, bars leh lungphona, kikhopna te pan atam pen kilawh hi cih Texas Governor pa in pulaak khia hi. White house coronavirus task force member khat ahi Dr. Anthony Fauci in belh khangno sungah COVID-19 ngahte akhan pen lamdang lo hi ci hi. Ahang in Khangno te in social distancing zang lo uh aa, mun tampi ah zong maituam thuah nuamlo uh in bars, party cih te zong apai tam lua ahih man ahi hi ci hi.
6) COVID-19 zatui Remdesivir version nam khat kibawl khia ding:
COVID-19 natna noptuam sakna zatui hoih mahmah aa akizang khat ahi Remdesivir zatui pen abeisa hunte ah nak ding atang (capsule) in kibawl aa, FDA in phalna angah khit zawh ciang tu in inhaled version akici kam pan diik theihna zatui nam khat in kibawl khia ta ding ci in Gilead zaitui company in taangko khia hi. Tua tawh kisai testing trial khat na kipan ta ding ci hi. Remdesivir zatui pen abeisa in Ebola pulna aading akibawl hi aa, mipil scientist ten COVID-19 natna aading zong zatui hoih ahih lam mukhia uh hi. Gilead company in belh tukum bei ciang zatui million tampi bawl khiat zawh ding kihanciam ding hi ci hi.
7) COVID-19 zatui khak Dexamethasone:
Nung nipi sungin Steroid Dexamethasone akici zatui thak khat in COVID-19 natna ngah mi 8 pan sung pan mikhat in noptuam na ngah hi cih Oxford University pan thu nei te in UK kumpi thu kizasakna ah taangko khiat zawh aa kipan tua zatui pen alei khang tek tek hi ci hi. Tua zatui pen $50 bek man aa man awl mahmah in, COVID-19 natna tawh zato tung mi tampi ii nuntakna honkhia zo hi ci hi.
Hih zatui pen World Health Organization (WHO) in zong ahoih lam taangko khia uh aa, ahi zongin COVID-19 natna a nasia te tung bek ah kizang pan hi ci hi. Abeisa in zong tua tawh akibang Gilead company te thoh Remdesivir zatui kimukhia in tudong ciang tua zatui zong kizang to to hi. Tu ciang ciang COVID-19 natna dam sakna (cure) zatui kimu nailo ahih manin mi khempeuh in Coronavirus vaccine bawlkhiat zawh nang kilunggulh tek ahi hi. UK Health Secretary Matt Hancock in hih zatui pen damsiang sak (cure) na zatui hi lo aa, natna a nasia te noptuam sak na bek hi ci in genkhia pha pha hi.
8) FDA in North Isle Wellness Center company tung thu piakna nei:
Kumpi Agency khat ahi the US Food and Drug Administration (FDA) in North Isle Wellness Center company, New York te thohkhiat COVID-19 zaitui te leh COVID-19 tawh kisai van tuamtuam te va lei khak loh dingin mipi tung theih sakna nei aa, tua company tung ah zong warning piakna Monday ni in nei uh hi. FDA in tua company te tung amau website tung a van zuak te uh amanlang takin lak khiat ding leh phuahphat kik dingin nai 48 sung hun pia in thu pia uh hi. North Isle Wellness Center website tung ah COVID-19 tawh kisai zatui pawl khat leh van zat pawlkhat taangko uh aa, zuak uh ci hi. US gam ah zatui khat peuh peuh ahi zongin, van khat peuh peuh ahi zongin I zuak nop leh Kumpi tung phalna kila leh registration kibawl masa phot aa, tua zawh ciang bek vante kizuak thei pan ahih manin akua mapeuh in zong theih huai mahmah thu khat ahi hi.
9) FDA in Hand sanitizers nam 9 zat nawn loh nang taangko:
COVID-19 hangin Hand sanitizer te ki nak zat mahmah aa, the US Food and Drug Administration (FDA) in mipi tung ah Hand sanitizer nam 9 te azang te aading lahuai ahih manin zat nawnloh ding leh tua company te kiang van te zuak nawn loh ding theih sakna nei uh hi. Tua Hand sanitizers te sungah a puak ham thei methanol tampi kihel aa, a zang te lua, lutangna, mit mang, pawl khat te mi taw thei, kibup thei leh tha gui (nervious system) sia thei, si thei hi cih warning pia in zaksakna nei uh hi. Tua Hand Sanitizer nam 9 te pen anuai aa bang hi aa, akua ma peuh in zong I zat khak loh ding thupi mahmah ding hi.
- All-Clean Hand Sanitizer
- Esk Biochem Hand Sanitizer
- CleanCare NoGerm Advanced Hand Sanitizer 75% Alcohol
- Lavar 70 Gel Hand Sanitizer
- The Good Gel Antibacterial Gel Hand Sanitizer
- CleanCare NoGerm Advanced Hand Sanitizer 80% Alcohol
- CleanCare NoGerm Advanced Hand Sanitizer 75% Alcohol
- CleanCare NoGerm Advanced Hand Sanitizer 80% Alcohol
- Saniderm Advanced Hand Sanitizer
10) US Food and Drug Administration (FDA) in hydroxychloroquine zatui pen emergency aa zat theihna (emergency use authorization) pan la khia ta uh cih taangko khia uh hi. FDA director pan belh inn ah a zang nuam ten zang thei lai aa, doctor ten zong ci na te tung prescription pia thei lai ci hi. Tulai tak in Remdesivir zatui pen emergency aa zat dingin akikoih zatui hi lai hi. Tua bek thamlo in company pawl khat ten zong research leh testing abawl na pan khawl ta uh hi.
11) Second round of coronavirus stimulus checks update:
US senate in nipi nih (July 3-17) sung zum khak (recess) dinguh aa, tua zawh ciang new coronavirus relief package ding kikupna nei pan dinguh hi ci hi. Tua sungah mipi ngah anih veina mipi huhna sum (second round coronavirus stimulus checks) zong kihel thei dingin kilamen hi. Abeisa in Senate Majority Leader Mitch McConnell in July kha sung kikupna kipat kik ding genkhia hi. President Trump in Scripps local TV News tawh Monday ni aa, interview abawlna ah huhna sum second round stimulus check pen mipi tung piak ding hi thei lai dingaa, tua dingin congress tawh na kisem khawm ding hi ci in genkhia hi. White House economic adviser Larry Kudlow in zong hong pai lai ding coronavirus stimulus package sungah mipite huhna sum second round stimulus check piak ding zong kihel thei lai ding hi cih genkhia hi.
12) US open Tenis kipawlna kinei ding:
Leitung gambup ah Tennis kimawlna ah aminthang mahmah pawipi khat ahi US Open Tennis Championship pen August 31 pan September 13 ni dong Queens, New York ah kimawl ding cih New York Gov. Andrew Cuomo in taangko khia hi. Ahi zongin a en mipi te om lo in kidem ding uh aa, kidemna khempeuh TV pan bek ki en thei ding hi ci hi.
13) Coronavirus vaccine update:
Tulai tak akisam mahmah Coronavirus vaccine bawl khiat zawh nang leitungbup pan company tampi hanciam uh aa, US kumpi in company tampi lak pan 7 telkhia in sum leh pai tawh panpih uh hi. Tua company te pen US kumpi ii Agency te ahi US Department of Health and Human service leh National Institutes of Health (NIH) te tawh kithuah ding uh hi. Tua company te lak pan US kumpi in Johnson & Johnson’s company pen $456 million tawh panpih uh aa, Moderna company pen $ 483 million tawh pahpih uh hi. UK company minthang khat ahi University of Oxford tawh asem khawm AstraZeneca’s company pen US Kumpi in dollar billion khat (1 billion) tawh panpih uh aa, October kha sung in vaccine 300 million doses val bang US te aading bawlkhiat sak ding thukimna nei uh hi.
14) US gam Iowa state sungaa om Kawlgam mi te COVID-19 natna ngah tam mahmah kici aa, adiak diak in Sa sai (meat packing plants) ah asem te tungah kilawh pen hi ci hi. Tua sa sai te ah asem mi 70% bang in COVID – 19 natna ngah uh aa, atam zaw quarantine lut uh hi ci hi. Iowa state sungah Kawlgam mi 10,000 kiim om ding in kiummawh aa, atam zaw in sa sai ah nasem uh hi ci hi.
15) Johns Hopkins University & Medicines te report na tungtawn in tu ni June 28, 2020 ciang dong Leitung ah Covid-19 natna ngah mi 10,044,731 (10 million) pha ta in asi mi 499,892 pha ta hi. US gam ah natna ngah mi 2,531,733 (2.5 million) leh asi mi 125,691 pha ta hi. Kawlgam ah natna ngah mi 296 pha ta in asi mi 6 om ta hi.
More: Covid-19 khit leitung huihnunzia tawmkhat ~ Mung Sian Kim
US om ei Zomi te sungah zong Covid-19 anei tampi kibehlap toto ta ahih manin i om na ciat ah i kidawp ciat ding leh I innkuanpih te hoih tak I kepcing ciat nang thupi mahmah ding hi. Adiak diak in tulai tak Zomi tampi tenna Tulsa khuapi sungah aom Zomi te lakna COVID-19 natna kizel mang aa, natna nei kitam tek tek ahih manin akua mapeuh in thu ngetna ah phawk tek ni. Note: ZNTV pan nung Wednesday ni aa akitaangko sa bawl khat zong lai in kong suahsak kik ahi hi. Thomas On Sian Mung (Thomas Mung Guite) Washington D.C June 28, 2020
Comment piaknop aomleh...